Elōg-Lóma 6 - Esaa-líat ɛ́ péná

Nzoɓan ɛg at ɓɛ́hɛ la Yésus Kilístus

¹ Á élōgyāŋ, mi lágá pɛ yéé é? Ɓaá, bi kóndyé jā lí niŋle á áɓē á lí ɓɔŋ nɛ́ mikaale mí Ɔ́lolómɛ̄ mí bul é?

² Á mbálɛ kɛ́m! Kasig ɓaá wú á áɓē, nɛ́-láá hɔ́ bi ŋgí niŋlégé pɛ á áɓē é?

³ Ɓaá, miníg yég nɛ́ kaa ɓɛ́hɛ bísɛ ɓá ɓaá āt la Yésus Kilístus li kele la nzoɓan ɓaá kuh, náŋ ki nɛ́ ɓaá āt la nyɛmb yɛɛ́ é?

⁴ Li kele la nzoɓan nyí ɓaá kūh, ɓaá wú élɔŋ la nyɛ́, bu jéɓɛ̄ ki élɔŋ la nyɛ́, á li ɓɔŋ nɛ́, kaa ŋguu nyí lipém lí Étāa Ɔlolómɛ̄ ya pāhyɛ́ Yésus Kilístus á póla ɓá ɓá wū, ɓɛ́hɛ ki bi kúh eniŋ ɛ́ péná.

⁵ La mbálɛ, kasig ɓaá āt kɔɔ la nyɛ́, bú wú nyɛmb ɛ ŋga púnan la ɛyɛɛ́, náŋ ki nɛ́ bi ŋga kɛ́ li kuh lí lipahye jé lí ŋga púnan la ɛjɛ́ɛ́.

⁶ Bi sɔ́ŋtánɛ m̀ɓɛɛŋ nɛ́, nlom á mut bi ɓɛ́ɛ́, wá tomlɛ́ á mbásá élɔŋ la nyɛ́, nɛ́ ndí nyíŋ nyuú yāhá miɓé ɛh ɓɛ́ɛ́g ɓé pɛ, la ki nɛ́ bih ɓɛ́ɛ́g ɓé pɛ miyɔ́ŋ mí áɓē.

⁷ Ányúū nɛ, nyɔ́ la nyɔ́ a ŋga wú a ɓógó á ŋgatka nyí aɓé.

⁸ Ndí kasig ɓaá wú élɔŋ la Kilístus, bi lɛ́ mbáki nɛ́ biíg kɛ ki li niŋ elɔŋ la nyɛ́.

⁹ Biíg yí kɔɔ nɛ́, kaa Kilístus a pāhyé á póla ɓá ɓá wū, a ŋgá wú ɓé pɛ, nyɛmb ɛ ŋgá la ɓé pɛ nyɛ́ lí ɓɔŋ lí tɔ̄ jam.

¹⁰ A wú ányúū li manɛ lí áɓē ŋgele ya ányúū yɔ́ ɛ́sɛ. Ndí nyí vɔ́ŋɔ́ɔ a lɛ á éniŋ, ag niŋ ányúū Ɔlolómɛ̄.

¹¹ Nlemlem ki la ɓɛ́nɛ, nyɔŋáŋ ɓɛ́nɛ-mɛ̄n kaa ɓot ɓá wú á yé ɛ́ ŋga légɓe li ɓɔŋ lí áɓē, la kaa ɓot bí ŋga nīŋ ányúū Ɔlolómɛ̄ á ŋ̀atanɛ́ la Yésus Kilístus.

¹² Ɛ́ ŋgá somlɛ hɔ́ ɓé pɛ nɛ́ aɓé á kanʼyɛ́ nyí nyúū yāná ɛ ŋga wú, jɔ́ nɛ́, miníh óglégé ɓé pɛ kóó yí nyúū.

¹³ Miníh byelénégé ɓé pɛ bijo byáná bí nyúū á lí ɓɔŋ lí áɓē, miníh yaanɛ́gɛ́ ɓé byɔ kaa biɓɔŋlé bí mísɔ̄n míh tɛ́ɛ́ ɓé. Ndí, kaa ɓot ɓá ɓógyéné á nyɛmb li timan á éniŋ, la bijo byáná bí nyúū, bí bí lɛ́ biɓɔŋlé bí mísɔ̄n mí tɛ́ɛ́ sim, miní níŋgí á nsɔ́n á Ɔ́lolómɛ̄.

¹⁴ Átɔm nɛ́, aɓé á ŋgá ɓɛ́la ɓé pɛ ŋguu nyí li ɓɔŋ lí ɓɛ́nɛ jam, kasig miní sē ɓé pɛ á sí mbéndá, ndí miní niŋle á sí míkaale mí Ɔ́lolómɛ̄.

Li sál ányúū etɛ́l-sim

¹⁵ Ndí yéé hɔ́ é? Ɓaá, biíg nyɛɛ hɔ́ ja lí ɓɔŋ lí áɓē ányúū nɛ bi sē ɓé pɛ ɓɛ́hɛ á sí likanʼyɛ lí mbéndá, ndí bu ɓɛ́ ja á sí mikaale mí Ɔ́lolómɛ̄ é? Á mbálɛ, kɛ́m! Ɓāh nyɛɛ ɓé ɓɛ́hɛ li ɓɔŋ náŋ!

¹⁶ Miní ŋgá yí ɓé nɛ kí miníg sále mut kaa miyɔ́ŋ, á lí ógle lí nyɛ, ɛnɛ miní lɛ́ míyɔ̄ŋ mí nyɔ́ŋ mut miní ŋga ógle é? Náŋ ag somo li laga nɛ́, miní lɛ́ míyɔ̄ŋ mí áɓē nyú á ŋga óm á nyɛmb, tɔ nɛ́ miní lɛ́ ɓáōgle Ɔlolómɛ̄ nyɔ́ a ŋga tɛ́ɛ́yɛ ɓɛ́nɛ sim.

¹⁷ Bi tí Ɔlolómɛ̄ mítamlan, átɔm nɛ́ miní ɓɛ́ɛ́ míyɔ̄ŋ mí áɓē, ndí nyí vɔ́ŋɔ́ɔ, maná lɛ́glé yé ɓá yéglɛ́ ɓɛ́nɛ, munú óglé ki yɔ́ la m̀mím wáná ásɛ.

¹⁸ Maná kūhlɛ́ á ŋgatka nyí aɓé la ɓɛ́nɛ munú yāán míndimí mí étɛ̄l-sim.

¹⁹ Mag nyɔŋle ŋget á mam mí ŋga lóo á póla ɓot-bí-bínam, á li ɓɔŋ nɛ́ miní sɔ́ŋtánɛ m̀ɓɛɛŋ. Nlemlem kaa miní yaanɛ́ɛ bijo byáná bí nyúū míyɔ̄ŋ mí mísɔ̄n mí nyɛ́gā la mí mí mpuŋgú, misɔ́n mí mí ŋgí óm ɓɛ́nɛ á lí ndɔ́gɓéne lí Ɔ́lolómɛ̄. Nyí vɔ́ŋɔ́ɔ, miní yáanɛ́ byɔ́ míyɔ̄ŋ mí mísɔ̄n mí étɛ̄l-sim yé ɛ́ ŋga yáanɛ ɓɛ́nɛ ɓápūán.

²⁰ Eceg miní ɓɛ́ɛ́ míyɔ̄ŋ mí áɓē, miní ɓɛ́ɛ́ kundɛ li ɓen lí lí ɓɔŋ lí yé ɛ́ tɛ́ɛ́.

²¹ Yé hɔ́ maná tombánɛ́ á míŋ misɔ́n é? Nyí lɛn, míg kɔnhanɛ ɓɛ́nɛ mbɔɔla, átɔm nɛ́ lisúg jáɓá lí lɛ́ jā nyɛmb.

²² Ndí nyí vɔ́ŋɔ́ɔ, maná kūhlɛ́ á ŋgatka nyí áɓē la ɓɛ́nɛ munú yāán míndimí mí Ɔ́lolómɛ̄. Miníg sál mísɔ̄n mí ŋga yáanɛ ɓɛ́nɛ ɓápūán, lisúg jáɓá ki lí lɛ́ éniŋ éɓem.

²³ La mbálɛ, nsála á áɓē á lɛ́ nyɛmb, ndí likaale Ɔlolómɛ̄ a ŋga tíi yɛmɛ́ lí lɛ́ éniŋ éɓem yé ɛ́ lɛ́léné á ŋ̀atanɛ́ la Yésus Kilístus, Ɛtáŋɛ wahá.