Biyɛ́ɛ́léné 7 - Esaa-líat ɛ́ péná

Eɓasɛ ɛ́ lɛ ákaa lilóm lí Ɔlolómɛ̄

¹ Ámbúh náŋ, ma Yohánɛs mu ɛ́n áŋgɛl ɛ́náa ɛ́ tɛ́ɛ á míkāh mínáa mí ŋkɔŋ-á-sí Yíŋ áŋgɛl ɛ́ ŋgí céŋ ŋgɔá ɛ́náa yí ŋkɔŋ-á-sí nɛ́ ŋgɔá tɔ ya ɛh púgúg ɓé á sí, á túwɛ, tɔ á eéé tɔ yá.

² La ma mu ɛ́n áŋgɛl etám ɛg ɓétle á étun yé mítūmnyam. Ɛ́ ɓɛ́ɛ́ ɛ́ byɛ́ɛ eɓátan-ɛ́-ndembye yé Ɔlolómɛ̄ nyɔ́ a lɛ éniŋ. La cíŋ ecɛ́ŋɛ́, yu lónlé yíŋí áŋgɛl ɛ́náa yí ɛ kuhúú ŋguu li ɓɔŋ lí sí la túwɛ aɓé, aá la yɔ́ nɛ́:

³ «Nyɔŋán lítāt, miníh ví buulɛ́gɛ́ ɓé sí, túwɛ tɔ biéé, nɛ́-tɛ́ɛ ɓá átyɛ́ bíɓátan bí ndembye á mbɔm yí ɓaɓɔŋle bí Ɔlolómɛ̄ wahá.»

⁴ La ma mu ámblé táŋga ɓot bí váá éɓátan-ɛ́-ndembye. Ɓáŋ ɓot bí ɓɛ́ɛ́ eɓógo ákōō ɛ́ ɓot la muúmínáa la bínáa bí átyɛ́ɛ eɓátan-ɛ́-ndembye átē a milóm mísɛ mí ɓɔ́ɔ̄n bí Íslāɛl.

⁵ Bí ɓɛ́ɛ́ jóom lí ákōō la áɓáa lí ɓot ɓá bí átyɛ́ éɓátan-ɛ́-ndembye á lilómɛ lí Yúda; Jóom lí ákōō la áɓáa á lilómɛ lí Lúbɛn; jóom lí ákōō la áɓáa a lilómɛ lí Gād;

⁶ jóom lí ákōō la áɓáa á lilómɛ lí Ásɛɛl; jóom lí ákōō la áɓáa á lilómɛ lí Neftália; jóom lí ákōō la áɓáa á lilómɛ lí Manáse;

⁷ jóom lí ákōō la áɓáa á lilómɛ lí Síméon; jóom lí ákōō la áɓáa á lilómɛ lí Lévi; jóom lí ákōō la áɓáa á lilómɛ lí Ísakaal;

⁸ jóom lí ákōō la áɓáa á lilómɛ lí Zabúlon; jóom lí ákōō la áɓáa á lilómɛ lí Yósɛp; jóom lí ákōō la áɓáa á lilómɛ lí Binyámin, ɓot ɓá bí átyɛ́ɛ eɓátan-ɛ́-ndembye á mbɔm.

Eɓasɛ ɛ́ lɛ́ ákaa ɔbul ví ɓot ɓá pɔ̄hlɛ

⁹ Ámbúh náŋ, ma Yohánɛs mu ɛ́n, édila ɛ́ ɓot yé mut tɔ wa a ŋgí yí ɓé táŋga. Yéŋ edila ɛ́ ɓot ɛ́ ɓɛ́ɛ́la ɓot bí bíkombo bísɛ, milóm mísɛ, milómɛ mísɛ la mipɔ́t mísɛ. Ɓáŋ ɓot bí ɓɛ́ɛ́ bí tɛ́ɛ ɔ́sū ví étɔɓé-líkanʼyɛ la ɔ́sū ví mɔɔ́n ntómbɛ́, bí jáhɛ bipúpúɛ bí mbɔ́tí, bú ɓɛ́la ki mitaa á mɔ.

¹⁰ Bíg lɛgɛ á lóō-lóō nɛ́: «Lisuŋga líg sɔ́le la Ɔlolómɛ̄ wahá nyɔ́ a tɔɔ́ á étɔɓé-líkanʼyɛ elɔŋ la mɔɔ́n ntómbɛ́.»

¹¹ Áŋgɛl ɛ́sɛ yú díí étɔɓé-líkanʼyɛ, ɓáŋ ɓacɛ́ŋ bí ékombo-lóō, la bíŋ biveglé bínáa, bú úm míɓɔ̄ŋ, mbɔm ɛ́g cág sí, ɔ́sū ví étɔɓé-líkanʼyɛ á lí ɓégɛ lí Ɔlolómɛ̄.

¹² Bí ŋgí laga nɛ́: «Ɛ ɓɛ́ náŋ! Kɔɔ, Ɔlolómɛ̄ wahá a kɔ́ɔ́ la eɓégɛ, lipém, peg, mitamlan, adit, mbimban la ŋguu á éɓem la á éɓem; ɛ́ ɓɛ́ náŋ!»

¹³ Váŋ nɛ́ ǹcɛ́ŋ á ékombo-lóō wa a nyɔ̄ŋ mpɔ́t ɔ ɓāt ma nɛ́: «Ɓá ɓot bí jáhɛ́ bípúpúɛ bí mbɔ́tí, bí lɛ́ ɓanzáá, bíg sɔ́léne véé é?»

¹⁴ La ma mu pélē nyɛ nɛ́: «Ɛtáŋɛ, wa nɛ́ ɔ ŋgɔ yí!» Váŋ nɛ́ a lága hɔ́ ma nɛ́: «Bíg pámle á éceglɛ ecɛ́ŋ. Ɓá so mbɔ́tí yáɓá átē á micii mí mɔɔ́n ntómbɛ́, la ɓɔ́ bú púɛ́ yɔ.

¹⁵ Ányúū náŋ nɛ́ bí tɛ́ɛ́ ɔ́sū ví étɔɓé-líkanʼyɛ yé Ɔlolómɛ̄, á lí ɓɔŋle lí nyɛ esaa púán díɓe la nzámuh átē a ndáá-ēcɛ́ŋ-Ɔlolómɛ̄ yɛ́ɛ̄. Ndí nyɔ́ a tɔɔ́ á étɔɓé-líkanʼyɛ, ag kɛ ɓɔ́ lí bútyɛ á líndūm jɛ́ɛ́.

¹⁶ La náŋ, bí ŋgá kɛ ɓé pɛ li ógtan lí nzal, bí ŋgá ɓɛ́la ɓé pɛ evéhé míndīm, bí ŋgá kɛ ɓé pɛ li ógtan lí ádīg á vaŋgá tɔ adíg ntám.

¹⁷ Átɔm nɛ́ mɔɔ́n ntómbɛ́ nyɔ́ a tɛ́ɛ́ á m̀mím á étɔɓé-líkanʼyɛ, ag ɓɛ́ ǹtát wāɓá ɓɔ́ jéŋ liɓembá; ag kɛ ɓɔ́ lí kɛla á míŋgɛ̄n mí míndīm mí éniŋ. Ndí Ɔlolómɛ̄ ki a tɔh ɓɔ́ bíya á miíh.»