Elōg-Lóma 10 - Esaa-líat ɛ́ péná

Nyɔ́ŋ-Ɛsáŋɛ́ a lɛ̄ ja wa ányúū milóm mísɛ

¹ Á élōgyāŋ, jam mi ŋga lée la m̀mím wáma ásɛ la nzag mi ŋga yága Ɔlolómɛ̄ ányúū ɓɔɔ́n bí Íslāɛl ɛ lɛ́ nɛ́ bí kūh lisuŋga.

² Átɔm nɛ́, mi lɛ mbóŋ nɛ bí byɛ́ɛ́ akwáá ányúū nsɔ́n Ɔlolómɛ̄. Ndí nyúŋ akwáá wáɓá á lɛ́ nyú á ŋgíla éyī.

³ Kasig ɓáh sɔ́ŋtánɛ ɓé nɛ́ láá Ɔ́lolómɛ̄ nɛ a ŋga tɛ́ɛ́yɛ ɓot sim ɔ́sū vɛ́ɛ́, ndí bú somó lí ɓɔŋle lí ɛ́yāɓā patí etɛ́l-sim ɓɔ́-mɛ̄n ɓá tɛ́ɛ́yɛ. La náŋ ɓá pún lí oŋle lí nzen nyí étɛ̄l-sim yé Ɔ́lolómɛ̄.

⁴ Ányúū nɛ nsɛ́ŋ á mbéndá Móse á ɓɛ́ɛ́ ja nɛ́ ɓot bí yí Nyɔ́-a-Pɔ́hlɛ nɛ́ ndí, tɔ nzáá a ŋga yéɓe la nyɛ́, Ɔlolómɛ̄ ag tɛ́ɛ́ nyɛ́ sim.

⁵ Móse nyɛ́-mɛ̄n a cíi likɔlɓan la etɛ́l-sim ɛ́ ŋga sɔ́le la mbéndá nɛ: «Mut a ŋga kɛ li ógle lí mbéndá ɛsɛ̄, ɛg kɛ nyɛ́ lí niŋɛ.»

⁶ Ndí, etɛ́l-sim ɛ́ ŋga sɔ́le á ŋyéɓé ɛ́g laga nɛ́: «Ɔh laglág ɓé á m̀mím wɔ́ɔ nɛ́: ‹Nzáá a ŋga kɛ́ li ɓét á lōó é›? Li laga náŋ lí lɛ́ nɛ lá somó lí mínɛ nɛ́: lí ɓét á lí yáŋa lí Nyɔ́-a-Pɔ́hlɛ nɛ́ a sūh é?

⁷ Tɔ nɛ́: ‹Nzáá a ŋga kɛ́ li suh á eɓél-écɛ̄hɛ é›? Li laga náŋ lí lɛ́ nɛ lá somó lí mínɛ nɛ́: li suh á lí pámɛ lí Nyɔ́-a-Pɔ́hlɛ á ŋkɔŋ á ɓá ɓá wū é?»

⁸ Yé eɓaŋgá ɛ́ lɛ́ á Lícii-Lipúán nɛ́: «Eɓaŋgá ɛ́ lɛ́ ɓɛ́ɓɛ la wa, ɛ́ lɛ́ wa á ányu la á m̀mím» ɛ́g mínɛ nɛ́ yéé é? Yéŋ eɓaŋgá ɛ́ lɛ́ éɓaŋgá ɛ́ ŋyéɓé bií ŋga lɛ́gɛ.

⁹ Kíyáɓɛ́nɛ ɔg páha á ányu wɔ́ɔ nɛ́ Yésus a lɛ Nyɔ́ŋ-Ɛsáŋɛ́, ndí á m̀mím wɔ́ɔ ki ɔg yéɓe nɛ́ Ɔlolómɛ̄ a pāhyɛ́ nyɛ á póla ɓá ɓá wū, ɔg kɛ li suŋɓɛ.

¹⁰ Ákaa ɛ́sɛ, tɔ nzáá a ŋga yéɓe á m̀mím wɛ́ɛ́, Ɔlolómɛ̄ ag tɛ́ɛ́ nyɛ́ sim, tɔ nzáá ki a ŋga páha ŋyéɓé wɛ́ɛ́, ag kɛ li suŋɓɛ.

¹¹ Átɔm nɛ́, Licii-Lipúán líg laga nɛ́: «Nyɔ́ la nyɔ́ a ŋga yéɓe la nyɛ́, m̀ɓá, a ŋgá kɛ ɓé lí tám.»

¹² Jɔ nɛ́, ndɔ́tlán tɔ ya ɛ sē ɓé á póla ɓɔɔ́n bí Élōg-Yúda la ɓá bí sē ɓé ɓɔ́ɔ̄n bí Élōg-Yúda. Nyɔ́ŋ-Ɛsáŋɛ́ a lɛ jā wa ányúū yāɓá ɓɔ́ bísɛ, nyɔ́ a ŋga tíi ɓá bísɛ bí ŋga lónle nyɛ́ mam mɛ́ɛ́ mí m̀ɓɛɛŋ bí ŋga ɓāt nyɛ́.

¹³ Jɔ́ nɛ́ Licii-Lipúán lí ŋga lága nɛ́: «Tɔ nzáá a ŋga lónle Nyɔ́ŋ-Ɛsáŋɛ́ ag kɛ li suŋɓɛ.»

¹⁴ Ndí, nɛ́ láá hɔ́ bí ŋga lā nyɛ́ lí lónle kí bíh byɛ́ɛ́ ɓé ŋyéɓé la nyɛ́ é? Nɛ́ láá bí ŋga kɛ́ li yéɓé la nyɛ́ kí bíh ámblégé ɓé Pɔ́l yɛ́ɛ̄ é? Nɛ́ láá bí ŋgá lá li ámblé lí Pɔ́l yɛ́ɛ̄ kí mut tɔ wa āh lɛ̄glág ɓé ɓɔ́ yɔ é?

¹⁵ Nɛ́ láá ɓot bí ŋga lá li lɛgɛ lí Pɔ́l yɛ́ɛ̄ Kíyáɓɛ́nɛ ɓáh ómɓɛ ɓé é? Ányúū náŋ nɛ́ yá ciiɓɛ́ nɛ: «Sē mívag li ɛ́n lí ɓálɛgɛ Pɔ́l M̀ɓɛɛŋ!»

¹⁶ Ndí, ɓot bísɛ ɓáh ógle ɓé Pɔ́l M̀ɓɛɛŋ. Ákaa ɛsɛ̄, Esáya a ɓat nɛ́: «Ɛtáŋɛ, nzáá a yéɓé líkálo jáhá á Pɔ́l yɔ́ɔ bi ŋga lɛ́gɛ é?»

¹⁷ Jɔ́ nɛ́, ŋyéɓé ág sɔ́le ja á lí ámble lí líkálo lí Pɔ́l bí ŋga lɛ́gɛ, jéŋ likálo nɛ́ lí lɛ́ li lɛgɛ lí éɓaŋgá yé Nyɔ́-a-Pɔ́hlɛ.

¹⁸ Mag ɓāt hɔ́ nɛ: ɓaá, Elōg-Yúda yáh ámble ɓé jéŋ likálo é? Ndí ɓá ámblé kɔɔ jɔ́, átɔm nɛ́ Licii-Lipúán líg laga nɛ: «Cíŋ yí ɓálɛgɛ Pɔ́l Ɔlolómɛ̄ yá ámblɛ́ á ŋkɔŋ-á-sí ásɛ, yé bí ŋgí laga yú pám á míkāh mí sí mísɛ.»

¹⁹ Mag ɓat sīg-pɛ nɛ́, ɓot bí lílōm lí Íslāɛl ɓáh sɔ́ŋtánɛ ɓé é? Móse a yíhɛ́ nɛ Ɔlolómɛ̄ a lagléé nɛ́: «Mag kɛ li ɓɔŋ nɛ́ miní ɓɛ́ nzoŋ la lilóm jé lí sē ɓé tāŋ lílōm á miíh máma. Mag kɛ li ɓɔŋ nɛ́ ɔ́ūn ví ɓét ɓɛ́nɛ likɔlɓan la lílōm jé lí byɛ́ɛ̄ ɓot miní ŋga nyɔ̄ŋ kaa ɓot bíh byɛ́ɛ́ ɓé eyí.»

²⁰ Esáya ag ɓáá ki m̀mím li laga á jóō lí Ɔ́lolómɛ̄ nɛ: «Ɓá bí ŋgí somo ɓé ma ɓá yí ma, ɓá bí ŋgí ɓat ɓé ma tɔ jam, ɓɔ́ nɛ́ ma yɛ́ɛ́léné mā-mɛ̄n.»

²¹ Ndí, Ɔ́lolómɛ̄ ag laga ki likɔlɓan la lilóm lí Íslāɛl nɛ́: «Lilóm jé lá pamɓéné ma la jé lá dɔ́gɓéné ma, jɔ́ nɛ́ ma lɛ́g mɔ díɓe la nzámuh.»