1 Korintu 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paulu surona Pueꞌ Ala

¹ Ane kaiꞌ tadulakomi, rángina miꞌi niuliꞌ peangkaiꞌ huoꞌá, láwiꞌ huoꞌánaꞌangkaiꞌ woꞌo Kerisitu. Kaiꞌ to moánti ngkóráꞌna Pueꞌ Ala, hai hangkoia ngkóráꞌ iti tewuniángi i tauna i duniáꞌ.

² To paraluu i huoꞌá, hangaa-ngaa mampeuláꞌiheꞌ oaꞌ hawaꞌna to i reáraꞌ.

³ Mewaliꞌ, ane arakou to mosalaꞌi pobágóꞌkuꞌ, tiꞌaranto moapa. Noꞌonoꞌ woꞌo ane pobágóꞌkuꞌ rapáresáꞌ, tiꞌara woꞌo moapa. Tiꞌara woꞌo kódóꞌ to mopakanótó ba maroꞌa pobágóꞌkuꞌ ba tiꞌara.

⁴ Kuisá kabulána lalungkuꞌ hai tiꞌaraꞌaꞌ masalaꞌ, agáiáná tiꞌara iti to mopakanótó katiꞌárángkuꞌ masalaꞌ. Pueꞌ to ina mopáresáꞌ lalungkuꞌ, ba maroꞌai ba tiꞌara.

⁵ Onoꞌ miꞌi haneꞌi kuꞌuliꞌ, ineeꞌkou mosalaꞌi pobágóꞌraꞌ hángká rángámi ane tiꞌara mani tempóna. Nipegiá sieruꞌ kahaweꞌna huleꞌ Pueꞌ. Ia miꞌi to ina mobungkáhi upu-upu to tewuniángi mani i lalu kamakáindiána. Ia to ina mopatongawaꞌ upu-upu tunggáiána laluraꞌ tauna. I tempó iti, hadua-hadua tauna ina molámbiꞌ petóiá hangko i Pueꞌ Ala to hintotoꞌ natarima.

Paulu mokámbáróá toKorintu láwiꞌ mampepemahileheꞌ

⁶ Halalu-halalu, apa to kuꞌuliꞌ ininá, kana i Apolo hai kódóꞌ haduduángkuꞌ. Kaiꞌ rodua kupopándiriꞌ, bona mampeuláꞌikou párentá to manguliꞌ, “Ineeꞌkou moliungi apa to teukiꞌ miꞌi.” Tunggáiángkuꞌ bona ineeꞌkou mampepemahile ánti peuláꞌmi i hadua tadulakomi. Ineeꞌkou motóiá hadua tadulakomi hai mopakóiꞌ to haduána.

⁷ Ba niuliꞌ ripaꞌi, maroꞌa manikou hangko i hángká rángámi? Apa paꞌi to ara i kómu ane tiꞌarai to nitarima hangko i Pueꞌ Ala? Hai moapa riꞌi haneꞌi mampepemahilekou, ane upu-upu to ara i kómu, iti to naweꞌikou Pueꞌ Ala?

⁸ Ba nipekiri paꞌi tiꞌara piꞌi ara to niparaluu? Ba nipekiri paꞌi maróhó miꞌi pepoináláimi i Pueꞌ? Ba niuliꞌ mepárentákou nodo datu, hai kaiꞌ surona Pueꞌ Iesu tiꞌara piꞌi niparaluu? Kemaroꞌa ntepuꞌu ane mewaliꞌkou datu i popárentána Pueꞌ Ala, bona mepárentáꞌangkaiꞌ woꞌo hingkakani hai kómu.

⁹ Agáiáná tiꞌara maniangkaiꞌ mewaliꞌ datu i duniáꞌ. Mouláꞌ polámbiꞌkuꞌ, kaiꞌ surona Pueꞌ Iesu, napopewaliꞌmongkaiꞌ Pueꞌ Ala tauna to tepaiwóiꞌá tueꞌkiꞌ hangko i upu-upu tauna. Kaiꞌ rapahibaliangkaiꞌ hai tauna to rahuku mate i lindoꞌraꞌ tauna to handaꞌ, to rapengongoꞌi tauna hai malaꞌeka.

¹⁰ Kaiꞌ rarekeꞌangkaiꞌ tobebe láwiꞌ mopahaweꞌangkaiꞌ bámbári kana i Kerisitu, agáiáná kómu, niuliꞌ toSarani to mapándekou! Kaiꞌ, maledeꞌangkaiꞌ, agáiáná kómu, niuliꞌ maróhó pepoináláimi! Kómu to raꞌádái tauna i duniáꞌ, agáiáná kaiꞌ, rasasalaꞌiangkaiꞌ!

¹¹ Haweꞌ deꞌe-deꞌe, tiꞌara gáná pandeꞌkiꞌ, tiꞌara gáná painungkiꞌ, hai tiꞌara woꞌo gáná pewaruꞌkiꞌ. Rapopeahiahiꞌangkaiꞌ oaꞌ. Tiꞌara ara katoroꞌángkiꞌ.

¹² Kaiꞌ mobágóꞌangkaiꞌ matimi mampeliꞌ katueꞌángkiꞌ. Ane araheꞌ to motundaꞌ-tundaꞌangkaiꞌ, kiháwángiheꞌ hai pewátiꞌ. Ane araheꞌ to mampopeahiahiꞌangkaiꞌ, kitódihá peá.

¹³ Ane araheꞌ to mohuwárá laluita to kadake i kaiꞌ, kihániki peheꞌ hai laluita to maꞌálusuꞌ. Haweꞌ deꞌe-deꞌe, terekeꞌangkaiꞌ nodo peá rumpuꞌ to ratibe láwiꞌ tiꞌara piꞌi mobunduꞌ.

¹⁴ Halalu-halalu! Tunggáiángkuꞌ deꞌe tiꞌarakou kupakahiliá, agáiáná moliu laluitangkuꞌ deꞌe, kupaturoꞌkou láwiꞌ kurekeꞌmokou nodo ánáꞌkuꞌ haduduángkuꞌ to kupokaꞌahiꞌ.

¹⁵ Kehapiꞌ i sábuna gurumi to moteteꞌkou i peuláꞌmi i Kerisitu, kódóꞌ peá to nipouma, láwiꞌ kódóꞌ miꞌi to rungu-runguna moánti Ngkóráꞌ Marasa, álána mepoináláikou i Kerisitu Iesu.

¹⁶ Onoꞌ miꞌi haneꞌi kupembiáꞌ ntepuꞌu halalu-halalu, bona nipeuláꞌi bábehiángkuꞌ.

¹⁷ Mewaliꞌ kuhuoꞌ Timotiu lao mampohidupaꞌákou. Timotiu iti mampopolumao oaꞌ bágóꞌna Pueꞌ, hai kurekeꞌ miꞌi ánáꞌkuꞌ to kupokaꞌahiꞌ. Ane haweꞌi i kómu, ina napopambuhinaoákou noumbá peuláꞌkuꞌ i Kerisitu, nodo to kupahaweꞌ miꞌi woꞌo i upu-upu jemaꞌa.

¹⁸ I oloꞌmi ara to mewaliꞌ maꞌángkáꞌ, láwiꞌ rapekiri tiꞌarapoꞌ ina lao mampohidupaꞌákou.

¹⁹ Agáiáná ina laontoaꞌ. Ane napokana Pueꞌ, tiꞌara piꞌi marue ina haweꞌaꞌ. I tempó iti, ina kuita apa to rabábehi tauna to mampepemahile iti, hai ina kuisá ba ara kuasaꞌna Pueꞌ Ala i hira, ba laluitaraꞌ peá.

²⁰ Láwiꞌ ane Pueꞌ Ala mepárentá i laluntaꞌ, hangaa-ngaa tapeuláꞌi peundeꞌáNa, tiꞌara peá i polaluitantaꞌ, agáiáná i bábehiántaꞌ woꞌo, láwiꞌ ara kuasaꞌ to talámbiꞌ hangko i Hia.

²¹ Mewaliꞌ, umbána to niundeꞌ: ane haweꞌaꞌ mopaturoꞌkou hai tiꞌara mani nikábáhá bábehiámi to kadake, ina mahárá polaluitangkuꞌ. Agáiáná ane tebáliki miꞌi bábehiámi, ina maꞌálusuꞌ polaluitangkuꞌ hai maꞌahiꞌ lalungkuꞌ.