1 Korintu 8 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pandeꞌ to rapopenómbá i ánitu

¹ Kaliliuána, ina molaluitaꞌaꞌ mokana pandeꞌ to rapopenómbá i ánitu. Niuliꞌ, “Kitaꞌ toSarani, mapándekeꞌ. Taisá miꞌi paturoꞌ to toꞌu.” Toꞌu ntepuꞌu, agáiáná kuhángáꞌáꞌákou: ánti kamapándemi iti, mampepemahilekou. Ineeꞌkou noꞌonoꞌ. Rángina miꞌi maꞌahiꞌkeꞌ i halalu hampepepoináláintaꞌ hai tapakaróhó laluraꞌ.

² Ane hadua tauna manguliꞌ, “Mapándeaꞌ, kuisá paturoꞌ to toꞌu,” agáiáná tiꞌara ara ahiꞌna, lempóna makuraꞌ mani kamapándena.

³ Agáiáná tauna to toꞌu-toꞌu mampokaꞌahiꞌ Pueꞌ Ala, Pueꞌ Ala moisá ntepuꞌu apa to ara i laluraꞌ.

⁴ Mewaliꞌ, mokana i pandeꞌ to rapopenómbá i ánitu, peisá taꞌandeꞌ, láwiꞌ taisá katiꞌárána ara pueꞌ ntániꞌna, bateꞌna peá Pueꞌ Ala. Hai taisá: hangko i upu-upu ánitu to rapenómbái, tiꞌara ara haweꞌ hangaa to toꞌu.

⁵ Handaꞌ pákáꞌna to rapenómbái tauna, to rauliꞌ pueꞌ ba ánitu, maroꞌa i langiꞌ, maroꞌa i wongko duniáꞌ.

⁶ Agáiáná i kitaꞌ to mepoinálái, hadua peá Pueꞌ Ala, Ia miꞌi Umántaꞌ, hai upu-upu to ara, mentóáꞌ hangko i Hia. Naweꞌikeꞌ katueꞌtaꞌ bona peisákeꞌ mampomahile hangaꞌNa. Hai hadua peá Pueꞌtaꞌ, Ia miꞌi Iesu Kerisitu. Moliu Iesu iti, Pueꞌ Ala mampopewaliꞌ hinángkáꞌ to ara i duniáꞌ, hai ánti kaꞌIesuna, molámbiꞌkeꞌ katueꞌ to woꞌu.

⁷ Agáiáná kehapiꞌ noꞌonoꞌ, tiꞌara upu-upu toSarani to mangisá iti. Araheꞌ to menómbá i ánitu hangko tiꞌara maniheꞌ moisá Pueꞌ, hai duuꞌna deꞌe-deꞌe, ane moitaheꞌ pandeꞌ to rapopenómbá miꞌi i ánitu, rauliꞌ i laluraꞌ, “Iti popenómbá i ánitu!” Mewaliꞌ, ane mandeꞌheꞌ pandeꞌ iti, rauliꞌ i laluraꞌ, “Madósákeꞌ,” láwiꞌ bata-bata mani laluraꞌ ba peisá raꞌandeꞌ ba tiꞌara, hai malááꞌheꞌ rapakedái.

⁸ Katoꞌuána, pandeꞌ iti tiꞌarakeꞌ moánti hungkuꞌ i Pueꞌ Ala, hai tiꞌarakeꞌ woꞌo moánti karaoꞌ hangko i Pueꞌ Ala. Ane taꞌandeꞌ, tiꞌarakeꞌ morasiꞌ, hai ane tiꞌara taꞌandeꞌ, tiꞌarakeꞌ woꞌo marugiꞌ.

⁹ Agáiáná hangaa-ngaa maroꞌa-roꞌakou. Peisá taꞌandeꞌ pandeꞌ iti hangko i kabulána laluntaꞌ, agáiáná ineeꞌ tapakanawoꞌ rángántaꞌ to tiꞌara mani maróhó pepoináláina.

¹⁰ Tunggáiángkuꞌ node: ane rápáꞌna niuliꞌ, “Mepoináláikeꞌ. Taisá miꞌi paturoꞌ to toꞌu; tiꞌaranto moapa-apa ane taꞌandeꞌ pandeꞌ to rapopenómbá i ánitu iti,” hai laokou i támbi penómbáꞌáraꞌ topoánitu haneꞌikou mandeꞌ pandeꞌraꞌ iti. Agáiáná tangaꞌmi mandeꞌ, ara hadua halalu hampepepoináláimi to moitakou to bata-bata mani laluna mokana pandeꞌ to rapopenómbá iti, ba peisá raꞌandeꞌ ba tiꞌara. Mewaliꞌ ánti kanaitámi mandeꞌ pandeꞌ iti, ia woꞌo meuláꞌ mandeꞌ.

¹¹ Onoꞌ haneꞌi, ánti kaniꞌisána miꞌi pandeꞌ iti peisá niandeꞌ, nipakanawoꞌ halalumi to bata-bata mani laluna. Hai to nipakanawoꞌ iti, ia miꞌi halalu hampepepoináláimi to nasulewátái Kerisitu i karapapateNa.

¹² Ane nibábehi to noꞌonoꞌ, masalaꞌkou, láwiꞌ nipakanawoꞌ halalumi to tiꞌara mani maróhó pepoináláina, hai madósá ntepuꞌukou i peitána Kerisitu.

¹³ Onoꞌ miꞌi haneꞌi kuhángáꞌáꞌákou: ane rápáꞌna ina mopakanawoꞌaꞌ halalu hampepepoinálái i kakuandeꞌna bauꞌ ba pandeꞌ, pandeꞌ iti tiꞌara kuandeꞌ, bona tiꞌara ara halalungkuꞌ to manawoꞌ ánti bábehiángkuꞌ. Mewaliꞌ hangaa-ngaa noꞌonoꞌkou woꞌo.