Elōg-Hébɛl 5 - Esaa-líat ɛ́ péná

Yésus a lɛ ǹtíi-nsúlé ǹcɛ́ŋ nyɔ́ a ekɔnan-ŋgɔ́ɔ́

¹ Á mbálɛ, joó nɛ ǹtíi-nsúlé ǹcɛ́ŋ, nyɔ́ a pɔ̄hlɛ́ á póla ɓot-bí-bínam, a tɛ́ɛ́ɓɛ́ á li sále lí Ɔlolómɛ̄ ányúū nsɛ́ŋ á ɓot-bí-bínam. Nsɔ́n wɛ́ɛ́ a lɛ́ nyú á lí sɔ́la lí míkaale la misúlé ányúū elaakɛ-miɓé.

² Ag la li sɔ́ŋtánɛ lí ɓot bí ŋgá yí ɓé jam, bí ŋga kɛ́ á njáŋgá, átɔm nɛ́, nyɛ́-mɛ̄n ki a lɛ̄ ja mut-a-binam nyɔ́ a ŋga ɓɔ̄t á mam mísɛ ákaa ɓɔ́.

³ La ki nɛ́, ányúū nyúŋ aɓɔt wɛ́ɛ́, ag nyɛ́ɛ li tíi lí Ɔ́lolómɛ̄ mísūlé ányúū yɛ́ɛ̄ nyɛ́-mɛ̄n la ányúū lilóm lísɛ nɛ́ ndí bí kuh elaakɛ-miɓé.

⁴ Mut tɔ wa a ŋgá la ɓé lí nyɔŋɓan lí ádit nyú ǹtíi-nsúlé ǹcɛ́ŋ la nyɛ́-mɛ̄n. Mut ag yaan ja ǹtíi-nsúlé ǹcɛ́ŋ la ŋyáŋlán á Ɔ́lolómɛ̄, kaa yé ɛ́ lolóó la Álon.

⁵ Ányúū náŋ, tɔ Nyɔ́-a-Pɔ́hlɛ āh katɓan ɓé lípēm jé lí lí ɓɛ́ lí ǹtíi-nsúlé ǹcɛ́ŋ, jéŋ lipém lá sɔ́lé nyɛ la Ɔlolómɛ̄ nyɔ́ a lága nyɛ̄ nɛ́: «Ɔ lɛ̄ Mɔ́ɔ̄n wama, nyí lɛn nɛ́ ma byál wa.»

⁶ Náŋ a lɛ̄ nlemlem la yé eɓaŋgá étām ɛ́ lɛ̄ nɛ́: «Ɔ lɛ̄ ǹtíi-nsúlé á éɓem la á éɓem, á líɓɛ́ɛg lí Mɛlkisédɛk.»

⁷ Nyɔ́-a-Pɔ́hlɛ nɛ́, á éniŋ yɛ́ɛ́ mú á sí vaŋgá, átē a ŋgandag mílōn la bíya, a kánɛ, ɔ ɓétɛ́ ki nzag á yóg mut a ŋgí la nyɛ́ lí suŋ á nyɛmb, la Ɔlolómɛ̄ ɔ yáhɛ́ nzag yɛ́ɛ́ ányúū esuhɛ-nyuú yɛ́ɛ́.

⁸ Tɔ náŋ ákaa a ɓɛ́ɛ́ Mɔ́ɔ̄n Ɔ́lolómɛ̄, a yégé lí ɓɛ́ lí éōgle ányúū bisɔghe a kūh.

⁹ A óglé nɛ́-tɛ́ɛ ɔ yáan nyɔ́ a kɔɔ́ lí ɓɔŋ nɛ́ ɓot bísɛ bí ŋga ógle nyɛ́ bí kuh lísuŋga lí pɔ́gɔ́-pɔgɔ,

¹⁰ kasig Ɔlolómɛ̄ a manáá nyɛ́ lí tɛ́ɛ́yɛ lí ǹtíi-nsúlé ǹcɛ́ŋ kaa Mɛlkisédɛk.

Li niŋ kaa ndog-Kilístus

¹¹ Á yé ɛ́ ŋga légɓe jé litɔt, bi byɛ́ɛ́ mam ŋgandag á lí laga, lí nánda lí mɔ ki lí sē ɓé bu, ányúū nɛ maná yaán ɓot bí ŋgá bíŋhan lí sɔ́ŋtánɛ.

¹² Miní ŋga nyɛ́ɛ li yaan lí ɓáyēglɛ lí ɓotle lí yɔŋ éceg, ndí tɛɛla nyí vɔ́ŋɔ́ɔ, miní ŋgí byɛ́ɛ́ kóó nɛ bí yéglɛ́ ɓɛ́nɛ mam mí ɔ́sū la ɔsú mí éɓaŋgá yé Ɔ́lolómɛ̄. Maná pám tɛɛla á ɔ́vega ví miní ŋgí byɛ́ɛ̄ ja kóó minyámíndím, ndí ah lidí lí ŋga nyááɓɛ ɓé.

¹³ Tɔ nzáá a ŋgí byɛ́ɛ̄ kóó minyámíndím a ŋgá la ɓé lí sɔ́ŋtánɛ lí yé ɛ́ ŋga lāglɛ á mam mí tɛ́ɛ́, átɔm nɛ́ a ŋgí lɛ ŋkɛ́gá-mɔ́ɔ̄n.

¹⁴ Ndí á mveŋghanɛ́, mináŋag-mí-ɓot mɔ́ míg dí lídī lí ŋga nyááɓɛ. Ɓɔ́ nɛ́ ɓá mwaánɛ́ pɔ́ŋ yāɓá á lí yí lí yé ɛ́ lɛ́ m̀ɓɛɛŋ la yé ɛ́ lɛ́ áɓē.