Elōg-Hébɛl 1 - Esaa-líat ɛ́ péná

Ɔlolómɛ̄ ag kwɛlɛ ɓɛ́hɛ li loole la Mɔɔ́n wɛ́ɛ̄

¹ Á éceg ɛ́ kwaŋ, á patí yɔ́ ɛ́sɛ, Ɔlolómɛ̄ ŋgí yɔg li máŋlɛ́ lí ɓatáŋɛ li loole la ɓapɔ́tle-bí-Ɔ́lolómɛ̄.

² Ndí, á nyú alɔ́ wá tiile bi byɛɛ́, Ɔlolómɛ̄ a pɔ́tɛ́ ɓɛ́hɛ li loole la Mɔɔ́n wɛ́ɛ̄. Li loole la nyɔ́ŋ Mɔɔ́n nɛ a vēg ŋkɔŋ-á-sí ásɛ la mam mí lɛ́ átē, ɔ tɛ́ɛ́yɛ́ nyɛ ŋ̀koto-embámbá yé mam mísɛ.

³ La nyɛ́ nɛ́ epaa yé lípēm lí Ɔ́lolómɛ̄ ɛ́ ŋga ɛ́ni, ndí ɔ ɓɛ́ kí kɔɔ yé Ɔ́lolómɛ̄ a lɛ, la ŋguu nyí eɓaŋgá yɛ́ɛ́ nɛ a nīt joó nɛ jam lá vēgɓɛ. Ɛnɛ́ a mānɛ́ li púɛ lí ɓot á míɓē máɓá, ɔ ɓét á lóō, ɔ tɔ́ɔ á m̀ɓɛ́nlómɛ a Nyɔlɛ nyɔ́ a Ŋguu-Mísɛ.

⁴ Náŋ ɔ yígle nɛ a ɓɛ́ á lóō lí áŋgɛl, la Ɔlolómɛ̄ ɔ ló nyɛ jóō jé lí lɛ́ mveŋghanɛ́ la ɛjáɓá.

Mɔɔ́n Ɔ́lolómɛ̄ ag loo áŋgɛl

⁵ Ɓaá, yɔɔ́yɔ́ɔ áŋgɛl Ɔlolómɛ̄ ɔ ví laga nɛ́: «Ɔ lɛ̄ mɔ́ɔ̄n wama, nyí lɛn nɛ́ ma byál wa é?» Tɔ nɛ́: «Nyɛ́, ag kɛ li lem nɛ́ mi lɛ nyɛ́ ɛ́sāŋɛ́ mág mi lēm nɛ́ a lɛ̄ mā mɔ́ɔ̄n é?»

⁶ Ndí, eceg Ɔlolómɛ̄ a ŋgí nyɛɛ li óm lí Mɔ́ɔ̄n wɛ́ɛ̄ á ŋkɔŋ-á-sí, ǹdúgu li byáa á póla biveglé bísɛ, a lagléé nɛ́: «Áŋgɛl yí Ɔ́lolómɛ̄ ɛ́sɛ yá nyɛɛ́ lí úlɓán ɔ́su vɛ́ɛ́.»

⁷ Ɔ pɔ́t ki ányúū áŋgɛl nɛ́: «A yáanɛ́ áŋgɛl yɛ́ɛ́ ŋgɔá ɔ yáanɛ́ ki ɓaɓɔŋle ɓɛ́ɛ́ lindombo lí nzáan.»

⁸ Á yé ɛ́ ŋga légɓe Mɔɔ́n wɛ́ɛ̄, Ɔlolómɛ̄ ɔ lága nɛ̄: «Ɔ lɛ Ɔ́lolómɛ̄, etɔɓé-líkanʼyɛ yɔ́ɔ yá tɛ́gɓɛ́ á éɓem la á éɓem. La étɛ̄l-sim nɛ́ ɔ ŋgɔ kɛ́ li kanʼyɛ lí lílōm jɔ́ɔ.

⁹ Wa dīŋ étɛ̄l-sim, la wā wu síŋgɛ yé ɛ́ lɛ́ áɓē, ányúū náŋ nɛ́ wa Ɔ́lolómɛ̄, Mā Lōó jɔ́ɔ ma ɔ́gɛ́ wa míwūū á m̀mú mí mí ŋga kɔ̄nhanɛ wa mívag, la ma mu ɛ́n nsɛ́ŋ nɛ́ mi dítɛ wa li loo lí ɓot ɓɔ́ɔ bí élɔŋ.»

¹⁰ Ɔlolómɛ̄ a lága ki nɛ́: «Ɛtáŋɛ, á míɓōtlé, wa nɛ́ ɔ vegéé sí, wu vēg ki loó la mɔ mɔ́ɔ.

¹¹ Bíŋ bísɛ bíg kɛ li loo, ndí wa, ɔ lɛ̄ ja á éɓem la á éɓem. Ɔɔ, byɔ́ bísɛ bíg kɛ li un ákaa mbɔ́tí,

¹² la wā ɔ vúlké byɔ́ ákaa mbɔ́tí livɛ́ɛ́, la byɔ́ byá veŋghán ákaa bí ŋga vēŋghanɛ mbɔ́tí, ndí wa, ɔ lɛ jā nlemlem, alɔ́ wɔ́ɔ wɔ́g á ŋgá man ɓé.»

¹³ Ɓaá yɔɔ́yɔ́ɔ áŋgɛl Ɔlolómɛ̄ ɔ ví laga nɛ́: «Tɔɔ́ á m̀ɓɛ́nlómɛ wama, nɛ́-tɛ́ɛ ma yáanɛ́ ɓálem ɓɔ́ɔ etɛ́lɓéné-míkoo mɔ́ɔ é?»

¹⁴ Ɓaá, yíŋ áŋgɛl ɛ́sɛ ɛ́ sē ɓé ja mímbūl mí mí ŋga sále Ɔlolómɛ̄ é? Ɓaá nsɔ́n wáɓá á sē ɓé jā lí óŋgánɛ lí ɓot bí ŋga nyɛ́ɛ li kuh lí lísuŋga é?