1 Peturuꞌ 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Halalu-halalu, sura deꞌe hangko i kódóꞌ Peturuꞌ, surona Iesu Kerisitu. Kupakatu sura deꞌe i kómu halalungkuꞌ to napileꞌimokou Pueꞌ Ala, to mahawuꞌ i poropensi Pontu, Galatia, Kapadokia, Asia hai Bitinia, hai to toroꞌ nodo tohaweꞌ i oloꞌraꞌ tauna to tiꞌara moisá Pueꞌ Ala.

² Hangko tiꞌara mani Napopewaliꞌ duniáꞌ deꞌe, Naisá miꞌi ami Pueꞌ Ala Umántaꞌ heáná to ina Napileꞌi mewaliꞌ taunáNa. Hai Inao to Magasaꞌ mampopewaliꞌmokou taunána Pueꞌ Ala to magasaꞌ. Onoꞌ miꞌi haneꞌi mengkoruꞌkou i Iesu Kerisitu to mopamagasaꞌkou hai waheꞌNa. Tabeá! Kupembiáꞌ bona Pueꞌ Ala mampoweꞌikou handaꞌ pewátiꞌ hai roꞌa ngkatueꞌ.

Tatóiá Pueꞌ Ala láwiꞌ Naweꞌikeꞌ pehárungá to maróhó

³ Tatóiá Pueꞌ Ala, Umána Iesu Kerisitu Pueꞌtaꞌ! Ánti kamahilena ahiꞌNa Pueꞌ Ala i kitaꞌ, Naweꞌimokeꞌ katueꞌ to woꞌu, hai katueꞌ to woꞌu iti talámbiꞌ moliu katueꞌna huleꞌ Iesu Kerisitu. Onoꞌ miꞌi haneꞌi maróhó pehárungántaꞌ {kaꞌina molámbiꞌtaꞌ katueꞌ to tiꞌara mokahópóꞌá}.

⁴ Hai ina molámbiꞌkeꞌ sosora to napatimamaꞌámokeꞌ Pueꞌ Ala i surugáꞌ, hai sosora iti tiꞌara peisá marugiꞌ ba mewaliꞌ kadake ba mambáliꞌ.

⁵ Ánti pepoináláimi, Pueꞌ Ala mokámpáikou hai kuasaꞌNa hangko i upu-upu to kadake, duuꞌna haweꞌ tempóna ina nilámbiꞌ katehómpóꞌ bukeꞌ-bukeꞌ hangko i Pueꞌ i kahópóꞌána duniáꞌ.

⁶ Onoꞌ miꞌi haneꞌi hangaa-ngaa góeꞌkou oaꞌ. Deꞌe-deꞌe masusa mani lalumi láwiꞌ handaꞌ pákáꞌna kapári to morampekou. Agáiáná kehapiꞌ noꞌonoꞌ, hangaa-ngaa góeꞌ lalumi, láwiꞌ kapári iti hampaiꞌ peá.

⁷ Narampekou kapári bona tongawaꞌ kamaróhóna pepoináláimi. Pepoináláimi iti peisá rapándiriꞌ nodo buláwá to rapáresáꞌ hai api. Ina tongawaꞌ kabuláwána ba tiꞌara, hai ina rapamagasaꞌ. Agáiáná masuliꞌ mani pepoináláimi haneꞌi buláwá, láwiꞌ buláwá tiꞌara ina ara duuꞌna i rue-ruena. Buláwá hangaa-ngaa rapáresáꞌ i lalu api. Noꞌonoꞌ woꞌo pepoináláimi hangaa-ngaa rapáresáꞌ moliu kapári. Mewaliꞌ ane mantahakou i lalu kapári, lempóna maróhó ntepuꞌu pepoináláimi, hai kómu ina ratóiá, rabiláꞌ hai rapomahile i kahaweꞌna huleꞌ Iesu Kerisitu i duniáꞌ.

⁸ Kehapiꞌ tiꞌara haweꞌ hangkani niꞌita Iesu Kerisitu, agáiáná nipokaꞌahiꞌ. Noꞌonoꞌ woꞌo, kehapiꞌ deꞌe-deꞌe tiꞌara niꞌita Iesu, bateꞌna nipoinálái. Onoꞌ miꞌi haneꞌi góeꞌ ntepuꞌu lalumi, hai kagóeꞌmi iti tiꞌara mpuꞌu ara rángána.

⁹ Góeꞌkou, láwiꞌ nilámbiꞌ miꞌi wuaꞌna pepoináláimi, ia miꞌi katehómpóꞌ hangko i huku dósámi.

¹⁰ Katehómpóꞌ to nilámbiꞌ iti, iti miꞌi to rapepekiri nabiꞌ-nabiꞌ hangkoia hai rapeliꞌ lempóna. Rapahaweꞌ noumbá Pueꞌ Ala ina mopatongawaꞌ kamaꞌahiꞌNa i kómu.

¹¹ Ánti peteteꞌna Inaona Kerisitu to ara i laluraꞌ, Pueꞌ Ala mampopaisáꞌáheꞌ noumbá karumihina kapári to hangaa-ngaa morampe wátána Kerisitu, hai Napahaweꞌáheꞌ woꞌo noumbá peawaꞌNa ane hópóꞌ miꞌi kapári iti. Agáiáná nabiꞌ-nabiꞌ iti, tiꞌaraheꞌ moisá noumbá upu-upuna iti ina mewaliꞌ. Onoꞌ miꞌi haneꞌi rapáresáꞌ ntepuꞌu apa to teukiꞌ, láwiꞌ rapoinao raisá heáná to ratunggái hai impirá kaꞌina mewaliꞌna.

¹² Hai Pueꞌ Ala mampopaisáꞌáheꞌ nabiꞌ-nabiꞌ hangkoia, bámbári to rapahaweꞌ iti tiꞌara mokana i wátáraꞌ haduduáraꞌ, ngkáliꞌna riꞌi, mokana i kómu to motarimamokou bámbári iti. Hai deꞌe-deꞌe, apa to rapahaweꞌ nabiꞌ-nabiꞌ hangkoia, rapakanótó miꞌi i kómu i katoꞌu-toꞌuána, láwiꞌ aramoheꞌ tauna to mopahaweꞌákou Ngkóráꞌ Marasa, hai apa to rapahaweꞌ iti, moliu kuasaꞌna Inao to Magasaꞌ to hangko i Pueꞌ Ala. Mogalo riꞌi malaꞌeka, mampoinaoheꞌ woꞌo moisá kana i katehómpóꞌ to nilámbiꞌ iti.

Hangaa-ngaa magasaꞌ katueꞌtaꞌ

¹³ Halalu-halalu, ánti pehárungámi i kanahómpókimi miꞌi Iesu Kerisitu, onoꞌ miꞌi haneꞌi kuhángáꞌáꞌákou: nipakanótó pekirimi, nimeeꞌ peundeꞌána lalumi haduduámi, hai nipakaróhó pehárungámi i pewátiꞌ to ina raweꞌikou i kahaweꞌna huleꞌ Iesu Kerisitu.

¹⁴ Kómu to mepoinálái, napoánáꞌmokou Pueꞌ Ala, onoꞌ miꞌi haneꞌi hangaa-ngaa nipeuláꞌi peundeꞌáNa. Ineeꞌmokou mampeuláꞌi peundeꞌána lalumi haduduámi nodo hangkoia i tempómi tiꞌara mani moisá Pueꞌ Ala.

¹⁵ Ngkáliꞌna riꞌi, hangaa-ngaa magasaꞌkou i lalumi hai i upu-upu bábehiámi alo-alona, láwiꞌ napileꞌimokou Pueꞌ Ala to magasaꞌ. Ia miꞌi to mokióꞌkou bona nipeuláꞌi bábehiáNa,

¹⁶ láwiꞌ ara teukiꞌ i lalu Sura Magasaꞌ to manguliꞌ: “Hangaa-ngaa magasaꞌ tueꞌmi, láwiꞌ Kódóꞌ deꞌe magasaꞌAꞌ.”

¹⁷ Halalu-halalu. Ane mokióꞌkou Pueꞌ Ala, niuliꞌ “Umaꞌ”, hai Ia miꞌi to mobutusi kárá-káráraꞌ upu-upu tauna hiolaꞌ hai bábehiáraꞌ, hai Ia tiꞌara mampopontaniꞌ tauna. Ánti kaꞌIana Umámi hai Topobutusi, onoꞌ miꞌi haneꞌi hangaa-ngaa mengkoruꞌkou i Hia tangaꞌmi mani toroꞌ i duniáꞌ deꞌe, láwiꞌ nodo pekou topolilo. {Lempóna: duniáꞌ deꞌe tiꞌara katoroꞌámi i katoꞌu-toꞌuána, agáiáná surugáꞌ riꞌi to ina nikatoroꞌi haweꞌ i rue-ruena.}

¹⁸ Hangaa-ngaa mengkoruꞌkou i Pueꞌ Ala, láwiꞌ niꞌisá noumbá pehómpókina Pueꞌ Ala. Ia mokábáhámokou hangko i rárá katueꞌmi hangkoia to tiꞌara mobunduꞌ, to nilámbiꞌ hangko i toiorumi. Hai to napakeꞌ Pueꞌ Ala mohómpókikou, tiꞌara párewá to masuliꞌ hólóna nodo buláwá ba peráꞌ to tiꞌara ina mantaha duuꞌna i rue-ruena,

¹⁹ agáiáná to Napakeꞌ mohómpókikou melumbuꞌ kamasuliꞌna, ia miꞌi waheꞌna Kerisitu haduduáNa. Kerisitu iti nodo hambaꞌa ánáꞌ dimbá to tiꞌara ara hakiꞌna ba kamakuraꞌna. Ia miꞌi to rahuku mate mosulewátáikou.

²⁰ Hangko tiꞌara mani duniáꞌ rapopewaliꞌ, Iesu miꞌi to napakanótó Pueꞌ Ala bona mewaliꞌ Topohómpóꞌ Salaꞌ. Deꞌe-deꞌe i tempó to kahópóꞌána, Ia haweꞌ miꞌi bona kómu peisákou Nahómpóki hangko i huku dósámi.

²¹ Ánti kaꞌIesuna hai upu-upuna to Nabábehi, kómu mepoináláikou i Pueꞌ Ala to mopatueꞌ huleꞌ Iesu hangko i kapate hai mampopeawaꞌ tueꞌNa, álána mepoináláikou hai mehárungákou i Pueꞌ Ala.

²² Deꞌe-deꞌe, láwiꞌ magasaꞌkou ánti pepoináláimi i paturoꞌ to toꞌu {ia miꞌi Ngkóráꞌ Marasa}, niꞌisá miꞌi mampokaꞌahiꞌ halalu hampepepoináláimi i katoꞌu-toꞌuána. Onoꞌ miꞌi haneꞌi kuweꞌikou laluita bona mombepokaꞌahiꞌkou hadua hai hadua hangko i lalumi ntepuꞌu.

²³ Iti to hangaa-ngaa nibábehi, láwiꞌ molámbiꞌmokou katueꞌ to woꞌu, hai katueꞌ to woꞌu iti tiꞌara nilámbiꞌ hangko i tauna to ina mate peá, ngkáliꞌna riꞌi molámbiꞌmokou katueꞌ to woꞌu iti láwiꞌ mepoináláimokou i ngkóráꞌna Pueꞌ Ala. NgkóráꞌNa iti tueꞌ oaꞌ i lalumi hai tiꞌara ina mokahópóꞌá.

²⁴ Ara teukiꞌ i lalu Sura Magasaꞌ to manguliꞌ node: “Katueꞌna tauna nodo peá rumpuꞌ, hai kamababena tauna hampaiꞌ peá nodo bungaꞌ i pádá. Rumpuꞌ bateꞌna hawiáꞌ malau, hai bungaꞌna ina maránáꞌ,

²⁵ agáiáná ngkóráꞌna Pueꞌ ina ara oaꞌ duuꞌna i rue-ruena.” (Iesaia 40:6-8) Hai ngkóráꞌna Pueꞌ Ala iti, ia miꞌi Ngkóráꞌ Marasa to rapahaweꞌámokou.