1 Korintu 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

^1-2 Sura deꞌe to hangko i kódóꞌ Paulu hai hangko i halalu hampepepoináláintaꞌ Sotene, kipakatu i jemaꞌa-jemaꞌa to ara i kótá Korintu. Pueꞌ Ala mopileꞌimokou mewaliꞌ taunáNa, hai Ia miꞌi to mopamagasaꞌmokou ánti pohintuwuꞌmi hai Kerisitu Iesu hingkakani hai upu-upu tauna to toroꞌ iumbá-umbá peá to mekakae i Iesu Kerisitu, Pueꞌraꞌ hai Pueꞌtaꞌ woꞌo. Kódóꞌ deꞌe, napileꞌiaꞌ Pueꞌ Ala mewaliꞌ surona Iesu Kerisitu mouláꞌ peundeꞌáNa.

³ Tabeángkiꞌ kipakatu i kómu. Kupembiáꞌ i Pueꞌ Ala Umántaꞌ hai i Pueꞌ Iesu Kerisitu bona mowátiꞌkou hangko i kabulána laluNa hai mampoweꞌikou roꞌa ngkatueꞌ.

Paulu manguliꞌ handaꞌ kamaroꞌana i Pueꞌ Ala

⁴ Halalu-halalu, tiꞌaraꞌaꞌ luleꞌ manguliꞌ handaꞌ kamaroꞌana i Pueꞌ Ala ánti kakómuna, láwiꞌ hangko i kabulána laluNa, Ia mampoweꞌikou pewátiꞌ ánti pohintuwuꞌmi hai Kerisitu Iesu.

⁵ Ánti pohintuwuꞌmi iti, Naweꞌimokou upu-upu pewátiꞌ to mobunduꞌ i katueꞌmi: ia miꞌi Napopaisáꞌámokou paturoꞌ to toꞌu, hai Naweꞌimokou kapánde mopahaweꞌ paturoꞌ iti.

⁶ Upu-upu iti mopakanótó kamaróhóna pepoináláimi i bámbári kana i Kerisitu to kipahaweꞌámokou,

⁷ duuꞌna tiꞌara piꞌi ara kamakuraꞌna pewátiꞌ to nilámbiꞌ, láwiꞌ nilámbiꞌ miꞌi handaꞌ pákáꞌna kapánde hangko i Inao to Magasaꞌ, hai mampegiákou kahaweꞌna huleꞌ Pueꞌtaꞌ Iesu Kerisitu.

⁸ Ia ina mopakaróhó pepoináláimi duuꞌna i kahópóꞌána duniáꞌ, bona i kahaweꞌna huleꞌ Pueꞌtaꞌ Iesu Kerisitu, tiꞌara piꞌi ina ara kamasalaꞌmi.

⁹ Hai Pueꞌ Ala peisá tapoinálái mobukeki dándiNa i kitaꞌ, láwiꞌ Ia to mopileꞌimokou bona mohintuwuꞌkou hingkakani hai ÁnáꞌNa Iesu Kerisitu Pueꞌtaꞌ.

Pekámbáróána Paulu láwiꞌ tiꞌaraheꞌ mohintuwuꞌ

¹⁰ Halalu-halalu, hangko i kuasaꞌ to naweꞌiaꞌ Pueꞌtaꞌ Iesu Kerisitu, kupembiáꞌ bona mohintuwuꞌkou upu-upu, hai ineeꞌkou mopaꞌara posisalaꞌ. Hangaa-ngaa mohintuwuꞌkou hai hampepekirikou.

¹¹ Halalu-halalu, tunggáiángkuꞌ manguliꞌ noꞌonoꞌ, láwiꞌ araheꞌ halaluntaꞌ hangko i Koloe hantámbi to mopahaweꞌ i kódóꞌ kaꞌárána posisalaꞌmi.

¹² Kupolaluita noꞌonoꞌ láwiꞌ ara to manguliꞌ, “Kódóꞌ tándáꞌ i Pauluaꞌ.” Ara to manguliꞌ, “Kódóꞌ tándáꞌ i Apoloꞌaꞌ.” To ntániꞌna woꞌo manguliꞌ, “Kódóꞌ tándáꞌ i Peturuꞌaꞌ.” Hai ara woꞌo to manguliꞌ, “Kódóꞌ tándáꞌ i Kerisituaꞌ.”

¹³ Tiꞌara paꞌi Kerisitu hadua peá? Ba kódóꞌ to mate rapakuꞌ i kau mombehape mopaháwángi dósámi? Ba rariukou bona mewaliꞌkou topegurungkuꞌ? Tiꞌara!

¹⁴ Rasiꞌnanto i oloꞌmi tiꞌarakou ara to kuriu, bateꞌraꞌ peá Kirisipu hai Gaiu,

¹⁵ haneꞌi tiꞌara ara to peisá manguliꞌ kuriukou mewaliꞌ topegurungkuꞌ.

¹⁶ Ara mani to kubuhinao: Setepanaheꞌ hantámbi, kódóꞌ to moriuheꞌ. Agáiáná i rawa hangko i hira, to kubuhinao, tiꞌara piꞌi ara tauna ntániꞌna to kuriu.

¹⁷ Tiꞌaraꞌaꞌ nahuoꞌ Kerisitu mewaliꞌ suroNa bona moriuaꞌ tauna, agáiáná bona moántiaꞌ Ngkóráꞌ Marasa. I kakupahaweꞌna Ngkóráꞌ Marasa, kutunggái kupakeꞌ básá to tiꞌara maꞌángkárá, bona tauna tiꞌara mepoinálái ánti kamapándengkuꞌ peá molaluita, ngkáliꞌna riꞌi bona mampoináláiheꞌ kuasaꞌ kamatena Kerisitu i kau mombehape, hai bona kamateNa iti tiꞌara mbero-mbero.

Hangko i Ngkóráꞌ Marasa, taisá kuasaꞌna hai kamanótóna laluna Pueꞌ Ala

¹⁸ Kipahaweꞌ bámbári to manguliꞌ Kerisitu mohómpóki tauna hangko i huku dósá i karapapateNa i kau mombehape. Ane tauna to ina mesuaꞌ i naraka mohádi bámbári iti, rauliꞌ, “Iti tiꞌara mesuaꞌ i akala.” Agáiáná ane kitaꞌ to nahómpóki Pueꞌ Ala hangko i huku dósántaꞌ mohádi bámbári iti, tauliꞌ, “Iti miꞌi rárána Pueꞌ Ala mopatongawaꞌ kuasaꞌNa!”

¹⁹ I lalu Sura Magasaꞌ, Pueꞌ Ala manguliꞌ: “Ina Kupaupu kapánde tauna, hai tiꞌara ina Kupakeꞌ pekirina tauna to mapánde.” (Iesaia 29:14)

²⁰ Apa bunduꞌraꞌ tauna to mapánde? Apa bunduꞌraꞌ guru agama toIahudiꞌ? Apa bunduꞌraꞌ tauna to mapánde molaluita i duniáꞌ deꞌe? I peitána Pueꞌ Ala, upu-upu kapánde tauna Narekeꞌ peá mbero-mbero,

²¹ láwiꞌ tiꞌarakeꞌ peisá moisá Pueꞌ Ala hangko i kapánde tauna. Ánti kamapándena Pueꞌ Ala, Ia mobutusi bona heáná to mepoinálái i Ngkóráꞌ Marasa to kipahaweꞌ, ina Nahómpóki hangko i huku dósáraꞌ. Agáiáná ane kipahaweꞌ Ngkóráꞌ Marasa, tauna to tiꞌara mepoinálái manguliꞌ, “Iti tiꞌara mesuaꞌ i akala.”

²² ToIahudiꞌ, tiꞌaraheꞌ mepoinálái ane tiꞌaraheꞌ kipopaitaꞌá tandaꞌ kuasaꞌ. Hai toIunani, tiꞌaraheꞌ mepoinálái ane tiꞌaraheꞌ kipakanótó hai kapánde tauna.

²³ Agáiáná kaiꞌ, mopahaweꞌangkaiꞌ kamatena Kerisitu i kau mombehape. Bámbári iti rapokóiꞌ inao toIahudiꞌ, hai i tauna to tiꞌara toIahudiꞌ, bámbári iti rarekeꞌ peá laluita to tiꞌara mesuaꞌ i akala.

²⁴ Agáiáná i heáná peá to napileꞌi Pueꞌ Ala mewaliꞌ taunáNa, toIahudiꞌ ba to tiꞌara toIahudiꞌ, Kerisitu to mopatongawaꞌ kuasaꞌna hai kamapándena Pueꞌ Ala.

²⁵ Ane i tauna to tiꞌara mepoinálái, kamatena Kerisitu i kau mombehape tiꞌara mesuaꞌ i akala, mole riꞌi melumbuꞌ mani kamapándena Pueꞌ Ala hangko i kamapándena tauna. Mouláꞌ tauna to tiꞌara mepoinálái, Pueꞌ Ala tiꞌara makuasaꞌ láwiꞌ Napatodáhi ÁnáꞌNa mate i kau mombehape. Mole riꞌi iti rárá katehómpóꞌ to napakanótó miꞌi Pueꞌ Ala, láwiꞌ melumbuꞌ mani kuasaꞌNa hangko i kuasaꞌ tauna.

²⁶ Halalu-halalu, nibuhinao mani noumbá katueꞌmi hangko tiꞌara manikou nakióꞌ Pueꞌ Ala mewaliꞌ taunáNa. I tempó iti, tiꞌarakou handaꞌ to mapánde ba makuasaꞌ ba tepaireáꞌá i peitána tauna,

²⁷ láwiꞌ Pueꞌ Ala mopileꞌi tauna to tiꞌara mapánde i peitána tauna ntániꞌna, bona to mapánde ina rapakahiliá. Natunggái mopileꞌiheꞌ to maledeꞌ, bona tauna to maróhó ina rapakahiliá.

²⁸ Natunggái mopileꞌiheꞌ to tepaiwóiꞌá, to tiꞌara rabiláꞌ, hai to tiꞌara mobunduꞌ i peitána tauna, bona tongawaꞌ to napomahile tauna katoꞌuána tiꞌara mobunduꞌ.

²⁹ Mewaliꞌ, onoꞌ miꞌi haneꞌi tiꞌara ara haweꞌ hadua tauna to peisá mampepemahile. Tiꞌara ara haweꞌ hadua tauna to peisá manguliꞌ, “Napileꞌiaꞌ Pueꞌ Ala ánti kamapándengkuꞌ haduduángkuꞌ.”

³⁰ Ngkáliꞌna riꞌi, peisákeꞌ mohintuwuꞌ hai Kerisitu Iesu ánti bábehiána Pueꞌ Ala, láwiꞌ Ia peá to mampobungkáhiákeꞌ rárá katehómpóꞌ. Ánti pohintuwuꞌtaꞌ hai Kerisitu Iesu, taisá kamapándena Pueꞌ Ala: Kerisitu to mopakanótókeꞌ i peitána Pueꞌ Ala, mopamagasaꞌkeꞌ, hai mampehuhuꞌá wátáNa mohómpókikeꞌ hangko i huku dósántaꞌ.

³¹ Onoꞌ miꞌi haneꞌi hintotoꞌ ntepuꞌu apa to teukiꞌ i lalu Sura Magasaꞌ: “Heáná to ina mampolaluita apa ntóáꞌna kagóeꞌna laluna, hangaa-ngaa mampolaluita kagóeꞌna iti ánti kamaroꞌana Pueꞌ i hia.” (Ieremia 9:24)