Biyɛ́ɛ́léné 12 - Esaa-líat ɛ́ péná

Mindígá la nyuŋgu

¹ Ndembye ecɛ́ŋɛ́ yu ɛ́ní á lóō, ɛ ɓɛ́ɛ́ mindígá wa, nyɔ́ a jálɓán vaŋgá ákaa mbɔ́tí, sóŋ ɛ ɓɛ́ɛ́ nyɛ́ á sí míkoo, ɔtot ví jóom lí átɛ̄ la áɓáa ki ví ɓɛ́ɛ́ nyɛ á m̀mú.

² A ɓɛ́ɛ́ líbum, ag díglan la ŋkogɛ ag tɛ́ɛ́ milón.

³ Váŋ nɛ́ ndembye etám ya ɛ́ní á lóō. Ɛ ɓɛ́ɛ́ ja m̀ɓáláŋ á nyuŋgu a ŋga vɛ́ɛ ákaa nzáan. Nyíŋ nyuŋgu ɛ ɓɛ́ɛ́la mimú nzambúwá la jóom lí míɓēg, m̀mú sig ki á ɓɛ́ɛ́la ɔtot.

⁴ Mpɛg wɛ́ɛ́ á ŋgí vɔ́l joga já átē á moga míŋháa mí átɛ̄ mí lɛ́ á lóō, wu léé jɔ á sí. Nyuŋgu yu tɛ́lɛ́ ɔ́sū ví míndīgá a ŋgí kogɛ, nɛ́ mɔɔ́n lá li byáa, ɛ mín nyɛ́.

⁵ Mindígá ɔ byál mɔɔ́n-á-páam; nyɛ́ nɛ́ a ŋga kɛ́ li wɛɛla lí bíkombo bísɛ á sí likanʼyɛ lí ŋguu. Ɔlolómɛ̄ ɔ kɛ́tɛ́ nyɔ́ŋ mɔɔ́n, ɔ tɔ́ɔyɛ́ nyɛ á étɔɓé-líkanʼyɛ á ŋgwáāg yɛ́ɛ̄.

⁶ Váŋ nɛ́ míndīgá a nāŋgá m̀bíí á éyāŋ, ápah Ɔlolómɛ̄ a ɓōŋhánɛ́ nyɛ etɔ, nɛ́ bí díɛ́hɛ́ nyɛ́ wóŋ ɔkóó la biɓógo bíɓáa la muúmísáama mí alɔ́.

⁷ Váŋ nɛ́ éɓāndá yá ɓóo á lóō. Míkaɛ̄l la áŋgɛl yɛ́ɛ́ bú ɓōtlé lí duhɛ lí nyuŋgu; nyuŋgu yɔg la áŋgɛl yɛ́ɛ́ bí ŋgí duhɛ ɓɔ́.

⁸ Tɔ la náŋ nyuŋgu yu ɓōmɓɛ, yú ɛ́ní nɛ etɔ ɛ́ sē ɓé pɛ yɔ la áŋgɛl yɛ́ɛ́ á lóō.

⁹ Nyúŋ m̀ɓáláŋ á nyuŋgu la áŋgɛl yɛ́ɛ́ bú lééɓɛ́ á ŋkɔŋ-á-sí; wɔ́ nɛ́ á lɛ́ nlom á nyɔ, nyú bí ŋga yáŋa nɛ́ Ǹsɔhɔ, Sátan, ŋ̀yɛ́ɛ ŋkɔŋ-á-sí ásɛ;

¹⁰ La ma Yohánɛs mu ámblé cíŋ ecɛ́ŋ ɛ́g lón nɛ́: «Eceg lísuŋga hɔ́ yé yá kɔlan, eceg yé mbimban la yé likanʼyɛ lí Ɔlolómɛ̄ wahá. Nyí vɔ́ŋɔ́ɔ, likanʼyɛ li lɛ́ á mɔ mí Nyɔ́-a-Pɔ́hlɛ wɛɛ́ átɔm nɛ́, ǹsɔ́mánɛ elōgétāŋ yáhá a lééɓɛ́ á sí enɛŋɛ́ la lóō; nyɛ́ nɛ́ a ŋgí sɔ́mánɛ ɓɔ́ díɓe la nzámuh ɔ́sū ví Ɔ́lolómɛ̄ wahá.

¹¹ Ndí, elōgétāŋ yáhá, yá dí nyɛ cíŋ, li loole la micii mí mɔɔ́n ntómbɛ́ la mbóŋ nyí eɓaŋgá Ɔ́lolómɛ̄ ɓá tíi. Ɓáh kɔn ɓé woŋ li tíi lí éniŋ yáɓá á nyɛmb.

¹² Jɔ́ nɛ́, kɔnán mívag, wa lóō la ɓɛ́nɛ ɓatɔɓene wóŋ! Eɓéé-nyúū la ɓɛ́nɛ; wa sí la wa túwɛ, átɔm nɛ́ ǹsɔhɔ a sūh á yóg yaná, ŋyálāg la ɔún, ákaa a ŋga yí nɛ́ yá yéglé ja nyɛ́ puh eceg.»

¹³ Ɛnɛ́ nyuŋgu ya ɛ́n nɛ ya lééɓɛ́ á sí, yu nāŋgá m̀bíí á lí oŋ lí míndīgá nyɔ́ a byál mɔɔ́n-á-páam.

¹⁴ Ndí bú tí míndīgá mípaa míɓáa mí ŋyogó ǹcɛ́ŋ á lí ɓɔŋ nɛ́ a púplé li kɛ á éyāŋ, ápah ɓá ɓoŋhán nyɛ voóm bí ŋga díɛ́hɛ́nɛ nyɛ́ mimbú míŋháa la epah, enɛŋɛ́ la nyíŋ nyɔ.

¹⁵ Váŋ nɛ́ nyíŋ nyɔ ya ló míndīm ŋgandag ákaa mindím mí lɔm á mbúh mindígá nɛ́ mí ɔ́ɔ́ndɛ́ nyɛ́.

¹⁶ Ndí, sí yu sɔ́ lí óŋgánɛ lí nyɔ́ŋ míndīgá; yu léglan, la yɔ yu mīn míndīm mí lɔm nyuŋgu ya ló.

¹⁷ Ŋyálāg la ɔún likɔlɓan la nyɔ́ŋ mindígá, nyuŋgu yu kɛ́ lí duhɛ lí nyíŋí mbota yɛ́ɛ̄ ɛsɛ̄ ya yégle, nyí ɛ ŋgí ógle mbéndá Ɔlolómɛ̄, yu ɓɛ́ ki mbóŋ nyí Yésus.

¹⁸ Ámbúh náŋ, nyuŋgu yu tɛ́lɛ́ á sáwá túwɛ.