Biyɛ́ɛ́léné 3 - Esaa-líat ɛ́ péná

Káati ya ómɓɛ́ á Eɓasɛ yé Sáldɛs

¹ Ciilé áŋgɛl nyí Eɓasɛ yé Sáldɛs nɛ́: Nyɔ́ a byɛ́ɛ̄ mí mímbūl nzambúwá mí Ɔ́lolómɛ̄ la atɛ́ nzambúwá ag pɔ́t nɛ: «Mag yí mísɔ̄n mɔ́ɔ. Ɓot bíg máŋa nɛ́ ɔ lɛ á éniŋ, ndom nɛ́ wa wú!

² Ɓɛ́ pɛɛ! Ólɓɛ́ yé ɛ́sɛ ɛ́ ŋgí tɔɔ́ wa á éniŋ, yɔ́g ɛ́ táág wú, átɔm nɛ́ ma sɔm nɛ mísɔ̄n mɔ́ɔ mí byɛ́ɛ́ anɛ́g á miíh mí Ɔlolómɛ̄ wama.

³ Ɔ́ŋɔ́ɔ́ hɔ́ yé ɛ́sɛ bí ŋgí yéglɛ wa, yé ɛ́sɛ ɔ ŋgí ámblé yéŋ eceg; náŋɛ̄ yɔ́, ɔ véŋé éniŋ! Kíyáɓɛ́nɛ wāh tɔɔ ɓé pɛɛ, mag kɛ li sɔ́ ákaa mut a wií; ɛ́h ɓɛ́ ɓé wa lí yí lí ŋgɛ́ŋ mi ŋga kɛ́ wa lí púhe.

⁴ Ndí nyí vɔ́ŋɔ́ɔ, ɔ ŋgí byɛ́ɛ puh ɓot á ŋkɔŋ á Sáldɛs yí yáh vínɛ ɓé mbɔ́tí yáɓá. Bíg jál bípúpúɛ bí mbɔ́tí, bí kɛ ma lí yígɛ, átɔm nɛ́ ɓɔ́ bí kɔ́ɔ.

⁵ Náŋ nɛ́ ǹdí-cíŋ a ŋga kɛ́ li jál lí bípúpúɛ bí mbɔ́tí. Mi ŋgá kɛ ɓé ma lí sáá lí jóō jɛ́ɛ́ a kálati eniŋ; mag kɛ nyɛ́ lí lem ɔ́sū ví Etāa la ɔ́sū ví áŋgɛl yɛ́ɛ́.

⁶ Nyɔ́ a byɛ́ɛ̄ miɔ́ɔ́, a ámblé yé M̀búl a ŋga lága Biɓasɛ.»

Káati ya ómɓɛ́ á Eɓasɛ yé Filadɛlfía

⁷ Ciilé áŋgɛl nyí Eɓasɛ yé Filadɛlfía nɛ́: Nyɔ́ Mpúán, Ɓátúpēgɛ, nyɔ́ a byɛ́ɛ̄ ɔ́diɓa ví káísa Dávid, nyɔ́ a lɛ nɛ́ kí a lége, mut tɔ wa a ŋgá leg ɓé, kí a lēg, mut tɔ wa a ŋgá la ɓé lí lege, ag pɔ́t nɛ́:

⁸ «Mag yí misɔ́n mɔ́ɔ. Ɛ́n sig, ma áhyɛ́ líkooká ɔ́sū vɔ́ɔ, jé tɔ mut a ŋgá la ɓé lí leg. Ɔh byɛ́ɛ́ ɓé pɛ ŋguu taŋ, ndí tɔ náŋ, wa náŋɛ éɓaŋgá yama, wāh táŋɓan ɓé ki ma.

⁹ Ɛ́n sig, mag nuŋlɛ wa ɓot bí nlɔŋ á Sátan, ɓá bí ŋga lága nɛ́ bí lɛ́ ɓɔ́ɔ̄n bí Élōg-Yúda, ndom nɛ́ bí sē ɓé ɓɔ̄, bíg ɓaŋ minaa. Ɛ́n sig, mag kɛ ɓɔ́ lí sɔ́la nɛ́ bí úm miɓɔ́ŋ á sí yɔ́ɔ míkoo, la náŋ bíg kɛ li yí nɛ́ ma dīŋ wa.

¹⁰ Kasig ɛ́ lɛ́ nɛ, wa náŋɛ éɓaŋgá yama átē a m̀ɓán, mág, mag kɛ wa lí tát á ŋgɛ́ŋ nyí miceglan mí ŋga kɛ́ li kuele lí ŋkɔŋ-á-sí ásɛ, á li vá lí ɓátɔɓene bí ŋkɔŋ-á-sí á éceglɛ.

¹¹ Mag sɔ́ puh eceg. Yoóm ɔ byɛ́ɛ̄, byeé yɔ́ m̀ɓɛɛŋ á lí ɓɔŋ nɛ́ mut tɔ wa ah nyɔŋlégé ɓé wa ɔ́tot vɔ́ɔ ví ǹdí-cíŋ.

¹² Ǹdí-cíŋ, mag kɛ nyɛ́ lí yaanɛ lí mbíi yí ndáá-ēcɛ́ŋ-Ɔlolómɛ̄ Loó jáma, m̀ɓá, a ŋgá kɛ ɓé pɛ li pám múŋ; mag kɛ li cii lí jóō lí Ɔlolómɛ̄ wama á nyúū yɛ́ɛ̄, la joó lí tísɔn nyí Ɔlolómɛ̄ wama, nyí ɛ lɛ̄ Yelúsalɛm nyí péná ya ómɓɛ́ la Loó jama. Mi cii ki joó jáma lí péná á nyúū yɛ́ɛ̄.

¹³ Nyɔ́ a byɛ́ɛ̄ miɔ́ɔ́, a ámblé yé M̀búl a ŋga lága Biɓasɛ.»

Káati ya ómɓɛ́ á Eɓasɛ yé Laodíse

¹⁴ Ciilé áŋgɛl nyí Eɓasɛ yé Laodíse nɛ́: Ɛ́ ɓɛ́ náŋ, titih mbóŋ nyí mbálɛ, nyɔ́ a lɛ tín nyí bíveglé bí Ɔlolómɛ̄ ag pɔ́t nɛ́:

¹⁵ «Mag yí misɔ́n mɔ́ɔ. Ɔ ŋgɔ́ vɔ́l ɓé, ɔ ŋgɔ́ nyám ɓé. Ɛ́ ɓɔŋ tɔ nɛ́ ɔg vɔ́l, tɔ li nyám!

¹⁶ Ndí, kaa ɔ ŋgɔ bíiɓan ja, nɛ́ ɔ ŋgɔ́ vɔ́l ɓé tɔ li nyám, mag kɛ wa lí ló.

¹⁷ Ákaa ɔ ŋgɔ lága nɛ́: ‹mi lɛ m̀byaŋ, ma byáŋa, mih byɛ́ɛ́ ɓé pɛ ma kóó la jam tɔ já›, la ákaa ɔ ŋgɔ́ yí ɓé nɛ ɔ lɛ ŋgɔ́ɔ́, wu ɓɛ́ yɛmɛ́, wu ɓɛ́ liyɛ́ɛ́, ndím la nsɔ́;

¹⁸ mag ééle wa nɛ́ ɔ sóm góol nyí nzáan ya púɛ á yóg yáma nɛ́ ɔ byáŋá, ɔ sóm ki bipúpúɛ bí mbɔ́tí ɔ ŋgɔ jál á lí ɓɔŋ nɛ́, ɔh wɛɛ́g ɓé nsɔ́ la ki nɛ́ ɔh kɔnɔ́g ɓé mbɔɔla; sóm ki ŋgɔɓé beéé ɔ ŋgɔ tɔ́nʼyɛ á miíh la wā ɔ tímān li ɛ́nan.

¹⁹ Ma, ɓá bísɛ mi ŋga dīŋ, mag ɓémɛ ɓɔ́, ámbúh mi kɔ́ghɛ́ ki ɓɔ́. Wa hɔ́! Étɛ́ ekɔ́ɔ́ yɔ́ɔ, ɔ véŋé éniŋ!

²⁰ Ɛ́n sig, mi tɛ́ɛ́ ɔ́sū ví líkooká, mag kɔtye. Kíyáɓɛ́nɛ mut a ámblé cíŋ yama, ndí á légē líkooká, mag níŋgi á ndáá yɛ́ɛ̄, mi dí elɔŋ la nyɛ́, nyɛ́g a dí elɔŋ la ma.

²¹ Ǹdí-cíŋ, ag kɛ li tɔɔ elɔŋ la ma á étɔɓé-líkanʼyɛ yama, ákaa mág ma tɔ́ɔ̄ la Etāa á étɔɓé-líkanʼyɛ yɛ́ɛ́ eceg ma dí cíŋ.

²² Nyɔ́ a byɛ́ɛ̄ miɔ́ɔ́, a ámblé yé M̀búl a ŋga lága Biɓasɛ.»