Elōg-Hébɛl 12 - Esaa-líat ɛ́ péná

Eɔ́hánɛ á míceglan

¹ Á yé ɛ́ ŋga légɓe ɓɛ́hɛ, ɓɛ́hɛ ɓá yé edila mbóŋ yá díi, bi cóó hɔ́ yé ɛ́sɛ ɛ́ ŋgá céŋɛ ɓɛ́hɛ li kɛ la ɔsú, ndí tíntín aɓé nyú wá díi ɓɛ́hɛ, ndí ɛ́h ɓɛ́ ɓé lí tɔmb, bi nāŋgá m̀bíí Ɔ́lolómɛ̄ a tí ɓɛ́hɛ nɛ́ bi nāŋgá.

² Eceg bi ŋga nāŋga m̀bíí, miíh máhá mí ɓɛ́ ja á mbóg Yésus, nyɛ́ nɛ́ a légē ɓɛ́hɛ nzen nyí ŋyéɓé, nyɛ́ ki nɛ́ a ŋga kɛ́ wɔ́ lí pámla á lísūg, nyɛ́ nɛ́, a mwáhɛ́ mívag mí mɓɛ́ nyɛ̄ ɔ́sū, la nyɛ́ ɔ yéɓé nyɛmb nyí mbásá átē a eɔ́hánɛ, ɛ́h ɓɛ́ ɓé lí nyɔŋ lí éceg la mbɔɔla ɛsɛ̄ nyíŋ nyaa nyɛmb ɛ ŋga tíi. Ndí nyí vɔ́ŋɔ́ɔ, a tɔ́ɔ á m̀ɓɛ́nlómɛ a etɔɓé-líkanʼyɛ yé Ɔ́lolómɛ̄.

³ Ɔ́ŋlán kaa Yésus a ɔ́hánɛ eceg ɓaɓɔŋ-miɓé ɓá síŋgɛ́ nyɛ, nɛ́ ndí mímīm máná míh ɓɔtɔ́g ɓé la ɓɛ́nɛ miní tímān la mbúh.

⁴ Átɔm nɛ́, á eɓándá yáná miní ŋga dúhɛ aɓé, miní dū yɔ́ tɛɛla á ɔ́vega ví bí ŋga kóm mícii máná.

⁵ Ɓaá, maná vólánɛ́ ŋgéélé Ɔlolómɛ̄ a ŋgí tíi ɓɛ́nɛ kaa ɓɔɔ́n ɓɛ́ɛ́ é? Eceg a lagléé nɛ́: «Á mɔ́ɔ̄n wama, kí Nyɔ́ŋ-Ɛsáŋɛ́ ag tɛ́ɛ́yɛ wa á nzen, ɔh yaŋlág ɓé nāŋ, ɔh yɔŋɓág ɓé kí ag nyáále wa.

⁶ Ányúū nɛ, Nyɔ́ŋ-Ɛsáŋɛ́ ag vá nyɔ́ a ŋga dīŋ á nzen ɛ tɛ́ɛ́, ndí ag lɔ́g ki joó nɛ mut a ŋga lēm kaa mɔɔ́n wɛ́ɛ̄.»

⁷ Ányúū li tɛ́ɛ́yɛ lí ɓɛ́nɛ á nzen nɛ́ miní ŋga sɔ̄ghe, ányúū nɛ Ɔlolómɛ̄ a lēm ɓɛ́nɛ kaa ɓɔɔ́n ɓɛ́ɛ́. Wɔɔ́wɔ́ɔ mɔɔ́n ɛsáŋɛ́ a ŋgá tɛ́ɛ́yɛ ɓé á nzen ɛ tɛ́ɛ́ é?

⁸ Kíyáɓɛ́nɛ ɓáh tɛ́ɛ́yɛ́ ɓé ɓɛ́nɛ á nzen ɛ tɛ́ɛ́ ákaa ɓɔɔ́n bísɛ, ɛnɛ miní lɛ́ ɓɔ́ɔ̄n-bí-lísɔm, miní sē ɓé mbyááhɛ.

⁹ Mú á nyú ŋkɔŋ-á-sí, ɓaá kūh ɓatāa ɓá bí ŋgí tɛ́ɛ́yɛ́ ɓɛ́hɛ á nzen, la ɓɛ́hɛ bu tí ɓɔ ádit. Nɛ́-láá hɔ́ bi ŋgá la ɓé ɓɛ́hɛ li ógle lí Ɛtáŋɛ wahá nyɔ́ a lɛ á lóō nɛ́ ndí bi kūh eniŋ é?

¹⁰ La mbálɛ, ɓatāa ɓáhá bí ŋgí tɛ́ɛ́yɛ ɓɛ́hɛ á nzen ányúū puh eceg li oŋle la miɔ́ŋɔ máɓá. Ndí, Ɔlolómɛ̄ nyɛ́ ag tɛ́ɛ́yɛ ɓɛ́hɛ á nzen ányúū nsɛ́ŋ wáhá, á lí ɓɔŋ nɛ́ bi ɓɛ́ ɓapúán ákaa nyɛ́.

¹¹ Jɔ́ nɛ́, á éceg bí ŋga kɔ́gɔ mut, a ŋgá kɔn ɓé mívag, náŋ ag ályɛ jā nyɛ́, ndí ámbúh eceg, yíŋ ŋgéélé ɛ́g ɓɔŋ nɛ́ mut a ɓɛ́ nsaŋ a wɛ́ɛ́hɛ́nɛ ki á etɛ́l-sim.

¹² Kɔ́glán hɔ́ mɔ mí má táá la miɓɔ́ŋ mí má yɔ́ghan,

¹³ miní wɛ́ɛhɛ́nɛ á anzenzéna a tɛ́ɛ́, á lí ɓɔŋ nɛ́ mut a ŋga cɔ́ŋg, akoo áh búgyág ɓé nyɛ nɛ́ ɓam ɓam, ndí a tɔ́ɔ ja mbólí.

Li tiŋɓe á ŋyáŋlán Ɔ́lolómɛ̄ ányúū nsɔ́n wɛ́ɛ́

¹⁴ Somlán lí ɓɛ́ lí nsaŋ la ɓot bísɛ, miní sōmó ki li niŋ lí éniŋ ɛ́ ŋga nyɛ́ɛle Ɔlolómɛ̄ yé ɛ́ lɛ́ nɛ, ah náŋ ɓé, mut tɔ wa a ŋgá kɛ ɓé lí ɛ́n lí Nyɔ́ŋ-Ɛsáŋɛ́.

¹⁵ Miní nyɔŋ litát nɛ mut tɔ wa ah nɛŋɓág ɓé la elɔ́ŋgɔ m̀mím yé Ɔlolómɛ̄. Mut waná tɔ wa ah yaakágán ɓé kaa lilaŋ liɓé, jé lá sā voóm asɛ̄ á lí sɔ́la lí ntugɛ.

¹⁶ Nyɔŋán lítāt nɛ mut a mpuŋgú á ndeŋg tɔ ŋ̀yɔ́l mam mí Ɔ́lolómɛ̄ ah ɓɛ́ɛ́g ɓé á póla yaná, ákaa Ésáo, nyɔ́ a nuŋléé ácɛ̄ŋ wɛ́ɛ́ ányúū esóa-lídī.

¹⁷ Átɔm nɛ́, ákaa miní ŋga yí, ámbúh eceg, ɛnɛ́ a ŋgí somo nɛ́ ɛsáŋɛ́ a lómbó nyɛ́ ndómbo nyí ǹcɛ́ŋ, bú dúhū nyɛ, āh kuhúú ɓé nzen tɔ ya á lí veŋe lí mām, tɔ náŋ ákaa a sɔ́hyéé la bíya á miíh.

¹⁸ Ɓɛ́nɛ manáh siŋgle ɓé ɓɛ́ɓɛ la titih jam tɔ ya nyí bí ŋga lá li siiɓan, ɛ́ ɓɛ́ nzáan ɛ ŋga lóŋ, ɛ́ ɓɛ́ mbaga nyí ɛ ŋga sɔ́ɔ vāŋgá, ɛ́ ɓɛ́ livito, ɛ́ ɓɛ́ livío licɛ́ŋ.

¹⁹ Manáh ámble ɓé tɔ nlón á nséɓá tɔ mpɔ́t á élōh cíŋ. Ɓá bí ámbléé byɔ́ bú lāgá nɛ bíh laglág ɓé pɛ ɓɔ́ tɔ̄ jam.

²⁰ Ányúū nɛ bí ŋgí la ɓé lí ɔ́hánɛ lí mísɛ́mɛg mí élōh cíŋ, nyí ɛ ŋgí laga nɛ́: «Nyɔ́ la nyɔ́ a ŋga kɛ́ li siiɓan lí ɔ́kolá, tɔ ya ɓɛ́ ja tít, bíg kɛ nyɛ́ lí ól la ŋgɔg!»

²¹ Yé ɓá ɛ́n ɛ́ ŋgí kɔnhan woŋ, la Móse ɔ lágā nɛ́: «Ma nát la woŋ, mag sɛ́glan nɛ́ ɓɔ́gɓɔ́g.»

²² Ndí ɓɛ́nɛ maná sīŋglé ɓɛ́ɓɛ la ɔ́kolá ví Síon, munú sīŋglé ki ɓɛ́ɓɛ la tísɔn nyí Ɔlolómɛ̄ nyɔ́ a lɛ á éniŋ. Nyíŋ tísɔn nɛ́ ɛ lɛ̄ Yelúsalɛm ɛ lɛ á lóō, ápah adun ndí ádun á áŋgɛl yí yá kɔtán á ŋgand ɛ́ lɛ̄.

²³ Maná sīŋglé ɓɛ́ɓɛ la ŋkɔtanɛ́ a ɓadúgu-libyáa, ɓá moó má ciiɓɛ́ á lóō, munú sīŋglé ɓɛ́ɓɛ la Ɔ́lolómɛ̄, ŋ̀kááhɛ ɓot bísɛ. Munú sīŋglé ki ɓɛ́ɓɛ la mimbúl mí ɓot bí tɛ́ɛ́-sim ɔ́sū ví Ɔ́lolómɛ̄ ɓá ɓá yāán ɓápūán.

²⁴ Maná sīŋglé ɓɛ́ɓɛ la Yésus, nyɔ́ a tɛ́ɛ́ á póla Ɔlolómɛ̄ la ɓot-bí-bínam á lí tɛ́g lí ésaa-líat ɛ́ péná. Munú sīŋglé ki ɓɛ́ɓɛ la micii mɛ́ɛ́ mí má kómɓɛ́ mí mí byɛ́ɛ̄ pɔ́l nyí ɛ ŋga loo pɔ́l nyí mícii mí Ábɛl.

²⁵ Nyɔŋán lítāt, miníh púnúg ɓé lí ámble lí nyɔ́ la nyɔ́ a ŋga pɔ́tɛ ɓɛ́nɛ. Átɔm nɛ́, kíyáɓɛ́nɛ ɓɔɔ́n bí Íslāɛl ɓáh véé ɓé ékɔ́ghɛ eceg bí ŋgí pún lí ámble lí Móse kí ag ɓóŋyɛ ɓɔ́ mam mú á ŋkɔŋ-á-sí, ɛbuu-la-ŋgele yáŋvéé la ɓɛ́hɛ, kí bu pún lí ámble lí nyɔ́ a ŋga pɔ́thɛ́nɛ ɓɛ́hɛ á lóō é?

²⁶ Á éceg ɛ́ kwaŋ, cíŋ Ɔlolómɛ̄ ya pógɛ́ sí. Ndí nyí lɛn, ag kakanɛ ɓɛ́hɛ nɛ́: «Mag kɛ li pógɛ lí sí ányúū ŋgele ya súgle, ndí ah sí yɔ-ntámɛ́ ɓé, la loó ki.»

²⁷ Bí biɓaŋgá nɛ «ŋgele ya súgle» bíg yéglɛ nɛ́, byoóm byá vegɓɛ, bí bí ŋga lá li pógɛ bíg kɛ li nyɔ́ŋ, á lí ɓɔŋ nɛ́ bí bí ŋgá la ɓé lí pógɛ bí kōndyé lí ɓɛ́.

²⁸ Kasig ɓɛ́hɛ bi ŋga kɛ́ li kuh lí líkanʼyɛ jé lí ŋgá kɛ ɓé lí póghan, la náŋ bi tí Ɔlolómɛ̄ mítamlan, bi sálé nyɛ́ átē a esuhɛ-nyuú la ŋkɔnwoŋɛ́, á nyaa ɛ ŋga kɔ́nɛ nyɛ́ mívag.

²⁹ Átɔm nɛ́, Ɔlolómɛ̄ Loó jáhá a lɛ nzáan ɛ ŋga cɛ́hɛ.