Timotéo 2 2 - Esaa-líat ɛ́ péná

Li ɔ́hánɛ lí bísɔghe á lí ɓɛ́ lí taŋ m̀ɓɔŋle a Yésus

¹ Wa hɔ́, á mɔ́ɔ̄n wáma, nyɔŋlé ŋguu yɔ́ɔ á líōŋgánɛ lí ŋga sɔ́le á ŋ̀atanɛ́ la Yésus Kilístus.

² Yé ɛ́sɛ wa ámblé mā mag yéglɛ ɔ́sū ví ŋgandag mbóŋ, wág byeehɛ́ yɔ́ ɓot bí kɔ̄lánɛ́, ɓá ɓɔ́-mɛ̄n bí ŋga lā li yéglɛ li ɓot ɓatám.

³ Nyɔŋ ɛ́yɔɔ ŋgaan á bísɔghe ákaa taŋ sónja nyí Yésus Kilístus.

⁴ Mut a ŋga kɛ́ á nsɔ́n á sónja, a ŋgá nyɔŋ ɓé pɛ eceg la mam mí éniŋ ákaa byɛmɛ́ bí ɓot, kíyáɓɛ́nɛ ag somo li nyɛɛle lí mut a níŋgɛ́ nyɛ á nsɔ́n á sónja.

⁵ Nlemlem á jam, á pembhán eɓándá, ǹdu-eɓándá ag kuh ɔtot kíyáɓɛ́nɛ a dū éɓāndá li oŋle la mitiŋ mí éɓāndá.

⁶ Ǹsál-ǹdíí á sí esɔghe, nyɛ́g ag nyɛɛ li ɓɛ́ lí mut ɔsú á lí pumu.

⁷ Ámblé yé mi ŋga lága. Á káa ɛ́sɛ, Nyɔ́ŋ-Ɛsáŋɛ́ ag kɛ́ wa lí yíhɛ lí mam mísɛ má yégle.

Ɔ́ŋɔ́ Yésus nyɔ́ a pāhye

⁸ Ɔ́ŋɔ́ Yésus Kilístus nyɔ́ a pāhye á póla ɓá ɓá wū, nyɔ́ a pámléné á ndáá-m̀biya nyí káísa Dávid, li oŋle la Pɔ́l M̀ɓɛɛŋ nyí mi ŋga lɛ́gɛ.

⁹ Ányúū nyíŋ Pɔ́l M̀ɓɛɛŋ nɛ́ mi ŋga sɔ̄ghe, tɛɛ mu kágɓɛ́ la nsáŋ-á-bícɛɛ kaa m̀ɓéé-mam. Ndí Eɓaŋgá Ɔ́lolómɛ̄ ɛ́h kágɛ̄ ɓé!

¹⁰ Ányúū náŋ nɛ́ mi ŋga ɔ́hánɛ mam mísɛ ányúū ɓot Ɔlolómɛ̄ a pɔ́hɔ, nɛ́ ndí ɓɔ́g bi kuh lisuŋga jé lí lɛ́léné á Yésus Kilístus, bí kuh ki lipém lí éɓem.

¹¹ Eɓaŋgá ɛ́ kɔ́ɔ̄ nɛ́ bí válé lípitá yɔ́ yé nɛ́: Kíyáɓɛ́nɛ ɓa wú elɔŋ la Yésus, elɔŋ la nyɛ́ biíg kɛ li niŋ.

¹² Kíyáɓɛ́nɛ ɓaá sɔghé elɔŋ la nyɛ́, elɔŋ la nyɛ́, biíg kɛ ki li kanʼyɛ. Kíyáɓɛ́nɛ ɓa táŋɓán nyɛ́, nyɛ́g ag kɛ ɓɛ́hɛ li táŋɓan.

¹³ Kíyáɓɛ́nɛ ɓāh tiŋɓe ɓé á míkakanɛ máhá, nyɛ́ a tíŋɛ á míkakanɛ mɛ́ɛ́, átɔm nɛ́, a ŋgá la ɓé lí táŋɓan lí nyɛ́-mɛ̄n.

Ŋgéélé ányúū li yí lí lí wɛɛla lí nsɔ́n wɛ́ɛ́

¹⁴ Ɔ́ŋlánɛ ɓot míŋ mam mísɛ, ɔ yíhɛ́ ɓɔ́ ɔ́sū ví Ɔ́lolómɛ̄ nɛ́ bi sɛ́ɓán mómo ányúū li somo lí lí sɔ́ŋtánɛ lí bíɓaŋgá, átɔm nɛ́ míh byɛ́ɛ́ ɓé nsɛ́ŋ tɔ wá, ah la náŋ ɓé, míg jáŋɛ ɓot bí ŋga ámble mɔ́.

¹⁵ Cegé la ŋguu nɛ́ ɔ ɛ́ní ɔ́sū ví Ɔ́lolómɛ̄ kaa mut nɛ́ a yí lí ɓɔŋ lí nsɔ́n wɛ́ɛ́, ákaa m̀ɓɔŋle nyɔ́ a ŋgá kɔn ɓé mbɔɔla la nyúŋ nsɔ́n, m̀ɓɔŋle nyɔ́ a ŋga yí lí camanɛ lí pɔ́l nyí ɛ lɛ mbálɛ á nyaa ɛ tɛ́ɛ́.

¹⁶ Sɛɓán bíyōgló bí míkwɛl. Ákaa ɛ́sɛ, ɓáŋ bí ŋga níŋgi átē, bíg kondye li nɛŋɛ la Ɔlolómɛ̄,

¹⁷ yé bí ŋga yéglɛ ɓot ɛ́g ɓéé énum ákaa póó likóŋgá. Náŋ nɛ́ Himéne la Filétos bí lɛ̄.

¹⁸ Ɓá nɛŋɛ́ la mbálɛ ányúū nɛ bíg laga nɛ́ lipahye lí ɓá ɓá wū lá man lí loo, la náŋ ɓá ɓɔ̄ŋ nɛ ŋyéɓé á ɓot ŋgandag á yɔ̄ŋɔ́.

Yé ɓa nyɛɛ́ lí ɓɛ́ á lí nyɛɛle lí Ɔ́lolómɛ̄

¹⁹ Ákaa ɛ́sɛ, jaa Ɔlolómɛ̄ a tɛ́ɛ́yɛ lí lɛ́ ŋguu. Biɓaŋgá byá ciiɓɛ́ muŋ byɔ́ bí nɛ́: «Nyɔ́ŋ-Ɛsáŋɛ́ ag yí ɛ́ɓɛ̄ɛ̄.» La ki nɛ́: «Tɔ nzáá a ŋga lónle Nyɔ́ŋ-Ɛsáŋɛ́, a nɛ́ŋɛ̄ la aɓé!»

²⁰ Ah bisóa bí góol la sílba byɔ́-ntámɛ́ ɓé nɛ́ bí lɛ́ á taŋ nlɛ́ɛ́, ndí bí ɓá ɓāŋ la enjéŋ la bí ɓá mɛ̄ la liŋgom byɔ́g bí lɛ́ átē. Bisóa bí ɔ́sū bí lɛ ányúū tāŋ mílɛ́gle, bíŋí ki ányúū li ɓɔŋle á ndáá ɔlɔ́ la ɔlɔ́ sig.

²¹ Nyɔ́ la nyɔ́ a ŋga ɓógtɛ nyɛ́-mɛ̄n á nyíŋ nyɛgá, ag kɛ li ɓɛ́ lí ésoá lípēm, yé yá nāŋɓɛ́ tóɓó-tóɓó, yé ɛ́ lɛ́ nsɛ́ŋ ányúū Ɛsáŋɛ́-a-mitán, la yé lɛ́ m̀ɓoŋhágan ányúū joó nɛ nsɔ́n á m̀ɓɛɛŋ.

Liɓɛ́ɛg lí m̀ɓɔŋle a Nyɔ́ŋ-Ɛsáŋɛ́

²² Á tímotéo, nɛŋɛ́ la mam má loohán lí nyɛɛle lí áwāndá, ndí somó étɛ̄l-sim, somó lí ɓɛ́la lí ŋyéɓé, somó lí ɓɛ́la lí édiŋ, somó nsaŋ la ɓá bísɛ bí ŋga lónle Nyɔ́ŋ-Ɛsáŋɛ́ la m̀mím á ŋga púú.

²³ Sɛɓán bíjōŋ bí míkwɛl bí ŋgíla eɓáha, ɔg yí nɛ́ míg sɔ́la jā mómo.

²⁴ Yí nɛ́, m̀ɓɔŋle a Nyɔ́ŋ-Ɛsáŋɛ́ āh nyɛɛ ɓé lí ómo, ndí ag nyɛɛ li diŋ lí ɓot bísɛ, ag nyɛɛ li la lí lí yéglɛ, la li ɔ́hánɛ lí ntɛ́ŋgānɛ́ asɛ̄.

²⁵ Ag nyɛɛ li yéglɛ lí ɓátɛ̄ŋgánɛ nyɛ́ la ewú-m̀mím. Nzáá a ŋga yí, kíyáɓɛ́nɛ Ɔlolómɛ̄ a ŋgá kɛ ɓé ɓɔ lí tíi lí eceg nɛ́ bí vēŋé bílɛ̄m ányúū li yí lí mbálɛ é?

²⁶ Tɔ li timan lí lí ɓógo ɓɔ́-mɛ̄n á áām á ǹsɔhɔ nyɔ́ a váá ɓɔ́ á ŋgatka, la nyɛ́ ɔ yáanɛ́ ɓɔ̄ mindimí á nsom wɛ́ɛ́ é?