Elōg-Lóma 7 - Esaa-líat ɛ́ péná

Elōg-Kílístus ɛ́g tɛ́lɛ kundɛ nyí mbéndá

¹ Á élōgyāŋ, mag kwɛlɛ ja ɓot bí ŋga yí kɔɔ mbéndá Móse. Ɓaá, miníg jáŋ nɛ́, kí mut a ŋgí lɛ á éniŋ, a lɛ á sí mbéndá é?

² La náŋ, eceg mindígá a lɔ́mɓɛ, mbéndá ɛ lɛ nyí ɛ ŋga āt nyɛ́ la nlóm wɛ́ɛ̄ eceg nyɔ́ŋ a lɛ á éniŋ. Ndí kíyáɓɛ́nɛ nlóm wɛ́ɛ̄ a wú, ag tɛ́lɛ kundɛ á nyíŋ mbéndá.

³ Náŋ ag mínɛ nɛ́, kíyáɓɛ́nɛ, eceg nlóm a ɓɛ́ɛ́ á éniŋ, ndí ag niŋ la páam etám, ag yáŋlɛ nɛ́ mindígá-a-ndeŋg. Ndí kíyáɓɛ́nɛ nlóm a wú, a lɛ̄ kúndɛ likɔlɓan la mbéndá, nyaa nyí ɛ lɛ nɛ́, tɔ a lɔ́mɓɛ́ la páam etám, a ŋgá yáŋlɛ ɓé nɛ mindígá-a-ndeŋg.

⁴ Á élōgyāŋ, nlemlem la ɓɛ́nɛ ki, kasig maná āt la Yésus Kilístus nyɔ́ a wú ányúū yáná, maná mān lí ɓáglan la mbéndá á lí ɓɛ́ lí ɓot bí mut ntám. Nyɛ́ nɛ́ a pāhye á póla ɓá ɓá wū, á li ɓɔŋ nɛ́ bi wúm mitám ányúū Ɔlolómɛ̄.

⁵ Á mbálɛ, eceg bi ŋgí niŋ ákaa ɓot bí binam, kóó-míson yáhá ɛ́ ŋgí loole la mbéndá á lí ɓɔŋhanɛ lí bíjo byáhá bí nyúū nsom wáɓá. Yé ɓaá pumú muŋ á míŋ misɔ́n ɛ́ lɛ́ ja nyɛmb.

⁶ Ndí nyí vɔ́ŋɔ́ɔ, ɓaá ɓáglán la yé ɛ́ ŋgí tígɛ ɓɛ́hɛ á m̀ɓog, ɓaá tɛ́lɛ́ kúndɛ ɔ́sū ví mbéndá, nyaa nyí ɛ ŋga yígle nɛ́, biíg la lí ɓɔŋle lí Ɔlolómɛ̄ á mbadi péná, á sí likanʼyɛ lí M̀búl Mpúán, ndí ah á sí likanʼyɛ lí kálati-mbéndá nyí ya lóo éceg ɓé.

Nsɛ́ŋ á mbéndá

⁷ Mi lágá pɛ yéé é? Ɓaá, mbéndá la aɓé bí lɛ́ jam já é? Á mbálɛ, kɛ́m! Ndí mbéndá nɛ ya yíhɛ́ mā yé ɛ́ lɛ áɓē. Ányúū nɛ́, mi ŋgí la ɓé ma lí yí lí yé ɛ́ lɛ́ étāman ki ɓɔ̄ŋ nɛ́ mbéndá ɛ̄h laglag ɓé nɛ: «Ɔh támág ɓé jam lí mut.»

⁸ Ndí, aɓé wú loolé la yé mbéndá ya lága á lí níŋgɛ lí mā patí étāman ɛ́sɛ á m̀mím. Átɔm nɛ́, kí ɓɔŋ nɛ́ mbéndá ɛh ɓɛ́ɛg ɓé, ki áɓē áh byɛ́ɛ́ ɓé ŋguu tɔ ya.

⁹ Á kwakwáŋɛ, eceg mbéndá ɛ́h ɓɛ́ ɓé, mi ŋgí niŋ. Ndí ɛnɛ́ mbéndá ya sɔ́la ekanʼyɛ, aɓé wú nīŋ,

¹⁰ la ma mu wú, átɔm nɛ́, mbéndá nyí ɛ ŋga nyɛ́ɛ li niŋɛ lí ɓot, ya kɛ́la ja mā á nyɛmb.

¹¹ Kɔɔ, aɓé wá lóolé la yé mbéndá ya lága á lí yɛ́ɛ lí ma, la wɔ́ wú óm mā á nyɛ̄mb li kele la mbéndá.

¹² La náŋ hɔ́, mbéndá ɛ lɛ púán, yé ki ɛ ŋga lága yɔ́g ɛ́ lɛ́ púán, ɛ́ tɛ́ɛ, yú ɓɛ́ ki m̀ɓɛɛŋ.

Mut á binam a lɛ á sí ŋgatka nyí aɓé

¹³ Á élōgyāŋ, mag ɓat nɛ́, jam lí m̀ɓɛɛŋ nɛ́ lá timán lí ɓɛ́ lí njɔm nyí nyɛmb ányúū yama é? Á mbálɛ kɛ́m! Ndí aɓé nɛ́ á lɛ́ njɔm nyí nyɛmb yáma. Wá étɛ́ kɔɔ eɓɛ́lé yɛ́ɛ́ nɛ á lɛ́ áɓē nlee la eceg wá ɓɔŋlé yé ɛ́ lɛ́ m̀ɓɛɛŋ á lí óm lí mā á nyɛ̄mb. Ekanʼyɛ yé mbéndá nɛ yá ɓɔ̄ŋ nɛ́ aɓé á étɛ́ tɛɛla á vɔɔ́vɔ́ɔ ɔvega á lɛ́ kɔɔ jam liɓé, á yɛ́lɛ́ ki eɓɛ́lé yɛ́ɛ́ yé kɔ́mɔn ɛ́sɛ.

¹⁴ Ákaa ɛsɛ̄, biíg yí nɛ́ mbéndá ɛg sɔ́le la Ɔ́lolómɛ̄. Ndí ma, mi lɛ̄ jā mut-a-binam, ma nūŋlɛ, mu yáan ŋyɔ́ŋ nyú áɓē.

¹⁵ Á mbálɛ, mi ŋgá sɔ́ŋtánɛ ɓé ma yé mi ŋga ɓɔ̄ŋ, átɔm nɛ́ jam mi byɛɛ́ kóó lí ɓɔŋ, mi ŋgá ɓɔŋ ɓé ma jɔ́, ndí jé mi ŋga síŋgɛ, jɔ́ nɛ́ mi ŋga ɓɔ̄ŋ.

¹⁶ Kíyáɓɛ́ hɔ́ nɛ jam mīh byɛ́ɛ́ ɓé ma kóó lí ɓɔŋ, jɔ́ nɛ́ mi ŋga ɓɔ̄ŋ, ɛnɛ mag yéɓé yé mbéndá ɛ ŋga lága, mag lem nɛ́ ɛ lɛ élɔ́ŋgɔ jam.

¹⁷ Jɔ́ nɛ́, ah la mā-mɛ̄n ɓé nɛ́ mi ŋga ɓɔŋ náŋ, ndí aɓé nyú á lɛ́ á átē wama nɛ́ á ŋga ɓɔ̄ŋhanɛ bíŋ byoóm.

¹⁸ Kasig mi ŋga yí nɛ́ átē wama, náŋ ɛnɛ átē a nyúū yáma á líɓɛ́ɛg lí mut-a-binam, m̀ɓɛɛŋ a sē ɓé múŋ. Kóó ɛ lɛ̄ ma nɛ́ mi ɓɔ̄ŋ m̀ɓɛɛŋ, ndí mi ŋgá la ɓé ma,

¹⁹ átɔm nɛ́ m̀ɓɛɛŋ mi byɛɛ́ kóó lí ɓɔŋ, ah wɔ́ ɓé nɛ mi ŋga ɓɔ̄ŋ, aɓé ki miíh byɛ́ɛ̄ ɓé ma kóó lí ɓɔŋ, wɔ́ ja nɛ́ má mi ŋga ɓɔ̄ŋ.

²⁰ Kíyáɓɛ́ ki nɛ́ jam mīh byɛ́ɛ́ ɓé ma kóó li ɓɔŋ, jɔ́ nɛ́ mi ŋga ɓɔ̄ŋ, ɛnɛ ah la mā-mɛn ɓé nɛ mi ŋga ɓɔŋ náŋ, ndí aɓé nyú wá nyɔŋán ma nɛ́ á ŋga ɓɔ̄ŋhanɛ bíŋ byoóm.

²¹ La náŋ, ma sɔ̄m nɛ, náŋ a lɛ ma kaa mbéndá nɛ, kí mi byɛɛ́ kóó li ɓɔŋ lí m̀ɓɛɛŋ, aɓé nɛ á ŋga tɛ́lɛ ma á ɔ́sū,

²² kí múŋ átē wama, mbéndá Ɔlolómɛ̄ ɛg nyɛɛle ma.

²³ Ndí mag ɛ́n nɛ́, átē wama, mbéndá étām nɛ ɛ ŋga dúhɛ mbéndá pɔ́ŋ yáma. Nyí ɛ ŋga lága nɛ́ yɔ nɛ́ ɛ lɛ. Nyíŋ mbéndá ya yáanɛ́ mā mut a m̀ɓog, á sí likanʼyɛ lí áɓē nyú á lɛ́ átē a bijo byáma bí nyúū.

²⁴ Mā nyí ŋgɔ́ɔ́-mut, nzáá a ŋga kɛ́ ma lí pámɛ á m̀ɓog á nyí nyuú ɛ ŋga óm mā á nyɛmb é?

²⁵ Eɓégɛ ɛ́ ɓɛ́ la Ɔlolómɛ̄ nyɔ́ a ŋga kɛ́ li ɓɔŋ náŋ li loole la Yésus Kilístus Ɛtáŋɛ wahá. Mā-ntámɛ́ hɔ́ nyɔŋ. Mú, eyí yáma ɛ́g óm ma lí ógle lí mbéndá Ɔlolómɛ̄, wóŋóó ki nyuú yáma ɛg óm ma lí ógle lí mbéndá nyí aɓé.