Elōg-Hébɛl 3 - Esaa-líat ɛ́ péná

Bíg ket Yésus la Móse

¹ La náŋ hɔ́ á élōgyāŋ, ɓɛ́hɛ ɓá bi lɛ̄ ndog-Ɔlolómɛ̄, nyí ya yéɓé ŋyáŋlán wɛ́ɛ́, miní légɓé Yésus. Ɔlolómɛ̄ a óm nyɛ́ nɛ́ a ɓɛ́ ɓɛ́hɛ ǹtíi-nsúlé ǹcɛ́ŋ, La nyɛ́ nɛ́ bi ŋga yéɓé.

² Ákaa ɛ́sɛ, a sál nsɔ́n wɛ́ɛ́ kaa ɛ́ ŋga sōmlɛ ɔ́sū ví mut a tí nyɛ wɔ́, nlemlem kaa Móse nyɛ́g a sál nsɔ́n wɛ́ɛ́ kaa ɛ́ ŋga sōmlɛ eceg aá ŋga sále ndog-Ɔlolómɛ̄.

³ Ndí, Yésus a kɔ́ɔ́ la lípēm lícɛ̄ŋɛ́ lí loo lí Móse. Náŋ ki nɛ́, ŋ̀óŋ-ndáá a byɛ́ɛ̄ ádit li loo lí ndáá yɔ-mɛ̄n.

⁴ Ɛ́ lɛ́ mbálɛ nɛ́ ndáá sig ɛ byɛ́ɛ́ e wɛ́ɛ̄ ŋ̀óŋ, ndí Ɔlolómɛ̄ nɛ a óŋ byóōm bísɛ.

⁵ Móse, á ɛ́yɛ̄ɛ̄ épah, a sál nsɔ́n wɛ́ɛ́ kaa ɛ́ ŋga sōmlɛ eceg aá ŋga sále ndog-Ɔlolómɛ̄, a ɓɛ́ɛ́ m̀ɓɔŋle, yé ɛ́sɛ a ŋgí ɓɔŋ ɛ́ ŋgí étɛ yé Ɔlolómɛ̄ a ŋga kɛ́ li máŋa ámbúh eceg.

⁶ Ndí, Nyɔ́-a-Pɔ́hlɛ ag sál nsɔ́n wɛ́ɛ́ kaa ɛ́ ŋga sōmlɛ, kaa mɔɔ́n á nyúŋ nlɛ́ɛ́, la nyɛ́ ɔ tɛ́ɛ́ɓɛ́ á m̀mú á ndog-Ɔlolómɛ̄. Biíg ɓɛ́ ndog yɛ́ɛ̄, kíyáɓɛ́nɛ ɓā náŋɛ̄ ŋyéɓé bi byɛ́ɛ̄ la nyɛ́ ŋgíla pendan, ɓaá yátá ki la yé bi ŋga píti.

Ɔlolómɛ̄ ag ɓoŋhan ɓayéɓe la nyɛ́ evɛɛɓan

⁷ Jɔ́ nɛ́ M̀búl Mpúán a ŋga laga nɛ́: «Nyí lɛn, kí maná ámblé cíŋ Ɔlolómɛ̄,

⁸ miníh lethɛ́gɛ́ ɓé mímīm máná ákaa á éceg miní ŋgí pamɓene nyɛ́, á ɔlɔ́ ví miní ceglɛ́ɛ nyɛ́ á éyāŋ.»

⁹ Ɔlolómɛ̄ ag laga nɛ́: «Á yéŋ éyāŋ nɛ ɓasɔ́ŋɛ́ ɓáná bí ceglɛ́ɛ ma eceg bí ŋgí pigi ma, la ɓɔ́ bú ɛ́n mísɔ̄n máma

¹⁰ náŋ la náŋ nɛ́-tɛ́ɛla mumínáa mí mímbú. Ányúū náŋ nɛ́, ma ályéné nyíŋ nyɔŋɔn la ma mu lágā nɛ́: ‹ákaa ɓáŋ ɓot ɓáh yí ɓé nzen yama, miɔ́ŋɔ máɓá míg kɛ ja ɓɔ́ lí óm á njáŋgá la njáŋgá›,

¹¹ átɔm nɛ́, ma kān-sɔŋ átē a ɔún vama nɛ́: ‹M̀ɓá bí ŋgá kɛ ɓé lí níŋgi á vóōm ma ɓōŋhán ɓɔ̄ evɛɛɓan›!»

¹² Á élōgyāŋ, nyɔŋán lítāt nɛ mut waná tɔ wa ah ɓɛ́ɛ́g ɓé la m̀ɓé a m̀mím, nyú á ŋga óm nyɛ́ nɛ́ ah yéɓyág ɓé pɛ la Ɔlolómɛ̄ nyɔ́ a lɛ á éniŋ.

¹³ Ndí, ɓɛ́nɛ la ɓɛ́nɛ miní tíélán míkūndá ɔlɔ́ la ɔlɔ́ sig, ányúū nɛ ví ɔlɔ́, ákaa yá ciiɓɛ́ á Lícii-Lipúán, víg yáŋlɛ nɛ́ «lɛn», nɛ́ ndí mut waná tɔ wa ah mwahkɛ́gɛ́ ɓé nɛ́ aɓé a yɛ́ɛ́ nyɛ́, la nyɛ́ a lēt m̀mím ah yéɓyág ɓé pɛ.

¹⁴ Ákaa ɛ́sɛ, bi lɛ̄ ɓot bí élɔŋ yé Nyɔ́-a-Pɔ́hlɛ, kíyáɓɛ́nɛ ɓā tiŋɓé á ŋyéɓé bi byɛɛ́ li ɓotle á míɓōtlé, náŋ la náŋ li pám nɛ́-tɛ́ɛla á lísūg.

¹⁵ Jɔ́ nɛ́ Licii-Lipúán lí ŋga lága nɛ́: «Nyí lɛn, kí maná ámblé cíŋ Ɔlolómɛ̄, miníh lethɛ́gɛ́ ɓé mímīm máná ákaa á éceg miní ŋgí pamɓene nyɛ́.»

¹⁶ Ndí, ɓa nzáá bí ámbléé cíŋ Ɔlolómɛ̄ ndí bú pamɓéné nyɛ é? Nɛ́ ah ɓot bísɛ Móse a pámhɛ́ɛ á Égípto é?

¹⁷ Ɓa nzáá ki Ɔlolómɛ̄ a ályéné mumínáa mí mímbú é? Nɛ́ ah ɓot bísɛ bí ɓɔ̄ŋɔ́ɔ́ áɓē la ɓɔ́ bú wú mísāā mísāā á éyāŋ é?

¹⁸ Ɓa nzáá Ɔlolómɛ̄ a kanlénéé sɔŋ nɛ́ m̀ɓá bí ŋgá kɛ ɓé lí níŋgi á vóōm a ɓōŋhán ɓɔ̄ evɛɛɓan é? Nɛ́ ah ɓot ɓá ndɔ́gɓéné nyɛ ɓé é?

¹⁹ Á mbálɛ, biíg ɛ́n nɛ ɓáh la ɓé lí níŋgi á nyɔ́ŋ voóm a evɛɛɓan ányúū nɛ ɓá pún lí yéɓe.