Biyɛ́ɛ́léné 9 - Esaa-líat ɛ́ péná

¹ Áŋgɛl ya yáhɛ́ ɛ́táan yu ɔ́ŋ nséɓá wɛ́ɛ́: la ma mu ɛ́n ɔ́tɛ̄ vú ɓógó á lóō, vú ɓɛ́han á sí; bú tí vɔ ɔdiɓa ví eɓél-écɛ̄hɛ.

² Ɔtɛ́ vú legé yéŋ eɓél-écɛ̄hɛ, la víta vú ɓét ákaa víta ví lísalká lícɛ̄ŋ; víŋ víta vú púan la ŋgɔá, vú dímbhánɛ́ vaŋgá.

³ Atátáŋgá á ŋgí pámle múŋ á víŋ víta, wú cámān á ŋkɔŋ-á-sí Bú tí wɔ ŋguu ákaa ŋguu aee á lɛ́ á ŋkɔŋ-á-sí

⁴ Bú súŋɛ̄ wɔ nɛ́ áh sɔghɛ́gɛ́ ɓé bíkāā bí ŋkɔŋ-á-sí, biéé la yíŋí péná bíɓɛɓɛ́la bitám, ndí á sɔ̄ghɛ́ jā ɓot-bí-bínam ɓá bíh byɛ́ɛ́ ɓé éɓátan-ɛ́-ndembye Ɔlolómɛ̄ á mbɔm.

⁵ Ɓáh tíi ɓé wɔ ŋguu nyí li ól lí ɓot, ndí nyí li sɔghɛ lí ɓɔ taŋ-taŋ náŋ sóŋ ɛ́táan. Ndí yéŋ esɔghe ecɛ́ŋ átātáŋgá á ŋga sɔ́la ɓɔ́, ɛ́g punan la esɔghe yé mut nɛ́ ɔee vá kɔ́ɔ́.

⁶ Múŋ á nyúŋ alɔ́, ɓot bíg kɛ li yáŋá lí nyɛmb, ndí ɛh sɔ́ ɓé; kóó ɛg kɛ ɓɔ́ lí ɓɛ́ nɛ́ bí wú, ndí nyɛmb ɛ ɓén ɓɔ́.

⁷ Nyúŋ atátáŋgá á ŋgí punan la vɔ́si yí wélan, á ɓɛ́ɛ́la byoóm á mímú ɔ́ŋgɛn atot á góol, misú máɓá ki mí ɓɛ́ɛ́ kaa misú mí ɓot-bí-bínam.

⁸ Nyúŋ atátáŋgá á ɓɛ́ɛ́la voŋ ákaa voŋ ví ɓondígá, la misoŋ ákaa misoŋ mí ŋgíla.

⁹ Á ŋgí ɛ́ni ɔ́ŋgɛn mbɔ́tí bícɛɛ yí wélan ɛ́ lɛ́ wɔ́ á tól, eduŋgú mípaa máɓá ɛ́ ɓɛ́ɛ́ ákaa eduŋgú yé bíɓamban bí vɔ́si yí ɛ́ ŋga kɛ́ á wélan.

¹⁰ Nyúŋ atátáŋgá á ɓɛ́ɛ́la mipɛg ákaa aee nɛ́ á byɛ́ɛ mípigá á mípɛg, ŋguu yaɓá li sɔghɛ lí ɓot ányúū sóŋ ɛ́táan ɛ́ ɓɛ́ɛ́ ɛ tɔɓɛ́nɛ̄ múŋ á mípɛg máɓá.

¹¹ Áŋgɛl nyí eɓél-écɛ̄hɛ nɛ́ ɛ ɓɛ́ɛ́ ákaa káísa yaɓá, nyí ɛ ŋga yáŋlɛ la mpɔ́t á Élōg-Hébɛl nɛ́ «Abádon» la mpɔ́t á Gelékia ki nɛ́ «Apóliyon» náŋ ag mínɛ nɛ́: «ǹcɛ́hɛ.»

¹² Eɓéé-nyúū ɔ́sū yú lóo, ámbúh náŋ, biɓéé-bí-nyúū bíɓáa bitám bíg sɔ́.

¹³ Ɛnɛ́ áŋgɛl ya yáhɛ́ ɛ́sáama ya ɔ́ŋ nséɓá wɛ́ɛ́, mu ámblé cíŋ ɛ́ ŋgí sɔ́le á míɓēg mí ɓɛ́ɛ́ mí tɛ́ɛ́ á míkāh mí étága-nsúlé ɛ́ góol yé ɛ́ lɛ ɔ́sū ví Ɔ́lolómɛ̄,

¹⁴ yu laga áŋgɛl ya yáhɛ́ ɛ́sáama nyí ɛ ɓɛ́ɛ́la nséɓá nɛ́: «Kúhú yíŋ áŋgɛl ɛ́náa yí lɛ́ ŋkágag la misáŋ mí bícɛɛ á ŋgwáāg ɔ́sōō vícɛ̄ŋ ví Éfláta.»

¹⁵ Bú kúhú yíŋ áŋgɛl ɛ́náa yí Ɔlolómɛ̄ a ɓōŋhán ányúū nyíŋ ŋgɛ́ŋ, víŋ ɔlɔ́, nyíŋ sóŋ, nyúŋ m̀bú á lí ól lí joga já átē á moga míŋháa mí ɓot-bí-bínam.

¹⁶ Bú yó ma táŋga ɓadu-wélan bí ɓɛ́ɛ́ á lóō lí vɔ́si; bí ɓɛ́ɛ́ bíɓógo bíɓáa bí ádun.

¹⁷ Á ŋ̀ɛ́nānɛ́ wáma, mu ɛ́n vɔ́si la ɓaɓét-yɔ́-á-lóō, bí jáhɛ mbɔ́tí bícɛɛ yí wélan á tól yí ɛ́ ŋga vɛ́ɛ ákaa nzáan, mbɔ́tí yí nsɔn á ndútú, la yí nsɔn á nzáa la nzuhú. Mimú mí yíŋ vɔ́si mí ŋgí punan la mimú mí ŋgíla. Nzáan, víta la nzuhú bí ŋgí pámle yɔ́ á mínyu.

¹⁸ Nyíŋ nzáan, víŋ víta la nzuhú, bí lɛ́ bíŋ bisɔghe bíŋháa bí ŋga pámle á mínyu mí yíŋ vɔ́si la byɔ́ byá cɛ́hɛ́ joga já átē a moga míŋháa mí ɓot-bí-bínam;

¹⁹ ányúū nɛ ŋguu nyí yíŋ vɔ́si ɛ lɛhɛ́nɛ́ yɔ́ á mínyu la á mípɛg máɓá. Mipɛg máɓá mí ŋgí punan la nyɔ; mí byɛ́ɛ́ mimú mí ŋga kɔ́an.

²⁰ Ndí, ɓá ɓot bí yégléé, ɓá bí véé bí bisɔghe, ɓáh veŋe ɓé bílɛ̄m byáɓá, ɓáh mwahɛ ɓé lí ɓégɛ lí mímbūl míɓē, bisát, bí góol tɔ bí sílba, bí bícɛɛ, bí ŋgɔg la bí bínjēŋ bí bí ŋgá la ɓé lí ɛ́n, li ámble, ndí tɔ li wɛɛ.

²¹ Ɓáh veŋe ɓé ki eniŋ yáɓá yé míólan, yé míkaŋ, yé ndeŋg la yé wií.