1 Korintu 10 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paulu mampopambuhinaoáheꞌ bona ineeꞌheꞌ menómbá i ánitu

¹ Halalu-halalu, kuꞌundeꞌ bona nibuhinao oaꞌ apa to mewaliꞌ hangkoia i toioruntaꞌ to naꞌánti nabiꞌ Musa mesuwuꞌ hangko i tampoꞌ Másiriꞌ. I kapohuꞌraꞌ iti, Pueꞌ Ala mampoioruáheꞌ hai gawu. Upu-upuheꞌ mengkalimba i tahiꞌ Malei to nagááꞌ Pueꞌ Ala bona rapoliui.

² Nodoheꞌ to rariu i lalu gawu hai uwai, tandaꞌ kamewaliꞌraꞌ topeuláꞌna Musa.

^3-4 Hira upu-upu mandeꞌ pandeꞌ to hibali, hai mainuheꞌ uwai to hibali to hangko i Pueꞌ Ala. Mainuheꞌ uwai to mesupaꞌ hangko i watu to mahile, hai watu iti rapándiriꞌ nodo Kerisitu to mamporángáheꞌ hai mampoweꞌiheꞌ katueꞌ.

⁵ Agáiáná kehapiꞌheꞌ molámbiꞌ handaꞌ pákáꞌna pewátiꞌ hangko i Pueꞌ Ala, ánti kakadakena bábehiáraꞌ, handaꞌ i oloꞌraꞌ to tiꞌara napomaroꞌa Pueꞌ Ala, onoꞌ miꞌi haneꞌi mateheꞌ hai wátáraꞌ kawaliónga i pádá loriꞌ.

⁶ Upu-upu to mewaliꞌ i toIahudiꞌ hangkoia mewaliꞌ pándiriꞌ i kitaꞌ, bona tiꞌarakeꞌ mampeuláꞌi bábehiáraꞌ to kadake.

⁷ Ineeꞌkeꞌ menómbá i lenggeꞌ ánitu, nodo to rabábehi hanggááꞌ hangko i oloꞌraꞌ hangkoia. Láwiꞌ ara teukiꞌ i lalu Sura Magasaꞌ to manguliꞌ: “Mandeꞌheꞌ hai mainu hingkani-ngkani. Roo onoꞌ motaró-taróheꞌ, menómbáheꞌ i ánitu.” (Pesuwuꞌá 32:1-6)

⁸ Ineeꞌkeꞌ mobábehi bábehiá to metitidiꞌi, nodo to rabábehi hanggááꞌ hangko i oloꞌraꞌ. Ánti bábehiáraꞌ iti, mateheꞌ rompuloꞌ hai tálu sábuna tauna i lalu hangaloá.

⁹ Ineeꞌkeꞌ mampehukáꞌ Pueꞌ, nodo to rabábehi hanggááꞌ hangko i oloꞌraꞌ, haneꞌiheꞌ mate natilóꞌ lelótó.

¹⁰ Hai ineeꞌkeꞌ mohume-hume, nodo to rabábehi hanggááꞌ hangko i oloꞌraꞌ, haneꞌiheꞌ napapate malaꞌeka.

¹¹ Upu-upu to mewaliꞌ i hira hangkoia teukiꞌ mewaliꞌ pándiriꞌ i kitaꞌ deꞌe-deꞌe. Hai upu-upuna iti mewaliꞌ pepaingáꞌi i kitaꞌ, bona tiꞌarakeꞌ molámbiꞌ pehukuna Pueꞌ Ala hibali hai hira. Láwiꞌ kitaꞌ deꞌe, tueꞌkeꞌ i tempó to kahópóꞌána.

¹² Mewaliꞌ, ane ara to manguliꞌ, “Maróhó ntepuꞌu pepoináláingkuꞌ i Pueꞌ,” hangaa-ngaa maroꞌa-roꞌakou bona tiꞌarakou manawoꞌ i lalu dósá!

¹³ Hinángkáꞌ pekeloꞌ to morampekou, pekeloꞌ to biásá mewaliꞌ i tauna, agáiáná Pueꞌ Ala tetidaꞌ oaꞌ i dándiNa: tiꞌarakou ina Napatodáhi rakeloꞌ melumbuꞌ hangko i róhóna lalumi. Ane narampekou pekeloꞌ, Pueꞌ Ala ina mampoweꞌikou rárá bona peisákou mantaha.

Ineeꞌkou mampesuaꞌi ádá penómbá i ánitu

¹⁴ Mewaliꞌ halalu-halalu to kupokaꞌahiꞌ, hangaa-ngaa nikaraohi ádá penómbá i ánitu!

¹⁵ Molaluitaꞌaꞌ i kómu, láwiꞌ kurekeꞌkou tauna to manótó. Kupembiáꞌ bona nipekiri laluitangkuꞌ deꞌe toꞌu ba tiꞌara.

¹⁶ Ane mainukeꞌ anggoroꞌ, hai tauliꞌ handaꞌ kamaroꞌana i Pueꞌ Ala, lempóna: tabuhinao waheꞌna Kerisitu to mabubu miꞌi i kau mombehape. Apa to tabábehi iti, mopakanótó kakitaꞌna tauna to nasulewátái Kerisitu hai waheꞌNa. Hai ane rapogáláꞌ-gáláꞌákeꞌ rótiꞌ haneꞌi taꞌandeꞌ, tabuhinao kamatena Kerisitu i kau mombehape. Iti woꞌo mopakanótó kakitaꞌna hawátá-wátákeꞌ hai Kerisitu,

¹⁷ láwiꞌ rótiꞌ iti hambuaꞌ peá ragáláꞌ-gáláꞌákeꞌ haneꞌi taꞌandeꞌ. Lempóna: kitaꞌ to handaꞌ mohintuwuꞌkeꞌ hai Kerisitu.

¹⁸ Noꞌonoꞌ woꞌo ádáraꞌ toSáráeliꞌ. Ane mohuhuꞌheꞌ popenómbáraꞌ i Pueꞌ Ala i wongko paintuá popenómbá, hira hangaa-ngaa mandeꞌheꞌ hanggááꞌ hangko i popenómbá iti, tandaꞌ pohintuwuꞌraꞌ hai popenómbáraꞌ iti i Pueꞌ Ala.

¹⁹ Apa tunggáiángkuꞌ manguliꞌ noꞌonoꞌ? Tiꞌara kuꞌuliꞌ ara pueꞌ i rawa hangko i Pueꞌ Ala. Hai tiꞌara woꞌo kuꞌuliꞌ ara bunduꞌna pandeꞌ to rapopenómbá i ánitu.

²⁰ Tunggáiángkuꞌ node: upu-upu to rapopenómbá i ánitu, tiꞌara rapopenómbá i Pueꞌ Ala, mole rapopenómbá riꞌi i setáꞌ. Hai tiꞌara kuꞌundeꞌ ane mohintuwuꞌkou hai setáꞌ.

²¹ Tiꞌara hintotoꞌ ane kómu to mainu anggoroꞌ tandaꞌ pohintuwuꞌmi hai Pueꞌ Iesu, mainukou woꞌo anggoroꞌ hingkakani hai hira to menómbáheꞌ i setáꞌ. Tiꞌara woꞌo hintotoꞌ ane kómu to mandeꞌ rótiꞌ mambuhinao kamatena Pueꞌ, mandeꞌkou woꞌo hingkakani hai tauna to menómbá i setáꞌ.

²² Ba maroꞌa ane mampehukáꞌkou Pueꞌ Ala haneꞌi Ia mohiriꞌ láwiꞌ menómbákou i ánitu? Ba nipekiri melumbuꞌ kamakuasaꞌmi haneꞌi Pueꞌ?

Pandeꞌ to rapopenómbá i ánitu peisá taꞌandeꞌ

²³ Ara to manguliꞌ, “Ánti kanakábáhántaꞌ Pueꞌ Ala hangko i huku dósántaꞌ, onoꞌ miꞌi haneꞌi peisákeꞌ mobábehi apa peá mouláꞌ peundeꞌántaꞌ haduduántaꞌ.” Toꞌu laluita iti, agáiáná kuhángáꞌáꞌákou: ara to mobunduꞌ to peisá tabábehi; ara woꞌo to tiꞌara mobunduꞌ. Peisákeꞌ mobábehi apa peá mouláꞌ peundeꞌántaꞌ, agáiáná tiꞌara upu-upu mopakaróhó laluna hángká rángántaꞌ.

²⁴ Lempóna: ineeꞌ pekou mampeliꞌ porasiꞌámi haduduámi. Hangaa-ngaa mobábehikou woꞌo apa to peisá motulungi hángká rángámi.

²⁵ Hinángkáꞌ bauꞌ to rapobaluꞌ i pobaluꞌ-baluꞌá, peisá nihóló hai niandeꞌ. Tiꞌarakou paraluu mekuneꞌ sieruꞌ ba pandeꞌ iti rapopenómbá miꞌi i ánitu ba tiꞌara. Upu-upuna iti peisá niandeꞌ i kabulána lalumi,

²⁶ láwiꞌ “Duniáꞌ deꞌe hai upu-upu óntóꞌna, Pueꞌ Ala pueꞌna.” (Sura Petóiá 24:1)

²⁷ Ane nakióꞌkou rángámi to tiꞌara toSarani lao mandeꞌ i támbina hai laokou, peisákou mandeꞌ apa peá to napatimamaꞌákou. Tiꞌara paraluu nipekuneꞌ ba bauꞌ iti rapopenómbá miꞌi i ánitu, láwiꞌ upu-upuna iti peisá niandeꞌ, tiꞌara paraluu bata-bata lalumi.

^28-29 Agáiáná ane ara to mandeꞌ ionoꞌ to mohángáꞌákou, “Bauꞌ iti rapopenómbá miꞌi i ánitu,” ineeꞌ niandeꞌ bona tiꞌarakou mopakasusa laluna rángámi iti. Ane i kitaꞌ haduduántaꞌ, tiꞌara moapa ane taꞌandeꞌ pandeꞌ iti. Babilaꞌ ara to mekuneꞌ, “Moapa riꞌi haneꞌi peundeꞌángkuꞌ napakanótó riꞌi to haduána?

³⁰ Ane kuandeꞌ bauꞌ iti, hai kuꞌuliꞌ handaꞌ kamaroꞌana i Pueꞌ Ala, moapa riꞌi haneꞌi ara maniheꞌ tauna to mosalaꞌiaꞌ?”

³¹ Agáiáná kuꞌuliꞌ: ane mandeꞌkeꞌ ba mainukeꞌ, ba apa peá to tabábehi, hangaa-ngaa tabábehi bona Pueꞌ Ala rapomahile.

³² Ineeꞌkou mobábehi apa to ina mopakanawoꞌ hángká rángámi, maroꞌa toIahudiꞌ, maroꞌa tauna to tiꞌara toIahudiꞌ, ba halalu hampepepoináláimi to mengkoruꞌ i Pueꞌ Ala.

³³ Noꞌonoꞌ woꞌo kódóꞌ, i pákáꞌ-pákáꞌna kubábehi oaꞌ apa to maroꞌa i peitáraꞌ upu-upu tauna. Tiꞌaraꞌaꞌ mampeliꞌ porasiꞌángkuꞌ peá, agáiáná kubábehi apa to ina mobunduꞌ i tauna ntániꞌna bona molámbiꞌheꞌ katehómpóꞌ.