Misɔ́n mí Ɓáōmɓɛ 8 - Esaa-líat ɛ́ péná

¹ Sául nyɛ́g a ɓɛ́ɛ́ á dimb lí ɓot bí yéɓyéé nyɛmb nyí Étiɛn. Múŋ á nyúŋ m̀bya, bú ɓōtlé li váŋgɛ lí Éɓasɛ yé Yelúsalɛm la ndeeŋgɛ. Amáh sig ɓáōmɓɛ, ɓáŋá ɓáyēɓe bísɛ bú cámān á míkɔŋ mí Yúdēa la mí mí Samália.

Sául ag váŋgɛ Eɓasɛ la ndeeŋgɛ

² Ɓot bí ŋyéɓé ǹcɛ́ŋ bú ɓóŋgó m̀bim á Étiɛn, bú jē wɔ̄ la ɓɔ́ bú leé nyɛ ŋgandag.

³ Ndí Sául nyɛ́, a ŋgí sand Eɓasɛ, á níŋgí á mílɛ̄ɛ̄, á byēé páam la ɓondígá la elóh, la nyɛ́ a vá ɓɔ á ndáá-m̀ɓog.

⁴ Ɓáŋ ɓot bí cāmáán pɛ́ɛ́ ɛsɛ̄ bí ŋgí kɛ nyɔ́ voóm ámbúh nyɔ́ŋɔ́, bíg lɛgɛ Pɔ́l M̀ɓɛɛŋ.

Filípo ag lɛgɛ Pɔ́l M̀ɓɛɛŋ á Samália

⁵ Náŋ nɛ̄ Filípo, a kɛnɛ́ɛ́ á tísɔn ya nyí Samália, ɔ lɛ̄gɛ́ pɔ́l nyí Nyɔ́-a-Pɔ́hlɛ.

⁶ Kasig limut lí ŋgí ámble ndí líg ɛ́n ki minɛ́ŋ Filípo a ŋgí ɓɔŋ, náŋ nɛ̄, la m̀mím wá, lí lɛ́gléé yé ɛ́sɛ a ŋgí lɛgɛ.

⁷ Ŋgandag mímbūl míɓē mí mí ŋgí teeŋgɛ ɓot mí ŋgí pám ɓɔ́ á nyúū míg tɛ́ɛ́ milón, biɓóg-bí-ɓōt la ɓá ɓá lɛ́mɛ ki bú tɔ́ɔ̄ mbólí.

⁸ Náŋ ɔ ɓɔ̄ŋ nɛ mivag micɛ́ŋ mú ɓɛ́ á nyíŋ tísɔn.

⁹ Ndí, mut a mikaŋ wa nɛ́ Símɔn a ɓɛ́ɛ́ múŋ á nyíŋ tísɔn, a ŋgí nyágɛ ɓatɔɓene bí Samália, a ŋgí ɔ́ŋɔ nɛ́ a lɛ tāŋ mut.

¹⁰ Li ɓotle á ɓátɔ̄ga li pám á ɓácɛ̄ŋ, ɓot bísɛ bí ŋgí átɓe la nyɛ́, bíg laga nɛ́: «Nyɔ́ mut a lɛ̄ ŋguu nyí Ɔlolómɛ̄, nyí ɛ ŋga yáŋlɛ nɛ́ Ekanɛ-ŋgan.»

¹¹ Kíyáɓɛ́nɛ bí tīŋɓéé la nyɛ́, náŋ a ɓɛ́ɛ́ ányúū nɛ li ɓotle ɓɛɛvéé a ŋgí nyágɛ ɓɔ́ la mikaŋ mɛ́ɛ́.

¹² Ndí, ɛnɛ́ ɓá yéɓé Pɔ́l M̀ɓɛɛŋ nyí Likanʼyɛ lí Ɔ́lolómɛ̄, la joó lí Yésus Kilístus Filípo a ŋgí lɛgɛ ɓɔ́, páam la ɓondígá bú kūh nzóɓan.

¹³ Símɔn, nyɛ́-mɛ̄n ki ɔ tímān lí yáan lí ŋyéɓé, ɔ kūh nzóɓan, a ŋgí ɓáglan ɓé pɛ la Filípo. Kasig a ŋgí ɛ́n ndembye-ɛ́-mam écɛ̄ŋ la minɛ́ŋ míg ɓɔŋɓɛ, nyɛ́ nɛ́ ɔ tímān lí nyág kɔɔ.

¹⁴ Á Yélūsalɛm, ɓaómɓɛ bú ámblé nɛ ɓot bí Samália ɓá lɛ́glé éɓaŋgá Ɔ́lolómɛ̄, bú óm Pétlos la Yohánɛs wóŋ.

¹⁵ Pétlos la Yohánɛs ɓɔ́ la li pám, bú kánɛ ányúū ɓot bí Samália á lí ɓɔŋ nɛ́ ɓɔ́g bí kuh M̀búl Mpúán.

¹⁶ Ákaa ɛ́sɛ, M̀búl Mpúán a ɓɛ́ɛ́ ŋgí lí suhle lí mut waɓá tɔ wa. Nzoɓan yɔ-ntámɛ́ nɛ bí kuhúú á jóō li Nyɔ́ŋ-Ɛsáŋɛ́ Yésus.

¹⁷ Váŋ hɔ́ nɛ Pétlos la Yohánɛs bí kahyɛ́ɛ ɓɔɔ́n bí Samália mɔ la ɓɔ́ bú kūh M̀búl Mpúán.

¹⁸ Ndí, ɛnɛ́ Símɔn a ɛ́nɛ́ɛ́ nɛ́, kí ɓaómɓɛ ɓá kahyɛ́ ɓot mɔ, bíg kuh M̀búl Mpúán, ɔ sōmó ɓɔ li tíi lí ŋkuh á lí sóm lí nyíŋ ŋguu.

¹⁹ A byɛ́la Pétlos la Yohánɛs nɛ́: «Ɓɛ́nɛ ki tíán ma nyíŋ ŋguu, á lí ɓɔŋ nɛ́ eceg mi ɓɛ́ mag kahyɛ ɓot mɔ, ɓɔ́g bí kuh M̀búl Mpúán.»

²⁰ Ndí Pétlos ɔ tímānɛ̄ nyɛ nɛ́: «Wa la ŋkuh wɔ́ɔ miní ɓɔ́lán, ányúū nɛ́ ɔg ɔ́ŋɔ nɛ́ ɔg la li sóm lí líkaale lí Ɔ́lolómɛ̄.

²¹ Ɔh byɛ́ɛ́ ɓé kundɛ li nyɔŋ lí ŋgaɓo á jam tɔ já vá, átɔm nɛ́ m̀mím wɔ́ɔ á ŋgá púú ɓé ɔ́sū ví Ɔ́lolómɛ̄.

²² Tám áɓē wɔ́ɔ, ɔ kánɛ̄ Nyɔ́ŋ-Ɛsáŋɛ́, la náŋ, Ɔlolómɛ̄ a lɛ nɛ́ a láákɛ́ míɔ̄ŋɔ má pámlé wa á m̀mím.

²³ Ɔɔ, mag ɛ́n nɛ́ m̀mím wɔ́ɔ á yáhɛ la etáman, la nɛ́ ɔ lɛ á m̀ɓog á míɓē!»

²⁴ La Símɔn ɔ pélē ɓɔ nɛ́: «Ɓɛ́nɛ-mɛ̄n kánhánɛ Nyɔ́ŋ-Ɛsáŋɛ́ ányúū yama, á li ɓɔŋ nɛ́ tɔ jam á yé maná pɔ́t ɛ́h pámlégé ɓé ma.»

²⁵ Ɛnɛ́ Pétlos la Yohánɛs ɓá manɛ́ lí tíi lí mbóŋ nyí Nyɔ́ŋ-Ɛsáŋɛ́ la li lɛgɛ lí Pɔ́l M̀ɓɛɛŋ, bú tímān á Yélūsalɛm. Á nzen yaɓá mitiman, bú lɛ̄gɛ́ Pɔ́l M̀ɓɛɛŋ á ŋgandag míkɔŋ mí Samália.

Filípo la m̀ɓɔŋle a gɔ́mna wa nyɔ́ a Etiópia

²⁶ Áŋgɛl nyí Nyɔ́ŋ-Ɛsáŋɛ́ yu yó la Filípo nɛ́: «Kɛɛ́n jé lí étun ɛ́ ŋkɛɛ, á nzen ɛ ŋga ɓógye á Yélūsalɛm li suh á Gáza, nyí ɓot bí ŋgá yɔg ɓé lí loolene.»

²⁷ La Filípo ɔ kɛ̄ ɛ́h ɓɛ́ ɓé lí bíŋhan. Múŋ á nzen, ɔ ɓómán la m̀ɓɔŋle ǹcɛ́ŋ a gɔ́mna wa nyɔ́ a Etiópia. A ɓɛ́ɛ́ ǹnágag, ŋ̀kanʼyɛ abyaŋ ásɛ á káísa mindígá nyí Etiópia nɛ́ Kandáse. A kɛnɛ́ɛ́ á Yélūsalɛm á nlɛ́ŋ mpúán.

²⁸ Á mítiman á yóg yɛ́ɛ̄, ɔ tɔ́ɔ̄ á éɓamban yé vɔ́si ɛ́ ŋga nímbi, ag sɔ́ŋgɔ kálati nyí Esáya m̀pɔ́tle-a-Ɔlolómɛ̄.

²⁹ M̀búl Mpúán ɔ yó la Filípo nɛ́: «Dúgú ɔ́sū, kɛɛ́n kɔ́p yéŋé éɓamban yé vɔ́si ɛ́ ŋga nímbi ɛ́ lɛ́ lí kɛ.»

³⁰ Filípo ɔ kɛ̄ ag nāŋga m̀bíí, ɔ ámblé kaa nyɔ́ mut a Etiópia a ŋga sɔ́ŋgɔ kálati nyí Esáya, la Filípo ɔ bíhī nyɛ nɛ́: «Ɓaá, ɔg sɔ́ŋtánɛ kɔɔ yé ɔ ŋgɔ sɔ́ŋgɔ é?»

³¹ Nyɔ́ŋ ɔ pélē nyɛ nɛ́: «Nɛ́ láá mi ŋga lá li sɔ́ŋtánɛ kíyáɓɛ́nɛ mih byɛ́ɛ́ ɓé ma ŋ̀kɔplene ma é?» La nyɛ́ ɔ yáŋá Filípo nɛ́ a ɓét a tɔ́ɔ̄ nyɛ́ á ŋgwáāg.

³² Epah ɛ́ kálati a ŋgí sɔ́ŋgɔ yɔ́ yē nɛ́: «Kaa ntómbɛ́ bí ŋga kɛ́ li sɛ́m lí cíŋ, kaa mɔɔ́n ntómbɛ́ a tɔɔ́ pií ɔ́sū ví mut a ŋga sɛ́nd nyɛ́ voŋ, náŋ nɛ̄ nyɛ́g a ŋgá kɛ ɓé lí áha lí ányu.

³³ Átē a esuhɛ-nyuú yɛ́ɛ́, ɓá yím nyɛ kundɛ nyí yé ɛ́ lɛ́ ɛ́yɛ̄ɛ̄. Nzáá a ŋga kɛ́ pɛ li máŋa likɔlɓan la nyíŋ mbota yɛ́ɛ̄ é? Átɔm nɛ́ ɓá cɛ́hɛ́ yɔ mú á ŋkɔŋ-á-sí.»

³⁴ Mut a Etiópia ɔ yó Filípo nɛ́: «Mag sɔ́hye wa lí ɓat, m̀pɔ́tle-a-Ɔlolómɛ̄ ag pɔ́t ányúū nzáá é? Nyɛ́-mɛ̄n tɔ nɛ́ mut ntám é?»

³⁵ Filípo ɔ nyɔ̄ŋ mpɔ́t, likɔlɓan la yéŋ epah ɛ́ kálati a sɔ́ŋgɔ, ɔ lɛ̄gɛ́ nyɛ Pɔ́l M̀ɓɛɛŋ nyí Yésus.

³⁶ Múŋ á nzen, bú pám ápah mindím mí ɓɛ́ɛ́, mut a Etiópia ɔ lāgá Filípo nɛ́: «Mindím mí, yéé pɛ ɛ́ ŋga céŋɛ nɛ́ mi kūh nzoɓan é?» [

³⁷ ]

³⁸ Ɔ kānʼyɛ́ nɛ bí tɛ́ɛ́yɛ́ eɓamban, ɓɔ́ bíɓáa bú suh, bú kɛ á míndīm la Filípo ɔ tí nyɛ nzoɓan.

³⁹ Ɛnɛ́ ɓá ɓógo á míndīm, M̀búl á Nyɔ́ŋ-Ɛsáŋɛ́ ɔ nyɔ́ŋɛ́ Filípo, mut a Etiópia ah ɛ́nɛ́ɛ ɓé pɛ nyɛ́. Ndí, tɔ la náŋ ɔ kɛ́lā duwɛ jɛ́ɛ́ la ɔsú átē a mivag.

⁴⁰ Filípo nyɛ́, ɔ pámlé á tísɔn nyí Azótos, á nzen yɛ́ɛ̄ mikɛ á Sezaléa, ɔ lɛ̄gɛ́ Pɔ́l M̀ɓɛɛŋ á tísɔn ɛ́sɛ ápah a ŋgí loole.