1 Korintu 16 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paulu membiáꞌ bona toKorintu morámpuheꞌ dóiꞌ petulungi

¹ Kaliliuána halalu-halalu, ina molaluitaꞌaꞌ kana i dóiꞌ to ina nirámpu bona motulungikou halalu hampepepoináláintaꞌ i kótá Ierusale to meahiahiꞌ tueꞌraꞌ. Kupembiáꞌ bona nirámpu dóiꞌ petulungimi mouláꞌ apa to kupaturoꞌámoheꞌ i jemaꞌa-jemaꞌa to ara i tampoꞌ Galatia.

² Ineeꞌ miꞌi nipegiá kahaweꞌkuꞌ hangko nirámpu riꞌi apa to ina nipakatuáheꞌ. Agáiáná haminggu-haminggu i alo Minggu, nipataniꞌ sieruꞌ dóiꞌ iti i támbimi mouláꞌ polámbiꞌámi hadua-hadua, hai niwoli mpakaroꞌa duuꞌkuꞌ haweꞌ.

³ Ane haweꞌmoꞌ, nipileꞌiheꞌ hangko i oloꞌmi tauna to peisá rapoinálái, bona kuweꞌiheꞌ sura ratibaaꞌ, hai kuhuoꞌheꞌ lao i Ierusale moánti dóiꞌ petulungimi.

⁴ Hai ane raparaluuaꞌ, ina laontoaꞌ woꞌo hingkakani hai hira.

Paulu moliwo ina lao i Korintu

⁵ Ara poliwongkuꞌ ina moweoꞌkou ane rooaꞌ moweoꞌ jemaꞌa-jemaꞌa to ara i tampoꞌ Makedonia, láwiꞌ kupoinao sieruꞌ lao i hira.

⁶ Peundeꞌángkuꞌ bona marueaꞌ hantóiꞌ hingkakani hai kómu. Babilaꞌ ina toroꞌaꞌ i kómu duuꞌna liu tempó lengiꞌ, hai roo onoꞌ peisáꞌaꞌ nipopeángkáꞌ mopaliliu polumaongkuꞌ lao i tampoꞌ ntániꞌna.

⁷ Tiꞌara kuꞌundeꞌ mehupeꞌ peá hampaiꞌ i kómu. Ane napokana Pueꞌ, kupoinao bona marueaꞌ hantóiꞌ hingkakani hai kómu.

⁸ Agáiáná deꞌe-deꞌe, hangaa-ngaa toroꞌaꞌ sieruꞌ ieneꞌ i Epesu duuꞌna haweꞌ Alo Pentakosta,

⁹ láwiꞌ kehapiꞌ handaꞌheꞌ tauna to moewaꞌaꞌ, mobunduꞌ ntepuꞌu pobágóꞌkuꞌ ieneꞌ.

Timotiu hai Apolo

¹⁰ Ane haweꞌ Timotiu, kuhárungá nitarima mpakaroꞌa hai niádái, láwiꞌ ia mampopolumao bágóꞌna Pueꞌ hibali hai kódóꞌ.

¹¹ Mewaliꞌ, ineeꞌ ara to mopakóiꞌ. Kupembiáꞌ woꞌo bona nipopeángkáꞌ mpakaroꞌa ane mesuleꞌi mai i kódóꞌ, láwiꞌ kupegiá ieneꞌ kahaweꞌna hingkakaniheꞌ hai halalu hampepepoináláintaꞌ.

¹² Kaliliuána, ane halaluntaꞌ Apolo, mompakani-kani miꞌi kuhuoꞌ bona mampohingkakaniá halalu hampepepoináláintaꞌ to ntániꞌna to ina lao moweoꞌkou i Korintu. Deꞌe-deꞌe tiꞌara mani naundeꞌ lao, agáiáná ane arai lógána, ia ina lao moweoꞌkou.

Kahópóꞌána sura

¹³ Maingáꞌ-ingáꞌkou. Nipakaróhó pepoináláimi! Nipakaróhó lalumi! Nitibaaꞌ oaꞌ pepoináláimi!

¹⁴ Apa peá to nibábehi, hangaa-ngaa nibábehi hangko i lalumi to bukeꞌ ahiꞌ.

¹⁵ Halalu-halalu, niꞌisá miꞌi Setepana hantámbi to rungu-runguna mewaliꞌ toSarani i tampoꞌ Akaia. Mohuhuꞌheꞌ katueꞌraꞌ i Pueꞌ bona motulungiheꞌ halalu hampepepoináláiraꞌ.

¹⁶ Mewaliꞌ halalu-halalu, kupembiáꞌ bona nipeuláꞌi paturoꞌraꞌ Setepana hantámbi, hai paturoꞌraꞌ upu-upu rángáraꞌ to mampopolumao bágóꞌna Pueꞌ.

¹⁷ Góeꞌ lalungkuꞌ láwiꞌ haweꞌmoheꞌ Setepana, Potunatu hai Akaikusi hangko i kótá Korintu. Hira miꞌi to kurekeꞌ sulewátámi to mai motulungiaꞌ ieneꞌ.

¹⁸ Halaluntaꞌ iti mopakaróhó lalungkuꞌ, hai biásáheꞌ woꞌo mopakaróhó lalumi. Onoꞌ miꞌi haneꞌi kupembiáꞌ bona nibiláꞌheꞌ tauna to noꞌonoꞌ.

¹⁹ Upu-upu jemaꞌa to ara i poropensi Asia mopahaweꞌ tabeáraꞌ i kómu. Akila hai Pirikila hingkakani hai upu-upu toSarani to maminggu i támbiraꞌ, mopahaweꞌ woꞌo tabeáraꞌ i lalu hangaꞌna Pueꞌ.

²⁰ Tabeá hangko i upu-upu halalumi ieneꞌ i Epesu. Ane hirámpukou maminggu, mombetabe-tabekou hangko i lalumi ntepuꞌu.

²¹ Kahópóꞌána sura deꞌe kuꞌukiꞌ hai taengkuꞌ haduduángkuꞌ. Tabeá hangko i kódóꞌ Paulu!

²² Tauna to tiꞌara mampokaꞌahiꞌ Pueꞌ Iesu, háráráheꞌ i Pueꞌ Ala. Maranata! MaimoKoꞌ, Pueꞌ!

²³ Kupembiáꞌ bona Pueꞌ Iesu mowátiꞌkou upu-upu!

²⁴ Kupokaꞌahiꞌkou i lalu hangaꞌna Kerisitu Iesu. Ami. Hangko i kódóꞌ, PAULU