1 Korintu 14 - Sura Magasaꞌ: Bahangapa sura Pototowiá to Sae hai Pototowiá to Woꞌu

Mahile bunduꞌna mopahaweꞌ laluitana Pueꞌ Ala

¹ Mewaliꞌ to hangaa-ngaa tapaioru ia miꞌi mampokaꞌahiꞌkeꞌ hángká rángántaꞌ, hai hangaa-ngaa tapoinao ntepuꞌu molámbiꞌ kapánde hangko i Inao to Magasaꞌ. Agáiáná kapánde to pobunduꞌ ntepuꞌu ia miꞌi kapánde mopahaweꞌ laluita to hangko i Pueꞌ Ala.

² Tauna to molaluita i lalu básá to naweꞌiheꞌ Inao to Magasaꞌ, tiꞌaraheꞌ mopahaweꞌ laluita iti i tauna, agáiáná molaluitaraheꞌ hai Pueꞌ Ala, láwiꞌ tauna ntániꞌna tiꞌaraheꞌ moisá apa to rauliꞌ. Ánti peteteꞌna Inao to Magasaꞌ, mampolaluitaheꞌ apa to tewuniángi i tauna.

³ Agáiáná tauna to mopahaweꞌ laluita to hangko i Pueꞌ Ala, laluitaraꞌ iti rapahaweꞌ i tauna, bona mopakaróhó laluraꞌ, modendeꞌheꞌ, hai mopalindó laluraꞌ.

⁴ Tauna to molaluitaheꞌ i lalu básá to hangko i kuasaꞌ Inao to Magasaꞌ, mopakaróhó peheꞌ laluraꞌ haduduáraꞌ, agáiáná tauna to mopahaweꞌheꞌ laluita to hangko i Pueꞌ Ala, mopakaróhó laluraꞌ upu-upu tauna i lalu jemaꞌa.

⁵ Peundeꞌángkuꞌ halalu-halalu, bona kómu upu-upu peisákou molaluita i lalu básá to hangko i kuasaꞌ Inao to Magasaꞌ, agáiáná maroꞌa mani ane mopahaweꞌkou laluita hangko i Pueꞌ Ala, láwiꞌ ane mopahaweꞌkou laluita hangko i Pueꞌ Ala, mahile pobunduꞌána i tauna ntániꞌna haneꞌi ane molaluitakou i lalu básá to hangko i kuasaꞌ Inao to Magasaꞌ. Agáiáná ane ara to molimbá básá iti bona tongawaꞌ lempóna, ina melumbuꞌ pobunduꞌána mopakaróhó laluraꞌ upu-upu tauna i lalu jemaꞌa.

⁶ Mewaliꞌ halalu-halalu, ane rápáꞌna laoaꞌ maminggu hingkakani hai kómu, hai molaluitaꞌaꞌ i lalu básá to hangko i kuasaꞌ Inao to Magasaꞌ, apa miꞌi bunduꞌna i kómu? Agáiáná mobunduꞌ ntepuꞌu ane kupahaweꞌákou apa to napatongawaꞌáꞌaꞌ Pueꞌ Ala, ba mopakanótóaꞌ tunggáiána Pueꞌ Ala, ba mopahaweꞌaꞌ laluita hangko i Pueꞌ, ba mepaturoꞌaꞌ i lalu básá to niꞌisá.

⁷ Mogalo riꞌi párewá to mokániꞌ nodo tulali ba dunde, ane tiꞌara ratawueꞌ ba rakáwiꞌ mpakaroꞌa, tiꞌara ara pobunduꞌána. Tauna to mampehádingi tiꞌara moisá lengkoꞌna pokániꞌna.

⁸ Hai ane ara tamburuꞌ to ratawueꞌ bona mokióꞌ surudadoꞌ lao mombeala, agáiáná ane tiꞌara maroꞌa karatawueꞌnaꞌ, heáná to ina timama lao mombeala?

⁹ Noꞌonoꞌ woꞌo kómu: ane molaluitakou i lalu básá to tiꞌara raisá tauna ntániꞌna, noumbá miꞌi karaisána lempóna apa to niuliꞌ? Upu-upu laluitami mbero-mbero peá, nodo wui to poliu.

¹⁰ I duniáꞌ deꞌe, mampopengaa básá, hai upu-upuna básá ara lempóna.

¹¹ Agáiáná ane ara tauna to mampolaluitaꞌákeꞌ i lalu básá to tiꞌara taisá, ina tapowuli peá apa to nauliꞌ. Noꞌonoꞌ woꞌo, ane kitaꞌ molaluita i lalu básá to tiꞌara raisá, ina rapowuli peá apa to tauliꞌ.

¹² Mewaliꞌ kómu halalu-halalu, nipoinao ntepuꞌu molámbiꞌ kapánde hangko i Inao to Magasaꞌ. Mewaliꞌ hangaa-ngaa nipembiáꞌ to mobunduꞌ ntepuꞌu, ia miꞌi kapánde to mopakaróhó laluraꞌ upu-upu tauna i lalu jemaꞌa.

¹³ Onoꞌ miꞌi haneꞌi, heáná to molaluita i lalu básá to hangko i kuasaꞌ Inao to Magasaꞌ, rángina miꞌi membiáꞌ i Pueꞌ bona molámbiꞌ kapánde molimbá laluitana iti, bona upu-upu tauna to mampehádingi ina moisá lempóna.

¹⁴ Láwiꞌ ane mekakaekeꞌ mopakeꞌ básá to hangko i Inao to Magasaꞌ, mekakaekeꞌ hangko i laluntaꞌ, agáiáná tiꞌara moliu pekirintaꞌ láwiꞌ tiꞌara taisá apa lempóna upu-upu to tahuwárá.

¹⁵ Mewaliꞌ, apa to hangaa-ngaa tabábehi? Ina mekakaekeꞌ i laluntaꞌ mopakeꞌ básá to hangko i kuasaꞌ Inao to Magasaꞌ, hai ina mekakaekeꞌ woꞌo mopakeꞌ básá to raisá hángká rángántaꞌ. Noꞌonoꞌ woꞌo, ina monanikeꞌ motóiá Pueꞌ Ala i laluntaꞌ mopakeꞌkeꞌ básá to hangko i Inao to Magasaꞌ, hai ina monanikeꞌ motóiá Pueꞌ Ala mopakeꞌ básá to raisá tauna ntániꞌna.

¹⁶ Ane rápáꞌna manguliꞌkeꞌ handaꞌ kamaroꞌana i Pueꞌ Ala i lalu básá to hangko i Inao to Magasaꞌ peá, tauna to mohádi tiꞌara ina moisá lempóna, mewaliꞌ tiꞌaraheꞌ peisá manguliꞌ “Ami” hai mampokana pekakae iti.

¹⁷ Kehapiꞌ maroꞌa miꞌi pekakaentaꞌ manguliꞌ handaꞌ kamaroꞌana i Pueꞌ Ala, tiꞌara ina mobunduꞌ i hángká rángántaꞌ, láwiꞌ pekakaentaꞌ iti tiꞌara ina mopakaróhó laluraꞌ.

¹⁸ Kuꞌuliꞌ handaꞌ kamaroꞌana i Pueꞌ Ala láwiꞌ peisáꞌaꞌ molaluita i lalu básá to hangko i Inao to Magasaꞌ melumbuꞌ hangko i kómu upu-upu.

¹⁹ Agáiáná ane maminggukeꞌ, rángingkuꞌ mopahaweꞌ hantepóꞌ rontepóꞌ peá laluita mopaturoꞌ tauna, haneꞌi mohuwárá handaꞌ laluita i lalu básá to hangko i Inao to Magasaꞌ, agáiáná tiꞌara raisá tauna apa lempóna.

²⁰ Halalu-halalu! Ineeꞌkou mampekiri nodo ánángkóiꞌ. Hangaa-ngaa mampekirikou nodo tauna to manginao miꞌi, hai hangaa-ngaa nodokou ánáꞌmpálei to tiꞌara mani moisá apa-apa mokana i bábehiá to kadake.

²¹ I lalu Ngkóráꞌna Pueꞌ Ala, teukiꞌ node mokana i toIahudiꞌ: Nauliꞌ Pueꞌ Ala, “Moliu laluitaraꞌ tauna to tiꞌara toIahudiꞌ ina Kupaturoꞌ tauna deꞌe. Ina Kukióꞌheꞌ tauna hangko i tampoꞌ to karaoꞌ bona mopahaweꞌheꞌ laluitaNgkuꞌ i taunáNgkuꞌ i lalu básá to tiꞌara raisá. Agáiáná kehapiꞌ noꞌonoꞌ, tiꞌaraheꞌ ina mampoinálái laluitaNgkuꞌ.” (Iesaia 28:11-12)

²² Mewaliꞌ, ane arakeꞌ to molaluita i lalu básá to hangko i kuasaꞌ Inao to Magasaꞌ, laluitantaꞌ iti mewaliꞌ tandaꞌ kuasaꞌ hangko i Pueꞌ Ala i tauna to tiꞌara mani mepoinálái i Hia, tiꞌara riꞌi i tauna to mepoinálái. Agáiáná ane mopahaweꞌkeꞌ laluita to hangko i Pueꞌ Ala, laluitantaꞌ iti mewaliꞌ tandaꞌ kuasaꞌ hangko i Pueꞌ Ala i tauna to mepoinálái, tiꞌara i tauna to tiꞌara mepoinálái.

²³ Kehapiꞌ noꞌonoꞌ, ane araheꞌ tauna to tiꞌara toSarani ba to tiꞌara mani moisá ngkóráꞌna Pueꞌ Ala, hai laoheꞌ maminggu hingkakani hai kómu, apa to ina rauliꞌ ane kómu upu-upu molaluita i lalu básá to hangko i Inao to Magasaꞌ? Manótó ina rauliꞌ magilakou.

²⁴ Agáiáná ane upu-upukou mopahaweꞌ laluita to hangko i Pueꞌ Ala, hai mesuaꞌ hadua tauna to tiꞌara toSarani, ba to tiꞌara mani moisá ngkóráꞌna Pueꞌ Ala, ia ina moisá lempóna laluitami álána ina naisá kamadósána,

²⁵ hai upu-upu to tewuniángi i laluna ina tebungkáhi. Kahópóꞌána, ia ina molingkudu menómbá i Pueꞌ Ala, haneꞌi manguliꞌ, “Toꞌu ntepuꞌu Pueꞌ Ala ara i oloꞌmi!”

Ane maminggukeꞌ, upu-upu hangaa-ngaa raꞌatoroꞌ maroꞌa

²⁶ Mewaliꞌ halalu-halalu, apa lempóna upu-upuna iti? Ane maminggukou, hadua-hadua hangaa-ngaa mopakeꞌ kamapándena bona mopakaróhó laluraꞌ hángká rángámi: ara to monani, ara to mepaturoꞌ, ara to mopahaweꞌ laluita to hangko i Pueꞌ Ala, ara to molaluita i lalu básá to hangko i Inao to Magasaꞌ, hai ara to molempónga laluitaraꞌ iti bona raisá upu-upu tauna.

²⁷ Ane araheꞌ tauna to molaluita i lalu básá to hangko i Inao to Magasaꞌ, rángina miꞌi rodua ba tálu peá, ineeꞌ melábi. Hai ineeꞌheꞌ molaluita sangkani, hangaa-ngaa mombeháwá-háwáheꞌ. Hai hangaa-ngaa ara tauna to molimbánga laluitaraꞌ bona raisá lempóna.

²⁸ Ane tiꞌara ara to molempónga laluitaraꞌ, tauna to peisá molaluita i lalu básá to hangko i Inao to Magasaꞌ hangaa-ngaa maniiꞌ peheꞌ ane maminggu. Rángina miꞌi molaluitaheꞌ i Pueꞌ Ala i laluraꞌ peá.

²⁹ Ane araheꞌ to mopahaweꞌ laluita to hangko i Pueꞌ Ala, magáná miꞌi rodua ba tálu peheꞌ to molaluita, hai hangaa-ngaa ara tauna ntániꞌna to mopáresáꞌ laluitaraꞌ iti, ba hangko i Pueꞌ Ala ba tiꞌara.

³⁰ Ane rápáꞌna ara hadua tauna to mehoda to molámbiꞌ popakanótó hangko i Pueꞌ Ala, rángina miꞌi tauna to tangaꞌna molaluita mengkaroo sieruꞌ, bona rángána peisá molaluita.

³¹ Mewaliꞌ, peisákou mombeháwá-háwá mopahaweꞌ laluita to hangko i Pueꞌ Ala, bona upu-upukou molámbiꞌ paturoꞌ to mopakaróhó lalumi.

³² Tauna to mopahaweꞌ laluita to hangko i Pueꞌ Ala hangaa-ngaa mopakanótó ba tempóna miꞌi molaluita ba tiꞌara mani.

³³ Rárá penómbá hangaa-ngaa rapopolumao mpakaroꞌa, hintotoꞌ hai peundeꞌána Pueꞌ Ala. Tiꞌara naundeꞌ Pueꞌ ane araheꞌ tauna to mohewo-hewo. Nodo to mewaliꞌ i lalu jemaꞌa-jemaꞌa iumbá-umbá peá,

³⁴ towawine hangaa-ngaa maniiꞌ-niiꞌ ane maminggu. Tiꞌaraheꞌ rapaliu molaluita, hangaa-ngaa mengkoruꞌheꞌ nodo to teukiꞌ i lalu áturána Pueꞌ Ala.

³⁵ Ane mampoinaoheꞌ moisá ba apa peá, rángina miꞌi rapekuneꞌ rái i toámáraꞌ i támbi, láwiꞌ tiꞌara hintotoꞌ towawine molaluita ane tangaꞌ maminggu.

³⁶ Ba niuliꞌ ripaꞌi kómu miꞌi to rungu-runguna mopahaweꞌ ngkóráꞌna Pueꞌ Ala? Ba niuliꞌ ripaꞌi ngkóráꞌna Pueꞌ Ala rapahaweꞌ peá i kómu? Ineeꞌ nipekiri noꞌonoꞌ.

³⁷ Ane araheꞌ tauna to manguliꞌ, “Molámbiꞌaꞌ kapánde mopahaweꞌ laluita to hangko i Pueꞌ Ala,” ba “Molámbiꞌaꞌ kapánde hangko i Inao to Magasaꞌ,” tauna iti hangaa-ngaa mopangákuꞌ to kuꞌukiꞌ deꞌe ia miꞌi párentá hangko i Pueꞌ.

³⁸ Agáiáná ane tiꞌaraheꞌ mampoinálái paturoꞌkuꞌ deꞌe, ineeꞌheꞌ woꞌo nipoinálái!

³⁹ Mewaliꞌ halalu-halalu, hangaa-ngaa nipoinao ntepuꞌu bona molámbiꞌkou kapánde mopahaweꞌ laluita to hangko i Pueꞌ Ala, agáiáná ineeꞌheꞌ woꞌo nikóntó to molaluita i lalu básá to hangko i kuasaꞌ Inao to Magasaꞌ.

⁴⁰ Upu-upuna hangaa-ngaa nibábehi mouláꞌ rárá to hintotoꞌ hai mouláꞌ áturá to maroꞌa.