Timotéo 2 1 - Esaa-líat ɛ́ péná

Mitamlan

¹ Ma Póol, mi lɛ ŋ̀ómɓɛ a Yésus Kilístus li oŋle la nsom á Ɔlolómɛ̄, mu ɓɛ́ ki ŋ̀ómɓɛ li oŋle la eniŋ Ɔlolómɛ̄ a kákanɛ á ŋ̀atanɛ́ la Yésus Kilístus.

² Mag ciile wa á Timotéo, édidíŋɛ yáma mɔ́ɔ̄n. Etāa Ɔlolómɛ̄ la Yésus Kilístus Ɛtáŋɛ wahá bí lómbó wa, bí kɔn wa ŋgɔ́ɔ́, bí tí ki wā nsaŋ.

Póol ag tíi Ɔlolómɛ̄ mítamlan

³ Mag tíi Ɔlolómɛ̄ ŋgandag mítamlan, nyɔ́ mi ŋga sále la cíŋ-m̀mím ɛ ŋga púú, nlemlem ákaa ɓatáŋɛ ɓá ɓɔŋ, eceg sig mi ŋga símhánɛ wa á míkánɛ máma díɓe la nzámuh.

⁴ Ɛnɛ́ ma ɔ́ŋɔ bíya byɔ́ɔ, kóó li ɛ́n lí wa sīg-pɛ yu byee ma tɔláá, nɛ́ ndí mi yál la mivag.

⁵ Mi ŋgí ɔ́ŋlág taŋ ŋyéɓé ɔ byɛ́ɛ̄. Nyúŋ ŋyéɓé nɛ mbómbó yɔ́ɔ a mindígá Lóyis la nyɔŋɛ́ Eníse bí ɓɛ́ɛ́la. Mi lɛ mbáki nɛ́ wɔ́ nɛ́ wág ɔ byɛ́ɛ̄.

Ndag likɔlɓan la Pɔ́l M̀ɓɛɛŋ

⁶ Jɔ́ nɛ́ mi ŋga ɔ́ŋlánɛ wa nɛ́, nyiŋgɛ́ likaale wa kūh, jé Ɔlolómɛ̄ a tí wa, li ɓotle á eceg yé mi kahyɛ́ɛ wā mɔ á m̀mú.

⁷ Ákaa ɛ́sɛ, Ɔlolómɛ̄ āh tíi ɓé ɓɛ́hɛ nɛ́ bi ɓɛ́ aɓɔɓɔŋga, ndí á tí ɓɛ́hɛ m̀mím ŋguu, á ediŋ la li yí lí lí ɔn lí nyúū.

⁸ Jɔ́ hɔ́ nɛ, ɔh kɔnɔ́g ɓé ɔ́sɔ̄n lí tíi lí mbóŋ nyí Ɛtáŋɛ wahá, ɔh kɔnɔ́g ɓé ki ma ɔ́sɔ̄n, ma nyɔ́ mi lɛ̄ á m̀ɓog ányúū yɛ́ɛ̄. Ndí, sɔghé elɔŋ la ma ányúū Pɔ́l M̀ɓɛɛŋ, ɔ válé lípitá á ŋguu Ɔlolómɛ̄,

⁹ nyɔ́ a sūŋ ɓɛ́hɛ, nyɔ́ a yáŋá ɓɛ́hɛ la ŋyáŋlán mpúán, ɔ yáŋá ɓɛ́hɛ ah ányúū misɔ́n máhá ɓé, ndí ányúū peg yɛɛ́ a vúl la elɔ́ŋgɔ yɛ́ɛ́ m̀mím. A étɛ́ ɓɛ́hɛ yéŋ elɔ́ŋgɔ yɛ́ɛ́ m̀mím yɔŋ ɔ́sū ví éceg li kele la Yésus Kilístus.

¹⁰ Nyí vɔ́ŋɔ́ɔ, yéŋ elɔ́ŋgɔ yɛ́ɛ́ m̀mím yá ɛ́nyéné á misɔ́ mí Ǹsuŋ wahá Yésus Kilístus. Nyɛ́ nɛ́ a mānɛ́ nyɛmb li kele la Pɔ́l M̀ɓɛɛŋ, ɔ étɛ̄ éniŋ yé ŋgíla lisúg.

¹¹ Ányúū nyíŋ Pɔ́l M̀ɓɛɛŋ nɛ́ Ɔ́lolómɛ̄ a tɛ́ɛ́yɛ́ mā ǹlɛgɛ-njɛn, ŋ̀ómɓɛ la ŋ̀yéglɛ.

¹² Ányúū náŋ nɛ́ mi ŋga ɔ́hánɛ bíŋ bisɔghe. Ndí náŋ a ŋgá kɔnɛ ɓé ma ɔ́sɔ̄n, átɔm nɛ́ mag yí la nzáá ma yéɓe, mi lɛ ki mbáki nɛ́ a byɛ́ɛ́ ŋguu li naŋɛ lí yé a byéehɛ́ ma nɛ́-tɛ́ɛla á ɔ́lɔ̄ vá tiile.

¹³ Yí taŋ bíɓaŋgá wa ámblé mā mag pɔ́t ɛ́ ɓɛ́ wa ákaa ndembye, átē a ŋyéɓé la ediŋ bí bí lɛ́léné á ŋ̀atanɛ́ la Yésus Kilístus.

¹⁴ Líkaale lí m̀ɓɛɛŋ Ɔlolómɛ̄ a byeehɛ́ wā, náŋɛ̄ jɔ́ li loole la M̀búl Mpúán nyɔ́ a tɔɔ́ átē wahá.

Póol ag tíi mbóŋ nyí Onesifóle

¹⁵ Ákaa ɔ ŋgɔ yí, Fígɛl la Elmojɛ́ne ɓɔ́g ɓá cóó ma ákaa ɓot bísɛ bí epah ékombo yé Ásia.

¹⁶ Nyɔ́ŋ-Ɛsáŋɛ́ a kɔ́nlé m̀biya á Onesifóle ŋgɔ́ɔ́, átɔm nɛ́ á biceg byá, Onesifóle a ŋgí sɔ́ ma lí letɛ lí nyúū, m̀ɓog wáma wáh kɔnɛ ɓé nyɛ ɔsɔ́n.

¹⁷ Á mveŋghanɛ́, ɛnɛ́ a pám á Lóma, ɔ sómo ma la akwáá nɛ́-tɛ́ɛ ɔ ɛ́n ma.

¹⁸ Nyɔ́ŋ-Ɛsáŋɛ́ a óŋgánɛ nɛ́ Ɔlolómɛ̄ a kɔ́n nyɛ́ ŋgɔ́ɔ́ á ɔ́lɔ̄ ví bíkááhɛ́nɛ́. Mam mísɛ ki a ɓɔ̄ŋlé ma á Éféso, ɔg yí mɔ́ m̀ɓɛɛŋ li loo lí ɓot bísɛ.