1 Timotiu 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Sura deꞌe hangko i kódóꞌ Paulu, surona Kerisitu Iesu. Kódóꞌ mewaliꞌ surona mouláꞌ popakanótóna Pueꞌ Ala to mohómpókikeꞌ hangko i huku dósántaꞌ, hai mouláꞌ woꞌo popakanótóna Kerisitu Iesu to mewaliꞌ pehárungáꞌántaꞌ.

² Sura deꞌe kupakatu i hio Timotiu to kupoánáꞌ, láwiꞌ mepoináláikoꞌ woꞌo i Iesu Kerisitu. Mekakaeaꞌ i Pueꞌ Ala Umántaꞌ, hai i Kerisitu Iesu Pueꞌtaꞌ, bona Ia mowátiꞌkoꞌ, mopatongawaꞌákoꞌ ahiꞌNa, hai mampoweꞌikoꞌ roꞌa ngkatueꞌ.

Guru agama to mepakanawoꞌ hangaa-ngaa rakóntóheꞌ

³ Kupembiáꞌ bona toroꞌkoꞌ oaꞌ i kótá Epesu, nodo to kuꞌuliꞌ hangkoia hangko tiꞌara maniaꞌ mai ieneꞌ i tampoꞌ Makedonia, láwiꞌ i Epesu araheꞌ bahangapa tauna to moánti paturoꞌ to salaꞌ, hai hangaa-ngaa nukóntóheꞌ bona ineeꞌheꞌ oaꞌ moánti paturoꞌ to mepakanawoꞌ.

⁴ Nukóntóheꞌ bona ineeꞌheꞌ paka mampolaluita darita mpaturu hai darita mokana i pantepuꞌuána toioruntaꞌ, to mentóáꞌ hangko i hangaꞌ-hangaꞌ toioruntaꞌ. Upu-upuna iti tiꞌara mobunduꞌ i lalu katueꞌtaꞌ, láwiꞌ tauna paka peheꞌ mombeheheꞌ-heheꞌ. Ngkáliꞌna riꞌi, to hangaa-ngaa tapailalu, noumbá tunggáiána Pueꞌ Ala i lalu katueꞌtaꞌ to taisá hangko i pepoináláintaꞌ i Hia.

⁵ Tunggáiána paturoꞌkuꞌ deꞌe, bona kitaꞌ upu-upu hangaa-ngaa mombepokaꞌahiꞌkeꞌ, hai ahiꞌ iti mentóáꞌ hangko i laluntaꞌ ntepuꞌu, hangko i kabulána laluntaꞌ, hai hangko i kamaróhóna pepoináláintaꞌ i Pueꞌ Ala.

⁶ Araheꞌ bahangapa tauna to tiꞌara piꞌi mampeuláꞌi rárá to manótó deꞌe, agáiáná mouláꞌraheꞌ rárá ntániꞌna, hai mampombeheheꞌi peheꞌ oaꞌ laluita to tiꞌara mobunduꞌ.

⁷ Rapoinao mepaturoꞌ kana i Paturoꞌna Musa, agáiáná kehapiꞌ rapoinálái pepaturoꞌraꞌ iti toꞌu, katoꞌuána tiꞌara raisá lempóna apa to rapepaturoꞌiá iti.

⁸ Taisá miꞌi kamaroꞌana Paturoꞌna Musa, asalaꞌ tapeuláꞌi hintotoꞌ hai tunggáiána.

⁹ Hangaa-ngaa taisá tunggáiána Paturoꞌna Musa bona maroꞌa katapopobunduꞌna. Pueꞌ Ala mampoweꞌikeꞌ Paturoꞌna Musa, tiꞌara bona mokóntó tauna to manótó bábehiáraꞌ, ngkáliꞌna riꞌi bona mokóntó: tauna to molingkaꞌi áturá iti, tauna to tiꞌara mengkoruꞌ i topopárentá, tauna to tiꞌaraheꞌ mengkoruꞌ i Pueꞌ Ala, tauna to mobábehi oaꞌ dósá, tauna to tiꞌara mobiláꞌ Pueꞌ Ala, tauna to tiꞌaraheꞌ moagama, tauna to mopapate ináraꞌ ba umáraꞌ, tauna to moundeꞌ mepapate,

¹⁰ tauna to mebualosi, hai tauna to mobábehi bábehiá to metitidiꞌi, nodo to rabábehi tobaleilo i hangka tobaleiloraꞌ, ba towawine i hangka towawineraꞌ, tauna to mepongkoꞌ, tauna to modongkoꞌ, tauna to mosabiki dongkoꞌ, hai upu-upu tauna to mobábehi apa to ntániꞌna to tiꞌara hiolaꞌ hai paturoꞌ to toꞌu.

¹¹ Paturoꞌ to toꞌu iti talámbiꞌ i Ngkóráꞌ Marasa to hangko i Pueꞌ Ala. Ia to meawaꞌ hai hintotoꞌ ratóiá. Ngkóráꞌ Marasa iti miꞌi to napoináláiáꞌaꞌ Pueꞌ Ala bona kubámbári i upu-upu tauna.

Kamaꞌahiꞌna Pueꞌ Iesu i Paulu

¹² Kuꞌuliꞌ handaꞌ kamaroꞌana i Kerisitu Iesu Pueꞌtaꞌ, láwiꞌ Naweꞌiaꞌ róhó moánti Ngkóráꞌ Marasa. Napileꞌiaꞌ mewaliꞌ topobágóꞌNa láwiꞌ Narekeꞌaꞌ tauna to peisá rapoinálái mampopolumao bágóꞌNa.

¹³ Hangkoia, Iesu kutitibei, noꞌonoꞌ woꞌo hai tauna to mepoinálái i Hia, kupeliꞌ bona kupopeahiahiꞌheꞌ. Agáiáná kehapiꞌ noꞌonoꞌ, Iesu mopatongawaꞌ kamaꞌahiꞌNa i kódóꞌ, láwiꞌ i tempó iti tiꞌara maniaꞌ mepoinálái kaꞌIana miꞌi Topohómpóꞌ Salaꞌ, hai tiꞌara mani kuisá apa to kubábehi.

¹⁴ {Agáiáná kehapiꞌ mahile ntepuꞌu dósángkuꞌ,} melumbuꞌ mani kamaꞌahiꞌna Pueꞌ Ala i kódóꞌ. Natulungiaꞌ hangko i kabulána laluNa, álána kupoinálái Kerisitu Iesu hai maꞌahiꞌaꞌ i tauna ntániꞌna ánti pohintuwuꞌkuꞌ hai Kerisitu.

¹⁵ Toꞌu ntepuꞌu laluita deꞌe, hai hintotoꞌ tapoinálái: “Kerisitu Iesu mai i duniáꞌ bona mohómpóki tauna to madósá hangko i huku dósáraꞌ.” Hai hangko i upu-upu tauna to madósá, kódóꞌ miꞌi deꞌe to melumbuꞌ ntepuꞌu kahandaꞌna kamadósángkuꞌ.

¹⁶ Kehapiꞌ handaꞌ ntepuꞌu kamadósángkuꞌ, Pueꞌ Ala mopatongawaꞌ kamaꞌahiꞌNa i kódóꞌ, bona hangko i katueꞌkuꞌ, kasabaraꞌna Iesu Kerisitu tongawaꞌ ntepuꞌu. Onoꞌ miꞌi haneꞌi mewaliꞌaꞌ pándiriꞌ i upu-upu tauna, bona mepoináláiheꞌ woꞌo i Iesu, áláraꞌ molámbiꞌ katueꞌ to maroꞌa to tiꞌara mokahópóꞌá.

¹⁷ Hintotoꞌ ntepuꞌu tabiláꞌ hai tatóiá Pueꞌ Ala, Datuntaꞌ to mepárentá duuꞌna i rue-ruena, hai to tiꞌara mokahópóꞌá, to tiꞌara peisá teita, hai to tiꞌara ara kahibaliáNa. Tapomahile hai tatóiá hangaꞌNa duuꞌna i rue-ruena. Ami.

Hawaꞌna Paulu i Timotiu

¹⁸ Timotiu to kupoánáꞌ. Kupembiáꞌ bona nupeuláꞌi paturoꞌkuꞌ to kupahaweꞌákoꞌ deꞌe. Hangaa-ngaa nubuhinao laluita to napahaweꞌákoꞌ Pueꞌ Ala tempómu rapileꞌi mewaliꞌ huoꞌána Pueꞌ, bona, kehapiꞌ ara to moewaꞌkoꞌ, laluita iti to ina mopakaróhó lalumu.

¹⁹ Hangaa-ngaa tetidaꞌkoꞌ i lalu pepoináláimu, hai nubábehi oaꞌ bábehiá to maroꞌa to mentóáꞌ hangko i kabulána lalumu. Ara bahangapa tauna to tiꞌarapoheꞌ noꞌonoꞌ, álána laluraꞌ tiꞌara piꞌi magasaꞌ, hai pepoináláiraꞌ mbero-mbero peá,

²⁰ nodoheꞌ Himeneu hai Alesande. To rodua iti kuhuhuꞌheꞌ i kuasaꞌna Datu Tokadake bona deaheꞌ hai bona tiꞌarapoheꞌ ina mopakóiꞌ Pueꞌ Ala.