Yohánɛs 16 - Esaa-líat ɛ́ péná

¹ Yésus aá la ɓayége ɓɛ́ɛ́ nɛ: «Ma lagá ɓɛ́nɛ míŋ mam mísɛ á li ɓɔŋ nɛ́ miníh kuág ɓé á míceglan.

² Bíg kɛ ɓɛ́nɛ li duhu á ndáá-míɓomán, li loo náŋ, ŋgɛ́ŋ ɛg sɔ́, nyí mut a ŋga kɛ́ ɓɛ́nɛ li ól a ŋga kɛ́ li ɔ́ŋɔ́ nɛ́ ag tíi Ɔlolómɛ̄ nsúlé.

³ Bíg kɛ li ɓɔŋ náŋ ányúū nɛ ɓáh yí ɓé Etāa tɔ ma.

⁴ Mag laga ɓɛ́nɛ náŋ á lí ɓɔŋ nɛ́ eceg nyíŋ ŋgɛ́ŋ ɛ ŋga kɛ́ li kɔlan, miní ɔ́ŋɔ́ nɛ́ mi lagléé ɓɛ́nɛ náŋ.» «Máh laga ɓé ma ɓɛ́nɛ náŋ á bíɓotlé ányúū nɛ́ bi ɓɛ́ɛ́ elɔŋ.

Nsɔ́n á M̀búl Mpúán

⁵ Ndí nyí vɔ́ŋɔ́ɔ, mag kɛ á yóg mut a óm ma, ndí tɔ mut á elɔŋ yáná ah ɓāt ɓé ma nɛ́: ‹Ɔg kɛ véé é?›

⁶ Ndí kaa ma lagá ɓɛ́nɛ náŋ, maná súnán lí loo lí ɔ́vega.

⁷ Ákaa ɛ́sɛ ma lagá ɓɛ́nɛ mbálɛ. Mikɛ máma mí lɛ́ ányúū nsɛ́ŋ wáná, ányúū nɛ́, kí máh kɛ́ ɓé ma, M̀mɔ́mɛ a ŋgá kɛ́ ɓé li sɔ́ ápah miní lɛ. Ndí kíyáɓɛ́nɛ ma kɛ̄, mag kɛ ɓɛ́nɛ nyɛ́ lí ómle.

⁸ Eceg a ŋga kɛ́ li sɔ́, ag kɛ́ li étɛ lí ɓot bí ŋkɔŋ-á-sí nɛ́ ɓá yɔ́p likɔlɓan la aɓé, etɛ́l-sim la ŋkál.

⁹ Likɔlɓan la aɓé, ag kɛ́ li étɛ nɛ́ ɓá yɔ́p ányúū nɛ bí ŋgá yéɓe ɓé la ma.

¹⁰ Likɔlɓan la etɛ́l-sim, ag kɛ́ li étɛ nɛ́ ɓá yɔ́p ányúū nɛ mag kɛ á yóg Etāa, miní ŋga kɛ ɓé pɛ ma lí ɛ́n.

¹¹ Likɔlɓan la ŋkál, ag kɛ́ li étɛ nɛ́ ɓá yɔ́p ányúū nɛ Ɔlolómɛ̄ a kááhɛ́ ŋ̀kanʼyɛ a nyú ŋkɔŋ-á-sí

¹² Mí ŋgí byɛ́ɛ́ mam ŋgandag á li laga lí ɓɛ́nɛ, ndí miní ŋgá la ɓé mɔ́ li ɔ́hánɛ nyí vɔ́ŋɔ́ɔ.

¹³ Eceg M̀búl á mbálɛ a ŋga kɛ́ li sɔ́, ág kɛ ɓɛ́nɛ li yíhɛ lí mbálɛ yɔ ɛsɛ̄, átɔm nɛ́ a ŋga kɛ́ ɓé lí pɔ́t la nyɛ́-mɛ̄n, ndí ag kɛ́ ɓɛ́nɛ li laga li mam a ámble la li yíhɛ́ lí ɓɛ́nɛ yé ɛ́sɛ yá nyɛ́ɛ lí sɔ́.

¹⁴ Ag kɛ ma lí tíi lí lipém ányúū nɛ́ ag kɛ li kuhlene á yé ɛ lɛ́ ɛ́yáma, la nyɛ́ a yíhɛ́ ɓɛ́nɛ yɔ́.

¹⁵ Yé ɛ́sɛ Etāa a byɛ́ɛ̄ ɛ lɛ́ ɛ́yáma, jɔ́ nɛ́ ma lága ɓɛ́nɛ nɛ́, ag kɛ li kuhlene á yé ɛ lɛ́ ɛ́yáma, la nyɛ́ a yíhɛ́ ɓɛ́nɛ yɔ́.»

Mitaka míg yaan mivag

¹⁶ «Puh eceg, miní ŋga kɛ ɓé pɛ ma li ɛ́n, ndí ámbúh puh eceg miní ɛ́n sīg-pɛ ma.»

¹⁷ Jogo jɛ́ɛ́ lí ɓayége lú ɓātɓán nɛ: «Yéé a ŋga somo ɓɛ́hɛ li laga eceg a ŋga yó nɛ́: ‹Puh eceg miní ŋga kɛ ɓé pɛ ma li ɛ́n, ndí ámbúh puh eceg miní ɛ́n sīg-pɛ ma.› Tɔ nɛ́: ‹Mag kɛ á yóg Etāa é›?»

¹⁸ Bú ɓātɓán sīg-pɛ nɛ́: «Puh eceg náŋ ag mínɛ nɛ́ yéé é? Bi ŋgá sɔ́ŋtánɛ ɓé ɓɛ́hɛ yé náŋ a ŋga somo li laga.»

¹⁹ Kasig Yésus a yíí nɛ́ ɓayége bíg somo nyɛ́ lí bihi, ɔ laga nɛ: «Mag yí nɛ́ ɓɛ́nɛ la ɓɛ́nɛ miníg somo ŋgɔpɔ nyí bí biɓaŋgá byáma nɛ́: ‹Puh eceg miní ŋga kɛ ɓé pɛ ma li ɛ́n, ndí ámbúh puh eceg miní ɛ́n sīg-pɛ ma.›

²⁰ La mbálɛ-mbálɛ mag laga ɓɛ́nɛ nɛ́, miníg kɛ li lee la li cɛ́lɛ, kí ɓot bí ŋkɔŋ-á-sí ɓɔ́ bíg sophɛ la mivag. Miníg kɛ li taka, ndí mitaka máná míg kɛ li yaan lí mivag.

²¹ Eceg ŋkogɛ a ŋga byée mindígá, ag taka ányúū nɛ́ ŋgɛ́ŋ yɛ́ɛ̄ abyál ya kɔlan; ndí eceg a byál ag vólánɛ esɔghe a kūh; ag kɔn já mivag nɛ́ a byál mɔɔ́n á ŋkɔŋ-á-sí

²² Jɔ́ nɛ́, miníg taka nyí vɔ́ŋɔ́ɔ, ndí biíg kɛ sīg-pɛ li ɛ́nan, mimím máná míg kɛ hɔ́ li sophɛ la mivag. Ndí míŋ mivag, tɔ mut á ŋgá kɛ ɓé ɓɛ́nɛ mɔ́ li ɓógtɛ.

²³ Múŋ á víŋ ɔlɔ́, miní ŋgá kɛ ɓé pɛ ma lí bihi lí tɔ jam. La mbálɛ-mbálɛ mag laga ɓɛ́nɛ nɛ́, ki maná ɓāt Etāa jam á jóō jáma, ag kɛ ɓɛ́nɛ jɔ́ lí tíi.

²⁴ Tɛɛla nyí vɔ́ŋɔ́ɔ, miní lɛ́ ŋgí lí ɓat lí tɔ jam á jóō jáma. Ɓatán hɔ́, miníg kɛ li kuh á lí somo nɛ́ mivag máná mí yáal.»

Yésus ag dí ŋkɔŋ-á-sí cíŋ

²⁵ «Ma lága ɓɛ́nɛ míŋ mam mísɛ á aŋgaáŋgan, ndí ŋgɛ́ŋ ɛg sɔ́, nyí míh ɓɛ́ ɓé pɛ ma mag pɔ́t la aŋgaáŋgan, ndí nyí mí ɓɛ́ mag nándlene ɓɛ́nɛ mam mí Etāa.

²⁶ Múŋ á víŋ ɔlɔ́, miníg kɛ li kánɛ á jóō jáma, mi ŋgá laga ɓé ma ɓɛ́nɛ nɛ́, mag kɛ li kánɛ lí Etāa ányúū yaná;

²⁷ átɔm nɛ́, Etāa nyɛ́-mɛ̄n ag dīŋ ɓɛ́nɛ ányúū nɛ́ maná dīŋ ma, la ki nɛ́ maná yéɓé nɛ́ ma pámléné á átē a Etāa Ɔlolómɛ̄.

²⁸ Ma pámléné á átē á Etāa li sɔ́ á ŋkɔŋ-á-sí, ndí nyí vɔ́ŋɔ́ɔ mag ɓógo á ŋkɔŋ-á-sí á li timan á yóg Etāa.»

²⁹ Ɓayége ɓɛ́ɛ́ bú lagá nyɛ nɛ́: «Ɛ́n nyí vɔ́ŋɔ́ɔ, wa yɛ́lɛ́ mam mísɛ, ɔ ŋgɔ́ pɔ́t ɓé pɛ la aŋgaáŋgan.

³⁰ Nyí vɔ́ŋɔ́ɔ, biíg yí nɛ́ ɔg yí jóō nɛ́ jam, ɔh byɛ́ɛ ɓé kóó nɛ mut a bíhī wa tɔ jam. Ányúū náŋ nɛ́ ɓaá yéɓé nɛ́ wa pámléné á átē a Ɔlolómɛ̄.»

³¹ Yésus ɔ pélē ɓɔ́ nɛ́: «Ɓaá, li ɓotle nyí vɔ́ŋɔ́ɔ miníg yéɓé é?

³² Ŋgɛ́ŋ ɛ lɛ lí siŋgle, ya nyɛ́g, nyí miní ŋga kɛ́ li caman, mut sig a kɛ́ á ɛ́yɛ̄ɛ̄ épah, miní yíg ma mā-ntámɛ́. Ndí mi sē ɓé ma mā-ntámɛ́, Etāa a lɛ́ la ma.

³³ Mag laga ɓɛ́nɛ míŋ mam á lí somo nɛ́, á ŋ̀atanɛ́ la ma, miní ɓɛ́la nsaŋ. Miníg kɛ li taka mú á nyú ŋkɔŋ-á-sí, ndí, lethánɛ nyuú ányúū nɛ ma dí ŋkɔŋ-á-sí cíŋ.»