Yohánɛs 1 3 - Esaa-líat ɛ́ péná

Ɓɔɔ́n bí Ɔ́lolómɛ̄

¹ Léɓyán édiŋ ecɛ́ŋ Etāa a tí ɓɛ́hɛ kaa likaale, nɛ́ bi yáŋlɛ́ ɓɔɔ́n bí Ɔlolómɛ̄. Bi lɛ kɔɔ ɓɔ́! Kasig ŋkɔŋ-á-sí wáh yí ɓé Ɔlolómɛ̄, ányúū náŋ nɛ́ á ŋgá la ɓé ɓɛ́hɛ li yí.

² Á élōgyāŋ yé ediŋ, li ɓotle la nyí vɔ́ŋɔ́ɔ bi lɛ̄ ɓɔ́ɔ̄n bí Ɔlolómɛ̄, ndí yé bi ŋga kɛ́ li ɓɛ́ ɛ́ lɛ́ ŋgí lí ɛ́ni. Biíg yí nɛ́, eceg Nyɔ́-a-Pɔ́hlɛ a ŋga kɛ́ li sɔ́, biíg kɛ li punan la nyɛ́, ánsī nɛ biíg kɛ nyɛ́ lí ɛ́n ákaa a lɛ.

³ Tɔ nzáá a ŋga nāŋʼyene nyɛ́ nyíŋ nyaa lipitá ag yaan mipúú ákaa Nyɔ́-a-Pɔ́hlɛ a lɛ mípūū.

⁴ Tɔ nzáá a ɓɔŋ aɓé a tɛ́ŋgánɛ́ mbéndá nyí Ɔlolómɛ̄, átɔm nɛ́ aɓé, á lɛ́ lí tɛ́ŋgánɛ lí mbéndá nyí Ɔlolómɛ̄.

⁵ Ndí, ɓɛ́nɛ miníg yí nɛ́ Yésus Kilístus a sɔ́ á lí ɓógtɛ lí míɓē, la ki nɛ́, aɓé tɔ wá á sē ɓé la nyɛ́.

⁶ Tɔ nzáá a lɛ̄ la nyɛ́ a ŋgá ɓɔŋ ɓé pɛ aɓé. Tɔ nzáá a ŋga ɓɔ̄ŋ aɓé, āh ɛ́n ɓé nyɛ ndí tɔ li yí lí nyɛ.

⁷ Á ɓɔ́ɔ̄n ɓáma, mut tɔ wa ah jáŋhɛ́gɛ́ ɓé ɓɛ́nɛ. Nyɔ́ a ŋga ōŋle etɛ́l-sim, a lɛ sim, kaa Yésus Kilístus nyɛ́-mɛ̄n a lɛ sim.

⁸ Nyɔ́ la nyɔ́ a ŋga ɓɔ̄ŋ aɓé a lɛ á épah ɛ́ ǹsɔhɔ, ányúū nɛ li ɓotle á ɔkolpáŋá, ǹsɔhɔ a lɛ m̀ɓɔŋ-miɓé. Jɔ́ nɛ́, Mɔɔ́n Ɔlolómɛ̄ a sɔ́ á lí cɛ́hɛ lí mísɔ̄n mí ǹsɔhɔ.

⁹ Nyɔ́ la nyɔ́ Ɔ́lolómɛ̄ a byál a ŋgá ɓɔŋ ɓé pɛ aɓé, ányúū nɛ mbóó Ɔlolómɛ̄ ɛ lɛ̄ átē wɛ́ɛ̄, a ŋgá la ɓé pɛ li ɓɔŋ lí áɓē, ányúū nɛ Ɔlolómɛ̄ nɛ a byál nyɛ.

¹⁰ Jam lí ŋga ɓɔ̄ŋ nɛ́ bí lem ɓɔɔ́n bí Ɔ́lolómɛ̄ la ɓɔɔ́n bí ǹsɔhɔ li lɛ́ nɛ́, nyɔ́ la nyɔ́ a ŋgá ɓɔŋ ɓé yé ɛ́ tɛ́ɛ́ sim, tɔ li diŋ lí mɔ́ɔ̄nyāŋ a sē ɓé nyɔ́ a Ɔlolómɛ̄.

Li diŋan ɓɛ́hɛ la ɓɛ́hɛ

¹¹ Ákaa ɛ́sɛ, pɔ́l maná ámble li ɓotle á míɓotlé yɔ nyí nɛ́: bi díŋán ɓɛ́hɛ la ɓɛ́hɛ.

¹² Ndí bih ɓɔŋɔ́g ɓé ákaa Káyin, nyɔ́ a ɓɛ́ɛ́ á épah ɛ́ Ǹlem, ɔ sɛ́m mɔ́ɔ̄nyāŋ cíŋ. Ányúū yéé a sɛ́mɛ́ɛ́ nyɛ́ cíŋ é? Ányúū nɛ misɔ́n mɛ́ɛ́ nyɛ́ Káyin mí ɓɛ́ɛ́ míɓē, ndí mí mí mɔ́ɔ̄nyāŋ mí ɓɛ́ɛ́ mí tɛ́ɛ.

¹³ Á élōgyāŋ, miní nyágág ɓé, kíyáɓɛ́nɛ ɓot bí ŋkɔŋ-á-sí bíg síŋgɛ ɓɛ́nɛ.

¹⁴ Ɓɛ́hɛ, biíg yí nɛ́ ɓaá ɓógyéné á nyɛmb, li níŋgí á éniŋ, ányúū nɛ biíg diŋ elōgyāŋ yáhá. Nyɔ́ la nyɔ́ áh byɛ́ɛ́ ɓé édiŋ a lɛ á sí likanʼyɛ lí nyɛ̄mb.

¹⁵ Tɔ nzáá a ŋga síŋgɛ mɔɔ́nyāŋ a lɛ mut a miólan. Miníg yí kɔɔ nɛ́, éniŋ éɓem ɛ́ sē ɓé la mut a miólan tɔ wa.

¹⁶ Ndembye ediŋ bi byɛ́ɛ̄ nyí lɛn ɛ lɛ nɛ́, nyɛ́ Yésus a tí éniŋ yɛ́ɛ́ ányúū yāhá, ɓɛ́hɛ ki, ɓaá nyɛ́ɛ lí tíi lí éniŋ yáhá ányúū elōgyāŋ yáhá.

¹⁷ Kíyáɓɛ́nɛ mut a yáhɛ la abyaŋ á ŋkɔŋ-á-sí, la nyɛ́ a ɛ́n mɔ́ɔ̄nyāŋ nyɔ́ a byɛ́ɛ̄ kóó la jam, ndí á létlé nyɛ m̀mím, nɛ láá hɔ́ ediŋ Ɔlolómɛ̄ ɛ lɛ́ nɛ yá ɓɛ́ la nyɛ́ é?

¹⁸ Á ɓɔ́ɔ̄n ɓáma, biíh diŋíg ɓé jā á biɓaŋgá la á biɓéé-bí-ányu, ndí bi étɛ́ ediŋ á míɓɔŋɔg la á líɓɛ́ɛg lí mbálɛ.

¹⁹ Náŋ nɛ́ a ŋga kɛ́ li étɛ nɛ́ bi lɛ átē á mbálɛ la ki nɛ́ m̀mím wáhá ág kɛ li tɔɔ lí pií ɔ́sū ví Ɔlolómɛ̄.

²⁰ La mbálɛ, Kíyáɓɛ́nɛ m̀mím wáhá ág kááhɛ́ ɓɛ́hɛ, bikááhɛ́nɛ́ bí Ɔlolómɛ̄ bíg loo bí bí m̀mím wáhá, ányúū nɛ nyɛ́ ag yí jóō nɛ́ jam.

²¹ Á élōgyāŋ yé édiŋ, kíyáɓɛ́nɛ m̀mím wáhá á ŋgá kááhɛ ɓé ɓɛ́hɛ, biíg pɔ́tɛ Ɔlolómɛ̄ ɛ́h ɓɛ́ ɓé woŋ.

²² Tɔ yé ɓaá ɓāt nyɛ, ag kɛ ɓɛ́hɛ yɔ́ lí tíi átɔm nɛ́ biíg naŋɛ mbéndá yɛ́ɛ́, biíg ɓɔŋ ki yé ɛ́ ŋga nyɛ́ɛle nyɛ́.

²³ Mbéndá yɛ́ɛ̄ nyí nɛ́: bi ɓɛ́la ŋyéɓé la Mɔ́ɔ̄n wɛ́ɛ̄ Yésus Kilístus, bi díŋán ki ɓɛ́hɛ la ɓɛ́hɛ, ákaa mbéndá nyí Nyɔ́-a-Pɔ́hlɛ ɛ ŋga lága ɓɛ́hɛ.

²⁴ Nyɔ́ la nyɔ́ a ŋga náŋɛ mbéndá yí Ɔlolómɛ̄, a lɛ la Ɔlolómɛ̄, Ɔlolómɛ̄ ki ɔ ɓɛ́ la nyɛ́. Náŋ nɛ́ bi ŋga yí nɛ́ a lɛ lā ɓɛ́hɛ, li kele la M̀búl Mpúán a tí ɓɛ́hɛ kaa likaale.