1 Korintu 6 - Sura Magasaꞌ: Bahangapa sura Pototowiá to Sae hai Pototowiá to Woꞌu

Ineeꞌkou mobuáꞌ halalu hampepepoináláimi i topebutusi to tiꞌara mepoinálái

¹ Moapa riꞌi haneꞌi niundeꞌ mobuáꞌ halalu hampepepoináláimi i topobutusi to tiꞌara mepoinálái i Pueꞌ Iesu? Moapa riꞌi haneꞌi tiꞌara nipahaweꞌ posisalaꞌmi i halalu hampepepoináláimi?

² Tiꞌara paꞌi niꞌisá, i alo pobutusi i kahópóꞌána duniáꞌ, tauna to mepoinálái i Pueꞌ Iesu ina mobutusi to i duniáꞌ. Mewaliꞌ ane kómu ina mewaliꞌ tadulako to mobutusi to i duniáꞌ, noumbá miꞌi paꞌi ane tiꞌara nibuku mobutusi posisalaꞌmi to manangkoꞌ peá i tempó deꞌe?

³ Tiꞌara paꞌi niꞌisá, i alo pobutusi i kahópóꞌána duniáꞌ, kitaꞌ toSarani to ina mobutusi woꞌo malaꞌeka. Mewaliꞌ, hangaa-ngaa nibuku woꞌo mobutusi posisalaꞌraꞌ tauna i duniáꞌ deꞌe.

⁴ Ane ara posisalaꞌmi, moapa riꞌi haneꞌi nipahaweꞌ iti i tauna to tiꞌara mepoinálái?

⁵ Tunggáiána laluitangkuꞌ deꞌe, bona mahilikou. Halalu-halalu to mepoinálái i Kerisitu, tiꞌara paꞌi ara hadua i oloꞌmi to manótó laluna to peisá mobutusi posisalaꞌmi? Hangaa-ngaa ara!

⁶ Ngkáliꞌna riꞌi kuhádi, hangko i oloꞌmi ara to mobuáꞌ halalu hampepepoináláina i topobutusi to tiꞌara mepoinálái i Pueꞌ Iesu!

⁷ Ineeꞌkou lao mobuáꞌ posisalaꞌmi i tauna to tiꞌara mepoinálái, láwiꞌ ane ara posisalaꞌ i oloꞌmi, mepakahiliá. Iti mopatongawaꞌ katiꞌárámi mobábehi apa to maroꞌa i peitána Pueꞌ Iesu. Katoꞌuána, ane ara to mopakanawoꞌkou ba mopakarugiꞌkou, rángimi miꞌi marugiꞌ haneꞌi nipahaweꞌ iti i lindoꞌna topobutusi to tiꞌara mepoinálái.

⁸ Agáiáná tongawaꞌ ara i oloꞌmi to mobábehi salaꞌ. Tiꞌara pekou mobagiuꞌheꞌ tauna to tiꞌara toSarani, agáiáná mogalo riꞌi hangka toSaranimi, nibagiuꞌheꞌ woꞌo!

⁹ Tiꞌara paꞌi niꞌisá halalu-halalu, tauna to kadake bábehiáraꞌ, tiꞌaraheꞌ ina mewaliꞌ taunána Pueꞌ Ala i lalu popárentáNa. Ineeꞌkou mopakanawoꞌ wátámi haduduámi. Tauna to metitidiꞌi bábehiáraꞌ, to menómbá i ánitu, to mebualosi, to mobábehi salaꞌ nodo tobaleilo to mampotoina hangka tobaleilona ba nodo towawine to mampotoina hangka towawinena,

¹⁰ to manako, to mehioroꞌ, to malangu, to mopakadake hángká rángána, hai tauna to mobagiuꞌ tauna ntániꞌna; tiꞌaraheꞌ ina mewaliꞌ taunána Pueꞌ Ala i lalu popárentáNa.

¹¹ Arakou to noꞌonoꞌ hangkoia, agáiáná Pueꞌ Ala mobahoꞌimokou hangko i dósámi, Napopewaliꞌmokou taunáNa, hai Napakanótómokou i peitáNa ánti pohintuwuꞌmi hai Pueꞌ Iesu Kerisitu hai ánti kuasaꞌna Inaona Pueꞌ Ala Pueꞌtaꞌ.

Paulu mopaturoꞌheꞌ, láwiꞌ ara to mobábehi bábehiá to metitidiꞌi

¹² Ara i oloꞌmi to manguliꞌ, “Ánti kanakábáhántaꞌ Pueꞌ Ala hangko i huku dósántaꞌ, onoꞌ miꞌi haneꞌi peisákeꞌ mobábehi apa peá mouláꞌ peundeꞌántaꞌ haduduántaꞌ.” Toꞌu laluita iti, agáiáná ara woꞌo to tiꞌara mobunduꞌ. Rápáꞌna: tiꞌara kuꞌundeꞌ ane wátángkuꞌ deꞌe nakuasaꞌi apa peá.

¹³ Ara woꞌo i oloꞌmi to manguliꞌ, “Pandeꞌ mobunduꞌ i taꞌintaꞌ, hai taꞌintaꞌ mobunduꞌ raóntóki pandeꞌ.” Toꞌu laluita iti, agáiáná hangkani tempó upu-upuna iti ina nawehángi Pueꞌ Ala. Tiꞌarakou peisá manguliꞌ wátántaꞌ deꞌe napopewaliꞌ Pueꞌ Ala bona mobábehikeꞌ bábehiá to metitidiꞌi. Ngkáliꞌna riꞌi, wátántaꞌ deꞌe hangaa-ngaa tapakeꞌ peá mobábehi apa to hintotoꞌ hai peundeꞌána Pueꞌ, láwiꞌ Ia pueꞌna wátántaꞌ.

¹⁴ Pueꞌ Iesu napatueꞌ huleꞌ Pueꞌ Ala hangko i kapate. Noꞌonoꞌ woꞌo i alo pobutusi, ánti kuasaꞌNa, wátántaꞌ woꞌo ina Napatueꞌ huleꞌ.

¹⁵ Tiꞌara paꞌi niꞌisá, wátámi ia miꞌi hanggáláꞌ hangko i wátána Kerisitu. Maroꞌa paꞌi ane wátántaꞌ to mewaliꞌ hanggáláꞌ hangko i Kerisitu iti tapakeꞌ mobábehi bábehiá to metitidiꞌi? Bateꞌna tiꞌara maroꞌa!

¹⁶ Tiꞌara paꞌi niꞌisá, heáná to mohintuwuꞌ hai hadua towawine to tiꞌara maroꞌa bábehiána, mewaliꞌ miꞌi hawátá hai towawine iti, láwiꞌ i lalu Sura Magasaꞌ teukiꞌ node: “Tauna to rodua iti mewaliꞌheꞌ hawátá-wátá.” (Pewaliꞌána 2:24)

¹⁷ Agáiáná heáná tauna to mohintuwuꞌ hai Pueꞌ, ia hampepekiri hai Pueꞌ.

¹⁸ Mewaliꞌ hangaa-ngaa nipakaraoꞌ wátámi hangko i bábehiá to metitidiꞌi iti, láwiꞌ dósá iti mopakarugiꞌ wátámi haduduámi. Dósá ntániꞌna mewaliꞌ i rawana peá wátámi.

¹⁹ Tiꞌara paꞌi niꞌisá halalu-halalu, wátámi ia miꞌi katoroꞌána Inao to Magasaꞌ. Ia ara i lalumi. Pueꞌ Ala haduduáNa mampoweꞌikou Inao to Magasaꞌ. Ia to makuasaꞌ i wátámi, tiꞌara piꞌi kómu, láwiꞌ wátámi tiꞌara kómu pueꞌna.

²⁰ Kómu Nahómpókimokou Pueꞌ Ala, hai Nabaiarimokou bukeꞌ-bukeꞌ. Onoꞌ miꞌi haneꞌi wátámi hangaa-ngaa nipakeꞌ mobábehi to maroꞌa bona Pueꞌ Ala rapomahile.