Lúkas 20 - Esaa-líat ɛ́ péná

Mbihi ányúū likanʼyɛ lí Yésus

¹ Ɔlɔ́ vá, Yésus a ŋgí yéglɛ ɓot á ndáá-ēcɛ́ŋ-Ɔlolómɛ̄ la li lɛgɛ lí Pɔ́l M̀ɓɛɛŋ. Váŋ nɛ́ ɓakanʼyɛ ɓatíi-nsúlé la ɓayí-mbéndá bí sɔ́ɔ́ elɔŋ la ɓacɛ́ŋ bí lílōmɛ

² á li ɓat li nyɛ nɛ́: «Lagá ɓɛ́hɛ la jɔɔ́jɔ́ɔ likundɛ ɔ ŋgɔ ɓɔ̄ŋ míŋ mam. Nzáá a tí wa nyíŋ kundɛ é?»

³ Yésus ɔ pélē ɓɔ́ nɛ́: «Mág mag bihi ɓɛ́nɛ nɛ́,

⁴ Laglán ma: ɓaá, nzoɓan nyí Yohánɛs ɛg sɔ́le la Ɔlolómɛ̄ tɔ nɛ́ la ɓot-bí-bínam é?»

⁵ Váŋ nɛ́ ɓá dūtɛ́ míɔ̄ŋɔ, bú mɔg nɛ: «kíyáɓɛ́nɛ ɓa lágá nɛ: ‹Ɔlolómɛ̄›, ag ɓat ɓɛ́hɛ nɛ́: ‹Ányúū yéé hɔ́ manáh yéɓe ɓé nyɛ é?›

⁶ Ndí kíyáɓɛ́nɛ ɓa yó nɛ́: ‹Ɓot nɛ́ ɓá óm nyɛ́›, ɓot bísɛ bíg waŋgɛ ɓɛ́hɛ ŋgɔg á lí ól lí ɓɛ́hɛ, ányúū nɛ́ ɓɔ́ bí lɛ́ mbáki nɛ́ Yohánɛs a ɓɛ́ɛ́ m̀pɔ́tle-a-Ɔlolómɛ̄.»

⁷ Váŋ nɛ́ ɓá pélē nyɛ́ nɛ́ bi ŋgá yí ɓé nzáá a óm nyɛ.

⁸ La Yésus ɔ tímānɛ̄ sīg-pɛ ɓɔ nɛ́: «Tɔ mág, mi ŋgá laga ɓé ma ɓɛ́nɛ la jɔɔ́jɔ́ɔ likundɛ mi ŋga ɓɔ̄ŋ míŋ mam.»

Ɔŋgaáŋgan ví bíɓēɓéyɛ bí ɓáɛŋ-kɔ́mbɔ

⁹ Ámbúh náŋ, Yésus ɔ kánɛ ɓot ví ɔŋgaáŋgan nɛ́: «Mut wa a sáláá ǹdíí á bínyɛŋgɛ́n bí wáany, la nyɛ́ ɔ tí wɔ ɓaɛŋ, ɔ kɛ́ á duwɛ li ŋga ɓēm.

¹⁰ Ɛnɛ́ eceg yá kɔlan, ɔ óm m̀ɓɔŋle wɛɛ́ wa á yóg ɓaɛŋ á lí ɓat lí ɓɔ ɛjɛ́ɛ́ joga. Ndí ɓaɛŋ bú úm nyɛ bikút, bú sóɛ̄ nyɛ mɔ nsɔ́.

¹¹ Ámbúh nyɔ́ŋ, m̀wɛɛ́n ǹdíí ɔ óm sīg-pɛ m̀ɓɔŋle ntám. Ndí ɓaɛŋ bú úm nyɛ bikút nlemlem, bú óŋo nyɛ́, bú sóɛ̄ nyɛ́ mɔ nsɔ́.

¹² La nyɛ́ ɔ óm sīg-pɛ m̀ɓɔŋle a yáhɛ bíŋháa. Nyɛ́g, bú ɓáálɛ́ nyɛ, bú dúhū nyɛ.

¹³ Váŋ nɛ́ m̀wɛɛ́n ǹdíí a yó la nyɛ́-mɛ̄n nɛ́: ‹Yéé mi ŋga nyɛ́ɛ li ɓɔŋ é? Mag óm edidíŋɛ yáma mɔɔ́n. Nyɛ́, bíg kɛ nyɛ́ lí ditɛ.›

¹⁴ Ndí ɛnɛ́ ɓáɛŋ ɓá ɛ́n nyɔ́ŋ mɔɔ́n-á-páam, bú laglán nɛ́: ‹Ŋ̀yéglan-embámbá nyɔ́. Bi ól nyɛ́, bi yéglán émbāmbá.›

¹⁵ Váŋ nɛ́ ɓá pámɛ nyɛ́ á ǹdíí, bú ól nyɛ.» Yésus ɔ ɓāt ɓɔ́ nɛ́: «Yéé m̀wɛɛ́n ǹdíí a ŋga kɛ́ ɓɔ́ lí ɓɔŋ é?

¹⁶ Ag kɛ li sɔ́, a ól ɓáŋ ɓaɛŋ bísɛ, a tí ǹdíí wɛ́ɛ́ ɓot ɓatám.» Ɛnɛ́ ɓot ɓá ámblé bíŋ biɓaŋgá, bú pélē nɛ́: «Kɛ́m, m̀ɓá!»

¹⁷ Ndí Yésus ɔ légɓé ɓɔ á mbɔm, a byɛ́la ɓɔ́ nɛ́: «Ɓaá, yéé jé Licila lí ŋga mínɛ é? Ŋgɔg nyí ɓaóŋ ndáá ɓá ɓen ah yɔ ɓé nɛ ya tímān li ɓɛgɛ lí ndáá é?

¹⁸ Mut la mut a ŋga kɛ́ yɔ li ɓɛ́han á lóō, ag búge. Nyɔ́ ki nyíŋ ŋgɔg ɛ ŋga kɛ́ li ɓɛ́han á nyúū, ɛg kɛ nyɛ́ li kɔgte.»

¹⁹ Á ékūyá-kúyá ɓayí-mbéndá la ɓakanʼyɛ ɓatíi-nsúlé bú somó nyɛ li byee, átɔm nɛ́ bí sɔ́ŋtáánɛ nɛ́ ányúū yaɓá nɛ a kánɛ víŋ ɔŋgaáŋgan, ndí bú kɔn limut woŋ.

Bíg ceglɛ Yésus likɔlɓan la táas ɓá nyɛɛ́ lí sála lí káísa ecɛ́ŋ

²⁰ Váŋ nɛ́ ɓáŋ ɓot ɓá ɓōtlé lí ee li Yésus. Bú óm nyɛ ɓot bí ŋgí étɛ nɛ́ bí tɛ́ɛ sim. Bí ŋgí somo nyɛ́ li kɔt lí ávuha á bíɓaŋgá byɛ́ɛ́, a lí ɓɔŋ nɛ́, bí núŋū nyɛ́ á elōg gɔ́mna, la ɔ́sū ví gɔ́mna licɛ́ŋ.

²¹ La ɓɔ́ bú bíhī nyɛ nɛ́: «Á Ŋ̀yéglɛ, biíg yí nɛ́, yé ɔ ŋgɔ pɔ́t la li yéglɛ ɛ lɛ́ mbálɛ; ɔ ŋgɔ́ tɔ́tɔ ɓé mut, ndí ɔg yéglɛ nzen yí Ɔlolómɛ̄ átē á mbálɛ.

²² Ɓaá, bi byɛ́ɛ́ kundɛ tɔ nɛ́ kɛ́m li sála lí táas á yóg káísa ecɛ́ŋ é?»

²³ Ɛnɛ́ Yésus ɔ sɔ́ŋtánɛ nɛ́ ɔám víŋ, a byɛ́la ɓɔ nɛ́:

²⁴ «Éthánɛ ma kápa ya, asú la joó lí nzáá bí lɛ́ múŋ é?» La ɓɔ́ bú pélē nyɛ nɛ́: «Bí Káísa ecɛ́ŋ.»

²⁵ Váŋ nɛ́ Yésus a lága ɓɔ nɛ́: «La náŋ hɔ́, miní tímánɛ Káísa ecɛ́ŋ yé ɛ lɛ yé Káísa ecɛ́ŋ, miní tímánɛ ki Ɔlolómɛ̄ yé ɛ lɛ yé Ɔlolómɛ̄.»

²⁶ Tɛɛla váŋ, ɓáh kɔt ɓé nyɛ́ ɔvuha tɔ vá á mam a ŋgí pɔ́t ɔsú ví límut. Á mveŋghanɛ́ ɛnɛ́ ɓá ámblé mbele yɛ́ɛ̄, bú nyág, bú ku mbúg.

Mbihi likɔlɓan la lipahye lí ɓot ɓá wú

²⁷ Váŋ nɛ́ jogo lí ɓot bí Élōg-Sadúkái, ɓá bí ŋgá yéɓe ɓé lípahye lí ɓot ɓá wú, ɓá sīŋglé Yésus ɓɛɓɛ. La ɓɔ́ bú bíhī nyɛ nɛ́:

²⁸ «Etāa, Móse a cíi ányúū yāhá nɛ: kíyáɓɛ́nɛ mut a byɛ́ɛ mɔɔ́nyāŋ a páam, nyɔ́ a lɛ nlɔ́mɓɛ́gɛ ndí a wú ŋgíla mɔɔ́n, mɔɔ́nyāŋ ag koto ŋkúh wɛ́ɛ́ á lí ɓɔŋ nɛ́ a kól nyɛ́ mbota.

²⁹ Légɓé sig, linyaŋ nzambúwá jéŋ; nyɔ́ ɔsú ɔ lɔ́m míndīgá, ɔ wú ɛ́h ɓɛ́ ɓé lí yíg lí mɔɔ́n.

³⁰ Nyɔ́ a yáhɛ́ bíɓáa

³¹ la nyɔ́ a yáhɛ́ bíŋháa, bú koto nyúŋ ŋkúh, mut sig á yɛ́ɛ́ eceg, la ɓɔ́ bú wú. Náŋ la náŋ, ɓɔ́ nzambúwá bísɛ bú wú ɛ́h ɓɛ́ ɓé ɓɔ́ li yíg lí mɔɔ́n.

³² Á mísúgle, mindígá nyɛ́g ɔ wú.

³³ Ɓaá, á ɔlɔ́ ví lípahye, nyɔ́ŋ mindígá ag kɛ li ɓɛ́ lí ŋ̀gáá nzáá é? Átɔm nɛ́ ɓɔ́ nzambúwá ɓá niŋ lá nyɛ́ ákaa ŋ̀gáá wāɓá.»

³⁴ Yésus ɔ pélē ɓɔ nɛ́: «Ɓot bí nyí sí bíg lɔ́mɓan.

³⁵ Ndí, yá ɛ́ni nɛ́ ɓot bí kɔɔ́ li nyɔŋ lí joga á éniŋ ɛ ŋga kɛ́ li sɔ́, la á lípahye, bí ŋgá lɔ́mɓan ɓé.

³⁶ Náŋ a lɛ nɛ́, bí ŋgá la ɓé pɛ li wú, ányúū nɛ́ bí lɛ́ nlemlem ákaa áŋgɛl; bí lɛ ɓɔ́ɔ̄n bí Ɔlolómɛ̄, ánsī nɛ bí lɛ́ ɓɔ́ɔ̄n bí lípahye.

³⁷ La ki nɛ́, ɓá ɓá wū bíg nyɛɛ li pahye. Móse nyɛ́-mɛ̄n a yéglɛ́ náŋ eceg aá ŋga pɔ́tle ekaŋga ɛ́ ŋga lóŋ ɛ́h ɓɛ́ ɓé lí sííɓe; ápah a ŋga yáŋa Nyɔ́ŋ-Ɛsáŋɛ́ nɛ: Lōó lí Áblaháam, Lōó lí Ísaak la Lōó lí Yákob.

³⁸ Ɔlolómɛ̄ a sē ɓé Lōó lí ɓot ɓá wú, ndí jé lí ɓá bí lɛ́ á éniŋ. Átɔm nɛ́, á ɔ́sū vɛ́ɛ́ ɓot bísɛ bí lɛ́ éniŋ.»

³⁹ Váŋ nɛ́ puh ɓayí-mbéndá ɓá nyɔ̄ŋ mpɔ́t lí laga nɛ́: «Etāa, wa yí ŋkwɛl.»

⁴⁰ Átɔm nɛ́, bí ŋgí yí ɓé pɛ yé bí bíhī nyɛ́.

Nyɔ́-a-Pɔ́hlɛ a lɛ nzáá á ŋgwáāg Dávid

⁴¹ Yésus ɔ ɓāt ɓɔ nɛ́: «Ányúū yéé bí ŋgá dígānɛ li laga nɛ́ Nyɔ́-a-Pɔ́hlɛ a lɛ̄ mɔ́ɔ̄n Dávid é?

⁴² Kíyáɓɛ́nɛ Dávid nyɛ́-mɛ̄n ag laga a Kálati-Byaá nɛ́: ‹Nyɔ́ŋ-Ɛsáŋɛ́ a laga Ɛtáŋɛ wama nɛ́: tɔɔ́ á m̀ɓɛ́nlómɛ wama,

⁴³ nɛ́-tɛ́ɛ ma yáánɛ́ ɓálem ɓɔ́ɔ etɛ́lɓéné-míkoo mɔ́ɔ!›

⁴⁴ La náŋ, Dávid ag yáŋa nyɛ́ nɛ́ Ɛtáŋɛ; nɛ́ láá hɔ́ a lɛ nyɛ́ mɔ́ɔ̄n é?»

Li nyɔŋ lí lítāt la miɓɔŋɔg mí ɓayí-mbéndá

⁴⁵ Váŋ nɛ́ Yésus a lága ɓáyēge ɓɛ́ɛ́ ɔsú ví limut lí ŋgí ámble nyɛ́ nɛ́:

⁴⁶ «Nyɔŋán lítāt lá ɓayí-mbéndá bí ŋga dīŋ li wɛɛwɛɛ la mitaandá mí mbɔ́tí, la ŋgandag mítamlan á ɓávoóm bí límut, li tɔɔ a bitɔ bí ɔ́sū a ndáá-míɓomán, la bitɔ bí ɔ́sū á ndáá-míndēmá.

⁴⁷ Ɓɔ́ ɓot bí ŋga nyɔŋ abyaŋ á míkūh mí ɓóndīgá la li laaɓɛ lí míkánɛ, bíg kɛ li kuh lí ékɔ́ghɛ yé ŋguu li loo lí ɓot bísɛ.»