1 Korintu 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paulu mopahaweꞌ Ngkóráꞌ Marasa hangko i kuasaꞌna Inao to Magasaꞌ

¹ Halalu-halalu, i kahaweꞌkuꞌ i kótámi hangkoia, kupahaweꞌámokou bámbári to hangko i Pueꞌ Ala. I tempó iti, tiꞌara kupakeꞌ básá to maꞌángkárá, ba laluita to mouláꞌ kamapándengkuꞌ haduduángkuꞌ.

² Kupolaluita noꞌonoꞌ, láwiꞌ kupakanótó miꞌi i lalungkuꞌ, tiꞌaraꞌaꞌ ina mampolaluita to ntániꞌna, bateꞌna peá Iesu miꞌi Datu Topehómpóꞌ to rapakuꞌ i kau mombehape duuꞌna mate.

³ Tangaꞌkuꞌ mani ara hingkakani hai kómu maledeꞌaꞌ, hai moridiꞌaꞌ ánti kamalááꞌkuꞌ.

⁴ Bámbári to kupahaweꞌákou iti, tiꞌara kupahaweꞌ mouláꞌ kamapándengkuꞌ haduduángkuꞌ, agáiáná kuasaꞌna Inao to Magasaꞌ to mopatongawaꞌ katoꞌuna Ngkóráꞌ Marasa iti,

⁵ bona mepoináláikou. Hai pepoináláimi iti tiꞌara mentóáꞌ hangko i kamapándena tauna, agáiáná mentóáꞌ hangko i kuasaꞌna Pueꞌ Ala.

Inao to Magasaꞌ to mampopaisáꞌákeꞌ paturoꞌ to hangko i Pueꞌ Ala

⁶ Kehapiꞌ noꞌonoꞌ, ane mampolaluitaꞌangkaiꞌ mokana i kapánde i tauna to maróhó miꞌi pepoináláiraꞌ i Kerisitu, kapánde iti tiꞌara mentóáꞌ hangko i duniáꞌ deꞌe, ba hangko i to makuasaꞌ i duniáꞌ, láwiꞌ to makuasaꞌ i duniáꞌ deꞌe ina mokahópóꞌá.

⁷ Agáiáná to kipahaweꞌákou, ia miꞌi kapánde to hangko i Pueꞌ Ala. Kipahaweꞌ tunggáiáNa Pueꞌ Ala mampoweꞌikeꞌ katueꞌ to meawaꞌ i alo bókóꞌna. Hangkoia, tunggáiáNa iti tewuniángi mani, tiꞌara raisá tauna. Agáiáná hangko tiꞌara mani Napopewaliꞌ duniáꞌ deꞌe, Pueꞌ Ala mopakanótó miꞌi ami kaꞌina Naweꞌintaꞌ katueꞌ to maroꞌa bona meawaꞌkeꞌ woꞌo.

⁸ Agáiáná tadulako i duniáꞌ deꞌe, tiꞌara raisá tunggáiána Pueꞌ Ala, láwiꞌ ane keraisái, ketiꞌaraheꞌ mopakuꞌ Pueꞌtaꞌ to meawaꞌ tueꞌNa i kau mombehape.

⁹ Agáiáná nodo to teukiꞌ i lalu Sura Magasaꞌ: “Heáná tauna to mampokaꞌahiꞌ Pueꞌ Ala, Napopatimamaꞌámoheꞌ to maroꞌa ntepuꞌu, to tiꞌara mani raita ba rahádi tauna, hai to tiꞌara mani haweꞌ hangkani mesupaꞌ i pekiri tauna.”

¹⁰ Kitaꞌ deꞌe, taisá miꞌi tunggáiána Pueꞌ Ala, láwiꞌ tunggáiáNa iti napopaisáꞌámokeꞌ Pueꞌ Ala moliu Inao to Magasaꞌ. Hai tiꞌara ara to tewuniángi hangko i Inao to Magasaꞌ, láwiꞌ Ia to mopáresáꞌ hinángkáꞌna, tepasuaꞌ tunggáiána Pueꞌ Ala to tiꞌara mani raisá tauna.

¹¹ Láwiꞌ to moisá apa to ara i pekirina hadua tauna, ia peá haduduána. Noꞌonoꞌ woꞌo, to moisá apa to ara i pekirina Pueꞌ Ala, bateꞌna peá Inaona Pueꞌ Ala haduduáNa.

¹² Hai kitaꞌ deꞌe, tiꞌarakeꞌ molámbiꞌ pekiri hangko i duniáꞌ deꞌe, agáiáná molámbiꞌkeꞌ pekiri hangko i Inaona Pueꞌ Ala bona taisá apa to naweꞌikeꞌ Pueꞌ Ala hangko i kabulána laluNa.

¹³ Mewaliꞌ, ane mepaturoꞌangkaiꞌ mokana i Ngkóráꞌ Marasa, tiꞌarakou kipaturoꞌ mouláꞌ kamapándengkiꞌ haduduángkiꞌ, agáiáná mepaturoꞌangkaiꞌ hai laluita to hangko i Inao to Magasaꞌ, i tauna to molámbiꞌmoheꞌ Inao to Magasaꞌ.

¹⁴ Tauna to tiꞌara moisá Pueꞌ Ala, tiꞌaraheꞌ mampokana paturoꞌ to hangko i Inaona Pueꞌ Ala, láwiꞌ rauliꞌ riꞌi, “Paturoꞌ iti tiꞌara mesuaꞌ i akala.” Tiꞌara rabuku motarima paturoꞌ to hangko i Inaona Pueꞌ Ala, láwiꞌ Inao to Magasaꞌ iti tiꞌara mokale i laluraꞌ.

¹⁵ Kitaꞌ to molámbiꞌmokeꞌ Inao to Magasaꞌ, manótó miꞌi laluntaꞌ mopáresáꞌ hinángkáꞌna: ba maroꞌai ba tiꞌara. Agáiáná tauna to tiꞌara moisá Pueꞌ Ala, tiꞌara rabuku mopáresáꞌ apa to ara i laluntaꞌ,

¹⁶ láwiꞌ teukiꞌ miꞌi i lalu Sura Magasaꞌ: “Heáná paꞌi to moisá pekirina Pueꞌ Ala? Heáná paꞌi to peisá mopaturoꞌ Pueꞌ Ala?” (Iesaia 40:13) Agáiáná kitaꞌ deꞌe, naweꞌimokeꞌ Pueꞌ Ala pekiri to hibali hai pekirina Kerisitu.