Yohánɛs 1 5 - Esaa-líat ɛ́ péná

Ŋyéɓé ág dí ŋkɔŋ-á-sí cíŋ

¹ Tɔ nzáá a ŋga yéɓe nɛ́ Yésus a lɛ Nyɔ́-a-Pɔ́hlɛ a byálɓɛ́ la Ɔ́lolómɛ̄. Tɔ nzáá a ŋga díiŋ Ɔlolómɛ̄, m̀byál, ag diŋ ki nyɔ́ a byálɓɛ́ la Ɔlolómɛ̄.

² La náŋ hɔ́, biíg yí nɛ́ biíg diŋ ɓɔɔ́n bí Ɔ́lolómɛ̄, kíyáɓɛ́nɛ biíg diŋ Ɔlolómɛ̄ la li ógle lí mbéndá yɛ́ɛ́.

³ Kɔɔ la mbálɛ, ediŋ Ɔ́lolómɛ̄ ɛ́ lɛ́ ja nɛ́: bi náŋɛ́ mbéndá yɛ́ɛ́. Tɔ mbéndá yɛ́ɛ́ ki ɛ́ sē ɓé mbɛ́gɛ ɛ ŋga díit,

⁴ ánsī nɛ́, ɓá bísɛ ɓá byálɓɛ́ la Ɔlolómɛ̄, ɓá dí ŋkɔŋ-á-sí cíŋ. La ŋyéɓé wáhá nɛ ɓaá dí ŋkɔŋ-á-sí cíŋ.

⁵ Ɓaá, nzáá a dí ŋkɔŋ-á-sí cíŋ é? Amáh sig nyɔ́ a yéɓe nɛ́ Yésus a lɛ Mɔ́ɔ̄n Ɔlolómɛ̄!

⁶ Yésus Kilístus nɛ́ a lɛ nyɔ́ a sɔ́, li loole la míndīm mí nzoɓan yɛ́ɛ̄ la micii mí nyɛmb yɛ́ɛ̄, ah mindím mɔ́-ntámɛ́ ɓé nɛ a sɔ́la, ndí, mindím la micii. Kasig, M̀búl Mpúán a lɛ mbálɛ, ányúū náŋ nɛ́ a ŋga tíi nyíŋ mbóŋ.

⁷ Mbóŋ ɛ́ŋháa ɛ́ lɛ yí ɛ́ ŋga yíhɛ náŋ:

⁸ M̀búl Mpúán, mindím la micii, yíŋ mbóŋ ɛ́ŋháa ɛ́g laga nlemlem á jam.

⁹ Kíyáɓɛ́nɛ biíg yéɓe mbóŋ nyí ɓot-bí-bínam, yíán nɛ́ nyí Ɔlolómɛ̄ ɛ lɛ́ taŋ, átɔm nɛ́, mbóŋ Ɔlolómɛ̄ ɛ lɛ nyí a tí, ányúū Mɔ́ɔ̄n wɛ́ɛ̄.

¹⁰ Nyɔ́ la nyɔ́ a ŋga yéɓe la Mɔ́ɔ̄n Ɔ́lolómɛ̄, nyɛ́-mɛ̄n ag tíi nyíŋ mbóŋ. Nyɔ́ la nyɔ́ a ŋgá yéɓe ɓé la Ɔlolómɛ̄, ag yaanɛ Ɔlolómɛ̄ mut-a-minaa, ányúū nɛ, āh yéɓe ɓé mbóŋ nyí Ɔlolómɛ̄ a tí ányúū Mɔ́ɔ̄n wɛ́ɛ̄.

¹¹ Nyíŋ mbóŋ yɔ nyí nɛ́: Ɔlolómɛ̄ a tí ɓɛ́hɛ eniŋ éɓem, yéŋ eniŋ ɛ́ lɛ́ la Mɔɔ́n wɛ́ɛ̄.

¹² Nyɔ́ la nyɔ́ a lɛ la Mɔɔ́n Ɔ́lolómɛ̄, a byɛ́ɛ eniŋ; Nyɔ́ la nyɔ́ a sē ɓé la Mɔɔ́n Ɔlolómɛ̄, ah byɛ́ɛ́ ɓé éniŋ.

Eniŋ éɓem

¹³ Ma cíilé ɓɛ́nɛ míŋ mam mísɛ á lí ɓɔŋ nɛ́, ɓɛ́nɛ ɓá miní ŋga yéɓe á jóō lí Mɔ́ɔ̄n Ɔ́lolómɛ̄, miní yí nɛ́ miní byɛ́ɛ́ eniŋ éɓem.

¹⁴ Bi lɛ́ mbáki la Ɔlolómɛ̄ nɛ́: kíyáɓɛ́nɛ ɓa ɓāt jam li oŋle la nsom wɛ́ɛ́, ag ámble ɓɛ́hɛ.

¹⁵ Kasig bi ŋga yí nɛ́, tɔ yéé bi ŋga ɓāt nyɛ́ ag ámble ɓɛ́hɛ, biíg yí nɛ́, ɓaá kūh jam ɓaá ɓāt nyɛ.

¹⁶ Kíyáɓɛ́nɛ mut a ɛ́n mɔ́ɔ̄nyāŋ ag ɓɔŋ aɓé, nyú á ŋgá óm ɓé nyɛ á nyɛ̄mb, a kánɛ̄, Ɔlolómɛ̄ ag kɛ lí tíi lí mɔ́ɔ̄nyāŋ eniŋ, kíyáɓɛ́nɛ, aɓé nyɔ́ŋ a ɓɔ̄ŋ á ŋgá óm ɓé kɔɔ nyɛ́ á nyɛ̄mb. Aɓé wá á lɛ̄ nyú á ŋga óm á nyɛ̄mb, ah ányúū wɔ́ ɓé nɛ mi ŋga lága nɛ́ bí kánɛ̄.

¹⁷ Yé ɛ́sɛ ɛ́h tɛ́ɛ́ ɓé ɛ́ lɛ́ áɓē, ndí, aɓé ásɛ á ŋgá óm ɓé á nyɛ̄mb.

¹⁸ Biíg yí nɛ́, tɔ nzáá a byálɓɛ́ la Ɔ́lolómɛ̄, a ŋgá ɓɔŋ ɓé pɛ aɓé, átɔm nɛ́, Yésus nyɔ́ a byálɓɛ́ la Ɔ́lolómɛ̄ ag tát nyɛ́, Ǹlem ki á ŋgá la ɓé nyɛ li siiɓan.

¹⁹ Biíg yí nɛ́ bi lɛ́ ɓá bí Ɔlolómɛ̄, ndí, ŋkɔŋ-á-sí ásɛ á lɛ́ á sí likanʼyɛ lí Ǹlem.

²⁰ Biíg yí ki nɛ́, Mɔɔ́n Ɔlolómɛ̄ a sɔ́, la nyɛ́ ɔ tí ɓɛ́hɛ eyí, á lí ɓɔŋ nɛ́, bi yí Loó-lí-mbálɛ. Bi lɛ la Loó-lí-mbálɛ bu ɓɛ́ ki la Mɔɔ́n wɛ́ɛ̄ Yésus Kilístus. Nyɛ́ nɛ́ a lɛ Loó-lí-mbálɛ ɔ ɓɛ́ ki eniŋ éɓem.

²¹ Á ɓɔ́ɔ̄n ɓáma, nyɔŋán lítāt la bisát.