Elōg-Éféso 3 - Esaa-líat ɛ́ péná

Nsɔ́n á Póol

¹ Á élōgyāŋ, ma Póol, á jóō lí Yésus Kilístus, mi lɛ á m̀ɓog ányúū ɓɛ́nɛ ɓot miní sē ɓé ɓɔ́ɔ̄n bí Élōg-Yúda.

² Kɔɔ, maná ámblé ɓot bíg pɔ́t likɔlɓan la nsɔ́n nyú á lɛ́ nɛ, Ɔlolómɛ̄ la elɔ́ŋgɔ yɛ́ɛ̄ m̀mín, a óm ma lí sál ányúū yāná nɛ́ ndí peg yɛ́ɛ̄ a vúl ɛ yáal.

³ Ɔlolómɛ̄ a yɛ́ɛ́le ma mbaŋ nyí ma sɔ́lé ɓɛ́nɛ li sɛ́m lí pɛ́m á ŋkwɛl wáma.

⁴ Eceg miní ɓɛ́ miníg sɔ́ŋgɔ nyí káati yama, miníg kɛ li ɛ́n lí yɔɔ́yɔ́ɔ eyí mi byɛ́ɛ̄ á lí sɔ́ŋtánɛ lí mbaŋ likɔlɓan la Nyɔ́-a-Pɔ́hlɛ.

⁵ Nyíŋ mbaŋ, Ɔlolómɛ̄ ah yɛ́ɛ́léné ɓé yɔ nyɔŋɔn yá lóo, ákaa nyí vɔ́ŋɔ́ɔ, a yɛ́ɛ́léné yɔ ɓaómɓɛ ɓɛ́ɛ́ ɓápūán la ɓapɔ́tle-bí-Ɔ́lolómɛ̄ li kele la M̀búl Mpúán.

⁶ Nyíŋ mbaŋ nyí nɛ́: ɓɔɔ́n bí Élōg-Yúda la ɓá bí sē ɓé ɓɔ́ɔ̄n bí Élōg-Yúda bíg kaan nlemlem á émbāmbá, bíg ɓɛ́ bíjo bí nyúū ya, bíg kuh ki nlemlem á líkakanɛ lí Ɔ́lolómɛ̄ á ŋ̀atanɛ́ wāɓá la Yésus Kilístus li oŋle la Pɔ́l M̀ɓɛɛŋ.

⁷ La elɔ́ŋgɔ yɛ́ɛ́ m̀mím, Ɔlolómɛ̄ a étɛ́ ŋguu yɛ́ɛ̄ nɛ́ mi ɓɛ́ m̀ɓɔŋle á nyíŋ Pɔ́l m̀ɓɛɛŋ.

⁸ Tɔ náŋ ákaa ma nɛ́ mi lɛ nyɔ́ a lóohán lí tígi átē á ndog-Ɔlolómɛ̄ yɔ ɛsɛ̄, ma pɔ́n nɛ ma kūh líkaale jé lí lí lɛgɛ lí mílōm mí sē ɓé ɓɔ́ɔ̄n bí Élōg-Yúda pɔ́l abyaŋ á ŋgíla lisúg nyú á Nyɔ́-a-Pɔ́hlɛ,

⁹ la li étɛ kaa láá Ɔlolómɛ̄ m̀veg sí la loó a ŋga yáhɛ mbaŋ nyí ɛ ɓáág ɛ sɔ́lɛ átē wɛ́ɛ̄.

¹⁰ Jɔ́ nɛ́, li ɓotle nyí vɔ́ŋɔ́ɔ, li loole la Eɓasɛ nɛ́ Migɔ́mna la Ɓakanʼyɛ bí lɛ́ á lóō bí ŋga kɛ́ lí yí lí peg Ɔlolómɛ̄ á pánd ɛ́sɛ,

¹¹ li oŋle la peg nyí eɓem a vúl nyí a yáhɛ́ɛ átē a Yésus Kilístus Ɛtáŋɛ wahá.

¹² Ŋyéɓé wáhá la Nyɔ́-a-Pɔ́hlɛ hɔ́ nɛ́ á ŋga tíi ɓɛ́hɛ kundɛ li siŋgle lí Ɔ́lolómɛ̄ ɓɛɓɛ ɛ́h ɓɛ́ ɓé ŋkɔnwoŋɛ́.

¹³ Jɔ́ nɛ́ mi ŋga lága ɓɛ́nɛ nɛ́, miníh mwahkɛ́gɛ́ ɓé nɛ bisɔghe mi ŋga kūh ányúū yāná bí yɔŋɓɛ́ ɓɛ́nɛ. Byɔ́ nɛ́ bí lɛ́ lípēm jáná.

Ediŋ yé Nyɔ́-a-Pɔ́hlɛ

¹⁴ Ányúū náŋ nɛ́ mi ŋga úm miɓɔ́ŋ ɔ́sū ví Etāa Ɔlolómɛ̄ á lí kánɛ lí nyɛ,

¹⁵ la nyɛ́ nɛ́ móō mí mimbiya mísɛ mí lɛ́ á lóō la á sí mí ŋga sɔ́léne.

¹⁶ Mag sɔ́hye nyɛ́ nɛ́, kasig a yáhɛ́ la abyaŋ á lípēm jɛ́ɛ́, M̀búl Mpúán wɛ́ɛ̄, a letɛ́ m̀búl wáná,

¹⁷ la ki nɛ́, átē a ŋyéɓé, Nyɔ́-a-Pɔ́hlɛ a tɔ́ɔ́ á mimím máná, nɛ́ ndí miní tɔ̄ɓéné átē á ediŋ, miní ólɓéné múŋ.

¹⁸ La váŋ, miníg kɛ li la lí lí sɔ́ŋtánɛ elɔŋ la ndog-Ɔlolómɛ̄ ɛsɛ̄ yé ɛ́ lɛ́ alaa, póg, ǹtɛ́l la njiɓa nyí ediŋ ɛ́ Nyɔ́-a-Pɔ́hlɛ.

¹⁹ Miníg kɛ li yí lí yé ɛ́ lɛ́ édiŋ ɛ́ Nyɔ́-a-Pɔ́hlɛ, yé ɛ́ ŋga lóo biyí bísɛ, á lí ɓɔŋ nɛ́ miní kúh miɓɛɛŋ mí Ɔlolómɛ̄ la ki nɛ́ nyɛ́ Ɔ́lolómɛ̄ a yál átē wāná.

²⁰ Nyɔ́ Ɔlolómɛ̄ a ŋga lóohan li lá lí ɓɔŋ li loo lí yé bií ŋga ɓāt nyɛ́, la li loo lí yé bií ŋga ɔ́ŋɔ, li kele la ŋguu yɛ́ɛ̄ nyí ɛ ŋga sál átē wāhá,

²¹ lipém lí ɓɛ́ la nyɛ́ á Eɓasɛ átē a Yésus Kilístus á nyɔ́ŋɔn ndí nyɔ́ŋɔn, la á éɓem la á éɓem! Ɛ́ ɓɛ́ náŋ.