Lúkas 14 - Esaa-líat ɛ́ péná

Yésus ag tɔɔyɛ mut nyuú ya vúh mbólí á ɔlɔ́ ví évɛɛɓan

¹ Á ɔlɔ́ ví évɛɛɓan vá, Yésus ɔ kɛ́ á li dí á yóg ŋ̀kanʼyɛ a ɓot bí Élōg-Falísái wa. Ɓot bí ɓɛ́ váŋ bí ŋgí nyɔŋ eceg á lí légɓe lí nyɛ.

² Yú sóŋhán nɛ mut wa nyɔ́ nyuú ya vúh la ɔkɔn, a ɓɛ́ɛ́ a tɛ́ɛ́ nyɛ́ ɔ́sū.

³ Váŋ nɛ́ Yésus a nyɔ́ŋ mpɔ́t, la nyɛ́ ɔ ɓāt ɓáyī-mbéndá la ɓot bí Élōg-Falísái nɛ́: «Mbéndá ɛg tíi kundɛ, tɔ nɛ́ kɛ́m nɛ bí tálá mut ɔkɔn á ɔlɔ́ ví évɛɛɓan é?»

⁴ Ndí ɓáh tɔ́ɔ́ ɓé nyɛ li pele. Váŋ nɛ́ Yésus a síiɓán ŋ̀kɔɔ́kɔn, ɔ tɔ́ɔyɛ́ nyɛ mbólí la nyɛ́ ɔ soɛ nyɛ.

⁵ Ámbúh náŋ ɔ lága ɓɔ nɛ́: «Nzáá á póla yaná, kíyáɓɛ́nɛ mɔɔ́n wɛ́ɛ̄ á páam tɔ nyaga yɛ́ɛ̄ ɓá ɓɛ́hán á éɓēl a ŋgá ɓógtɛ ɓé ɓɔ m̀bíí la m̀bíí á ɔlɔ́ ví évɛɛɓan é?»

⁶ Ndí ɓáh la ɓé li pele lí tɔ jam múŋ.

Li yí lí li pɔhɔ lí étɔ

⁷ Ɛnɛ́ Yésus a ɛ́nɛ́ɛ́ ákaa ɓayáŋlɛ bí ŋgí pɔhɔ bitɔ bí ɔ́sū la ɔ́sū, ɔ kánɛ ɓɔ ví ɔŋgaáŋgan nɛ́:

⁸ «Eceg mut a yáŋa wa á ŋgand yɛɛ́ aúg, ɔh kɛnɛ́g ɓé li tɔɔ á étɔ ɔ́sū, ányúū nɛ ɛ́g la li ɓɛ́ nɛ́ mut a ŋga loo wá ádit a yáŋlɛ muŋ;

⁹ á li pún nɛ́, mut a yáŋá ɓɛ́nɛ bíɓáa, ah sɔ́ɔ́g ɓé wa li laga nɛ́: Tɛ́lɛ́, ɔ tí nyɛ́ étɔ. La náŋ ɔg kɛ li tɛ́lɛ la ɔsɔ́n vísɛ á li kɛ lí lí tɔɔ á étɔ yé mbúh.

¹⁰ Á mveŋghanɛ́, kíyáɓɛ́nɛ ɓá yáŋá wá voóm, kɛɛ́n, tɔɔ́ á étɔ yé mbúh á li somo nɛ́, eceg mut a yáŋa wa a sɔ́, a lágá wa nɛ́: Á ŋgwam, ɓét mú ɔ tɔ́ɔ̄ ɔ́sū. Náŋ ag kɛ wa li ɓɛ́ lí lípēm á miíh mí ɓot bísɛ bí ŋga ɓɛ́ á téɓeli elɔŋ la wa.

¹¹ Jɔ́ nɛ́ tɔ nzáá a ŋga ɓétɛ nyɛ́-mɛ̄n, bíg kɛ nyɛ́ li súhɛ; ndí tɔ nzáá a ŋga súhɛ nyɛ́-mɛ̄n, bíg kɛ nyɛ́ li ɓétɛ.»

Ɔŋgaáŋgan ví ɓot ɓá yáŋlɛ́ á líndēmá

¹² Ámbúh váŋ, Yésus a byɛ́la mut a yáŋá nyɛ nɛ́: «Eceg ɔ ŋgɔ tíi lidí lí kɔsi tɔ jé lí ŋgōgó, ɔh yáŋlág ɓé míwāndá mɔ́ɔ, tɔ elōgnyɔ̄ŋ, tɔ ɓot ɓɔ́ɔ bí m̀biya, tɔ mimbyaŋ mí ɓot mí lɛ́ wa á ŋgwáāg atán, ányúū nɛ ɓɔ́g bíg kɛ wa lí yáŋa, bí tímanɛ wa yé wa tí ɓɔ.

¹³ Ndí á mveŋghanɛ́, kí ɔg yáŋa ɓot á líndēmá, yáŋa já ɓáyɛ̄ɛ̄yɛ́ɛ, ɓot ɓá lɛ́mɛ, biɓóg-bí-ɓōt, la ɓá bí ndím.

¹⁴ Ɔg kɛ li ɓɛ́la lí mísɔ̄tá ányúū nɛ bí ŋga kɛ ɓé wa li tímanɛ lí tɔ jam. Ɔlolómɛ̄ nɛ a ŋga kɛ wa li sála eceg a ŋga kɛ́ li pahyɛ li ɓot bísɛ bí tɛ́ɛ́ sim.»

¹⁵ Ɛnɛ́ mut wa á elɔŋ ɛ́ ɓot bí ɓɛ́ á téɓeli la Yésus a ámblé bíŋ biɓaŋgá, ɔ lága Yésus nɛ́: «Misɔ́tá la nyɔ́ a ŋga yáŋlɛ á líndēmá á Ékombo Ɔ́lolómɛ̄!»

¹⁶ Váŋ nɛ́ Yésus a máŋlɛ́ nyɛ nɛ́: «Mut wa nyɔ́ŋ a ɓoŋháán líndēmá, la nyɛ́ ɔ yáŋá ɓot ŋgandag.

¹⁷ Ɛnɛ́ eceg lí dí yá kɔlan, ɔ óm m̀ɓɔŋle wɛɛ́ li laga lí ɓáyāŋlɛ nɛ́: Sɔ́ɔ́gkágán, eceg li dí yá kɔlan.

¹⁸ Ndí ɓɔ́ bísɛ wa ámbúh nyɔ́ŋɔ́ bú ɓōtlé lí ɓat lí élaakɛ la li tíi lí njɔm yáɓá. Nyɔ́ ɔsú a byɛ́la m̀ɓɔŋle nɛ́: Mag sɔ́le li sóm lí ǹdíí, ɛ́g ɓat nɛ́ mi kɛ́ mi légɓé wɔ́; sóon, laakɛ́ ma.

¹⁹ Nyɔ́ŋɔ́ ntám a byɛ́la nyɛ́ nɛ́: Mag sɔ́le li sóm lí jóom lí nyága ányúū ǹdíí wama, yí ɛ́ ŋga sál ɛ́ɓáa ɛ́ɓáa, mag kɛ yɔ́ lí ceglɛ; sóon, laakɛ́ ma.

²⁰ Nyɔ́ŋɔ́ ntám sīg-pɛ a byɛ́ nɛ́: Mag sɔ́le li lɔ́mɓan, ányúū náŋ nɛ́ mi ŋgá la ɓé ma li sɔ́.

²¹ M̀ɓɔŋle ɔ tímān la yíŋ mbele yɔ́ ɛ́sɛ á yóg ɛsáŋɛ́-a-mitán wɛ́ɛ̄. Váŋ nɛ́ ɛsáŋɛ́-a-mitán a ála la nyɛ́ ɔ lága m̀ɓɔŋle wɛɛ́ nɛ: Kwááɓɛ́ɛ, kɛɛ́n á ɓávoóm ɔ ŋgɔ kɔ́p limut la á mílɔ̄ŋ mí tísɔn, ɔ sɔ́la ma vá: ɓayɛ́ɛ́yɛ́ɛ, ɓot ɓá lɛ́mɛ, ɓá bí ndím la biɓóg-bí-ɓōt.

²² Ámbúh eceg, m̀ɓɔŋle ɔ tímān nyɛ li laga nɛ́: Etāa, yá ɓɔŋɓɛ ákaa wa yó, ndí bitɔ bí ŋgí lɛ á ndáá.

²³ Ɛsáŋɛ́ a atán ɔ lága m̀ɓɔŋle wɛɛ́ nɛ́: Kɛɛ́n á nzen yí mítān la á míndīī, ɔ kágyɛ́ ɓot nɛ́ bí sɔ́ bí níŋgí, á li ɓɔŋ nɛ́ ndáá yama ɛ yál.

²⁴ La mbálɛ, mag laga ɓɛ́nɛ nɛ́ mut tɔ wa á ɓá bí yáŋlɛ́ɛ a ŋgá kɛ ɓé li cege lí lidí jama.»

Li yíg lí mam mísɛ ányúū li oŋ lí Yésus

²⁵ Ɔbul ví limut ví ŋgí wɛɛ la Yésus á nzen. La nyɛ́ ɔ yáan, a byɛ́la ɓɔ́ nɛ́:

²⁶ «Nyɔ́ la nyɔ́ a ŋga ōŋ ma, a nyɛ́ɛ li cóó lí ɛsáŋɛ́, nyaŋɛ́, ŋ̀gáá wɛ́ɛ́, ɓɔɔ́n ɓɛ́ɛ́, elōgnyāŋ yé páam la yé ɓondígá, ndí la eniŋ yɛ́ɛ́ nyɛ́-mɛ̄n ki. Ah la náŋ ɓé, a sē ɓé nɛ a la li ɓɛ́ lí ŋ̀yége wama.

²⁷ Nyɔ́ la nyɔ́ a ŋgá ɓɛgɛ ɓé mbásá yɛ́ɛ̄ la li oŋ lí ma, a sē ɓé nɛ a la li ɓɛ́ lí ŋ̀yége wama.

²⁸ Ákaa ɔvega, Wɔɔ́wɔ́ɔ mut á póla yaná, kíyáɓɛ́nɛ ag somo li óŋ lí nlɛ́ɛ́ á líkɔgɔ, a ŋgá tɔɔ ɓé yágá, a dúútɛ́ misɔŋgí mí yé a ŋga kɛ́ li pámɛ, la li yí, kíyáɓɛ́nɛ a byɛ́ɛ́ yé ɛ kɔɔ́ ɛ́ ŋga pám la nsɔ́n wɛ́ɛ́ á lísūg é?

²⁹ Ah náŋ ɓé, kíyáɓɛ́nɛ a ɓōtlé jaa, ndí ah la ɓé li manɛ, ɓá bísɛ bí ŋga ɛ́n náŋ bíg ɓotle nyɛ́ li ɔl

³⁰ la li laga nɛ́: Léɓyán sig ma nyɔ́ mut, a ɓōtlé míōŋ ndí áh la ɓé pɛ mɔ li manɛ!

³¹ Tɔ nɛ́, yɔɔ́yɔ́ɔ káísa, eceg a ŋga kɛ̄ li duhɛ lí nyíŋí káísa etám wélan, a ŋgá dúgu ɓé yágá li tɔɔ, a légɓé kí nɛ́ la jóom lí ákōō jɛ́ɛ́ lí ɓot, ag lɛ̄ nɛ́ a lá lí duhɛ lí nyíŋí ɛ ŋga wɛ́ɛla muúmɓáa mí ákōō mí ɓot é?

³² Kí ya ɛ́n nɛ ɛ ŋgá la ɓé, ɛg óm mut á li ɓoman la nyíŋí káísa, kí ɛ́ ŋgí lɛ̄ énɛŋɛ́ á li ɓat lí yɔ nɛ́ bí kóm nsaŋ.

³³ Ányúū náŋ, tɔ nzáá átē wāná a ŋgá cóó ɓé yéé ɛ́sɛ a byɛ́ɛ́, a ŋga la ɓé li ɓɛ́ lí ŋ̀yége wama.»

Li naŋɛ lí ésɔh

³⁴ «Ɔɔ, ŋku á lɛ́ jam lí m̀ɓɛɛŋ. Ndí kíyáɓɛ́nɛ wɔ́-mɛ̄n wá jáŋɛ́ ésɔh yɛ́ɛ́, la yéé bí ŋga la yɔ́ wɔ́ li tímanɛ é?

³⁵ Á ŋgá ɓɛ́ ɓé pɛ la eɓáha tɔ yá ányúū sí, tɔ ányúū ntɔ́ɔ́ á líkund; bíg léé já wɔ́ á ápūū. Nyɔ́ la nyɔ́ a byɛ́ɛ́ míɔ̄ɔ̄ á li ámble, a ámblé.»