Matéus 21 - Esaa-líat ɛ́ péná

Miníŋgi mí Yésus á Yélūsalɛm

¹ Ɛnɛ́ Yésus la ɓayége ɓɛ́ɛ́ ɓá sīŋglé ɓɛɓɛ la Yelúsalɛm, bú pám ɓɛ́ɓɛ la Betfagéa, á ɔ́kolá ví tín ɛ́ Olíva. Váŋ nɛ̄ Yésus a óm ɓáyēge ɓɛ́ɛ́ bíɓáa,

² aá la ɓɔ́ nɛ́: «Kɛnán á ŋkɔŋ á lɛ́ ɔ́sū váná, la lí pám, miníg kɛ li kɔ́p lí m̀mín á jákāas á tíŋɛ, mɔɔ́n wɛ́ɛ̄ á ŋgwáāg yɛ́ɛ̄; tiŋlán wɔ́, miní sɔ́la ma wɔ́ la mɔɔ́n wɛ́ɛ̄.

³ Ndí kíyáɓɛ́nɛ mut a ɓāt ɓɛ́nɛ jam, peelán nyɛ́ nɛ́: Nyɔ́ŋ-Ɛsáŋɛ́ a byɛ́ɛ́ kóó la mɔ́; á ékūyá-kúyá, ag kɛ ɓɛ́nɛ mɔ́ li mwahle.»

⁴ Náŋ ag ɓɔŋɓɛ á li somo nɛ́ jam m̀pɔ́tle-a-Ɔlolómɛ̄ a pɔ́t lí yāl. A lagléé nɛ́:

⁵ «Laglán ŋgɔn ŋkɔŋ á Síon nɛ́, Légɓé sig, káísa yɔɔ ɛg sɔ́le wa, la esuhɛ-nyuú, á lóō lí m̀mín á jákāas la á lóō lí mɔ́ɔ̄n wɛ́ɛ̄, mɔɔ́n tít nyí ɛ ŋga ɓɛ́gɛ ɓot.»

⁶ Ɓayége bú kɛ, bú ɓɔ̄ŋ ákaa Yésus a lagléé ɓɔ́.

⁷ Bú sɔ́la m̀mín á jákāas la mɔɔ́n wɛ́ɛ̄, ámbúh náŋ bú táa mbɔ́tí yáɓá á lóō lí tít la Yésus ɔ tɔ́ɔ̄ yɔ á lóō.

⁸ limut jé lílōm lú táa mbɔ́tí á nzen. Ɓáŋá ɓátām bú sɛ́m péná ɛ́ ɓɔ́ɔ̄n bí mícāā, bú táa yɔ̄ á nzen.

⁹ Ɓot bí ŋgí wɛɛ ɔ́sū ví Yésus la ɓá bí oŋ nyɛ́ á mbúh bí ŋgí lón nɛ́: «Osána á Mɔ́ɔ̄n Dávid! Ndómbo ɛ ɓɛ́ la nyɔ́ a ŋga sɔ́ á jóō lí Nyɔ́ŋ-Ɛsáŋɛ́! Osána á loó-loó!»

¹⁰ Eceg Yésus a níŋgí á Yélūsalɛm, tísɔn ɛsɛ̄ yú póghan. Ɓot bí ŋgí ɓat nɛ́: «Ɓaá, nzáá nyɔ̄ŋ é?»

¹¹ Limut lú pélē nɛ: «Yésus, m̀pɔ́tle-a-Ɔlolómɛ̄ nyɔ́ŋ, mbyááhɛ nyí tísɔn Názalɛt á Galiléa.»

Yésus ag sand á ndáá-ēcɛ́ŋ-Ɔlolómɛ̄

¹² Ámbúh, Yésus ɔ níŋgí á ndáá-ēcɛ́ŋ-Ɔlolómɛ̄, ɔ dúhú ɓot bísɛ bí ŋgí nuŋu la ɓá bí ŋgí sóm átē. Ɔ ɓōtlé li ɓɛ́h lí téɓeli á sí yí ɓáveŋghanɛ-mɔní, la aɓɛlá á ɓánuŋu aɓeŋ.

¹³ Ɔ lāgá ɓɔ̄ nɛ́: «Yá ciiɓɛ́ nɛ́: ‹Ndáá yáma ɛg kɛ li yáŋlɛ nɛ́ ndáá mikánɛ› ndí ɓɛ́nɛ, maná yaanɛ́ yɔ lisɔlɓéné lí mítɔnɓa!»

¹⁴ Múŋ átē á ndáá-ēcɛ́ŋ-Ɔlolómɛ̄, ɓot-bí-ndím la ɓá ɓá lɛ́mɛ á míkoo bú sɔ́ nyɛ á ŋgwáāg la nyɛ́ ɔ mānɛ́ ɓɔ.

¹⁵ Ɓakanʼyɛ ɓatíi-nsúlé la ɓayí-mbéndá bú álá, ɛnɛ́ ɓá ɛ́n bínanaŋga bí mam Yésus a sɔ́lé lí ɓɔŋ, bú ámblé ki kaa ɓá ɓɔɔ́n bí ŋgí lón múŋ á ndáá-ēcɛ́ŋ-Ɔlolómɛ̄ nɛ́: «Osána á Mɔ́ɔ̄n Dávid!»

¹⁶ La ɓɔ́ bú bíhī Yésus nɛ́: «Ɔg ámble ákaa bí ŋga lága é?» Ndí nyɛ́ ɔ lāgá ɓɔ nɛ́: «Ɔɔ, miní ɓáág ŋgí lí sɔ́ŋgɔ lí yé epah Lícii-Lipúán ɛ́ ŋga máŋa nɛ́: ‹Wa ɓōŋhán mínyu mí ɓɔ́ɔ̄n ɓátɔ̄ga la mí mí míkɛ̄gá mí ɓɔ́ɔ̄n nɛ mí lɔ́ŋghɛ́nɛ wā ŋgóso eɓégɛ!›»

¹⁷ La nyɛ́ ɔ yíg ɓɔ̄ váŋ, ɔ pám á tísɔn li kɛ á Betánia, ápah a loohɛ́ɛ díɓe.

Tín ɛ fígiya nyí ŋgíla mitám

¹⁸ La kítí eceg Yésus a ŋgí timan á tísɔn, nzal yú byēé nyɛ.

¹⁹ Ɔ ɛ́n tín ɛ fígiya á ŋgwáāg nzen, ɔ sīŋglé yɔ ɓɛɓɛ, ndí āh kɔ́p ɓé tɔ jam átē, amáh sig áwāā la awáá. Ɔ lāgá hɔ́ yɔ nɛ́: «Á m̀ɓá la m̀ɓá ɔ ŋgɔ́ wúm ɓé pɛ mitám!» Á ékūyá-kúyá, nyíŋ tín fígiya yu wú, yu óm nɛ́ kɛ́lɛ́t.

²⁰ Ɓáyēge bú nyág ɛnɛ́ ɓá ɛ́n náŋ, bú yó nɛ: «Láá yá ɓɔ̄ŋɓɛ́ nɛ á ékūyá-kúyá tín ɛ fígiya ya wú, yu óm ki nɛ́ kɛ́lɛ́t é?»

²¹ Yésus ɔ pélē ɓɔ̄ nɛ́: «La mbálɛ, mag laga ɓɛ́nɛ nɛ́, kíyáɓɛ́nɛ ɔlɔ́ vá, maná ɓɛ́la ŋyéɓé ndí manáh ɓɛ́la ɓé péndan, amáh lí ɓɔŋ lí yé ma sɔ́le lí ɓɔŋ lí tín ɛ fígiya; miníg la li lagá lí ví ɔkolá nɛ́: ‹Ɓógó vá, kɛ̄n ɓɛ́hán á túwɛ›, náŋ ag ɓɔŋɓɛ.

²² Kí maná ɓɛ́la ŋyéɓé, yé ɛ́sɛ miní ŋga kɛ́ li ɓat kí miníg kánɛ, miníg kɛ yɔ́ lí kuh.»

Mbihi likɔlɓan la likundɛ lí Yésus

²³ Eceg Yésus a níŋgí á ndáá-ēcɛ́ŋ-Ɔlolómɛ̄, ɓakanʼyɛ ɓatíi-nsúlé la ɓacɛ́ŋ bí lílōmɛ bú sīŋglé nyɛ ɓɛɓɛ kí ag yéglɛ, bú bíhī nyɛ nɛ́: «La jɔɔ́jɔ́ɔ likundɛ ɔ ŋgɔ ɓɔ̄ŋ míŋ mam é? Nzáá a tí wa nyíŋ kundɛ é?»

²⁴ Yésus ɔ pélē ɓɔ̄ nɛ́: «Mág mag ɓat ɓɛ́nɛ mbihi yāhya; kí maná pélē ma, mág mag kɛ ɓɛ́nɛ li laga la jɔɔ́jɔ́ɔ likundɛ mi ŋga ɓɔ̄ŋ míŋ mam mísɛ.

²⁵ Laglán ma, ɓaá nzoɓan nyí Yohánɛs ɛg sɔ́le la Ɔlolómɛ̄ tɔ nɛ́ la ɓot-bí-bínam é?» Bú dūtɛ́ míɔ̄ŋɔ, bú mɔg nɛ: «Kíyáɓɛ́nɛ ɓa lāgá nɛ, Ɔlolómɛ̄, ag ɓat ɓɛ́hɛ nɛ́: ‹Ányúū yéé hɔ́ manáh yéɓe ɓé la nyɛ é?›

²⁶ Ndí ki ɓa yó ki nɛ́, ɓot-bí-bínam, biíg nyɛɛ li nyɔŋ lí lítāt la limut, átɔm nɛ́ ɓot bísɛ ɓá nyɔ̄ŋ Yohánɛs kaa m̀pɔ́tle-a-Ɔlolómɛ̄.»

²⁷ Váŋ nɛ̄ ɓá pélē Yésus nɛ́: «Bi ŋgá yí ɓé ɓɛ́hɛ.» Nyɛ́g ɔ tímānɛ̄ ɓɔ nɛ́: «Tɔ mág mi ŋgá laga ɓé ma ɓɛ́nɛ la jɔɔ́jɔ́ɔ likundɛ mi ŋga ɓɔ̄ŋ míŋ mam.»

Ɓɔɔ́n bí páam bíɓáa

²⁸ Yésus ɔ bíhī ɓakanʼyɛ ɓatíi-nsúlé la ɓacɛ́ŋ bí lílōmɛ nɛ́: «Miníg ɔ́ŋɔ láá la nyí pɔ́l é? Mut wa nyɔ́ŋ a ɓɛ́ɛ́la ɓɔɔ́n bí páam bíɓáa; ɔ sīŋglé nyɔ́ ɔsú á ŋgwáāg, aá la nyɛ́ nɛ́: ‹Á mɔ́ɔ̄n wama, ɔ kɛnɛg lɛn, ɔ sál á ǹdíí á bínyɛŋgɛ́n bí wáany.›

²⁹ Nyɔ́ŋ ɔ pélē nyɛ̄ nɛ́: ‹Mi ŋgá kɛ ɓé ma›. Ámbúh eceg náŋ ɔ téeŋgɛ́ nyɛ, ɔ tímān lí kɛ.

³⁰ Nyɔ́ŋ mut ɔ sīŋglé nyɔ́ a yáhɛ́ bíɓáa á ŋgwáāg, ɔ lāgá nyɛ̄ nlemlem á jam. Nyɔ́ŋ ɔ pélē nyɛ nɛ́: ‹Etāa mag kɛ›. Ndí, ámbúh eceg āh kɛ ɓé.

³¹ Wɔɔ́wɔ́ɔ mɔɔ́n á póla ɓɔ́ bíɓáa a ɓɔ̄ŋ nsom á ɛ́sāŋɛ́ é?» La ɓɔ́ bú pélē Yésus nɛ́: «Nyɔ́ ɔsú.» Váŋ nɛ́ a lāgá ɓɔ̄ nɛ́: «La mbálɛ, mag laga ɓɛ́nɛ nɛ́, ɓakomanɛ-ŋkuh-á-gɔ́mna la ɓondígá bí ákwala, bíg kɛ li dúgu lí lí pám la ɓɛ́nɛ á Ékombo Ɔ́lolómɛ̄.

³² Ákaa ɛ́sɛ, Yohánɛs Ǹtíi-nzoɓan a sɔ́ á yóg yaná ag étɛ nzen ɛ tɛ́ɛ́ sim, ndí ɓɛ́nɛ, manáh yéɓe ɓé nyɛ; á mveŋghanɛ́, ɓakomanɛ-ŋkuh-á-gɔ́mna la ɓondígá bí ákwala ɓɔ́ ɓá yéɓé nyɛ. Tɔ ámbúh li ɛ́n náŋ, manáh yíg veŋe ɓé bilɛ́m nɛ́ miní yéɓé la nyɛ́.»

Ɔŋgaáŋgan ví bíɓēɓéyɛ bí ɓáɛŋ-kɔ́mbɔ

³³ «Ámblán ɔŋgaáŋgan vitám ví nɛ́: M̀wɛɛ́n sí a sáláá ǹdíí á bínyɛŋgɛ́n bí wáany, ɔ céŋ wɔ kɔ́tá, ɔ tím m̀ɓáláŋ á m̀ɓálá átē ányúū li pámɛ lí mílɔg, la nyɛ́ ɔ óŋ njóŋgi ányúū li tát lí ǹdíí wɛ́ɛ́. Ámbúh náŋ, ɔ yíglé ɓáɛŋ ǹdíí wɛ́ɛ́ la nyɛ́ ɔ kɛ́ á dúwɛ.

³⁴ Ɛnɛ́ éceg ɛ́ mpumu yá kɔlan, ɔ óm ɓáɓɔŋle ɓɛ́ɛ́ á yóg ɓaɛŋ nɛ́ bí sɔ́la nyɛ́ ɛ́jɛ̄ɛ̄ jóga.

³⁵ Ndí ɓaɛŋ bú byeé ɓáŋ ɓaɓɔŋle; bú úm wa bikút, bú ól nyɔ́ŋɔ́, nyɔ́ ntám bú ól nyɛ la ŋgɔg.

³⁶ Ɔ óm sīg-pɛ ɓaɓɔŋle ɓatám, ɔbul li loo lí ɓá bí ɔ́sū; ɓaɛŋ bú ɓɔ̄ŋ ɓɔ nlemlem á jam.

³⁷ Á mísúgle, ɔ óm ɓɔ mɔ́ɔ̄n wɛ́ɛ̄ la miɔ́ŋɔ nɛ́: ‹Bíg kɛ li ditɛ lí mɔ́ɔ̄n wama.›

³⁸ Ndí ɛnɛ́ ɓáɛŋ ɓá ɛ́n nyɔ́ŋ mɔɔ́n á páam, bú laglán nɛ: Ŋ̀yéglan-embámbá nyɔ́, sɔ́án! Bi ól nyɛ́, bi yéglán émbāmbá.

³⁹ Bú byeé nyɛ, bú pámɛ́ nyɛ á ǹdíí, bú ól nyɛ.

⁴⁰ Ɓaá, eceg m̀wɛɛ́n ǹdíí a ŋga kɛ́ li sɔ́, ag kɛ láá lí ɓɔŋ lí ɓáŋ ɓaɛŋ é?»

⁴¹ Ɓakanʼyɛ ɓatíi-nsúlé la ɓacɛ́ŋ bí lílōmɛ bú pélē nyɛ̄ nɛ́: «Ag kɛ li ól lí bíŋ bíɓēɓéyɛ bí ɓáɛŋ ɛ́h ɓɛ́ ɓé ŋgɔ́ɔ́, la nyɛ́ á tí ɓaɛŋ ɓatám nsɔ́n á ǹdíí wɛ́ɛ́, ɓá bí ɓɛ́ bíg tíi nyɛ́ ɛ́jɛ̄ɛ̄ jóga kí éceg yá kɔlan.»

⁴² Yésus ɔ lāgá ɓɔ̄ nɛ́: «Ɓaá miníh ɓáág ŋgí lí sɔ́ŋgɔ á Licii-lipúán nɛ: ŋgɔg ɓaóŋ ndáá ɓá ɓen, yɔ nɛ́ ya tímān lí ɓɛgɛ lí ndáá; misɔ́n mí Nyɔ́ŋ-Ɛsáŋɛ́ míŋ: Sē líŋgɔ̄ŋɔ́ á miíh máhá é!

⁴³ Jɔ́ nɛ́ mi ŋga lága ɓɛ́nɛ nɛ́: Likanʼyɛ lí Ɔ́lolómɛ̄ líg kɛ ɓɛ́nɛ li nyɔŋɓɛ, la jɔ́ lí tíéɓɛ́ lilóm lí ŋga kɛ́ li tíi lí mítām.

⁴⁴ Nyɔ́ la nyɔ́ a ŋga kɛ́ li ɓɛ́han á lóō lí nyíŋ ŋgɔg, ag kɛ li búge; nyɔ́ ki ɛ ŋga kɛ́ li ɓɛ́han á lóō, ɛg kɛ nyɛ́ lí kɔgte.»

⁴⁵ Ɛnɛ́ ɓákanʼyɛ ɓatíi-nsúlé la Elōg-Falísái ɓá ámblé nyúŋ aŋgaáŋgan, bú sɔ́ŋtánɛ́ nɛ ɓɔ́ nɛ́ Yésus a ŋga pɔ́tle.

⁴⁶ Bú somo nyɛ́ li byee, ndí bú kɔ̄n limut woŋ; átɔm nɛ́ ɓot bí ŋgí nyɔŋ nyɛ́ kaa m̀pɔ́tle-a-Ɔlolómɛ̄.