Elōg-Hébɛl 4 - Esaa-líat ɛ́ péná

¹ Ɔlolómɛ̄ a yíg ɓɛ́hɛ mikakanɛ nɛ́ biíg la li níŋgi á vóōm a ɓōŋhán ɓɛ́hɛ evɛɛɓan. Nyɔŋán hɔ́ lítāt nɛ mut waná tɔ wa ah súúg ɓé lí níŋgi átē,

² átɔm nɛ́, ɓaá lɛ́glé Pɔ́l M̀ɓɛɛŋ nlemlem ákaa ɓot bí ɓɛ́ɛ́ á éyāŋ, ndí, eɓaŋgá bí ámbléé yáh óŋgánɛ ɓé ɓɔ á tɔ jam, ányúū nɛ ɓáh yéɓe ɓé la yɔ́.

³ Ɓɛ́hɛ ɓot ɓaá yéɓe, biíg kɛ li níŋgi ápah évɛɛɓan ɛ́ lɛ, kaa Ɔlolómɛ̄ a lagléé nɛ́: «Ákaa ma kān-sɔŋ á átē a ɔún vama, m̀ɓá bí ŋgá kɛ ɓé lí níŋgí á vóōm ma ɓōŋhán ɓɔ̄ evɛɛɓan.» Ɔlolómɛ̄ a lagléé náŋ kí ɔ súgɛ́ nsɔ́n wɛ́ɛ́ nyú á lí veg lí ŋkɔŋ-á-sí.

⁴ Ányúū nɛ Licii-Lipúán líg pɔ́t likɔlɓan la ɔlɔ́ vá yáhɛ́ nzambúwá nɛ: «Á ɔ́lɔ̄ vá yáhɛ́ nzambúwá, Ɔlolómɛ̄ ɔ vɛ́ɛ́ɓán nsɔ́n wɛ́ɛ́ ásɛ»,

⁵ nyɛ́ nɛ́ a pɔ́t bí biɓaŋgá ɓā ámble nɛ: «M̀ɓá, bí ŋgá kɛ ɓé lí níŋgi á vóōm ma ɓōŋhán ɓɔ̄ evɛɛɓan.»

⁶ Tɔ náŋ ákaa ɓot bí ɔ́sū bí lɛ́gléé Pɔ́l M̀ɓɛɛŋ bíh níŋglée ɓé átē ányúū ŋgilí-ógle yaɓá. A mān lí súgɛ nɛ́ jogo lí ɓot líg níŋgi á nyɔ́ŋ voóm a evɛɛɓan.

⁷ Ányúū náŋ nɛ́ Ɔlolómɛ̄ a tɛ́ɛ́yɛ́ sīg-pɛ ɔ́lɔ̄ vítām, ɔ yáŋá vɔ́ nɛ́ «lɛn», ámbúh ŋgandag mímbú, ɔ pɔ́t likɔlɓan la víŋ ɔlɔ́, li loole la Dávid, kaa yé ɓaá dúgú lí ɛ́n ápah a ŋga laga á kálati yɛɛ́ nɛ́: «Nyí lɛn, kí maná ámble cíŋ Ɔlolómɛ̄, miníh lethɛ́gɛ́ ɓé mímīm máná.»

⁸ Kí ɓɔ̄ŋ nɛ́ Yósua a níŋgɛ́gɛ ɓɔ́ á yéŋ evɛɛɓan, kí ámbúh náŋ, Ɔ́lolómɛ̄ āh pɔ́t ɓé pɛ likɔlɓan la ɔlɔ́ vítām.

⁹ Náŋ ag mínɛ nɛ́ evɛɛɓan yé Ɔ́lolómɛ̄ ámbúh nsɔ́n wɛ́ɛ́ á ɔ́lɔ̄ vá yáhɛ́ nzambúwá ɛ́ ɓáág ɛ́ ŋgí laaŋkégé lílōm jɛ́ɛ́.

¹⁰ Ányúū nɛ, nyɔ́ la nyɔ́ a níŋgí á évɛɛɓan Ɔlolómɛ̄ a ɓōŋhan, nyɛ́g a vɛ́ɛɓán mísɔ̄n mɛ́ɛ́, nlemlem ákaa Ɔlolómɛ̄ a vɛɛɓáán ɛ́mɛ̄ɛ̄.

¹¹ Bi cégé hɔ́ la ŋguu á lí níŋgi á yéŋ evɛɛɓan, bi dū hɔ́ éɓāndá nɛ mut wáhá tɔ wa ah kuág ɓé nlemlem ákaa ɓot ɓá pún lí ógle.

¹² Á mbálɛ, eɓaŋgá Ɔ́lolómɛ̄ ɛ́g nyiŋgɛ, ɛ́g sál la ŋguu, ɛ́ byɛ́ɛ́ nsɔŋ ntɔ́ga nyú á ŋga vóó li loo lí mboná nyí ɛ ŋga sɛ́m bípah bíɓáa. Ɛg níŋgi wóŋ átē, yá ɓágá m̀búl la mut-a-até, ya ɓágá ki moŋga mí nyúū la pɔ́ŋ-bíveh. Ɛg kááhɛ kóó la miɔ́ŋɔ mí m̀mím á mut-a-binam.

¹³ Eveglé tɔ yá ɛ́ sɔ́lɛ̄ á miíh mí Ɔlolómɛ̄ ɛ́ sē ɓé. Byoóm bísɛ bí áhɛ á miíh mɛ́ɛ́, ag ɛ́n jam sig kaa láá lí lɛ, biíg kɛ nyɛ́ lí tɛ́lɛ ɔ́sū á lí tíi lí nyɛ ndagle.

Yésus nɛ́ a lɛ ǹtíi-nsúlé ǹcɛ́ŋ

¹⁴ Kasig bi byɛɛ́ hɔ́ taŋ ǹtíi-nsúlé ǹcɛ́ŋ nɛ Yésus, Mɔɔ́n Ɔ́lolómɛ̄, nyɔ́ a yáɓē míloó li pám tɛɛla á mbóg Ɔlolómɛ̄, bi tíŋɓé hɔ́ á ŋyéɓé bi ŋga páha.

¹⁵ Ányúū nɛ bi byɛ́ɛ ǹtíi-nsúlé ǹcɛ́ŋ nyɔ́ a ŋga lá li kaan lí áɓɔt wáhá. Nyɛ́g a kūh míceglan á mam mísɛ kaa ɓɛ́hɛ, ndí nyɛ́ āh vuhle ɓé Ɔ́lolómɛ̄.

¹⁶ Bi síŋglé hɔ́, ɛ́h ɓɛ́ ɓé woŋ tɔ wá ɓɛɓɛ la étɔɓé-líkanʼyɛ yé Ɔ́lolómɛ̄ nyɔ́ a byɛɛ́ elɔ́ŋgɔ m̀mím, á lí ɓɔŋ nɛ́ a étɛ́ ɓɛ́hɛ ekɔnan-ŋgɔ́ɔ́ yɛ́ɛ́ la elɔ́ŋgɔ yɛ́ɛ́ m̀mím, nɛ́ ndí bi kuh lióŋgánɛ á éceg ɛ́ kɔ́ɔ̄.