2 Korintu 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Sura deꞌe hangko i kódóꞌ Paulu, to napileꞌi Pueꞌ Ala mewaliꞌ surona Kerisitu Iesu mouláꞌ peundeꞌáNa, hai hangko i Timotiu halaluntaꞌ, kipakatu i kómu halalu hampepepoináláingkiꞌ to ara i kótá Korintu. Kipakatu woꞌo sura deꞌe i upu-upu toSarani to ara i tampoꞌ Akaia.

² Kipakatu tabeángkiꞌ haweꞌ i kómu. Kipembiáꞌ bona Pueꞌ Ala Umántaꞌ hai Pueꞌ Iesu Kerisitu mampoweꞌikou pewátiꞌ hai roꞌa ngkatueꞌ.

Pueꞌ Ala mopakaróhó laluntaꞌ i lalu kapári

^3-4 Tatóiá miꞌi Pueꞌ Ala Umána Iesu Kerisitu Pueꞌtaꞌ, láwiꞌ Ia miꞌi Umántaꞌ to mahile ahiꞌNa, hai Ia woꞌo to mopakaróhó laluntaꞌ i pákáꞌ-pákáꞌna kapári to morampe katueꞌtaꞌ. Nabábehi noꞌonoꞌ bona karóhó to kitarima hangko i Hia, kipakeꞌ woꞌo mopakaróhó laluraꞌ tauna ntániꞌna to molámbiꞌ woꞌo kapári.

⁵ Handaꞌ kapári to nalámbiꞌ Kerisitu, hai kapári iti kilámbiꞌ woꞌo. Noꞌonoꞌ woꞌo kahandaꞌna karóhó lalu to kilámbiꞌ hangko i Kerisitu.

⁶ Ane narampeangkaiꞌ kapári, kapári iti kitódihá bona kipakaróhó lalumi hai bona nilámbiꞌ katehómpóꞌ. Hai kómu, narampekou woꞌo kapári nodo to kilámbiꞌ. Mewaliꞌ, ane Pueꞌ Ala mopakaróhó lalungkiꞌ i lalu kapári, róhó iti kipakeꞌ woꞌo mopakaróhó lalumi, bona sabaraꞌkou hai mantahakou.

⁷ Onoꞌ miꞌi haneꞌi tiꞌara bata-bata lalungkiꞌ. Kiꞌisá kaꞌina mantahami i lalu kapári. Kiꞌisá kapári to nilámbiꞌ hibali hai kapári to kilámbiꞌ, hai bateꞌna Pueꞌ Ala ina mopakaróhó lalumi hibali hai kaiꞌ.

⁸ Halalu-halalu, kiundeꞌ bona niꞌisá karumihina kapári to morampeangkaiꞌ hangkoia i poropensi Asia, hai kapári iti melumbuꞌ hangko i pebukuángkiꞌ. Mapári ntepuꞌu lalungkiꞌ. Pehádingkiꞌ nodoangkaiꞌ to ina mate.

⁹ Pehádingkiꞌ nodoangkaiꞌ to rabutusi ina rahuku mate. Agáiáná kapári iti hangaa-ngaa mewaliꞌ bona tiꞌaraꞌangkaiꞌ mehárungá i róhóngkiꞌ haduduángkiꞌ, ngkáliꞌna riꞌi bona mehárungá peangkaiꞌ i Pueꞌ Ala, láwiꞌ Ia miꞌi to makuasaꞌ mopatueꞌ huleꞌ tauna to mate.

¹⁰ Kehapiꞌangkaiꞌ hurewuꞌ, Pueꞌ Ala mokábáhá mpuꞌumongkaiꞌ hangko i kapári to rumihi iti, haneꞌi tiꞌaraꞌangkaiꞌ mate. Hai kiꞌisá Pueꞌ Ala ina mokábáháꞌangkaiꞌ hangko i hinángkáꞌna kapári, maroꞌa to morampeangkaiꞌ deꞌe-deꞌe ba i alo to ina haweꞌ.

¹¹ Hai kómu woꞌo, hangaa-ngaa nipekakaeáꞌangkaiꞌ, láwiꞌ ánti pekakaena handaꞌ tauna, Pueꞌ Ala ina motulungiangkaiꞌ, álána handaꞌ tauna ina manguliꞌ handaꞌ kamaroꞌana i Hia.

Paulu mopakanótó apa ntóáꞌna haneꞌi tebáliki tunggáiána lao moweoꞌheꞌ

¹² Halalu-halalu, góeꞌ lalungkiꞌ láwiꞌ kiꞌisá bulá lalungkiꞌ. Iti tongawaꞌ, i upu-upu bábehiángkiꞌ tiꞌara ara kamasalaꞌkiꞌ, pelumbuꞌna miꞌi i kómu. I hinángkáꞌna to kibábehi, tiꞌara ara to kiwuniángi; tunggáiángkiꞌ manótó i peitána Pueꞌ Ala. Apa to kibábehi, kibábehi hangko i kamaroꞌana to kilámbiꞌ hangko i Pueꞌ Ala, tiꞌara hangko i kapánde tauna.

^13-14 Apa to kiukiꞌ i lalu surangkiꞌ, tongawaꞌ lempóna, tiꞌara ara to kiwuniángi. Kehapiꞌ tiꞌara manikou moisá ntepuꞌu tunggáiángkiꞌ, kuhárungá kahópóꞌána ina niꞌisá upu-upuna, hai i kahaweꞌna huleꞌ Pueꞌtaꞌ Pueꞌ Iesu, ina góeꞌ lalumi ánti kakaiꞌna, hai kaiꞌ woꞌo ina góeꞌ lalungkiꞌ ánti kakómuna.

¹⁵ Mewaliꞌ, ánti kakuisána upu-upuna iti, onoꞌ miꞌi haneꞌi ara tunggáiángkuꞌ ina lao moweoꞌkou karongkánina, bona rongkanikou molámbiꞌ pewátiꞌ.

¹⁶ Mouláꞌ poliwongkuꞌ to rungu-runguna iti, ina kuweoꞌkou i tempóngkuꞌ lao i tampoꞌ Makedonia, hai ane mesuleꞌaꞌ hangko i tampoꞌ Makedonia, ina mehupeꞌ wopaꞌaꞌ i kómu, bona nitulungiaꞌ i polumaongkuꞌ lao i tampoꞌ Iudá.

¹⁷ Agáiáná tunggáiángkuꞌ iti tebáliki. Ba niuliꞌ riꞌi tiꞌaraꞌaꞌ tetidaꞌ i dándingkuꞌ? Ba niuliꞌ riꞌi mouláꞌ peaꞌ peundeꞌángkuꞌ haduduángkuꞌ nodo tauna i duniáꞌ, haneꞌi kuꞌuliꞌ “Ió,” haneꞌi woꞌo kuꞌuliꞌ “Tiꞌara”?

¹⁸ Halalu-halalu, tiꞌara noꞌonoꞌ! Nodo Pueꞌ Ala mobukeki upu-upu dándiNa i kitaꞌ, noꞌonoꞌ woꞌo laluitangkiꞌ i kómu. Peisáꞌangkaiꞌ rapoinálái. Tiꞌara kiuliꞌ “Ió” i kómu ane tunggáiángkiꞌ “Tiꞌara”.

¹⁹ Láwiꞌ kódóꞌ, Silasi hai Timotiu, mopahaweꞌangkaiꞌ bámbári i kómu mokana i Iesu Kerisitu, Ánáꞌna Pueꞌ Ala. Hai Iesu Kerisitu iti, tiꞌara ara katebálikiána tunggáiáNa i kitaꞌ. Tiꞌara hangkani Nauliꞌ “Ió” ane tunggáiáNa “Tiꞌara”. Manótó ntepuꞌu tiꞌara ara katebálikiána tunggáiáNa i kitaꞌ.

²⁰ Handaꞌ dándina Pueꞌ Ala i kitaꞌ, hai moliu Iesu, Ia mobukeki upu-upu dándiNa iti. Ánti kaꞌIesuna, peisákeꞌ motóiá Pueꞌ Ala hai manguliꞌ, “Ami!”

²¹ Pueꞌ Ala haduduáNa to mopakaróhó lalungkiꞌ hai lalumi woꞌo, bona kitaꞌ upu-upu mohintuwuꞌ hai Kerisitu. Ia to mopileꞌikeꞌ mewaliꞌ taunáNa,

²² hai mampoweꞌikeꞌ Inao to Magasaꞌ to mopakanótó kakitaꞌna taunáNa. Inao to Magasaꞌ iti miꞌi to mewaliꞌ petándáina Pueꞌ Ala i laluntaꞌ, láwiꞌ Ia mopakaróhó dándina Pueꞌ Ala i kitaꞌ, bona manótó i kitaꞌ {i alo pobutusi}, ina Naweꞌikeꞌ upu-upuna to Nadándiákeꞌ.

²³ Halalu-halalu, tiꞌaraꞌaꞌ modongkoꞌ, Pueꞌ Ala sabiꞌkuꞌ. Ia to moisá lalungkuꞌ. Tiꞌaraꞌaꞌ lao i kómu i Korintu hangkoia láwiꞌ tiꞌara kuꞌundeꞌ mokámbáróákou hai laluita to mahárá.

²⁴ Tiꞌara kiundeꞌ kipárentákou oaꞌ, láwiꞌ kiꞌisá maróhó pepoináláimi i Kerisitu. Kiundeꞌ mobágóꞌ hingkakani hai kómu bona mantámbái kagóeꞌna lalumi.