Lúkas 3 - Esaa-líat ɛ́ péná

Yohánɛs Ǹtíi-nzoɓan ag yáŋlɛ́ɛ kaa m̀pɔ́tle-a-Ɔlolómɛ̄

¹ Á m̀bú wá yáhɛ́ jóom la mítáan nyú á likanʼyɛ jé lí káísa ecɛ́ŋ Tibélia, Pɔ́nsio Piláto nɛ́ a ɓɛ́ɛ́ gɔ́mna licɛ́ŋ lí Yúdēa, Elóde ŋ̀kanʼyɛ a Galiléa, mɔɔ́nyāŋ Filípo ŋ̀kanʼyɛ a ékombo yé Ituléa la Tilakonitída; Lisánias ɔ ɓɛ́ ŋ̀kanʼyɛ á Abiléna.

² Múŋ á yéŋ eceg, Háne la Kaífa nɛ́ bí ɓɛ́ɛ́ ɓakanʼyɛ ɓacɛ́ŋ bí ɓatíi-nsúlé. Váŋ nɛ́ Ɔlolómɛ̄ a kwɛlhɛ́ɛ Yohánɛs mɔɔ́n Sakália á éyāŋ.

³ La nyɔ́ŋ ɔ wɛ́ɛ á míkāh mí míkɔŋ mí lɔm lí Yɔ́ldan mísɛ, ag tɛ́ɛ likálo nɛ́: «Miní vēŋé bilɛ́m, miní kuh nzoɓan, váŋ Ɔlolómɛ̄ ag kɛ ɓɛ́nɛ li laakɛ lí míɓē máná.»

⁴ Á ŋgí ɓɔŋ ákaa yé yá ciiɓɛ́ á kálati biyíhɛ́nɛ́ nyí Ésáya m̀pɔ́tle-a-Ɔlolómɛ̄ nɛ́: «Cíŋ ɛg lón á éyāŋ nɛ: Miní ɓōŋhán nzen nyí Nyɔ́ŋ-Ɛsáŋɛ́, miní tɛ́ɛ́yɛ́ milɔ́ŋ mɛ́ɛ́ sim.

⁵ Misósógá míg kɛ li yál, akolá ácɛ̄ŋ la nyú átɔ́ga ág kɛ li búgɓɛ́ɛ, mipamba mí kɔ́tɛ́ míg kɛ́ li tɛ́lɛ, nzen yí ŋgɔg ɛ́g kɛ li sáŋglɛ;

⁶ Ɓot bísɛ bíg kɛ li ɛ́n lí lísuŋga lí Ɔlolómɛ̄.»

Yohánɛs ag étɛ ɔún ví Ɔlolómɛ̄

⁷ Yohánɛs a ŋgí laga limut jé lí ŋgí sɔ́ lí kuh lí nzoɓan á yóg yɛ́ɛ̄ nɛ́: «Á mbóta péé, nzáá a yéglɛ́ ɓɛ́nɛ li nāŋga lí ɔ́ūn ví Ɔlolómɛ̄ ví ŋga sɔ́ m̀bíí é?

⁸ Tíán hɔ́ mitám míláám mí ŋga étɛ nɛ́ maná veŋé bílɛ̄m; ndí miníh laglág ɓé la ɓɛ́nɛ-mɛ̄n nɛ́: ‹Bi byɛ́ɛ Áblaháam ákaa etāa wahá.› Átɔm nɛ́, mag laga ɓɛ́nɛ nɛ́, Ɔlolómɛ̄ ag la li yaanɛ lí yí ŋgɔg ɓɔɔ́n bí Áblaháam.

⁹ Ŋkulaŋ a lɛ m̀ɓoŋhágan á lí sɛ́m lí míkaŋ mí bíéé; Jɔ́ hɔ́ nɛ; eéé la eéé ɛ́ ŋgá tíi ɓé mitám mílāām, ɛ́g kɛ li sɛ́mɓɛ, la yɔ́ ɛ́ lééɓɛ́ á nzáan.»

Li étɛ lí mveŋghanɛ́ a bilɛ́m

¹⁰ La limut lú ɓāt Yohánɛs nɛ́: «láá ɓa nyɛ́ɛ hɔ́ li ɓɔŋ é?»

¹¹ Nyɛ́g ɔ pélē ɓɔ nɛ́: «tɔ nzáá a byɛ́ɛ̄ mbɔ́tí ɛ́ɓáa, a tí nyɔ́ ah byɛ́ɛ́ ɓé; nyɔ́ ki a byɛ́ɛ̄ lídī, a ɓɔ̄ŋ nlemlem á jam.»

¹² Jogo lí ɓakomanɛ-ŋkuh-á-gɔ́mna ki bú sɔ́ lí kuh lí nzoɓan, la ɓɔ́ bú ɓāt Yohánɛs nɛ́: «Á Ŋ̀yéglɛ, láá ɓa nyɛ́ɛ lí ɓɔŋ é?»

¹³ La nyɛ́ ɔ pélē ɓɔ nɛ́: «miníh ɓátág ɓé tɔ jam á lóō lí táŋga nyí ya tɛ́ɛ́ɓɛ.»

¹⁴ Jogo lí ɓádu-wélan ki bú ɓāt nyɛ nɛ́: «Ɓɛ́hɛ ki, yéé ɓa nyɛ́ɛ li ɓɔŋ é?» Yohánɛs ɔ pélē ɓɔ nɛ́: «Miníh nyɔŋɔ́g ɓé jam lí mut la elóh, tɔ li ɓeeyɛ lí mut jam yɛmɛ́, kɔnán ja mívag la nsála wáná.»

Yohánɛs ag lɛgɛ pɔ́l nyí nyɔ́ŋ a ŋga kɛ́ li sɔ́

¹⁵ Kasig límut li ɓɛ́ɛ́ até á nlaaŋkán, mut sig a ŋgí ɓatɓan la nyɛ́-mɛ̄n kíyáɓɛ́nɛ Yohánɛs ɓé nɛ́ á lɛ Nyɔ́-a-Pɔ́hlɛ.

¹⁶ Ndí nyɛ́ ɔ pélē ɓɔ́ nɛ́: «Ma, mag tíi ɓɛ́nɛ nzoɓan nyí mindím, ndí nyɔ́ a ŋga sɔ́ ámbúh yáma ag loo ma ŋguu. Mih kɔ́ɔ́ ɓé ma li kúhu lí míkɔɔ mí bítāmbí byɛ́ɛ́. Nyɛ́ ág kɛ ɓɛ́nɛ li tíi lí nzóɓan nyí nzáan la M̀búl Mpúán.

¹⁷ Ag kɛ li púɛ lí yáli yɛ́ɛ́, yíkágánɛ́ ag byee evɛ́nd á wɔ á lí ɓága lí mítū la miíh a ŋga kɛ́ li naŋɛ á ákoa wɛ́ɛ́. Ndí tín la mitú, ag ɓɔŋ ɓɔ́ lísalká, jé a ŋga kɛ́ li dígɛ á nzáan nyí ɛ ŋgá dím ɓé.»

¹⁸ Náŋ nɛ́ Yohánɛs a ŋgí lɛgɛ limut Pɔ́l M̀ɓɛɛŋ la li tíi lí ɓɔ́ ŋgéélé yí nyaa la nyaa.

Lisúg lí nsɔ́n á Yohánɛs Ǹtíi-nzoɓan

¹⁹ Yohánɛs Ǹtíi-nzoɓan a ŋgí laga Elóde ŋ̀kanʼyɛ á Galiléa aɓé a ɓɔ̄ŋ á li nyɔŋ lí Elódiáda ŋ̀gáá mɔ́ɔ̄nyāŋ, la míŋí mam miɓé mísɛ a ɓɔ̄ŋ.

²⁰ Kasig yé a dúgú lí ɓɔŋ ɛ́h mɓɛ́ ɓé ɛ́ kɔ́ɔ, Elóde ɔ óm Yohánɛs á ndáá-m̀ɓog.

Yésus ag kuh nzoɓan

²¹ Kasig ɓot bísɛ bí kuhúú nzoɓan, Yésus nyɛ́g ɔ kūh nzoɓan. Eceg a ŋgí kánɛ, lóō lú léglan,

²² M̀búl Mpúán a sūhlé nyɛ́ mbunán la ɔɓeŋ. Váŋ nɛ́ cíŋ ɛ sɔ́léné á lóō, yu lága nɛ: «Wa nɛ ɔ lɛ mɔɔ́n wama, nyí lɛn nɛ́ ma byál wa.»

Ndándó nyí Yésus

²³ Eceg Yésus a ŋgí ɓotle nsɔ́n wɛ́ɛ́, a ɓɛ́ɛ́la jam ákaa muúmíŋháa mí mímbú. Ákaa miɔ́ŋɔ mí ɓot, a ɓɛ́ɛ́ mɔɔ́n Yósɛp, Yósɛp nyí Hélia,

²⁴ Hélia nyí Matat, Matat mí Lévi, Lévi nyí Mɛ́lkia, Mɛ́lkia mí Yánai, Yánai nyí Yósɛp,

²⁵ Yósɛp nyí Matátias, Matátias mí Ámos, Ámos nyí Náhum, Náhum nyí Ésli, Ésli nyí Nagái,

²⁶ Nagái nyí Maat, Maat mí Matátias, Matátias mí Séméin, Séméin nyí Yósɛk, Yósɛk mɔɔ́n Yóda,

²⁷ Yóda nyí Yohánan, Yohánan nyí Lésa, Lésa nyí Zolobábɛl, Zolobábɛl nyí Salátiɛl, Salátiɛl nyí Nélia,

²⁸ Nélia nyí Mɛ́lkia, Mɛ́lkia mí Ádia, Ádia nyí Kósam, Kósam mí Elmádam, Elmádam mɔɔ́n Éel,

²⁹ Éel nyí Yésus, Yésus nyí Eliézɛl, Eliézɛl nyí Yolíma, Yolíma nyí Matat, Matat mí Lévi,

³⁰ Lévi nyí Síméon, Síméon nyí Yúda, Yúda nyí Yósɛp, Yósɛp nyí Yónam, Yónam nyí Eliákim,

³¹ Eliákim nyí Méléa, Méléa mí Ména, Ména mí Matáta, Matáta mí Nátan, Nátan mɔɔ́n Dávid,

³² Dávid nyí Yése, Yése nyí Yóbɛd, Yóbɛd nyí Bóoz, Bóoz bí Sála, Sála nyí Naásɔn,

³³ Naásɔn nyí Aminádab, Aminádab mí Admin, Admin mí Álni, Álni nyí Éslom, Éslom nyí Fálɛs, Fálɛs nyí Yúda,

³⁴ Yúda mɔɔ́n Yákob, Yákob nyí Ísaak, Ísaak mɔɔ́n Áblaháam, Áblaháam nyí Talá, Talá nyí Nákɔl,

³⁵ Nákɔl nyí Séluk, Séluk nyí Lagáus, Lagáus nyí Fálek, Fálek nyí Ébɛl, Ébɛl nyí Sála,

³⁶ Sála mɔɔ́n Kaínam, Kaínam mɔɔ́n Alfasáda, Alfasáda mɔɔ́n Sém, Sém mɔɔ́n Nóa, Nóa nyí Lámɛk,

³⁷ Lámɛk nyí Matúsala, Matúsala mɔɔ́n Énɔk, Énɔk nyí Yálɛt, Yálɛt nyí Maléléɛl, Maléléɛl mí Kaínam,

³⁸ mɔɔ́n Énos, Énos mɔɔ́n Sɛt, Sɛt mɔɔ́n Ádam, Ádam mɔɔ́n Ɔlolómɛ̄.