Málkus 5 - Esaa-líat ɛ́ péná

Yésus ag pámɛ mut mimbúl míɓē

¹ Yésus la ɓayége ɓɛ́ɛ́ bú pám á yéŋé épah yé ebúle, á ékombo ɛ́ Gelasénia.

² Kasig Yésus a ŋgí suh á m̀ɓoŋgó, á ékūyá-kúyá, mut wa a ɓɛ́ɛ́la m̀búl m̀ɓé, ɔ sɔ́ li ɓoman la nyɛ́, a ŋgí sɔ́le á kɔ́tá sɔŋ,

³ ápah a ŋgí tɔɓene. Tɔ mut a ŋgí la ɓé pɛ nyɛ́ lí kág, tɔ ɓɛ́ ja la nsáŋ-á-bícɛɛ.

⁴ Ákaa ɛ́sɛ nɛ́ bí ŋgí yɔg nyɛ́ lí kág li mɔ la mikoo la misáŋ-mí-bícɛɛ, ndí eceg sig, a ŋgí pát mɔ́; ndí tɔ mut ah ɓɛ́ɛ́la ɓé ŋguu li byee lí nyɛ.

⁵ Díɓe la nzámuh, a ɓɛ́ɛ́ ja múŋ á kɔ́tá sɔŋ la á lóō lí ákolá, ag tɛ́ɛ milón, ag ɓáálɛ nyuú yɛ́ɛ̄ la ŋgɔg.

⁶ Ɛnɛ́ a ɛ́n Yésus énɛŋɛ́ wóŋóó, ɔ ɓógó m̀bíí, ɔ sɔ́ ɔ kū la miɓɔ́ŋ ɔ́sū vɛ́ɛ́.

⁷ Váŋ nɛ́ a tɛ́ɛ́ nlón la ŋguu nɛ́: «Á Yésus, Mɔɔ́n Ɔlolómɛ̄ Nyɔlɛ, yéé ɔ ŋgɔ sōmle ma é? Sóon á jóō lí Ɔlolómɛ̄, ɔh sɔ́ɔ́g ɓé ma lí ɓɔgɔ.»

⁸ Ákaa ɛ́sɛ Yésus a ŋgí laga wɔ́ nɛ́: «Á m̀búl m̀ɓé, pám á nyúū nyɔ́ mut!»

⁹ Ámbúh náŋ Yésus ɔ bíhī wɔ́ nɛ́: «Joó jɔ́ɔ nɛ́ nzáá é?» Wú pélē nyɛ nɛ́: «Ma nɛ́ mi lɛ Ɔbul; átɔm nɛ́ bi lɛ́ ŋgandag.»

¹⁰ Wú díit hɔ́ Yésus la nzɔ́hyé nɛ ah duhlág ɓé mɔ́ enɛŋɛ́ la ekombo.

¹¹ Ákaa liɓembá lícɛ̄ŋ lí ŋgoo lí ɓɛ́ɛ́ lí ŋgí dí váŋ á míɓēt mí ɔ́kolá,

¹² mimbúl míɓē mú sɔ́hyé nyɛ nɛ́: «Óm ɓɛ́hɛ á líɓembá lí ŋgoo nɛ́ bi níŋgí yɔ́ á nyúū.»

¹³ La Yésus ɔ yéɓe. Váŋ nɛ́ má pám nyɔ́ŋ mut á nyúū, mú níŋgí ŋgoo á nyúū; la jéŋ liɓembá lísɛ jé lí ɓɛ́ɛ́la jam ákaa akóó á ŋgoo áɓáa lú yɔ́lɔ́ á lóō lí ɔ́kolá, lú ɓɛ́hán á ébúle, lú tíɓe.

¹⁴ Ɓatát yíŋ ŋgoo bú nāŋgá m̀bíí, bú kɛ li camanɛ lí nyíŋ pɔ́l á tísɔn la á ɓɔ́ɔ̄n bí míkɔŋ bísɛ. Ɓot bú sɔ́ li légɓe lí yéé yá loo.

¹⁵ Ɛnɛ́ ɓá pám ɓɛ́ɓɛ la Yésus, bú ɛ́n nyɔ́ mut a ɓɛ́ɛ́la mimbúl míɓē ŋgandag a tɔ́ɔ̄, a jáhɛ mbɔ́tí, ɔ tímān nyaa m̀ɓɛɛŋ, Náŋ ɔ kɔ̄nhánɛ́ ɓɔ woŋ.

¹⁶ Ɓá bí ɛ́nɛ́ɛ́ yéé yá loo, bú máŋlɛ́ ɓɔ mam mísɛ má looléné mut a mimbúl míɓē elɔŋ la ŋgoo.

¹⁷ La ɓɔ́ bú ɓōtlé li sɔ́hye lí Yésus nɛ́ a nɛ́ŋɛ̄ la ékombo yáɓá.

¹⁸ Eceg Yésus a ŋgí níŋgi á m̀ɓoŋgó, mut a ɓɛ́ɛ́la mimbúl míɓē ɔ sɔ́hyé nyɛ nɛ́ bí byáŋ elɔŋ.

¹⁹ Ndí Yésus ah yéɓyée ɓé, ndí ɔ lága ja nyɛ́ nɛ́: «soóg á átān wɔ́ɔ, kɛɛ́n máŋlɛ́ ndog yɔɔ yé ɛ́sɛ Nyɔ́ŋ-Ɛsáŋɛ́, átē a ekɔnan-ŋgɔ́ɔ́ yɛ́ɛ́ a ɓɔ̄ŋlé wa.»

²⁰ Váŋ nɛ́ nyɔ́ŋ mut a kɛ, ɔ ɓōtlé li camanɛ á yéŋ epah ékombo yé Jóom lí Tísɔn yé ɛ́sɛ Yésus a ɓɔ̄ŋlé nyɛ. Ɓot bísɛ bú nyág.

Yésus ag tɔɔyɛ mindígá wā mbólí, ag pahyɛ ki ŋgɔn nyí Yálius

²¹ Eceg Yésus a cágáá á nyúŋú mií á ébúle la m̀ɓoŋgó, límut lú díí nyɛ́ á ŋgwáāg mindím.

²² Váŋ nɛ́ ŋ̀kanʼyɛ wa átē a ɓakanʼyɛ ndáá-miɓomán bí ŋga yáŋa nɛ́ Yáīlos a ɛ́n nyɛ, ɔ sɔ́, ɔ kúēlé nyɛ á míkoo;

²³ ɔ díit nyɛ la nzɔ́hyé nɛ: «Ŋgɔn yama ɛg somo li wú, sɔ́ ɔ káhyɛ́ yɔ mɔ á li ɓɔŋ nɛ́ ɛ sūŋɓɛ̄ ndí ɛ nīŋ.»

²⁴ Yésus ɔ kɛ elɔŋ la nyɛ́, ndí limut licɛ́ŋ lí ŋgí oŋ nyɛ́, lú pagtánɛ́ nyɛ.

²⁵ Váŋ nɛ́ míndīgá wa nyɔ́ micii mí ŋgí pám, náŋ ag ɓɔŋ jóom lí mímbú la míɓáa lɛn,

²⁶ a kuhúú ŋgandag ndutu á li yɛ́ŋgan á yóg ɓot bí mítāālán, a pámhɛ́ɛ ki yé ɛ́sɛ a ɓɛ́ɛ́la ákaa ŋkuh, ɛ́h ɓɛ́ ɓé lí ɛ́n lí mveŋghanɛ́ tɔ wa; ndí á bíŋ bísɛ, nyuú ɛ́ ŋgí dit bí lí dit.

²⁷ Kasig nyɔ́ŋ mindígá a ámbléé yéé ɓot bí ŋgí kwɛl likɔlɓan la Yésus, ɔ níŋgí átē á jéŋ limut, ɔ sɔ́lé Yésus á mbúh, ɔ síiɓán mbɔ́tí yɛ́ɛ̄.

²⁸ Ákaa ɛ́sɛ a ŋgí laglan nɛ́: «Kíyáɓɛ́nɛ ma lá tɔ li siiɓan lí mbɔ́tí yɛ́ɛ̄, mag suŋɓɛ.»

²⁹ Á ékūyá-kúyá, micii mú sɛ́m, ɔ ógtán nɛ́ ɔkɔn vɛ́ɛ́ vá man.

³⁰ Á nlemlem á éceg, Yésus ɔ ógtán nɛ puh ŋguu ya pám nyɛ á nyúū. Ɔ yáan átē a limut, ɔ bíhī nɛ: «Nzáá a síiɓán mbɔ́tí yáma é?»

³¹ Ɓayége ɓɛ́ɛ́ bú tímānɛ̄ nyɛ nɛ́: «Wā-mɛ̄n ɔg ɛ́n ákaa limut lá kág wa, ndí ɔg ɓáá m̀mím lí ɓat nɛ́: ‹Nzáá a síiɓán ma é?›»

³² Ndí Yésus ɔ yáanɛ́ miíh voóm asɛ̄ á li légɓe lí nzáá a ɓɔ̄ŋ náŋ.

³³ Váŋ nɛ́ nyɔ́ŋ mindígá, ákaa a ŋgí yí yéé yá loo, ɔ sɔ́ ag sɛ́glan la woŋ, ɔ kū Yésus á sí míkoo, ɔ lága nyɛ mbálɛ ɛsɛ̄.

³⁴ Ndí Yésus, ɔ lága nyɔ́ŋ mindígá nɛ: «Á ŋgɔn yama, ŋyéɓé wɔ́ɔ wá sūŋ wa, kɛnɛ́g la nsaŋ, ɔkɔn vɔ́ɔ vá man!»

³⁵ Yésus a ɓɛ́ɛ́ a ŋgí pɔ́tɔg eceg ɓot bí sɔ́léé á yóg ŋ̀kanʼyɛ ndáá-miɓomán Yálius á li laga lí nyɛ nɛ́: «Ŋgɔn yɔɔ ya wú, yéé pɛ ɔ ŋgí teeŋgɛ́gɛ́ Ŋ̀yéglɛ é?»

³⁶ Ndí Yésus, ɛ́h ɓɛ́ ɓé li nyɔŋ lí eceg la bíŋ biɓaŋgá, ɔ yó ŋ̀kanʼyɛ ndáá-miɓomán nɛ: «Ɔh kɔnɔ́g ɓé woŋ, ɓɛ́ ja la ŋyéɓé.»

³⁷ Amáh sig Pétlos, Yákop la Yohánɛs mɔɔ́nyāŋ á Yákop, Yésus ah yéɓyée ɓé nɛ mut ntám tɔ wa a kɛ́ elɔŋ la nyɛ́.

³⁸ Li pám á yóg ŋ̀kanʼyɛ ndáá-miɓomán, eduŋgú ɛ́ ɓɛ́ɛ́ ŋgandag. Yésus ɔ ɛ́n ɓot bíg lee, bíg tɛ́ɛ milón.

³⁹ Ɔ níŋgí á ndáá, ɔ lága ɓɔ́ nɛ́: «Yéé ɛ́ lɛ ŋgandag eduŋgú la yí cíŋ míwū é? Mɔɔ́n ah wúág ɓé, a lɛ ja á ɔlɔ́.»

⁴⁰ Ɛnɛ́ ɓá ɓōtlé li ɔl lí Yésus, ɔ pámɛ ɓot bísɛ á ápūū, ɔ yéglé ja elɔŋ la ɛsáŋɛ́ la nyaŋɛ́ á mɔɔ́n, la ɓot bí sɔ́ɔ́ nyɛ li yígɛ. Bú níŋgí ápah mɔɔ́n a ɓɛ́ɛ́ á náŋɛ,

⁴¹ Yésus ɔ byée nyɛ á wɔ, ɔ lága nyɛ nɛ́: «Talíta kum», náŋ a lɛ nɛ́: «Á ŋgɔn-mindígá, mag pɔ́t, ɔg vɛɛɓe!»

⁴² Á ékūyá-kúyá, ŋgɔn-mindígá yu tɛ́lɛ, yu ɓōtlé li wɛɛ. A ɓɛ́ɛ́la jóom lí mímbú la míɓáa. Náŋ ɔ nyágɛ́ ɓá bísɛ bí ɓɛ́ɛ́ váŋ tɔláá.

⁴³ La Yésus ɔ ɓéhyɛ́ ɓɔ nɛ́ bíh ɓɔŋɔ́g ɓé nɛ mut tɔ wa a yí náŋ; ámbúh náŋ, ɔ lága ɓɔ nɛ́ bí tí ŋgɔn-mindígá lidí.