1 Iohane 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Sura to kuꞌukiꞌákou deꞌe, mokana i Ngkóráꞌ to mopaꞌara katueꞌ. Ngkóráꞌ iti, ara miꞌi ami hangko i rungu-runguna, hangko tiꞌara mani duniáꞌ deꞌe rapopewaliꞌ. Hai kaiꞌ topeguruna Iesu, kihádi miꞌi, kiꞌita mata, kisabiki, hai kipekamaꞌ miꞌi wátáNa.

² To mopaꞌara katueꞌ iti haweꞌ miꞌi i duniáꞌ deꞌe, hai kiꞌita miꞌi. Onoꞌ miꞌi haneꞌi kipakanótóámokou kaheánáNa. Kisabiki kaꞌIana to mopaꞌara katueꞌ to maroꞌa to tiꞌara mokahópóꞌá. Ia to ara hingkakani hai Pueꞌ Ala Umántaꞌ, haweꞌ miꞌi i kaiꞌ.

³ Apa to kiꞌita hai kihádi miꞌi, iti to kipahaweꞌákou, bona kómu woꞌo mepoinálái hai peisákou mohintuwuꞌ hai kaiꞌ i lalu pohintuwuꞌkiꞌ hai Pueꞌ Ala Umántaꞌ hai Iesu Kerisitu ÁnáꞌNa.

⁴ Kiukiꞌákou deꞌe, bona góeꞌ ntepuꞌuangkaiꞌ.

Hangaa-ngaa tueꞌkeꞌ i lalu kamabaa

⁵ Deꞌe miꞌi bámbári to kihádi hangko i Iesu haneꞌi kipahaweꞌákou: Pueꞌ Ala peisá rapándiriꞌ nodo pewangkaꞌ. Tiꞌara ara kamakáindiNa.

⁶ Ane tauliꞌ mohintuwuꞌkeꞌ hai Pueꞌ Ala, agáiáná katoꞌuána mobábehikeꞌ oaꞌ to kadake nodokeꞌ to tueꞌ i lalu kamakáindi, modongkoꞌkeꞌ hai tiꞌarakeꞌ mampeuláꞌi paturoꞌ to toꞌu.

⁷ Agáiáná ane mobábehikeꞌ oaꞌ to maroꞌa láwiꞌ tueꞌkeꞌ i lalu kamabaa, nodo Pueꞌ Ala ara i lalu kamabaa, mohintuwuꞌkeꞌ hadua hai hadua, hai waheꞌna Iesu ÁnáꞌNa mobahoꞌikeꞌ hangko i upu-upu dósántaꞌ.

⁸ Ane tauliꞌ tiꞌara ara dósántaꞌ, modongkokikeꞌ wátántaꞌ haduduántaꞌ hai tiꞌarakeꞌ mopailalu paturoꞌ to toꞌu.

⁹ Agáiáná ane tapangákuꞌ dósántaꞌ, Pueꞌ Ala ina mobukeki dándiNa i kitaꞌ: Ia ina moámpungi upu-upu dósántaꞌ, hai ina mopamagasaꞌ laluntaꞌ hangko i upu-upu to kadake, láwiꞌ Ia mobábehi apa to manótó i kitaꞌ.

¹⁰ Ane tauliꞌ tiꞌara mpuꞌukeꞌ madósá, lempóna mampopodongkoꞌmokeꞌ Pueꞌ Ala, hai tiꞌara tapailalu ngkóráꞌNa.