Yohánɛs 11 - Esaa-líat ɛ́ péná

Yésus ag pahyɛ Lásalo

¹ Ŋ̀kɔɔ́kɔn wa nɛ́ Lásalo, a ŋgí tɔɔ á Betánia ŋkɔŋ á Mālía la mɔɔ́nyāŋ á mindígá Maatá.

² Nyɔ́ŋ Malía nɛ́ á ɔ́ghɛ́ɛ Nyɔ́ŋ-Ɛsáŋɛ́ ŋ̀gɔ́gɔ á libíndɛ, ɔ tɔ̄h ki nyɛ́ mikoo la voŋ vɛ́ɛ́ ví m̀mú. Á mbálɛ, mɔɔ́nyāŋ Lásalo a ŋgí kɔn.

³ Elōgnyāŋ yé ɓóndīgá yú óm mut li laga lí Yésus nɛ́: «Ɛtáŋɛ, mut ɔ ŋgɔ diŋ ag kɔn.»

⁴ Ɛnɛ́ a ámblé náŋ ɔ lagá nɛ́: «Víŋ ɔkɔn ví ŋga ól ɓé nyɛ́, la vɔ́ nɛ́ lipém lí Ɔlolómɛ̄ lí ŋga ɛ́nyéne; li kele la vɔ́ nɛ́ bí ŋga kɛ́ li tíi lí Mɔɔ́n Ɔlolómɛ̄ lipém.»

⁵ La mbálɛ, Yésus a ŋgí diŋɛ Maatá, Malía la Lásalo.

⁶ Tɔ náŋ kaa a ŋgí yí nɛ́ Lásalo ag kɔn, ɔ lōɛ́ sīg-pɛ alɔ́ áɓáa váŋ ápah a ɓɛ́ɛ́.

⁷ Ámbúh náŋ, ɔ lagá ɓayége ɓɛ́ɛ́ nɛ́: «Bi timkágán á Yúdēa.»

⁸ Ɓayége ɓɛ́ɛ́ bú lágá nyɛ́ nɛ́: «Lábi kɛ́ɛté ɓé nɛ ɓɔɔ́n bí Élōg-Yúda bí ŋgí somo wa lí ól la ŋgɔg, ndí ɔg somo sīg-pɛ li timan wóŋ é?»

⁹ Yésus ɔ pélē ɓɔ́ nɛ́: «Ɓaá, nzámuh ɛh byɛ́ɛ́ ɓé jóom lí ŋgɛ́ŋ la ɛ́ɓáa é? Kíyáɓɛ́nɛ mut ag wɛɛ la nzámuh, a ŋgá ɓomtan ɓé ányúū nɛ́ ag ɛ́n mipúú mi nyú ŋkɔŋ-á-sí

¹⁰ Ndí, kíyáɓɛ́nɛ mut ag wɛɛ la díɓe, ag ɓomtan ányúū nɛ́ mípūū mí sē ɓé.»

¹¹ Ɛnɛ́ Yésus a pɔ́t bíŋ biɓaŋgá ɔ kōndyé nɛ́: «Liwándá jáhá Lásalo lí lɛ́ lí lál, ndí ma kɛ́ mi vɛ́ɛ́ɓɛ́ nyɛ́.»

¹² Váŋ hɔ́ nɛ́ ɓayége ɓɛ́ɛ́ ɓá lagá nyɛ nɛ́: «Ɛtáŋɛ, kíyáɓɛ́nɛ á lɛ ja á ɔ́lɔ̄ ag kɛ li suŋɓɛ.»

¹³ Ákaa ɛ́sɛ Yésus a ŋgí kwɛlene nyɛmb nyí Lásalo, ndí ɓayége bí ŋgí ɔ́ŋɔ nɛ́ a ŋgí pɔ́t ányúū yɛmɛ́ ɔlɔ́.

¹⁴ Váŋ nɛ́ Yésus a lēglénéé hɔ́ ɓɔ́ nɛ́: «Lásalo a wú pɔ́n!

¹⁵ Mag kɔnlene ɓɛ́nɛ mivag, kasig míh mɓɛ́ ɓé má wóŋ, ányúū náŋ miníg kɛ li yéɓé la ma, sɔ́án bi kɛ́nɛ́g ápah a lɛ.»

¹⁶ Váŋ nɛ́ Tómas nyɔ́ a byɛ́ɛ̄ ŋgól nɛ́ m̀byáh a lága ɓáŋá ɓayége nɛ́: «Ɓɛ́hɛ ki bi kɛnɛ́g bi wú elɔŋ la Ɛtáŋɛ wahá.»

¹⁷ Ɛnɛ́ Yésus a pám wóŋ, ɔ kɔ́p nɛ alɔ́ ánáa nyú lɛn káán Lásalo a jéɓɛ.

¹⁸ Kasig Betánia ya ɓáglán ja la Yelúsalɛm jam-kaa kílométa ɛ́ŋháa,

¹⁹ ŋgandag ɓɔ́ɔ̄n bí Élōg-Yúda bí Yúdēa yú sɔ́ li letɛ lí Mālía la Maatá nyúū ányúū nyɛmb mɔɔ́nyāŋ waɓá á páam.

²⁰ Ɛnɛ́ Maatá a ámblé nɛ Yésus a lɛ lí sɔ́, ɔ kɛ́ li ɓoman la nyɛ́. Malía nyɛ́ ɔ yéglé a tɔ́ɔ̄ á ndáá.

²¹ Váŋ nɛ́ Maatá a lága Yésus nɛ́: «Ɛtáŋɛ, kí ɓɔŋ nɛ́ ɔ ɓɛ́ vá, kí mɔɔ́lyāŋ āh wú ɓé.

²² Ndí, tɔ nyí vɔ́ŋɔ́ɔ mag yí nɛ́, tɔ yéé ɔ ŋgɔ ɓāt Ɔlolómɛ̄ ag kɛ wa yɔ́ lí tíi.»

²³ Yésus ɔ pélē nyɛ́ nɛ́: «Mɔɔ́nyɔ̄ŋ ag kɛ li pahye.»

²⁴ Maatá ɔ tímānɛ̄ nyɛ nɛ́: «Mag yí nɛ́ ag kɛ li pahye á ɔlɔ́ vá tiile, eceg ɓot bísɛ ɓá wú bí ŋga kɛ́ li pahye.»

²⁵ Yésus aá la nyɛ́ nɛ́: «Mi lɛ lipahye la eniŋ, nyɔ́ la nyɔ́ a ŋga yéɓé la ma, tɔ a wú ag kɛ li niŋ;

²⁶ tɔ nzáá ki a lɛ á éniŋ ndí a yéɓé la ma, m̀ɓá-mɓá a ŋga kɛ ɓé li wú. Ɓaá, ɔg yéɓé náŋ é?»

²⁷ Maatá ɔ pélē nyɛ́ nɛ́: «Ɔɔ Ɛtáŋɛ, mag yéɓe nɛ́ ɔ lɛ Nyɔ́-a-Pɔ́hlɛ, Mɔɔ́n Ɔlolómɛ̄ nyɔ́ a sɔ́ á ŋkɔŋ-á-sí»

²⁸ Múŋ á bíŋ biɓaŋgá, Maatá ɔ kɛ́ li yáŋa lí mɔ́ɔ̄nyāŋ á mindígá Mālía, ɔ sɔ̄glánɛ̄ nyɛ́ nɛ́: «Ŋ̀yéglɛ a sɔ́, ag yáŋa wa.»

²⁹ Ɛnɛ́ Mālía a ámblé náŋ, á ékūyá-kúyá, ɔ tɛ́lɛ́ ɔ kɛ́ li ɓoman la Yésus.

³⁰ Ndí, Yésus a ɓɛ́ɛ́ ŋgí lí níŋgi á ŋkɔŋ; a ɓɛ́ɛ́ á ŋgí tɛ́ɛ́ á voóm Maatá a kɔ́pléné nyɛ́.

³¹ Eceg ɓɔɔ́n bí Élōg-Yúda bí Yúdēa ɓá bí ɓɛ́ɛ́ váŋ á ndáá elɔŋ la Malía á lí letɛ lí nyɛ́ nyuú ɓá ɛ́n nyɛ́ ag digɓan lí pám, bú ōŋ nyɛ la miɔ́ŋɔ nɛ́ ag kɛ li lee á sɔŋ.

³² Ɛnɛ́ Malía a pám ápah Yésus a lɛ, ɔ ɛ́n nyɛ́, ɔ kúēlé nyɛ́ á sí mikoo, aá la nyɛ́ nɛ: «Ɛtáŋɛ, kí ɓɔŋ nɛ́ ɔ ɓɛ́ vá, ki mɔɔ́lyāŋ ah wú ɓé.»

³³ Ɛnɛ́ Yésus a ɛ́n Mālía la elɔŋ yɛ́ɛ́ yé ɓɔ́ɔ̄n bí Élōg-Yúda bí Yúdēa bíg lee, náŋ ɔ síiɓán nyɛ́ ŋgandag.

³⁴ Váŋ nɛ́ a ɓāt ɓɔ́ nɛ́: «Á véé maná jē nyɛ é?» Bú pélē nyɛ́ nɛ́: «Ɛtáŋɛ, sɔ́ ɛ́n!»

³⁵ La Yésus ɔ lée.

³⁶ Ɓɔɔ́n bí Élōg-Yúda bí Yúdēa bú lagá nɛ́: «Léɓyán sig kaa a ŋgí diŋɛ nyɛ́!»

³⁷ Jogo lí ɓot á elɔŋ yáɓá lú lagá nɛ́: «Nyɛ́ mut a ɓɔ̄ŋ nɛ mut-a-ndím a ɛ́nán, nɛ́ láá ah la ɓé pɛ li céŋɛ nɛ́ Lásalo ah wúág ɓé é?»

³⁸ Náŋ ɔ síiɓán sīg-pɛ Yésus la nyɛ́ ɔ kɛ́ á sɔŋ, nyí bí ɓogóó á ŋgɔg la ɓɔ́ bú lēg miníŋglé mɛ́ɛ́ la ŋgɔg etám.

³⁹ Ɔ lága nɛ: «Ɓógtánɛ nyíŋ ŋgɔg» Maatá, mɔɔ́nyāŋ á elóŋ-mut ɔ lagá Yésus nɛ́: «Ɛtáŋɛ ag nyɛɛ li num lí áɓē, alɔ́ ánáa nyú lɛn káán ɓá jé nyɛ.»

⁴⁰ Yésus ɔ lága nyɛ nɛ́: «Ɓaá, máh laga ɓé wa nɛ́ kíyáɓɛ́nɛ ɔ byɛ́ɛ ŋyéɓé ɔg kɛ li ɛ́n lí lípēm lí Ɔ́lolómɛ̄ é?»

⁴¹ La ɓɔ́ bú ɓógtɛ́ hɔ́ ŋgɔg; Yésus ɔ ɓétɛ́ miíh á lóō ɔ lága nɛ: «Etāa, mag tíi wa mitamlan ányúū nɛ́ wa ámblé ma.

⁴² Mag yí la mbálɛ nɛ́ ɔg ámble ma eceg sig. Ndí, ányúū jé limut la díí ma, mag pɔ́t nɛ́ ndí bí yéɓé nɛ́ wa nɛ́ wa óm ma.»

⁴³ Ɛnɛ́ a manɛ́ lí laga náŋ, ɔ pɔ́t á loó-loó nɛ́: «Á Lásalo, pám!»

⁴⁴ Váŋ nɛ́ Lásalo a pám mɔ la mikoo ŋkágag la bándáas la asú m̀vúlkége la mbɔ́ŋ. Yésus ɔ lagá ɓɔ nɛ́: «Kúhlán nyɛ́, miní mwahɛ́ nyɛ́ á kɛ́nɛ́g.»

Dimb lí Yésus

⁴⁵ Ŋgandag á élɔŋ yé ɓɔ́ɔ̄n bí Élōg-Yúda bí Yúdēa ɓá bí sɔ́ɔ́ lí pɔ́tɛ lí Mālía, ɛnɛ́ bí ɛ́nɛ́ɛ́ yé Yésus a ɓɔ̄ŋ, bú yéɓé la nyɛ́.

⁴⁶ Ndí ɓatám bú kɛ lí kɔ́p lí ɓot bí Élōg-Falísái á lí máŋlɛ lí ɓɔ́ yé Yésus a ɓɔ̄ŋ.

⁴⁷ Ɓakanʼyɛ ɓatíi-nsúlé la ɓot bí Falísái bú kɔ̄tán á ɔ́ku-vicɛ́ŋ-ví-bíkāāhɛ́nɛ́, la ɓɔ́ bú lagá nɛ: «Yéé ɓa nyɛ́ɛ li ɓɔŋ é? Nyɔ́ mut ag ɓɔŋ ŋgandag binanaŋga bí mam.

⁴⁸ Kíyáɓɛ́nɛ ɓa mwáhɛ́ nɛ́ a kóndyé lí kɛla náŋ la ɔ́sū, ɓot bísɛ bíg kɛ li yéɓé la nyɛ́. Elōg-Lóma ɛ́g kɛ́ li sɔ́ a lí kúlú lí Liɓógá jáhá Lipúán la li cɛ́hɛ lí lilóm jáhá.»

⁴⁹ Wa á elɔŋ yáɓá nɛ́ Kaífa, nyɔ́ a mɓɛ́ ŋ̀kanʼyɛ ǹcɛ́ŋ a ɓatíi-nsúlé múŋ á nyúŋ m̀bú ɔ lagá ɓɔ nɛ́: «Miní ŋgá sɔ́ŋtánɛ ɓé tɔ jam!

⁵⁰ Ɓaá, miní ŋgá ɛ́n ɓé nɛ́ náŋ a lɛ nsɛ́ŋ wáná nɛ́, mut wa nɛ́ a wú ányúū lilóm, li loo nɛ́ lilóm lísɛ líg cɛ́ é?»

⁵¹ Ndí Kaífa a ŋgí pɔ́t ɓé bíŋ biɓaŋgá la nyɛ́-mɛ̄n; kasig a ɓɛ́ɛ́ ŋ̀kanʼyɛ ǹcɛ́ŋ a ɓatíi-nsúlé múŋ á nyúŋ m̀bú nɛ a pɔ́tɔ́ɔ́ náŋ á ɔ́sū ví eceg, nɛ́ ɛ́g somlɛ nɛ́ Yésus a wú ányúū lilóm lí Élōg-Yúda.

⁵² Ah ányúū jɔ́-ntámɛ́ ɓé já, ndí á lí komanɛ lí ɓɔ́ɔ̄n bí Ɔlolómɛ̄ ɓá cámān pɛ́ɛ́ ɛsɛ̄ nɛ́ bí ɓɛ́ mut wa.

⁵³ Múŋ á víŋ ɔlɔ́ hɔ́ nɛ́ bí súghɛ́ɛ nɛ́ bíg ólhánɛ Yésus.

⁵⁴ Ndí á ɛ́yɛ̄ɛ̄ épah, Yésus nyɛ́ ɔ mwáhɛ́ lí ɓét ag suh á miíh mí ɓákanʼyɛ bí Élōg-Yúda. Váŋ nɛ́ a kɛ á epah ékombo yé ɛ́ lɛ́ ɓɛɓɛ la eyáŋ, á ŋkɔŋ á ŋga yáŋlɛ nɛ́ Efláim, ɔ tɔ́ɔ́ wóŋ la ɓayége ɓɛ́ɛ́.

⁵⁵ Á yéŋ eceg, ŋgand Páska nyí Elōg-Yúda ɛ ɓɛ́ɛ́ ɓɛɓɛ. Á nlááhɛ a nyíŋ ŋgand, ŋgandag ɓɔ́ɔ̄n bí Élōg-Yúda bí lɛ́ á míkɔŋ bú ɓét á Yélūsalɛm nɛ́ bí so miɓé máɓá.

⁵⁶ Bí ŋgí somo Yésus múŋ á ndáá-ēcɛ́ŋ-Ɔlolómɛ̄ ápah bi ɓɛ́ɛ́, bí ŋgí laglan nɛ́: «Miníg ɔ́ŋɔ láá é? M̀ɓá a ŋgá kɛ ɓé li sɔ́ á ŋgand.»

⁵⁷ Ɓakanʼyɛ ɓatíi-nsúlé la Elōg-Falísái bú tí ndag nɛ́, nyɔ́ la nyɔ́ a ŋga yí voóm Yésus a lɛ, a lagá á li ɓɔŋ nɛ́ bí byee nyɛ́.