Elōg-Lóma 8 - Esaa-líat ɛ́ péná

M̀búl Mpúán ag tɛ́ɛ́yɛ ɓɛ́hɛ kundɛ

¹ Á élōgyāŋ, nyí vɔ́ŋɔ́ɔ hɔ́, ɓá ɓá āt la Yésus Kilístus bí ŋgá kuh ɓé pɛ ekɔ́ghɛ tɔ yá,

² átɔm nɛ́, mbéndá nyí M̀búl Mpúán nyɔ́ a ŋga tíi eniŋ á ŋ̀atanɛ́ la Yésus Kilístus ya kɔ́pɔ̄ mā á mbéndá nyí aɓé la nyí nyɛmb.

³ Ɔlolómɛ̄ a ɓɔ̄ŋ yé mbéndá yāh la ɓé li ɓɔŋ, ányúū nɛ, nyíŋ mbéndá ɛh ɓɛ́ɛ́la ɓé ŋguu nyí li kanʼyɛ lí mut-a-binam átē a aɓɔt wɛ́ɛ́. Ányúū li kɔ́ghɛ lí áɓē nɛ āh ɓɛ́ɛ́la ɓé pɛ ŋguu tɔ ya á nyúū nyí mut-a-binam, Ɔlolómɛ̄ a óm Mɔ́ɔ̄n wɛ́ɛ̄ á épunan yáhá la nyuú nyí miɓé, nɛ́ a ɓógtɛ́ ɓɛ́hɛ á áɓē.

⁴ A ɓɔ̄ŋ naŋ nɛ́ ndí, ɓɛ́hɛ ɓot bi ŋgá wɛɛhɛnɛ ɓé pɛ á líkanʼyɛ lí míson, ndí á sí likanʼyɛ lí M̀búl Mpúán, bi lá li niŋ kaa mbéndá ɛ ŋga lága.

⁵ Ɛ́ lɛ́ mbálɛ nɛ́, ɓá bí ŋga nīŋ á sí likanʼyɛ lí míson, bíg oŋ jā byóōm bí kóó míson. Ndí ɓá bí ŋga nīŋ á sí likanʼyɛ lí M̀búl Mpúán bí oŋ ja kóó yí M̀búl Mpúán.

⁶ Li oŋle lí kóó-míson líg óm á nyɛmb, ndí li ɓɔŋ lí yé M̀búl Mpúán a ŋga sómo líg tíi eniŋ la nsaŋ.

⁷ Ɔɔ, li oŋle lí kóó-míson lí lɛ́ jā lí ndɔ́gɓéne lí Ɔ́lolómɛ̄, ányúū nɛ mison mí ŋgá ógle ɓé mbéndá Ɔlolómɛ̄, mí ŋgá la ɓé tɔ yɔ li ógle.

⁸ Eceg mut a lɛ á sí likanʼyɛ lí kóó-míson, a ŋgá la ɓé nyɛɛle lí Ɔ́lolómɛ̄.

⁹ Ndí ɓɛ́nɛ, miní sē ɓé á sí likanʼyɛ lí míson, miní lɛ́ á sí likanʼyɛ lí M̀búl Mpúán, kasig M̀búl á Ɔ́lolómɛ̄ á lɛ́ átē wāná. Nyɔ́ la nyɔ́ ah byɛ́ɛ́ ɓé M̀búl á Nyɔ́-a-Pɔ́hlɛ, a sē ɓé mut a Nyɔ́-a-Pɔ́hlɛ.

¹⁰ Ndí, kíyáɓɛ́nɛ Nyɔ́-a-Pɔ́hlɛ a lɛ átē wāná, la mbálɛ, tɔ náŋ ákaa nyuú yāná ya nyɛ́ɛ lí wú ányúū njɔm nyí miɓé, M̀búl nyɛ́ ag tíi ɓɛ́nɛ eniŋ ányúū nɛ, Ɔlolómɛ̄ a yáanɛ́ ɓɛ́nɛ ɓá bí tɛ́ɛ́ sim.

¹¹ Kíyáɓɛ́ ki nɛ́ M̀búl nyú á nyɔ́ a pāhyɛ́ Yésus á póla ɓá ɓá wū á tɔ́ɔ átē wāná, ɛnɛ nyɔ́ a pāhyɛ́ Yésus Kilístus á póla ɓá ɓá wū, li kele la M̀búl wɛ́ɛ́ nyú á lɛ́ átē wāná, ag kɛ ki li niŋɛ lí nyúū yáná yí ŋga wú.

¹² Jɔ́ hɔ́ nɛ, á élōgyāŋ, bi byɛ́ɛ́ epíl, ndí ah yé míson ɓé mí mí ŋga nyághánɛ ɓɛ́hɛ li nīŋ ákaa mí ŋga sómo.

¹³ Átɔm nɛ́, kíyáɓɛ́nɛ miníg niŋ li oŋle la míson, miníg kɛ li wú. Ndí, kíyáɓɛ́nɛ la M̀búl Mpúán, miníg ól míɓɔŋɔg mí míson máná, miníg kɛ li niŋ.

¹⁴ Ákaa ɛ́sɛ, ɓá bísɛ M̀búl á Ɔ́lolómɛ̄ á ŋga wɛ́ɛla bí lɛ́ ɓɔ́ɔ̄n bí Ɔ́lolómɛ̄.

¹⁵ Ányúū nɛ, M̀búl Ɔlolómɛ̄ a tí ɓɛ́nɛ á sē ɓé nyú á ŋga yáanɛ ɓɛ́nɛ miyɔ́ŋ la li kɔnhanɛ lí ɓɛ́nɛ woŋ sīg-pɛ, ndí, maná kūh M̀búl nyú wá yaanɛ́ ɓɛ́nɛ ɓɔɔ́n bí Ɔ́lolómɛ̄. Wɔ́ nɛ́ a ŋga yígle ɓɛ́hɛ li lónle lí nyɛ̄ nɛ́: «Ába, Etāa!»

¹⁶ Nyɔ́ŋ M̀búl nyɛ́-mɛ̄n nɛ́ á ŋga yíhɛ kɔɔ ɓɛ́hɛ nɛ́ bi lɛ̄ ɓɔ́ɔ̄n bí Ɔ́lolómɛ̄.

¹⁷ Kaa bi lɛ hɔ́ ɓɔ́ɔ̄n bí Ɔ́lolómɛ̄, bi lɛ ɓákoto-embámbá, ɓakoto-embámbá yé Ɔ́lolómɛ̄, ɓakoto-embámbá elɔŋ la Nyɔ́-a-Pɔ́hlɛ. Kasig ɓaá nyɔ̄ŋ ŋgaan á bísɔghe byɛ́ɛ́, biíg kɛ ki li nyɔŋ lí ŋgaan á lípēm jɛ́ɛ́.

Lipém lí ŋga kɛ́ li sɔ́

¹⁸ Ákaa ɛ́sɛ, mag ɔ́ŋɔ nɛ́, bí sē ɓé nɛ ɓá kēt bisɔghe bí lɛn la lipém jé Ɔ́lolómɛ̄ a ŋga kɛ́ ɓɛ́hɛ li étɛ ámbúh eceg.

¹⁹ Átɔm nɛ́, biveglé bísɛ bí lɛ́ lí laaŋke átē a evéhé nɛ́ Ɔlolómɛ̄ a yíhɛ́ ɓanzáá bí lɛ́ ɓɔ́ɔ̄n ɓɛ́ɛ́.

²⁰ Ányúū nɛ, bíŋ biveglé bísɛ bí lɛ́ á sí líkanʼyɛ lí ŋgíla eɓáha, ah ányúū ɓé nɛ byɔ́-mɛ̄n byá diŋ náŋ, ndí ányúū nɛ Ɔlolómɛ̄ nyɛ́-mɛ̄n nɛ́ a vá byɔ á sí jéŋ likanʼyɛ. Byɔ́ bísɛ bí ŋgí byɛ́ɛ́ lipitá.

²¹ Átɔm nɛ́ biveglé bísɛ bíg kɛ li kɔplɛ á eɓɛ́lé yé miyɔ́ŋ, bíh lɔɓe ɓé ki tɔ pɛ. Váŋ, bíg nyɔŋ lí ŋgaan á kúndɛ nyí ɓɔɔ́n bí Ɔ́lolómɛ̄ bí byɛ́ɛ̄ la á lípēm jáɓá.

²² Ákaa ɛ́sɛ, biíg yí nɛ́, tɛɛla nyí vɔ́ŋɔ́ɔ, biveglé bísɛ bí ŋgí lónóg ákaa mindígá nɛ ŋkogɛ a byɛɛ́.

²³ Ndí, bí sē ɓé byɔ́-ntámɛ́. Ɓɛ́hɛ ki ɓá, ɓaá kuh M̀búl Mpúán kaa joga lí ɔ́sū á míkaale mí Ɔ́lolómɛ̄, ɓɛ́hɛ ki bi ŋgí ɓéeg la esɔghe átē wāhá, á nlaaŋkán nɛ Ɔlolómɛ̄ ag yaanɛ ɓɛ́hɛ ɓɔɔ́n ɓɛ́ɛ́, la nyɛ́ a pámɛ́ ɓɛ́hɛ nɛ́ ɓam ɓam á m̀ɓog á nyí nyuú.

²⁴ Ákaa ɛ́sɛ, ɓaá man lí suŋɓɛ, bi byɛ́ɛ́ jéŋ lipitá. Ndí, kí mut a mán lí ɛ́n lí jam a ŋga nāŋʼyene lípitá ɛnɛ lipitá ɓé pɛ jéŋ. Nɛ́-láá hɔ́ mut a ŋga nāŋʼyene lípitá á jam a mān li ɛ́n é?

²⁵ Ndí, li naŋʼye lí lípitá á jam ɔ ŋgɔ ɛ́n ɓé, lí lɛ́ li laaŋke lí jéŋ jam átē a eɔ́hánɛ.

²⁶ Náŋ ki nɛ́, ányúū aɓɔt wáhá, M̀búl Mpúán a sɔ́ ɓɛ́hɛ li óŋgánɛ, átɔm nɛ́ bi ŋgá yí ɓé ɓɛ́hɛ li kánɛ ákaa ɛ́ ŋga sōmlɛ. Ndí, M̀búl Mpúán ag kánɛ ányúū yāhá. Eceg a ŋga kánɛ, ag ɓé kaa mut nɛ́ a ŋga ɓé la esɔghe. Ɔvega vɛ́ɛ́ ví lí ɓé víg loo mam mísɛ bi ŋga lá li laga lí Ɔ́lolómɛ̄.

²⁷ Ɔlolómɛ̄ ki nyɔ́ a ŋga ɛ́n mímīm ag yí yé M̀búl a ŋga ɓāt, ányúū nɛ li oŋle la nsom á Ɔ́lolómɛ̄ nɛ M̀búl a ŋga kánɛ ányúū ndog-Ɔlolómɛ̄.

²⁸ Á yéŋé épah, biíg yí ki nɛ́, Ɔlolómɛ̄ ag yaanɛ mam mísɛ m̀ɓɛɛŋ ányúū ɓá bí ŋga díŋɛ nyɛ́, ɓá a yáŋa li oŋle la peg yɛɛ́ a vúl.

²⁹ Ɓá a man lí pɔhɔ, a mān lí súgɛ nɛ́ bíg yáan puh la puh á épunan yé Mɔ́ɔ̄n wɛ́ɛ̄, nɛ́ ndí nyɔ́ŋ Mɔɔ́n wɛ́ɛ̄ a ɓɛ́ nyɔ́ ɔsú á lí byáa átē a linyaŋ licɛ́ŋ lí ɓot.

³⁰ Ɓá a mān lí pɔhɔ, a yáŋá ki ɓɔ́, ɓá a yáŋa, a yáanɛ́ ki ɓɔ́ ɓot bí tɛ́ɛ́ sim, ɓá ki yáanɛ́ ɓot bí tɛ́ɛ́ sim, ɓɔ́g a tí ɓɔ lipém.

Bi lɔ́ŋghɛ́nɛ ediŋ Ɔ́lolómɛ̄

³¹ Mi lágá pɛ yéé é? Kasig Ɔ́lolómɛ̄ a lɛ̄ ɓɛ́hɛ á mbúh, nzáá a lɛ́ nɛ a dí ɓɛ́hɛ cíŋ é?

³² Ákaa Ɔ́lolómɛ̄ ah ɓag ɓé Mɔɔ́n wɛ́ɛ̄ nyɛ́-mɛ̄n ésɔghe, ndí ɔ sɛ̄m nyɛ ányúū yāhá ɓɛ́hɛ bísɛ, nɛ́-láá a ŋgá la ɓé ɓɛ́hɛ li kaale lí byóōm bísɛ yɛmɛ́ li kele la Mɔɔ́n wɛ́ɛ̄ é?

³³ Nzáá a ŋga kɛ́ li la lí li sɔ́mánɛ lí ɓá Ɔlolómɛ̄ a pɔ́hɔ é? Tɔ mut, átɔm nɛ́ Ɔlolómɛ̄ nɛ a yáanɛ́ ɓɔ ɓá bí tɛ́ɛ́ sim!

³⁴ Nzáá a ŋga kɛ́ ɓɔ́ lí kɔ́ghɛ é? Tɔ mut, átɔm nɛ́ Yésus Kilístus a wú, li loo náŋ, a pāhye, a lɛ á m̀ɓɛ́nlómɛ a Ɔlolómɛ̄, nyɛ́ ki nɛ́ a ŋga kále ɓɛ́hɛ!

³⁵ Yéé ɛ́ ŋga lā ɓɛ́hɛ li ɓága la ediŋ yé Nyɔ́-a-Pɔ́hlɛ é? Ɓaá, ndutu, etɔ-líkōt, miduhlān, nzal, liyɛ́ɛ́, byoóm bí kɔpɔ́ tɔ nɛ́ nyɛmb é?

³⁶ Ákaa Licii-Lipúán lí ŋga lága nɛ: «Ányúū yɔ́ɔ nɛ́ nyɛmb ɛ ŋga lɛ́ŋle ɓɛ́hɛ ɔlɔ́ la ɔlɔ́ sig, ɓaá nyɔŋɓɛ́ ákaa tít nɛ ɓá nyɛɛ́ lí sɛ́m lí cíŋ.»

³⁷ Ndí, bíŋ bísɛ, biíg dí byɔ cíŋ nɛ́ ɓam, li kele la ŋguu nyí nyɔ́ a díŋɛ́ ɓɛ́hɛ.

³⁸ Ɔɔ, mi lɛ̄ mbáki nɛ́, ɛ́ ɓɛ́ nyɛmb tɔ bisɔghe ányúū li kuh lí éniŋ éɓem, ɛ́ ɓɛ́ áŋgɛl tɔ migɔ́mna, ɛ́ ɓɛ́ alɔ́ á lɛn tɔ nyú á ŋga kɛ́ li sɔ́, ɛ́ ɓɛ́ patí ŋguu ɛ́sɛ ɛ́ lɛ́ á ŋkɔŋ-á-sí,

³⁹ ɛ́ ɓɛ́ ŋguu ɛ́sɛ ɛ́ lɛ́ á lōó tɔ yí ɛ́ lɛ́ á sí ntím, ndí tɔ eveglé étām tɔ yá, jam tɔ já lí ŋgá lá ɓé ɓɛ́hɛ li ɓága la ediŋ yé Ɔ́lolómɛ̄ a éthɛ́nɛ́ á Ɛtáŋɛ wahá Yésus Kilístus.