1 Korintu 3 - Sura Magasaꞌ: Bahangapa sura Pototowiá to Sae hai Pototowiá to Woꞌu

ToKorintu tiꞌaraheꞌ mohintuwuꞌ

¹ Halalu-halalu, hangkoia i tempóngkuꞌ mani hingkakani hai kómu, tiꞌarakou peisá kupaturoꞌ nodo tauna to molámbiꞌmoheꞌ Inao to Magasaꞌ, agáiáná kupaturoꞌkou nodo tauna to mouláꞌ maniheꞌ peundeꞌána laluraꞌ haduduáraꞌ, láwiꞌ tempó iti, pepoináláimi i Kerisitu tiꞌara mani maróhó; nodo manikou ánáꞌmpálei i lalu pepoináláimi.

² Ane ánáꞌmpálei to mehuhu mani, tiꞌara mani peisá rapoweꞌi andeꞌá. Noꞌonoꞌ woꞌo kómu hangkoia. Kupahaweꞌámokou paturoꞌ to hintotoꞌ i tauna to tiꞌara mani maróhó pepoináláiraꞌ. Tiꞌara manikou kupahaweꞌá paturoꞌ to hintotoꞌ i tauna to maróhó pepoináláiraꞌ. Hai haweꞌ deꞌe-deꞌe, tiꞌara mpuꞌu mani nibuku motarima,

³ láwiꞌ mouláꞌ manikou peundeꞌána lalumi haduduámi. Mahiniꞌ manikou hai pakakou mosisalaꞌ. Iti mopatongawaꞌ kamampeuláꞌimi mani peundeꞌána lalumi haduduámi, hibali hai tauna to tiꞌara mani moisá Pueꞌ.

⁴ Hadua manguliꞌ, “Kódóꞌ tándáꞌ i Pauluaꞌ,” hai hadua manguliꞌ, “Kódóꞌ tándáꞌ i Apoloꞌaꞌ.” Bábehiámi iti nodo bábehiáraꞌ tauna to tiꞌara mani moisá Pueꞌ, to mouláꞌ peá peundeꞌána laluraꞌ haduduáraꞌ.

⁵ Heáná Apolo? Heáná Paulu? Huoꞌána peangkaiꞌ Pueꞌ Ala. Bágóꞌkiꞌ mopaturoꞌkou bona mepoináláikou i Pueꞌ Iesu. Kaiꞌ hadua-hadua mampopolumao bágóꞌ to naweꞌiangkaiꞌ Pueꞌ hai bágóꞌkiꞌ montaniꞌ-ntaniꞌ.

⁶ Peisá rapándiriꞌ node: kódóꞌ to mohawuꞌ, Apolo to mobubuhi, agáiáná Pueꞌ Ala to mopatueꞌ.

⁷ Topohawuꞌ hai topobubuhi, tiꞌara hira ntóáꞌna bágóꞌ iti, bateꞌna peá Pueꞌ Ala, láwiꞌ Ia to mopatueꞌ tudaꞌ-tudaꞌraꞌ duuꞌna mowuaꞌ.

⁸ Topohawuꞌ hai topobubuhi, hibali peheꞌ: ina molámbiꞌheꞌ háwángina hintotoꞌ hai pobágóꞌraꞌ.

⁹ Kódóꞌ hai Apolo hibaliangkaiꞌ, topobágóꞌnaꞌangkaiꞌ Pueꞌ Ala, hai kómu peisá rapándiriꞌ nodo hinoena Pueꞌ Ala. Kómu woꞌo peisákou rapándiriꞌ nodo támbina Pueꞌ Ala.

¹⁰ Ánti kabulána laluna Pueꞌ Ala, kódóꞌ to rungu-runguna moánti Ngkóráꞌ Marasa i kómu. Kódóꞌ peisáꞌaꞌ rapándiriꞌ nodo tauna to mapánde moaró támbi i wongko watu pehodaꞌá támbi, hai tauna ntániꞌna mopaliliu bágóꞌ iti moaró támbi i wongko watu iti. Upu-upu topobágóꞌ hangaa-ngaa maingáꞌ-ingáꞌ bona maroꞌa pobágóꞌraꞌ i Pueꞌ.

¹¹ Mokana i ntóáꞌna pepoináláintaꞌ, tiꞌara ara rárá ntaniꞌ bona peisákeꞌ mewaliꞌ ánáꞌna Pueꞌ Ala, bateꞌna peá mepoináláikeꞌ i Iesu Kerisitu. Onoꞌ miꞌi haneꞌi Iesu Kerisitu rapándiriꞌ nodo watu pehodaꞌá támbi to naꞌaró Pueꞌ Ala. Tiꞌara ara pehodaꞌá támbi to ntániꞌna.

¹² Ane tauna to maroꞌa pampopolumaoraꞌ bágóꞌna Pueꞌ, peisáheꞌ rapándiriꞌ nodo topoaró támbi to mopakeꞌ párewá to maroꞌa, nodo buláwá, peráꞌ hai watu to masuliꞌ. Ane tauna to tiꞌara maroꞌa pampopolumaoraꞌ bágóꞌna Pueꞌ, hira nodoheꞌ topoaró támbi to mopakeꞌ párewá to tiꞌara maroꞌa, nodo kau, rumpuꞌ hai deami.

¹³ Mewaliꞌ, ane támbi naꞌandeꞌ api, ina tongawaꞌ párewána, ba maroꞌai ba tiꞌara, láwiꞌ párewá to maroꞌa ina mantaha, agáiáná párewá to tiꞌara maroꞌa ina pumpu naꞌandeꞌ api. Noꞌonoꞌ woꞌo i kahaweꞌna huleꞌ Pueꞌ, Ia ina mopáresáꞌ bágóꞌna upu-upu tauna, hai ina tongawaꞌ pobágóꞌtaꞌ, ba maroꞌai ba tiꞌara.

¹⁴ I alo pobutusi, Pueꞌ Ala ina mopáresáꞌ pobágóꞌna upu-upu tauna. Ane tongawaꞌ kamaroꞌana, ina molámbiꞌheꞌ háwángina.

¹⁵ Agáiáná ane tiꞌara tongawaꞌ kamaroꞌana pobágóꞌna mouláꞌ popáresáꞌna Pueꞌ, ia ina molámbiꞌ rugiꞌ láwiꞌ tiꞌara ina molámbiꞌ háwángina. Kehapiꞌ ia ina tekábáhá hangko i huku dósána, agáiáná nodo mani tauna to rahore hangko i lalu api.

¹⁶ Tiꞌara paꞌi niꞌisá halalu-halalu: kómu ia miꞌi támbinakou Pueꞌ Ala, hai Inaona Pueꞌ Ala ara i oloꞌmi.

¹⁷ Ane ara tauna to mogero pohintuwuꞌraꞌ taunána Pueꞌ Ala, ia ina nahuku Pueꞌ Ala, láwiꞌ katoroꞌána Pueꞌ Ala magasaꞌ. Kómu to mepoinálái, kómu miꞌi támbi katoroꞌána Pueꞌ Ala iti.

Ineeꞌ mouláꞌ kapánde tauna

¹⁸ Ineeꞌkou modongkoki wátámi haduduámi. Ane ara hadua tauna i oloꞌmi to mampe to mapánde i peitána tauna, rángina miꞌi tauna iti mewaliꞌ nodo tobebe i peitána tauna bona ia mewaliꞌ mapánde i peitána Pueꞌ Ala.

¹⁹ Láwiꞌ apa to rauliꞌ kapánde tauna, hibali hai pekiri tobebe i peitána Pueꞌ Ala. Ara to teukiꞌ i lalu Sura Magasaꞌ node: “Pueꞌ Ala monangiheꞌ oaꞌ tauna to mapánde hai to moakala.” (Aiubi 5:13)

²⁰ Ara woꞌo to teukiꞌ node: “Pueꞌ Ala moisá pekirina tauna to mapánde tiꞌara ara pobunduꞌána.” (Sura Petóiá 94:11)

²¹ Mewaliꞌ, onoꞌ miꞌi haneꞌi kupembiáꞌ bona ineeꞌ nipomahile kapánde hadua tauna, láwiꞌ hinángkáꞌna to niparaluu, mentóáꞌ hangko i Pueꞌ Ala,

²² tepasuaꞌ kódóꞌ, Apolo, Peturuꞌ, katueꞌ to woꞌu, katekábáhámi hangko i kapate, hinángkáꞌna to ara i duniáꞌ, apa to mewaliꞌ i lalu katueꞌmi deꞌe-deꞌe, hai apa to ina mewaliꞌ i alo to ina haweꞌ. Upu-upuna iti mentóáꞌ hangko i Pueꞌ Ala bona mewaliꞌ gáláꞌmi.

²³ Hai kómu miꞌi taunánakou Kerisitu, hai Kerisitu miꞌi Huoꞌána Pueꞌ Ala.