Yohánɛs 2 1 - Esaa-líat ɛ́ péná

Mitamlan

¹ Ma ǹcɛ́ŋ á eɓasɛ, mag ciile wa nyɔ́ Mindígá a adit Ɔlolómɛ̄ a pɔ́hɔ, mag ciile ki ndog yɔɔ, ɓɛ́nɛ ɓá mi ŋga díiŋ kɔɔ, ah mā-ntámɛ́ ɓé nɛ mi ŋga díiŋ ɓɛ́nɛ, ndí ɓá bísɛ bí ŋga yí mbálɛ,

² kasig ɛ tɔɔ́ la ɓɛ́hɛ, ɛg ɓɛ́ la ɓɛ́hɛ eceg ɛ́sɛ.

³ Ndómbo, ekɔnan-ŋgɔ́ɔ́ la nsaŋ, bí ŋga sɔ́le la Etāa Ɔlolómɛ̄, la Yésus Kilístus, Mɔɔ́n Etāa, bí ɓɛ́ la ɓɛ́hɛ átē á mbálɛ la ediŋ.

Li niŋle á mbéndá Ɔlolómɛ̄

⁴ Ma kɔ̄n mívag ŋgandag li ɛ́n nɛ́ ndog yɔɔ ɛg wɛɛhɛnɛ á nzen mbálɛ, li oŋle la mbéndá Etāa a tí ɓɛ́hɛ.

⁵ Nyí vɔ́ŋɔ́ɔ, á Mindígá a adit, jam mi ŋga ɔ́ŋlánɛ wa lí lɛ́ nɛ́: «Bi díŋán ɓɛ́hɛ la ɓɛ́hɛ». Nyíŋ mbéndá ɛ sē ɓé mbéndá péná nyí mi ŋga cíile wa, ndí ɛ lɛ́ jā nyí bi byɛ́ɛ̄ li ɓotle á míɓotlé.

⁶ Ediŋ ɛ́ lɛ̄ jā nɛ́: bi wɛ́ɛ́hɛ́nɛ á nzen mbéndá Ɔlolómɛ̄. Nyíŋ mbéndá nɛ maná ámblé li ɓotle á míɓotlé, nɛ́ ndí miní wɛ́ɛhɛ́nɛ á nyíŋ.

⁷ Átɔm nɛ́ ŋgandag ɓot bí mínaa yá cámān á ŋkɔŋ-á-sí. Bí ŋgá yéɓe ɓé nɛ Yésus Kilístus a sɔ́ kɔɔ la nyúū mut-a-binam. Ɓáŋ ɓot bí lɛ́ ɓot-bí-mínaa la ɓalem-bí-kilístus.

⁸ Nyɔŋán hɔ́ lítāt la ɓɛ́nɛ-mɛ̄n, á lí ɓɔŋ nɛ́ miníh jáŋɛ́gɛ́ ɓé mpumu nyú á mísɔ̄n máná, ndí miní somó jā lí kuh lí nsála wáná ásɛ.

⁹ Tɔ nzáá a ŋgá tɔɓene ɓé á bíyéglɛ́nɛ́ bí Nyɔ́-a-Pɔ́hlɛ ndí á kóndyé jam litám átē a sē ɓé la Ɔlolómɛ̄. Ndí nyɔ́ la nyɔ́ a ŋga tɔ́ɓene á bíyéglɛ́nɛ́ a lɛ lā Etāa elɔŋ la Mɔɔ́n.

¹⁰ Kíyáɓɛ́nɛ mut a byáŋ elɔŋ la ɓɛ́nɛ ndí ah sɔ́la ɓé bíŋ biyéglɛ́nɛ́, miníh lɛ́glégé ɓé nyɛ á yóg yāná miníh laglág ɓé tɔ̄ nyɛ́ mísɔ̄-mí-m̀ɓɛɛŋ.

¹¹ Tɔ nzáá a ŋga lága nyɛ́ mísɔ̄-mí-m̀ɓɛɛŋ ɛnɛ nyɛ́g a byáŋ la nyɛ á mísɔ̄n mɛ́ɛ́ míɓē.

Ɛnáŋgānɛ́

¹² Mi ŋgí byɛ́ɛ́ mam ŋgandag á lí laga lí ɓɛ́nɛ, ndí māh somo ɓé já ma mɔ́ lí cii á lípapá la tíŋtɛ. Átɔm nɛ́ mag ɔ́ŋɔ li sɔ́ wóŋ á yóg yaná nɛ́ mi kwɛ́lɛ́ ɓɛ́nɛ mɔ́ á mbɔm la á mbɔm, á lí ɓɔŋ nɛ́ mivag máhá mí yáal.

¹³ Ndog mɔɔ́nyɔ̄ŋ a Mindígá nyɔ́ a pɔ́hlɛ ɛg tama wa.