Málkus 15 - Esaa-líat ɛ́ péná

Yésus ɔ́sū ví Piláto

¹ La miyɛ́ mí kítí, ɓakanʼyɛ ɓatíi-nsúlé bú tɔɔ á émɔga elɔŋ la ɓacɛ́ŋ bí mílōmɛ, la ɓayí-mbéndá, la ɔku-vicɛ́ŋ-ví-bíkāāhɛ́nɛ́ vísɛ nɛ́ ɓaam. Bú kág Yésus, bú kɛ nyɛ li tíi lí Piláto.

² Piláto ɔ ɓāt nyɛ nɛ́: «Ɓaá wa nɛ́ ɔ lɛ káísa nyí Elōg-Yúda é?» Yésus ɔ pélē nyɛ nɛ́: «Ákaa wa pɔ́t!»

³ Ɓakanʼyɛ ɓatíi-nsúlé bí ŋgí úm nyɛ́ njɔm ŋgandag.

⁴ Piláto ɔ bíhī sīg-pɛ nyɛ́ nɛ́: «Ɔh byɛ́ɛ́ ɓé jam ɔ ŋgɔ pélē é? Ɛ́n sig sɔ́mɔn ɛ́sɛ bí ŋga kóm wa á nyúū.»

⁵ Ndí Yésus ah pele ɓé tɔ jam, nyaa nyí lɛ nɛ́ Piláto ɔ nyág.

⁶ Á ŋgand Páska sig, Piláto a ŋgí pámɛ mut wa á miɓog, nyɔ́ lilómɛ a ŋgí ɓat nyɛ́.

⁷ Á yéŋ eceg, mut wa bí ŋga yáŋa Balábas a ɓɛ́ɛ́ á m̀ɓog, la elɔŋ yɛ́ɛ́ yé ɓot bí ŋgí tɛ́ŋgánɛ likanʼyɛ, ɓá bí ólóó mut eceg mpuŋgú á loolóó.

⁸ Limut lú kɛ á mbóg Piláto, lú ɓōtlé nyɛ li ɓat lí yé a ɓáág ag ɓɔŋle ɓɔ́ ákaa elɛ́m.

⁹ La nyɛ́ ɔ tímānɛ ɓɔ nɛ́: «Ɓaá miníg somo nɛ́ mi mwáhlé ɓɛ́nɛ káísa nyí Elōg-Yúda é?»

¹⁰ A ŋgí ɓat ɓɔ́ náŋ átɔm nɛ́ a sɔ́ŋtánɛ nɛ́ ányúū nzoŋ yaɓá nɛ́ ɓakanʼyɛ ɓatíi-nsúlé ɓá sɔ́la nyɛ Yésus.

¹¹ Ndí, ɓakanʼyɛ ɓatíi-nsúlé ɓɔ́, bú nyághánɛ́ límut nɛ́ lí ɓat nɛ́ a pámɛ́ ja ɓɔ́ Balábas.

¹² Ɛnɛ́ Piláto a nyɔŋ sīg-pɛ mpɔ́t, ɔ bíhī ɓɔ nɛ́: «Mi ɓɔ́ŋ hɔ́ láá la nyɔ́ miní ŋga yáŋa nɛ́ káísa nyí Elōg-Yúda é?»

¹³ Limut lú lón pɛ nɛ́: «tomó nyɛ́ á mbásá!»

¹⁴ Piláto ɔ bíhī ɓɔ nɛ́: «Ɓaá, wɔɔ́wɔ́ɔ aɓé a ɓɔ̄ŋ é?» Ndí ɓɔ́ bú kōndyé ja li lón la ŋguu nɛ́: «tomó nyɛ́ á mbásá!»

¹⁵ Kasig Piláto a ŋgí somo ɓɔ́ li kɔnhanɛ lí mívag, ɔ pámɛ́ ɓɔ Balábas á m̀ɓog. Ámbúh li lɔ́ghánɛ lí Yésus la aso, ɔ tí ɓɔ nyɛ́ nɛ́ bí tōmó nyɛ́ á mbásá.

Bíg jáhɛ Yésus ɔtot ví bílɔ

¹⁶ Sónja yú kɛ́la Yésus á m̀mím-átān á ndáá gɔ́mna licɛ́ŋ, la ɓɔ́ bú yáŋá elōg sónja yɔ́ ɛ́sɛ.

¹⁷ Bú jáhɛ́ nyɛ mbɔ́tí evɛɛ́vɛ́ɛ, bú óŋ ɔ́tot ví bílɔ, bú kāhyɛ́ nyɛ̄ vɔ́ á m̀mú.

¹⁸ Váŋ nɛ́ ɓá ɓōtlé nyɛ li keeyɛ nɛ́: «Ɓaá tamá wa, á káísa nyí Elōg-Yúda!»

¹⁹ Bú ɓōtlé nyɛ li lɔ́g lí líkāā á m̀mú, bú túlé nyɛ mitɛ́ɛ́, bú úmlé nyɛ miɓɔ́ŋ la ɓɔ́ bú úúyɛ́ mísū á sí ɔ́sū vɛ́ɛ́.

²⁰ Ɛnɛ́ ɓá manɛ́ nyɛ li keeyɛ, bú ɓógtɛ́ nyɛ yéŋ evɛɛ́vɛ́ɛ mbɔ́tí la ɓɔ́ bú tímānɛ̄ nyɛ mbɔ́tí yɛ́ɛ́. Ámbúh náŋ, bú kɛ nyɛ li tomo á mbásá.

Mitomo mí Yésus á mbásá

²¹ Mut wa a ŋgí loo nzen, nɛ́ Símɔn nyɔ́ a Siléna, ɛsáŋɛ́ a Alegsándēle la Lúfus, nyɔ́ a ŋgí sɔ́le á ǹdíí; sónja yú kágyɛ́ nyɛ li ɓɛgɛ lí mbásá nyí Yésus.

²² Yú kɛ́la Yésus á voóm a ŋga yáŋlɛ nɛ́ Golgóta, náŋ ag kɔplɛ nɛ́: «voóm á evóghó m̀mú.»

²³ Li pám wóŋ, yú somo nyɛ li tíi lí mílɔg yá puú la libíndɛ lí míla, ndí Yésus ɔ ɓēén li nyú.

²⁴ Ámbúh náŋ, yú tōmó nyɛ á mbásá. Á li kaan lí mbɔ́tí yɛ́ɛ́, yú lɛ̄ŋgɛ́ mbam á li yí lí yé mut sig a ŋga kɛ́ li kuh.

²⁵ Náŋ a ɓɛ́ɛ́ ŋgɛ́ŋ ɛ́buu yí kítí eceg bí tōmléé nyɛ́.

²⁶ Micila mí ŋgí étɛ njɔm ekɔ́ghɛ yɛ́ɛ́ ɛ́ nyɛmb mí ɓɛ́ɛ́ nɛ́: «Káísa nyí Elōg-Yúda.»

²⁷ Sónja ɛ́ tōmléé mítɔnɓa míɓáa elɔŋ la nyɛ́. Wá á m̀ɓɛ́nlómɛ, nyúŋú ki á m̀ɓɛ́ŋgáa wɛɛ́. [

²⁸ ]

²⁹ Ɓaloo-nzen bí ŋgí óŋo Yésus, bíg mɛg m̀mú la li laga nɛ́: «Wa hɔ́ nyɔ́, ɔ ŋgɔ búg ndáá-ēcɛ́ŋ-Ɔlolómɛ̄, ndí ɔ nyɔ̄ŋ alɔ́ áŋháa á lí óŋ lí yɔ,

³⁰ suŋ hɔ́ wā-mɛ̄n, suh á mbásá.»

³¹ Ɓakanʼyɛ ɓatíi-nsúlé la ɓayí-mbéndá ɓɔ́g bí ŋgí ɔl nyɛ́ nɛ́: «A sūŋ ɓot ɓatám, ndí a ŋgá la ɓé li suŋ lí nyɛ́-mɛ̄n!

³² Nyɔ́-a-Pɔ́hlɛ, káísa nyí Íslāɛl, a súh hɔ́ vɔ́ŋɔ́ɔ á mbásá, á li ɓɔŋ nɛ́ bi ɛ́n ndí bi yéɓé!» Ɓot ki bí tōmlɛ́ɛ á mbásá ákaa nyɛ́, ɓɔ́g bí ŋgí óŋo nyɛ́.

Nyɛmb nyí Yésus

³³ Náŋ a ɓɛ́ɛ́ kɔsi eceg livito lí bútyɛ́ɛ ŋkɔŋ-á-sí ásɛ li pám á ŋgɛ́ŋ ɛ́ŋháa ɛ́ ŋgōgó.

³⁴ Á yíŋ ŋgɛ́ŋ ɛ́ŋháa ɛ́ ŋgōgó, Yésus ɔ tɛ́ɛ́ nlón la ŋguu nɛ́: «Elói, Elói, lama sabágtani!» Náŋ ag kɔplɛ nɛ́: «Á Ɔlolómɛ̄ wama, á Ɔlolómɛ̄ wama, ányúū yéé wa cóó ma é?»

³⁵ Jogo lí ɓot á ɓá bí ɓɛ́ɛ́ váŋ, ɛnɛ́ ɓá ámblé nyúŋ nlón bú lága nɛ: «Nyí hɔ́ nyɔ́, a ɓōtlé lí yáŋa lí Elías m̀pɔ́tle-a-Ɔlolómɛ̄!»

³⁶ Mut wa ɔ ɓógó m̀bíí, ɔ kɛ li nyɔŋ lí jom lí mbɔɔkɛ jé a dúu á éɓāmhá-wáany, ɔ págyɛ̄ jɔ á lísūg lí líkāā, ɔ lɛ́g nyɛ nɛ́ a nyū, la nyɛ́ ɔ lága nɛ: «Laaŋkán, bi léɓyág kíyáɓɛ́nɛ Elías ag sɔ́ nyɛ́ li suhɛ á mbásá.»

³⁷ Ndí Yésus, ɔ tɛ́ɛ́ sīg-pɛ nlón la ŋguu, la nyɛ́ ɔ páte.

³⁸ Líɓato licɛ́ŋ lí ɓɛ́ɛ́ lí ŋgí céŋ ndugá-púán wú wáhé bípah bíɓáa li ɓotle á lóō nɛ́-tɛ́ɛ la á sí.

³⁹ Ŋ̀kanʼyɛ a nlɔŋ á eɓógo sónja a ɓɛ́ɛ́ a tɛ́ɛ́ ɔ́sū ví Yésus, ɛnɛ́ a ɛ́n ákaa a páte, ɔ pɔ́t nɛ: «La mbálɛ, nyɔ́ mut a mɓɛ́ kɔɔ Mɔɔ́n Ɔlolómɛ̄.»

⁴⁰ Elɔŋ ɛ́ ɓondígá ki ɛ́ ɓɛ́ɛ́ ɛ́ tɛ́ɛ puh enɛŋɛ́ ɛ́g légɓe. Yéŋ elɔŋ ɛ́ ɓɛ́ɛ́la, Malía nyɔ́ a Magdála, Malía, nyaŋɛ́ á Yákop ntɔ́ga la Yóse, elɔŋ la Salóme.

⁴¹ Ɓɔ́ nɛ́ bí ŋgí oŋ Yésus, la li ɛɛle lí nyɛ eceg a ɓɛ́ɛ́ á ŋkɔŋ á Galiléa. Ŋgandag ɓondígá etám ki ɛ́ ɓɛ́ɛ́ muŋ á yéŋ elɔŋ yí ɛ́ ɓétéé elɔŋ la Yésus á Yélūsalɛm.

Mije mí Yésus

⁴² Ɛnɛ́ ŋgōgó ya vín, kasig náŋ a ɓɛ́ɛ́ nlááhɛ a ɔlɔ́ ví évɛɛɓan ví Élōg-Yúda,

⁴³ Yósɛp nyɔ́ Alimatéa ɔ nyɛ́g. A ɓɛ́ɛ́ mut bí ŋga dítɛ á ɔku vicɛ́ŋ ví ɓákááhɛ. Nyɛ́g a ŋgí laaŋke Likanʼyɛ lí Ɔlolómɛ̄. La nyɛ́ ɔ ɓaá m̀mím li kɛ á yóg Piláto á li ɓat lí nyɛ m̀bim á Yésus.

⁴⁴ Piláto ɔ nyág nɛ́ Yésus a vóó lí wú. Váŋ nɛ́ a óm nɛ bí yáŋá nyɛ́ ŋ̀kanʼyɛ nlɔŋ á éɓōgo sónja á li ɓat lí nyɛ kíyáɓɛ́nɛ Yésus a wú yɔŋ.

⁴⁵ Nyɔ́ŋ ɔ tí nyɛ bilegléné bísɛ, váŋ nɛ́ a yéɓé nɛ Yósɛp a nyɔ̄ŋ m̀bim á Yésus.

⁴⁶ Ámbúh yɛɛ́ li sóm lí mbɔ́ŋ, Yósɛp ɔ súhɛ m̀bim á Yésus á mbásá, ɔ vúlké wɔ múŋ á nyíŋ mbɔ́ŋ, ɔ nāntɛ́ɛ wɔ á sɔŋ ɓá ɓog á ŋgɔg. Ámbúh náŋ ɔ sógɛ́ ŋgɔg etám, ɔ lēg mínīŋglé mí nyíŋ sɔŋ.

⁴⁷ Malía nyɔ́ a Magdála la Malía nyaŋɛ́ á Yóse bí ŋgí légɓé véé bí nāntɛ́ɛ m̀bim á Yésus.