Elōg-Éféso 2 - Esaa-líat ɛ́ péná

Li ɓógo á nyɛmb li kɛ á éniŋ

¹ Á élōgyāŋ, ɓɛ́nɛ ɓot miní ɓɛ́ɛ́ míwúag ányúū avuha wáná la miɓé máná miní ŋgí ɓɔŋ

² á ɔkolpáŋá, eceg miní ŋgí ógle loó lí nyú ŋkɔŋ-á-sí, ŋ̀kanʼyɛ nyɔ́ a lɛ á póla sí la loó. Nyɔ́ŋ ŋ̀kanʼyɛ nɛ́ a lɛ m̀búl m̀ɓé á ŋga sál vɔ́ŋɔ́ɔ á póla ɓot ɓá ndɔ́gɓéné Ɔ́lolómɛ̄.

³ Ɓɛ́hɛ bísɛ ki bi ɓɛ́ɛ́ múŋ á nyúŋ nsɔŋgí, ányúū nɛ bi ŋgí niŋle á kóó yáhá míson, bi ŋgí ɓɔŋ nsom á kóó yáhá míson la li oŋle lí míɔ̄ŋɔ máhá. Ányúū yéŋ eɓɛ́lé yáhá éɓē nɛ Ɔlolómɛ̄ a súghɛ́ɛ nɛ́ ag kɔ́ghɛ ɓɛ́hɛ nlemlem ákaa ɓáŋá.

⁴ Ndí, Ɔlolómɛ̄ a yáhɛ la ekɔnan-ŋgɔ́ɔ́ ányúū nɛ a lóohán ɓɛ́hɛ li diŋ.

⁵ Ányúū náŋ nɛ́, kasig bi ɓɛ́ɛ́ míwúag ányúū avuha wáhá, a tímān ɓɛ́hɛ li tíi lí éniŋ elɔŋ la Nyɔ́-a-Pɔ́hlɛ. La elɔ́ŋgɔ yɛ́ɛ́ m̀mím nɛ ɓaá suŋɓɛ.

⁶ A pāhyɛ́ ɓɛ́hɛ elɔŋ la Yésus Kilístus, elɔŋ la nyɛ́, ɔ tɔ́ɔyɛ́ ki ɓɛ́hɛ á lóō.

⁷ Jɔ́ nɛ́, a étɛ́ ɓɛ́hɛ m̀mím wɛ́ɛ́ nláám á ŋ̀atanɛ́ wāhá la Yésus Kilístus, la náŋ ɔ sómo li étɛ lí ábyaŋ á ŋgíla ŋget nyú á elɔ́ŋgɔ yɛ́ɛ́ m̀mím á bíceg bí ŋga kɛ́ li sɔ́.

⁸ Ákaa ɛ́sɛ, la elɔ́ŋgɔ yɛ́ɛ́ m̀mím nɛ maná suŋɓɛ, li oŋle la ŋyéɓé miní byɛ́ɛ̄. Jéŋ lisuŋga lí ŋgá sɔ́le ɓé la ɓɛ́nɛ-mɛ̄n, lí lɛ jā líkaale lí Ɔlolómɛ̄.

⁹ Lí ŋgá sɔ́le ɓé á mísɔ̄n máná, á lí ɓɔŋ nɛ́ tɔ mut ah sɛgɓágán ɓé,

¹⁰ átɔm nɛ́ Ɔlolómɛ̄ nɛ a ōŋgɛ́ ɓɛ́hɛ, nyɛ́ nɛ́ a vēg ɓɛ́hɛ nɛ́ bi nīŋ á ŋ̀atanɛ́ la Yésus Kilístus, ányúū li yáhɛ lí mísɔ̄n mí m̀ɓɛɛŋ nyɛ́ Ɔ́lolómɛ̄ a ɓōŋhán ɓɛ́hɛ á ɔ́sū ví éceg.

Lí ɓɛ́ lí jam já átē á Yésus Kilístus

¹¹ Ɔ́ŋlán hɔ́ nɛ́ á kwakwáŋɛ, miní ɓɛ́ɛ́la ndembye á nyúū nyí ɛ ŋgí étɛ nɛ́ miní sē ɓé ɓɔ́ɔ̄n bí Élōg-Yúda, ɓɛ́nɛ ɓá ɓɔɔ́n bí Élōg-Yúda bí ŋgí yáŋa bipɔ-bí-ɓot, kasig ɓɔ́ bí ŋga ɔ́ŋɔ nɛ́ ɓá kwɛɓɛ, ányúū nɛ bí byɛ́ɛ endóndó líkwɛɛ á éjo yáɓá ɛ́ nyúū.

¹² Ɔ́ŋlán nɛ́ váŋ á yéŋ eceg, miní ŋgí yí ɓé Nyɔ́-a-Pɔ́hlɛ, ɔ́ŋlán ki nɛ́ miníh ɓɛ́ɛ́la ɓé kundɛ li tɔɔ á éti yé lílōm lí Íslāɛl, ɔ́ŋlán nɛ́ bisaa-bí-míat mí byɛ́ɛ̄ líkakanɛ Ɔlolómɛ̄ a ɓɔŋɔ́ɔ́ la ndog yɛ́ɛ̄ míh ɓɛ́ɛ́ ɓé ányúū yāná. Miní ŋgí nīŋ á ŋkɔŋ-á-sí ŋgíla lipitá la ŋgíla Ɔlolómɛ̄.

¹³ Ndí, ɓɛ́nɛ ɓá miní ɓɛ́ɛ́ énɛŋɛ́ la Ɔlolómɛ̄ á kwakwáŋɛ, nyí vɔ́ŋɔ́ɔ maná āt la Yésus Kilístus, micii mɛ́ɛ́ má siŋglɛ́ ɓɛ́nɛ ɓɛɓɛ la nyɛ́.

¹⁴ Ákaa ɛ́sɛ, Yésus nɛ́ a lɛ̄ nsaŋ wáhá. A yáanɛ́ ɓɔ́ɔ̄n bí Élōg-Yúda la ɓá bí sē ɓé ɓɔ́ɔ̄n bí Élōg-Yúda pɔ̄m lilóm. Eceg a tí nyúū yɛ́ɛ̄ kaa nsúlé, a sáá bívinká, ɔ mānɛ́ ndándó nyí ɛ ŋgí ɓága ɓɔ́.

¹⁵ A sáá mbéndá Móse, mitiŋ mɛ́ɛ́ la bitɛ́ɛ́yɛ́nɛ́ byɛ́ɛ́. La náŋ, a sōmó nɛ ɓɔɔ́n bí Élōg-Yúda la ɓá bí sē ɓé ɓɔ́ɔ̄n bí Élōg-Yúda bí tímān pɔ̄m lilóm lí péná, ányúū náŋ nɛ́ a kóm ɓɔ nsaŋ.

¹⁶ La nyɛmb yɛ́ɛ̄ á mbásá, Yésus Kilístus a yáanɛ́ ɓɔ nyúū ya, ɔ sáŋgá ki ɓɔ́ la Ɔlolómɛ̄. La nyɛmb yɛ́ɛ̄ á mbásá, a mánɛ́ bísīŋgá.

¹⁷ Á ɓɛ́nɛ ɓá miní ɓɛ́ɛ́ énɛŋɛ́, la ɓá bí ɓɛ́ɛ́ ɓɛɓɛ, a sɔ́ ɓɛ́nɛ li lɛgɛ lí pɔ́l m̀ɓɛɛŋ nyí nsaŋ.

¹⁸ Li kele la nyɛ́ nɛ́ ɓɔ́ɔ̄n bí Élōg-Yúda la ɓá bí sē ɓé ɓɔ́ɔ̄n bi Élōg-Yúda ɓɛ́hɛ bísɛ bií ŋga lā li pám ɔ́sū ví Etāa átē á pɔ̄m M̀búl Mpúán.

¹⁹ Jɔ́ nɛ́, ɓɛ́nɛ ɓot miní sē ɓé ɓɔ́ɔ̄n bí Élōg-Yúda, miní sē ɓé pɛ ɓacɛn-bí-ɓot tɔ ɓasɔ́sɔ̄le, ɓɛ́nɛ la ɓɔɔ́n bí Élōg-Yúda maná yaán ɓɔ́ɔ̄n bí lilóm lí Ɔ́lolómɛ̄, munú ɓɛ́ ki á m̀biya wɛ́ɛ́.

²⁰ Maná níŋgi á mióŋ ápah ɓaómɓɛ la ɓapɔ́tle-bí-Ɔ́lolómɛ̄ nɛ́ bí lɛ́ jaa, ápah Yésus Kilístus nyɛ́-mɛ̄n a lɛ́ kaa ŋgɔg ɛ ɓɛ́gɛ̄ ndáá.

²¹ Á lóō jɛ́ɛ́ nɛ ŋgɔg míōŋ ɛ́sɛ ɛ́ kahɛ́ m̀ɓɛɛŋ, la yɔ́ yá ɓét á lí ɓɛ́ lí ndáá-ēcɛ́ŋ-Ɔlolómɛ̄ nyí púán átē a Nyɔ́ŋ-Ɛsáŋɛ́.

²² La nyɛ́ nɛ́ ɓɛ́nɛ bísɛ maná byáŋ elɔŋ á míōŋ á li yaan lí ndáá Ɔlolómɛ̄ li kele la M̀búl Mpúán.