Yohánɛs 1 4 - Esaa-líat ɛ́ péná

Li lem lí M̀búl á Ɔ́lolómɛ̄

¹ Á élōgyāŋ yé ediŋ, Miníh yéɓyág ɓé la ɓá bísɛ bí ŋga yó nɛ́ bí byɛ́ɛ́ M̀búl Mpúán, ndí miní ceglɛ́ ɓɔ́, á lí yí tɔ nɛ́ m̀búl bí byɛ́ɛ̄ a lɛ́ nyú á Ɔlolómɛ̄, átɔm nɛ́ ŋgandag ɓapɔ́tle-bí-Ɔ́lolómɛ̄ bí mínaa yá cámān á ŋkɔŋ-á-sí.

² Jam lí ŋga kɛ́ ɓɛ́nɛ li yíhɛ nɛ́ mut a byɛ́ɛ́ M̀búl Ɔ́lolómɛ̄ lí lɛ́ nɛ́: Tɔ nzáá a ŋga páha nɛ́ Yésus Kilístus a nyɔ̄ŋ nyúū nyí mut-a-binam, a lɛ nyɔ́ a Ɔlolómɛ̄.

³ Tɔ nzáá ki a ŋga pún lí páha lí jéŋ liɓɛ́ɛg lí Yésus a sē ɓé nyɔ́ a Ɔlolómɛ̄, a lɛ́ jā ǹlem a Kilístus ányúū yɛ́ɛ̄ nɛ, maná ámblé bíg lɛgɛ nɛ́, ǹlem a Kilístus ag sɔ́, nyí vɔ́ŋɔ́ɔ a nyɛ́g á ŋkɔŋ-á-sí.

⁴ Á ɓɔ́ɔ̄n ɓáma, kasig miní lɛ́ ɓɔ́ɔ̄n bí Ɔlolómɛ̄, maná dí ɓáŋ ɓapɔ́tle-bí-Ɔ́lolómɛ̄ bí mínaa cíŋ, ányúū nɛ́ M̀búl á Ɔlolómɛ̄ á lɛ́ la ɓɛ́nɛ, ág loo nyú á lɛ́ á ŋkɔŋ-á-sí.

⁵ Ɓɔ́ bí lɛ́ ɓot bí ŋkɔŋ-á-sí, bíg pɔ́t á nyaa ŋkɔŋ-á-sí, ŋkɔŋ-á-sí ki ág ámble ɓɔ́.

⁶ Ɓɛ́hɛ, bi lɛ ɓá bí Ɔ́lolómɛ̄. Nyɔ́ a ŋga yí Ɔ́lolómɛ̄ ag ámble ɓɛ́hɛ. Nyɔ́ a sē ɓé la Ɔlolómɛ̄ a ŋgá ámble ɓé ɓɛ́hɛ. Váŋ nɛ́ bi ŋga yí ápah M̀búl á mbálɛ á lɛ, la nyú á njáŋgá.

Ediŋ ɛ́ ŋga sɔ́le la Ɔlolómɛ̄

⁷ Á élōgyāŋ yé édiŋ, bi diŋán ɓɛ́hɛ la ɓɛ́hɛ, átɔm nɛ́ ediŋ ɛ́g sɔ́le la Ɔlolómɛ̄, la ki nɛ́, tɔ nzáá a ŋga díiŋ a byálɓɛ́ la Ɔlolómɛ̄, ag yí ki Ɔlolómɛ̄.

⁸ Tɔ nzáá a ŋgá diŋ ɓé āh yí ɓé Ɔlolómɛ̄, ánsī nɛ Ɔlolómɛ̄ a lɛ̄ édiŋ.

⁹ Ediŋ Ɔlolómɛ̄ a étɛ́ ɓɛ́hɛ, yɔ́ yé nɛ́: a óm pɔmbɛ yɛ́ɛ̄ Mɔɔ́n á ŋkɔŋ-á-sí, á li ɓɔŋ nɛ́, la nyɛ́ bi ɓɛ́la eniŋ.

¹⁰ Yéŋ ediŋ ɛ́ lɛ́ nɛ́: ah ɓɛ́hɛ ɓé nɛ ɓaá dīŋ Ɔlolómɛ̄, nyɛ́ nɛ́ a dīŋ ɓɛ́hɛ, la nyɛ́ ɔ óm Mɔ́ɔ̄n wɛ́ɛ̄, ɔ tí nyɛ kaa nsúlé ányúū elaakɛ-miɓé máhá.

¹¹ Á élōgyāŋ yé ediŋ, Kíyáɓɛ́nɛ Ɔlolómɛ̄ a dīŋ ɓɛ́hɛ náŋ, ɓɛ́hɛ ki ɓaá nyɛ́ɛ lí diŋan ɓɛ́hɛ la ɓɛ́hɛ.

¹² Mut tɔ wa a ɓáág ŋgi lí ɛ́n lí Ɔlolómɛ̄. Kíyáɓɛ́nɛ biíg diŋan ɓɛ́hɛ la ɓɛ́hɛ, Ɔlolómɛ̄ a lɛ lá ɓɛ́hɛ, ediŋ yɛ́ɛ́ ki yá yál á póla yahá.

¹³ Jam lí ŋga étɛ ɓɛ́hɛ nɛ́ bi lɛ̄ la Ɔlolómɛ̄, nyɛ́g ɔ ɓɛ́ la ɓɛ́hɛ lí lɛ́ nɛ́: a tí ɓɛ́hɛ M̀búl wɛ́ɛ́.

¹⁴ Ɓɛ́hɛ, ɓaá ɛ́n, biíg tíi nyíŋ mbóŋ nɛ́ Etāa a óm Mɔ́ɔ̄n wɛ́ɛ̄ kaa Ǹsuŋ ŋkɔŋ-á-sí.

¹⁵ Tɔ nzáá a ŋga páha nɛ́ Yésus a lɛ Mɔ́ɔ̄n Ɔ́lolómɛ̄, Ɔlolómɛ̄ a lɛ́ la nyɛ́, nyɛ́g a lɛ́ la Ɔlolómɛ̄.

¹⁶ Ɓɛ́hɛ, ɓaá yí ediŋ Ɔlolómɛ̄ a byɛhɛ́nɛ́ ɓɛ́hɛ bu yéɓé ki la yɔ́. Ɔlolómɛ̄ a lɛ́ édiŋ, tɔ nzáá a tīŋɓé á ediŋ a lɛ́ la Ɔlolómɛ̄, Ɔlolómɛ̄ ki ɔ ɓɛ́ la nyɛ́.

¹⁷ Kíyáɓɛ́nɛ bi byɛ́ɛ́ taŋ ediŋ á póla yahá, bi ŋgá kɔn ɓé woŋ á ɔ́lɔ̄ ví ŋkál, ányúū nɛ ákaa nyɛ́ Yésus, a lɛ, náŋ nɛ́ ɓɛ́hɛ ki bi lɛ á nyū ŋkɔŋ-á-sí.

¹⁸ Ediŋ ɛ́ ŋgá yí ɓé wōŋ, taŋ ediŋ ɛ́g pún wōŋ, ányúū nɛ ekɔ́ghɛ ɛ́g sɔ́la woŋ, mut a ŋga kɔ̄n woŋ áh byɛ́ɛ ɓé taŋ ediŋ.

¹⁹ Ndí ɓɛ́hɛ, biíg diŋan, ányúū nɛ nyɛ́ Ɔ́lolómɛ̄ nɛ a dúgú ɓɛ́hɛ li diŋ.

²⁰ Kíyáɓɛ́nɛ mut ag laga nɛ́: «Mag diŋɛ Ɔlolómɛ̄», ndí ag síŋgɛ mɔɔ́nyāŋ, ɛnɛ a lɛ́ mut-a-minaa. La mbálɛ, nyɔ́ la nyɔ́ a ŋgá diŋɛ ɓé mɔ́ɔ̄nyāŋ nyɔ́ a ŋga ɛ́n, a ŋgá la ɓé tɔ li diŋɛ lí Ɔ́lolómɛ̄ nyɔ́ a ŋgá ɛ́n ɓé.

²¹ Mbéndá Ɔlolómɛ̄ a tí ɓɛ́hɛ yɔ nyí nɛ́: nyɔ́ la nyɔ́ a ŋga díŋɛ Ɔlolómɛ̄, a díŋɛ́ ki mɔɔ́nyāŋ.