1 Iohane 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Ánáꞌkuꞌ, kuꞌukiꞌ sura deꞌe, bona ineeꞌkou mobábehi dósá. Agáiáná ane arai to mobábehi dósá, ara Hadua to motangaꞌ-tangaꞌikeꞌ i lindoꞌna Pueꞌ Ala Umántaꞌ, Ia miꞌi Iesu Kerisitu, Huoꞌána Pueꞌ Ala to Manótó.

² Hai Ia miꞌi to mate mewaliꞌ sulewátántaꞌ, bona Pueꞌ Ala moámpungi dósántaꞌ, hai tiꞌara peá dósántaꞌ to Nahómpóki, agáiáná dósáraꞌ woꞌo tauna i humalele duniáꞌ.

Ane taisá Pueꞌ Ala, ina mampeuláꞌikeꞌ hawaꞌNa

³ Ane tapeuláꞌi hawaꞌna Pueꞌ Ala, iti miꞌi to mopatongawaꞌ mpuꞌu kataisána Pueꞌ Ala.

⁴ Tauna to manguliꞌ, “Kuisá miꞌi Pueꞌ Ala,” agáiáná tiꞌaraheꞌ mampeuláꞌi hawaꞌNa, modongkoꞌheꞌ hai tiꞌaraheꞌ mopailalu paturoꞌ to toꞌu.

⁵ Tauna to mampeuláꞌi laluitana Pueꞌ Ala, hira to toꞌu-toꞌu mampokaꞌahiꞌ Pueꞌ Ala. Deꞌe miꞌi to mopatongawaꞌ pohintuwuꞌtaꞌ hai Pueꞌ Ala:

⁶ heáná peá to manguliꞌ mohintuwuꞌ miꞌi hai Pueꞌ Ala, ia hangaa-ngaa mampeuláꞌi bábehiána Kerisitu.

⁷ Halalu-halalu to kupokaꞌahiꞌ. Hawaꞌ to kuꞌukiꞌákou iti, tiꞌara hawaꞌ to woꞌu. Hawaꞌ iti marue miꞌi rapahaweꞌ i kómu hangko i rungu-rungumi mantepuꞌu mepoinálái. Hawaꞌ iti bona mombepokaꞌahiꞌkou, ia miꞌi ntóáꞌna paturoꞌ to marue miꞌi nihádi.

⁸ Agáiáná kehapiꞌ noꞌonoꞌ, bateꞌna kuꞌukiꞌákou hawaꞌ iti nodo hawaꞌ to woꞌu, láwiꞌ katoꞌuna hawaꞌ iti tongawaꞌ miꞌi i lalu katueꞌna Iesu hai tongawaꞌ woꞌo i lalu katueꞌmi, láwiꞌ kamakáindi i lalu katueꞌmi mantepuꞌu miꞌi makuraꞌ, hai kamabaa to toꞌu mantepuꞌu miꞌi mewangkaꞌ.

⁹ Heáná peá to manguliꞌ ia tueꞌ i lalu kamabaa, agáiáná tiꞌara mampokaꞌahiꞌ halalu hampepepoináláina, lempóna: ia tueꞌ mani i lalu kamakáindi.

¹⁰ Heáná peá to mampokaꞌahiꞌ halalu hampepepoináláina, ia tueꞌ i lalu kamabaa, hai tiꞌara ara to mopakanawoꞌ.

¹¹ Agáiáná heáná peá to tiꞌara mampokaꞌahiꞌ halalu hampepepoináláina, ia ara mani i lalu kamakáindi hai tiꞌara moisá iumbá kalaoána, láwiꞌ kamakáindi iti mopabilo.

Ineeꞌkeꞌ mampomahile párewá i duniáꞌ

¹² Ánáꞌkuꞌ, kuꞌukiꞌákou sura deꞌe, láwiꞌ ánti bábehiána Pueꞌ Iesu, teámpungi miꞌi dósámi.

¹³ Umaꞌ-umaꞌ, kuꞌukiꞌákou sura deꞌe, láwiꞌ niꞌisá miꞌi Heáná to ara hangko i rungu-runguna. Ánáꞌntomoane hai ánáꞌntawine, kuꞌukiꞌákou sura deꞌe, láwiꞌ ninangi miꞌi Datu Tokadake.

¹⁴ Kuꞌukiꞌákou ánáꞌkuꞌ, láwiꞌ niꞌisá miꞌi Umántaꞌ. Kuꞌukiꞌákou umaꞌ-umaꞌ, láwiꞌ niꞌisá miꞌi Heáná to ara hangko i rungu-runguna. Kuꞌukiꞌákou ánáꞌntomoane hai ánáꞌntawine, láwiꞌ maróhó miꞌi pepoináláimi, nipailalu oaꞌ ngkóráꞌna Pueꞌ Ala, hai ninangi miꞌi Datu Tokadake.

¹⁵ Ineeꞌkou mampomahile duniáꞌ deꞌe hai óntóꞌna. Heáná to mampomahile párewá i duniáꞌ deꞌe, lempóna tiꞌaraheꞌ mampokaꞌahiꞌ Pueꞌ Ala Umántaꞌ.

¹⁶ Láwiꞌ upu-upu to ara i lalu duniáꞌ deꞌe, ia miꞌi: peundeꞌána laluntaꞌ haduduántaꞌ, apa to taita hai tapokaelu, hai apa to mopaꞌara pampepemahilentaꞌ. Upu-upu iti tiꞌara hangko i Umántaꞌ, bateꞌna peá mentóáꞌ hangko i duniáꞌ.

¹⁷ Hai duniáꞌ deꞌe ina magero hingkakani hai upu-upu óntóꞌna to napoinao tauna. Agáiáná tauna to mampeuláꞌi peundeꞌána Pueꞌ Ala, bateꞌna ina tueꞌ oaꞌ duuꞌna i rue-ruena.

Ineeꞌkou mampoinálái paturoꞌ to mosápuáka kaꞌIesuna miꞌi Datu Topehómpóꞌ

¹⁸ Ánáꞌkuꞌ, tiꞌara piꞌi marue kahópóꞌána duniáꞌ ina haweꞌ. Hai ina haweꞌ woꞌo hadua to rauliꞌ Ewálina Kerisitu, nodo to paka rapaturoꞌákou. Hai deꞌe-deꞌe haweꞌmoheꞌ handaꞌ tauna to mampoewaliá Kerisitu. Onoꞌ miꞌi haneꞌi tongawaꞌ ntepuꞌu kaꞌina haweꞌna kahópóꞌána duniáꞌ.

¹⁹ Rungu-runguna, ewálinaheꞌ Kerisitu iti ara i oloꞌna jemaꞌa, agáiáná katoꞌuána tiꞌaraheꞌ rángántaꞌ. Onoꞌ miꞌi haneꞌi rapálehimokeꞌ. Ane rápáꞌna hira iti toꞌu-toꞌu rángántaꞌ, kehingkakaniheꞌ oaꞌ hai kitaꞌ. Agáiáná megáákimoheꞌ hangko i kitaꞌ, mewaliꞌ tongawaꞌ ntepuꞌu katiꞌáráraꞌ tándáꞌ i kitaꞌ.

²⁰ Agáiáná kómu halalu-halalu, motarimamokou Inao to Magasaꞌ to hangko i Kerisitu, onoꞌ miꞌi haneꞌi niꞌisá miꞌi apa to toꞌu.

²¹ Mewaliꞌ, tunggáiángkuꞌ moukiꞌákou sura deꞌe, tiꞌara ánti katiꞌárána niꞌisá paturoꞌ to toꞌu. Kuꞌukiꞌákou sura deꞌe, láwiꞌ niꞌisá miꞌi paturoꞌ to toꞌu, hai niꞌisá miꞌi woꞌo katiꞌárána ara dongkoꞌ to mentóáꞌ hangko i Pueꞌ Ala to manótó.

²² Heáná to modongkoꞌ? To modongkoꞌ, hira miꞌi tauna to mosápuáka kaꞌIesuna Datu Topehómpóꞌ. Hira miꞌi ewálina Kerisitu, láwiꞌ mosápuákaheꞌ Pueꞌ Ala Umántaꞌ hai Iesu ÁnáꞌNa.

²³ Tauna to mosápuáka Ánáꞌna Pueꞌ Ala, hira miꞌi to tiꞌara ara pohintuwuꞌraꞌ hai Pueꞌ Ala Umántaꞌ. Tauna to mopangákuꞌ kaꞌIesuna Ánáꞌna Pueꞌ Ala, hira miꞌi to mohintuwuꞌheꞌ woꞌo hai Pueꞌ Ala Umántaꞌ.

²⁴ Mewaliꞌ halalu-halalu, bámbári to nihádi hangko i rungu-runguna, iti to hangaa-ngaa nipailalu oaꞌ. Ane nipailalu oaꞌ bámbári iti, ina mohintuwuꞌkou oaꞌ hai Pueꞌ Ala Umántaꞌ hai Iesu ÁnáꞌNa.

²⁵ Deꞌe miꞌi dándiNa i kitaꞌ: ina talámbiꞌ katueꞌ to maroꞌa to tiꞌara mokahópóꞌá.

²⁶ Kuꞌukiꞌákou sura deꞌe mokana i tauna to mampoinao mopakanawoꞌkou.

²⁷ Agáiáná halalu-halalu, nitarima miꞌi Inao to Magasaꞌ to hangko i Kerisitu, hai Inao to Magasaꞌ iti ara oaꞌ i lalumi. Onoꞌ miꞌi haneꞌi tiꞌarapokou paraluu rapaturoꞌ tauna ntániꞌna, láwiꞌ Inao to Magasaꞌ iti to mopaturoꞌákou upu-upu to paraluu niꞌisá. Upu-upu paturoꞌNa toꞌu, tiꞌara paturoꞌ dongkoꞌ. Mewaliꞌ, hangaa-ngaa mohintuwuꞌkou oaꞌ hai Kerisitu, hiolaꞌ hai apa to Napaturoꞌámokou hangkoia.

Pueꞌ Ala mampoánáꞌkeꞌ bona mampeuláꞌikeꞌ peundeꞌáNa

²⁸ Kaliliuána ánáꞌkuꞌ, hangaa-ngaa mohintuwuꞌkou oaꞌ hai Kerisitu, bona ane haweꞌi huleꞌ, pebáiꞌkeꞌ mampombelindoꞌá, hai tiꞌarapokeꞌ mahili Nakahaweꞌi.

²⁹ Niꞌisá ntepuꞌu halalu-halalu, Kerisitu mampeuláꞌi oaꞌ peundeꞌána Pueꞌ Ala. Onoꞌ miꞌi haneꞌi niꞌisá woꞌo, upu-upu tauna to mampeuláꞌi oaꞌ peundeꞌána Pueꞌ Ala, napoánáꞌmoheꞌ Pueꞌ Ala.