Lúkas 23 - Esaa-líat ɛ́ péná

Bíg kɛla Yésus ɔ́sū ví Piláto

¹ Váŋ nɛ́ ɓot bísɛ bí tɛ́lɓéé elɔŋ á li kɛla lí Yésus ɔ́sū ví Piláto.

² Bú ɓōtlé nyɛ li sɔ́mánɛ la li laga nɛ́: «Ɓaá kɔ́p nyɔ́ mut ag kóm lísandá á ékombo yáhá. Ag céŋɛ ɓot nɛ́ bíh sáálág ɓé káísa táas a ŋga ɓāt, la li katɓan nɛ́ a lɛ Nyɔ́-a-Pɔ́hlɛ, ɔ ɓɛ́ ki káísa.»

³ La Piláto ɔ bíhī Yésus nɛ́: «Wa nɛ́ ɔ lɛ Káísa nyí Elōg-Yúda é?» Yésus ɔ pélē nyɛ nɛ́: «Ákaa wa pɔ́t!»

⁴ Piláto ɔ lága ɓakanʼyɛ ɓatíi-nsúlé la jéŋé limut nɛ́: «Mah sɔm ɓé ma nyɔ́ mut njɔm tɔ ya nyí ɛ kɔɔ́ la ekɔ́ghɛ.»

⁵ Ndí ɓɔ́ bú víhyɛ́ ja li laga nɛ́: «Ag tíi ɓot bí Yúdēa bísɛ kúmba la esukúlu yɛ́ɛ́, li ɓotle á Galiléa li pám nɛ́-tɛ́ɛ la vá.»

Bíg kɛ́la Yésus ɔ́sū ví Élóde

⁶ Ɛnɛ́ Piláto a ámblé náŋ, ɔ ɓāt kí nɛ́ nyɔ́ŋ mut a lɛ mut a Galiléa.

⁷ Ɛnɛ́ a sɔ́ŋtánɛ́ nɛ́ Yésus a lɛ á sí likanʼyɛ jé lí Élóde, la ki nɛ́ nyɔ́ŋ a sóŋhán li ɓɛ́ á Yélūsalɛm nyúŋ alɔ́, ɔ óm nyɛ á yóg yɛ́ɛ̄.

⁸ Ɛnɛ́ Élóde a ɛ́nɛ́ɛ́ Yésus, ɔ kɔ̄n mivag ŋgandag, átɔm nɛ́ náŋ a lɛ yɔŋ éceg nɛ́ a ŋgí somo nyɛ́ li ɛ́n, ányúū yé ɛ́sɛ a ŋgí ámble bíg pɔ́t likɔlɓan la nyɔ́ŋ, la lipitá nɛ ag ɛ́n nyɛ́ ag ɓɔŋ minɛ́ŋ.

⁹ Elóde ɔ bíhī Yésus mam ŋgandag, ndí nyɛ́ āh pele ɓé nyɛ́ tɔ jam.

¹⁰ Ɓakanʼyɛ ɓatíi-nsúlé la ɓayí-mbéndá bí mɓɛ́ váŋ, bú lēgtánɛ́ Yésus la ŋguu sɔ́mɔn.

¹¹ Elóde la ɓatát nyɛ́, átē á ŋgandag ŋyaŋ, bú ɓōtlé li ɔl lí Yésus. La Elóde ɔ jáhɛ́ nyɛ elɔ́ŋgɔ mbɔ́tí, ɔ tímānɛ̄ nyɛ á yóg Piláto.

¹² Múŋ á víŋ ɔlɔ́, Elóde la Piláto bú yáan míwāndá, ɓɔ́ ɓot ɓáh dúgu ɓé lí diŋan.

Yésus ag kuh ekɔ́ghɛ yé nyɛmb

¹³ Piláto ɔ kɔ̄tánɛ́ ɓakanʼyɛ ɓatíi-nsúlé, ɓakanʼyɛ ékombo la lilóm lísɛ,

¹⁴ ɔ lága ɓɔ nɛ́: «Maná sɔ́la ma nyɔ́ mut ákaa m̀ɓógtɛ lilóm á nzen ɛ tɛ́ɛ́. Ndí ma, ma kááhɛ́ nyɛ́ ɔ́sū váná, māh kɔt ma nyɛ́ ɔ́vuha tɔ vá ví kɔɔ́ la ekɔ́ghɛ á sɔ́mɔn yáná ɛ́sɛ.

¹⁵ Tɔ Elóde ki, ákaa āh sɔm ɓé nyɛ njɔm, jɔ́ nɛ́ a tímānɛ̄ ɓɛ́hɛ nyɛ́. La náŋ, āh ɓɔŋ ɓé jam tɔ já li kɔɔ́ nyɛ́ lí ólhánɛ.

¹⁶ Ányúū náŋ, mag ɓomhanɛ nyɛ́ mi mwáhɛ́ nyɛ́ a kɛ́nɛ́g.» [

¹⁷ ]

¹⁸ Váŋ nɛ́ ɓot bísɛ ɓá tɛ́ɛ́ mílōn nɛ: «Ól nyɔ́ mut, pámɛ́ ɓɛ́hɛ Balábas.»

¹⁹ Balábas a níŋgléé á míɓog ányúū mpuŋgú á loolóó á tísɔn la ki nɛ́ a ólóó mut.

²⁰ Kasig Piláto a ɓɛ́ɛ́la eɔ́ŋɔ yé li mwahɛ lí Yésus, ɔ kwɛ́lɛ̄ pɛ ɓɔ́ nlemlem á jam.

²¹ Ndí ɓot bú lón ja nɛ́: «Tomó nyɛ́ á mbásá, tomó nyɛ́ á mbásá!»

²² Piláto, a ŋgele yá yáhɛ́ ɛ́ŋháa ɔ bíhī ɓɔ́ nɛ́: «Wɔɔ́wɔ́ɔ aɓé hɔ́ nyɔ́ mut a ɓɔ̄ŋ é? Ma, māh sɔm ma nyɛ́ njɔm ɛ ŋga ólhánɛ nyɛ́. Jɔ́ nɛ́, mag ɓomhanɛ nyɛ́, mi mwáhɛ́ nyɛ́ a kɛ́nɛ́g.»

²³ Ndí limut lú váŋgɛ ja la milón nɛ́ Yésus a tōmlɛ́ɛ á mbásá. Kasig milón máɓá mí ŋgí ɓét bí lí ɓét,

²⁴ Piláto ɔ nyɔ̄ŋ bísúghɛ́nɛ́ nɛ ag yáhɛ nsom wáɓá.

²⁵ Váŋ nɛ́ a pámɛ Balábas, mut ɓɔ́ bí ŋgí ɓat nyɛ́, nyɔ́ a ɓɛ́ɛ́ á m̀ɓog ányúū mpuŋgú la eólan. Á yéé ŋga légɓe Yésus, ɔ tí ɓɔ nyɛ́ nɛ́ bí ɓɔŋ la nyɛ́ ákaa nsom wáɓá.

Bíg tomo Yésus á mbásá

²⁶ Eceg bí ŋgí kɛ́la Yésus, bú ɓómán la Símɔn, mut a Siléna nyɔ́ a ŋgí sɔ́le á ǹdíí. Bú kágyɛ́ nyɛ li ɓɛgɛ lí mbásá ámbúh Yésus.

²⁷ Edila limut yé ndog Yésus ɛ́ ŋgí óŋ nyɛ́. Múŋ á yéŋ elɔŋ, ɓondígá bí ɓɛ́ɛ́ átē ɓá bí ŋgí lee la li síítan ányúū yɛ́ɛ̄.

²⁸ Yésus ɔ yáan ɔ légɓé ɓɔ, a byɛ́la ɓɔ́ nɛ́: «Á ŋgɔn yí Yélūsalɛm, miníh lelég ɓé ányúū yáma, ndí lelán ja ányúū yaná ɓɛ́nɛ-mɛ̄n la ányúū ɓɔɔ́n ɓáná.

²⁹ Átɔm nɛ́ alɔ́ ág kɛ li sɔ́ nyú ɓot bí ɓɛ́ bí laga nɛ́: Misɔ́tá la bikom bí ɓondígá la ɓá bí lɛ́ ŋgí li byál tɔ li nyáŋɛ.

³⁰ Múŋ á yéŋ eceg, bíg kɛ li laga lí ákolá ácɛ̄ŋ nɛ: Miní ɓɛ́hán ɓɛ́hɛ á nyúū, bí lagá ki ŋgondo nɛ́: Bútyánɛ ɓɛ́hɛ.

³¹ Ánsī nɛ, kí ɓá ɓɔ̄ŋ péná eéé ná, ebuu-la-ŋgele yáŋvéé la ŋkum é?»

³² Bí ŋgí kɛla ɓot bíɓáa ɓatám, ɓá bí ɓɛ́ɛ́ mítɔnɓa, á li ól lí ɓɔ elɔŋ la Yésus.

Mitomlɛ mí Yésus á mbásá

³³ Ɛnɛ́ bí pámáá á nyɔ́ voóm bí ŋga yáŋa «Evóghó m̀mú», bú tōmó Yésus á mbásá elɔŋ la míŋ mitɔnɓa míɓáa, nyɔ́ wa á m̀ɓɛ́nlómɛ, nyɔ́ŋɔ́ ki á m̀ɓɛ́ŋgáa wɛɛ́.

³⁴ Váŋ nɛ́ Yésus a lága nɛ: «Etāa, laakɛ́ ɓɔ́ ányúū nɛ bí ŋgá yí ɓé yé bí ŋga ɓɔ̄ŋ.» Á kaa sónja ɛ́ ŋgí somo li kaan lí mbɔ́tí yɛ́ɛ́, yú lɛ̄ŋgɛ́ mbam.

³⁵ Ɓot bí ɓɛ́ɛ́ váŋ bú tíg bíg légɓe. Ɓakanʼyɛ, ɓɔ́ bí ŋgí ɔl la li laga nɛ́: «A lɛ ǹsuŋ ɓot ɓatám, kíyáɓɛ́nɛ a lɛ Nyɔ́-a-Pɔ́hlɛ, nyɔ́ Ɔlolómɛ̄ a tɛ́ɛ́yɛ, a súŋ hɔ́ nyɛ́-mɛ̄n!»

³⁶ Sónja yɔ́g ɛ́ ŋgí ɔl nyɛ́. Yú sīŋglé nyɛ ɓɛɓɛ á lí tíi lí nyɛ eɓámhá-wáany,

³⁷ la li lága nɛ: «kíyáɓɛ́nɛ ɔ lɛ káísa nyí Elōg-Yúda, sūŋ hɔ́ wā-mɛ̄n!»

³⁸ Ɛ́ ɓɛ́ɛ́ nciíg á lóō lí mbásá yɛ́ɛ̄ nɛ: «Káísa nyí Elōg-Yúda nyí.»

³⁹ Ntɔnɓa wá á ɓá bíɓáa bí tōmléé á mbásá, wɔ́g wú ɓōtlé lí óŋo lí Yésus wú lága nɛ: «Ɓaá wa ɓé nɛ ɔ lɛ Nyɔ́-a-Pɔ́hlɛ é? Sūŋ hɔ́ wā-mɛ̄n ɔ súŋ ki ɓɛ́hɛ!»

⁴⁰ Ndí nyúŋú ntɔnɓa ntám wú lagá nyú ɔ́sū nɛ: «Ɔ ŋgɔ́ kɔn ɓé Ɔ́lolómɛ̄ woŋ é? Wa nyɔ́ ɔ lɛ li kuh lí nlemlem á ékɔ́ghɛ.

⁴¹ Ányúū yāhá, náŋ a tɛ́ɛ. Bi lɛ li kuh lí nsála á miɓɔŋɔg máhá, ndí nyɛ́, āh ɓɔŋ ɓé jam liɓé tɔ já.»

⁴² La nyɛ́ ɔ lāgá nɛ: «Á Yésus, ɔ ɔ́ŋlag ma eceg ɔ ŋgɔ kɛ́ li sɔ́ kaa káísa.»

⁴³ Váŋ nɛ́ Yésus a tímānɛ̄ nyɛ nɛ́: «La mbálɛ, mag laga wa nɛ́, nyí lɛn, ɔg kɛ li ɓɛ́ élɔŋ la ma á paladīs.»

Nyɛmb nyí Yésus

⁴⁴ Náŋ a ɓɛ́ɛ́ mam mí kɔsi, eceg livito lí bútyɛ́ɛ ŋkɔŋ-á-sí ásɛ li pám á ŋgɛ́ŋ ɛ́ŋháa ɛ́ ŋgōgó.

⁴⁵ Vaŋgá vú dím. Váŋ nɛ́ líɓato licɛ́ŋ jé lí ɓɛ́ɛ́ lí ŋgí céŋ ndugá-púán lá wáhyé á m̀mím.

⁴⁶ La Yésus ɔ tɛ́ɛ́ nlón á lóō lóō, a byɛ́ nɛ́: «Etāa, mag tímanɛ m̀búl wáma á mɔ mɔ́ɔ.» Ɛnɛ́ a manhɛ́ɛ li pɔ́t náŋ, ɔ páte.

⁴⁷ Ɛnɛ́ ŋ̀kanʼyɛ nlɔŋ á eɓógo sónja a ɛ́n yéé yá loo, ɔ ɓégɛ́ Ɔlolómɛ̄, la li laga nɛ́: «La mbálɛ, nyɔ́ mut a mɓɛ́ kɔɔ a tɛ́ɛ sim.»

⁴⁸ Ɓot bísɛ ɓá bí ɓɛ́ɛ́ bí kómānɛ váŋ á li légɓe ákaa Yésus a ŋgí tomlɛ á mbásá, ɛnɛ́ ɓá ɛ́n yé yá loo, bú tímān á mímbóg máɓá bíg síítan la evínɛ-m̀mím.

⁴⁹ Bileman bí Yésus bísɛ la ɓondígá bí ŋgí óŋ nyɛ́ á mbúh li ɓotle á Galiléa, bí ɓɛ́ɛ́ bí tɛ́ɛ́ puh enɛŋɛ́ bíg légɓe yéé ɛ ŋga lōo.

Mije mí Yésus

⁵⁰ Váŋ nɛ́ mut wa nɛ́ Yósɛp a sɔ́ɔ́, a ɓɛ́ɛ́ ɛ́mbōn yé ɔ́ku-vicɛ́ŋ-ví-ɓákāāhɛ, elɔ́ŋgɔ mut yé tɛ́ɛ́ sim.

⁵¹ Ah tíée ɓé cíŋ yɛ́ɛ̄ á dimb jáɓá tɔ á miɓɔŋɔg máɓá. A ɓɛ́ɛ́ mut a Alimatéa, tísɔn nyí Elōg-Yúda. A ŋgí laaŋke Likanʼyɛ lí Ɔ́lolómɛ̄.

⁵² Nyɔ́ŋ mut ɔ kɛ á mbóg Piláto á li ɓat lí nyɛ m̀bim á Yésus.

⁵³ La nyɛ́ ɔ súhɛ wɔ á mbásá, ɔ vúlké wɔ á mbɔ́ŋ, ɔ nāntɛ́ɛ wɔ á sɔŋ ɛ ɓogɓɛ́ɛ á ŋgɔg, ápah bí ɓɛ́ɛ́ ŋgí li vá lí m̀bim tɔ wá.

⁵⁴ Náŋ a ɓɛ́ɛ́ ɔlɔ́ ví m̀ɓoŋhanɛ́ a etɔ nɛ́ likɛ́ɛ́ ag ɓɛ́ ɔlɔ́ ví évɛɛɓan.

⁵⁵ Ɓondígá bí ɓɛ́ɛ́ elɔŋ la Yésus li ɓotle á Galiléa, bú óŋ Yósɛp á mbúh. Bú légɓé sɔŋ, bú ɛ́n ákaa ɓá nāntɛ́ɛ m̀bim wɛ́ɛ́.

⁵⁶ Ámbúh náŋ, bú tímān á mímbóg máɓá, bú ɓoŋhán míŋgɔ́gɔ la mibíndɛ. Á ɔlɔ́ ví évɛɛɓan ví Elōg-Yúda, bú vɛ́ɛɓan li oŋle la mbéndá.