Elōg-Kólóso 3 - Esaa-líat ɛ́ péná

¹ Á élōgyāŋ, kasig maná pāhyé élɔŋ la Kilístus, somlán hɔ́ mam mí lɛ́ á lōó, ápah Kilístus a lɛ, ápah a tɔɔ́ a m̀ɓɛ́nlómɛ a Ɔlolómɛ̄.

² Nsɛ́ŋ á éniŋ yáná á lɛ́ jā á lōó, ndí ah á sí ɓé.

³ Ákaa ɛ́sɛ, maná wú la Kilístus, eniŋ yáná ki ɛ́ sɔ́lɛ la nyɛ́ átē a Ɔlolómɛ̄.

⁴ Eceg Kilístus nyɔ́ a lɛ́ éniŋ yáná a ŋga kɛ́ li ɛ́ni, váŋ nɛ́ ɓɛ́nɛ ki miní ŋga kɛ́ li ɛ́ni elɔŋ la nyɛ́ átē a ŋyoganɛ́ wɛ́ɛ̄ a lipém.

Li cóó lí éɓɛ̄lé yé mut a kwaŋ á lí yaan lí mut á péná

⁵ Ɓɔŋán hɔ́ nɛ́ miní ól miɓɔŋɔg mí ŋkɔŋ-á-sí mísɛ mí lɛ́ átē wāná, mɔ́ nɛ́ mí lɛ́: mpuŋgú, ndeŋg, eót, kóó-eɓé, la eót-ɛ́-mɔ́nī yé ɛ́ lɛ́ lí ɓégɛ lí bísāt.

⁶ Nyúŋ avuha ásɛ nɛ́ á ŋga ályɛ Ɔlolómɛ̄.

⁷ Náŋ nɛ miní ŋgí niŋ á kwakwáŋɛ eceg miní ɓɛ́ɛ́la miŋ miɓɔŋɔg.

⁸ Nyí vɔ́ŋɔ́ɔ hɔ́, ɓɛ́nɛ ki Mwahánɛ̄ yé ɛ́sɛ ɛ lɛ́ kaa ɔwún, enyááka, m̀ɓé-a-m̀mím, mióó, miyɛ́l miní ŋga pɔ́t.

⁹ Minaa míh ɓɛ́ɛ́g ɓé pɛ á póla yaná, átɔm nɛ́, maná cóó eɓɛ́lé yé mut a kwaŋ la miɓɔŋɔg mɛ́ɛ́,

¹⁰ kasig maná yaán mut a péná, nyɔ́ a ŋgá tɔmb ɓé lí veŋe lí éniŋ yɛ́ɛ́ á lí ɓɔŋ nɛ́ a yí m̀veg nyɛ́, a púnán ki la nyɛ́.

¹¹ Jɔ́ hɔ́ nɛ, ɛ́ ŋgá ɓɛ́ ɓé pɛ nɛ́ mɔ́ɔ̄n Élōg-Gelékia nyɔ́, tɔ nɛ́ mɔɔ́n Élōg-Yúda nyɔ́, ɛ́ ŋgá ɓɛ́ ɓé pɛ nɛ́ mut a kwɛ́ɛɓɛ nyɔ́ tɔ nɛ́ epɔ̄-mut yé, ɛ́ ŋgá ɓɛ́ ɓé pɛ nɛ́ ɓacɛn-bí-ɓot ɓá tɔ nɛ́ ɓɛɛ́n-bí-ŋkɔŋ ɓá, ɛ́ ŋgá ɓɛ́ ɓé pɛ nɛ́ ŋyɔ́ŋ nyú tɔ nɛ́ kundɛ-mut nyí, ndí Kilístus nɛ́ a lɛ́ byɔ́ bísɛ ányúū ɓot bísɛ.

¹² Kasig Ɔlolómɛ̄ a pɔ̄hɔ́ ɓɛ́nɛ, kasig miní lɛ́ ndog yɛ́ɛ̄, kasig miní lɛ́ bídidíŋɛ byɛ́ɛ́ bí ɓɔ́ɔ̄n, ɓɛ́án hɔ́ la m̀mím a ŋgɔ́ɔ́, ɓɛ́án la ediŋ, esuhɛ-nyuú, ewú-m̀mím, la eɔ́hánɛ.

¹³ Miní ɓɛ́la eɔ́hánɛ ɓɛ́nɛ la ɓɛ́nɛ, miní láakán kí yá ɓɛ́nɛ mut a byɛlɛ́nɛ̄ nyɔ́ŋɔ́ ɔ́ūn. Kasig Nyɔ́ŋ-Ɛsáŋɛ́ a láakɛ́ ɓɛ́nɛ, ɓɛ́nɛ ki ɓɔŋán nlemlem á jam.

¹⁴ Ndí, ákaa jam li ɔsú, ɓɛ́án la ediŋ átē wāná, átɔm nɛ́ yɔ́ nɛ́ ɛ lɛ́ taŋ ŋ̀atanɛ́.

¹⁵ Nsaŋ á Kilístus nɛ́ á wɛɛla mimím máná, múŋ á nyúŋ nsaŋ nɛ́ maná yáŋlɛ́ á lí ɓɛ́ lí pɔ̄m nyúū. Yíán lí tíi lí mítamlan eceg ɛ́sɛ.

¹⁶ Eɓaŋgá Kilístus ɛ́ tɔ́ɔ á póla yáná la abyaŋ wɛ́ɛ́ ásɛ. Jɔ́ nɛ́, mut sig a yéglɛ́ nyɔ́ŋɔ́, miní tíélán ŋgéélé ɓɛ́nɛ la ɓɛ́nɛ átē a peg. Tíán Ɔlolómɛ̄ mítamlan la m̀mím wáná ásɛ, lóŋghánɛ̄ nyɛ́ byaá bí ŋgoso enyɛŋgɛ, byaá bí lípēm la byaá bí éɓégɛ bí ŋga sɔ́le la M̀búl Mpúán.

¹⁷ Yé ɛ́sɛ miní ŋga pɔ́t tɔ li ɓɔŋ, ɓɔŋán yɔ́ a jóō lí Nyɔ́ŋ-Ɛsáŋɛ́ Yésus, ányúū li tíi lí Etāa Ɔlolómɛ̄ mítamlan a jóō lí nyɛ́ Yésus.

Ŋgéélé yí éniŋ

¹⁸ Á ɓóndīgá, miní súhɛ̄ nyúū á ŋgwáāg ɓalóm ɓáná, li oŋle la nsom á Nyɔ́ŋ-Ɛsáŋɛ́.

¹⁹ A páam, miní dīŋ ɓaá ɓáná, miníh letlégé ɓé ɓɔ́ m̀mím.

²⁰ Á ɓɔ́ɔ̄n, miní óglé ɓábyāl ɓɛ́nɛ a jóō nɛ̄ jam, náŋ nɛ́ Nyɔ́ŋ-Ɛsáŋɛ́ a ŋga láaŋkene ɓɛ́nɛ.

²¹ Á ɓábyāl, miníh ályɛ́gɛ́ ɓé ɓɔ́ɔ̄n ɓáná, miníg táág yōmɛ́ ɓɔ.

²² Á míyɔ̄ŋ miní óglé ɓɛ̄ɛ́n ɓáná ɓá bí lɛ́ mú á ŋkɔŋ-á-sí a jóō nɛ́ jam. Miníh sālégé ɓé jā ɓɔ́ eceg bí ŋga ée ɓɛ́nɛ ányúū li nyɛɛle lí ɓɔ̄, ndí miní sálé ɓɔ́ la m̀mím a ŋga púú, nyú á ɓot bí ŋga kɔ̄n Nyɔ́ŋ-Ɛsáŋɛ́ woŋ.

²³ Tɔ wɔɔ́wɔ́ɔ nsɔ́n miní ŋga sál, ɓɔŋán wɔ́ la m̀mím á ŋga púú ɔ́ŋgɛn Nyɔ́ŋ-Ɛsáŋɛ́ nɛ miní ŋga sále, ndí ah ɓot-bí-bínam ɓé,

²⁴ kasig miní ŋga kɛ́ li kuh lí émbāmbá ɛ́ Nyɔ́ŋ-Ɛsáŋɛ́ kaa likaale. Ɛtáŋɛ waná a lɛ̄ Kilístus, nyɛ́ nɛ́ miní ŋga sále.

²⁵ Tɔ nzáá a ŋga ɓɔ̄ŋ aɓé, ag kuh nsála á áɓē wɛ́ɛ́, átɔm nɛ́ Ɔlolómɛ̄ ah byɛ́ɛ́ ɓé mbáglán tɔ ya a póla ɓot.