Misɔ́n mí Ɓáōmɓɛ 24 - Esaa-líat ɛ́ péná

Teltúlus ág sɔ́mánɛ Póol

¹ Ámbúh alɔ́ átáan, ŋ̀kanʼyɛ ǹcɛ́ŋ a ɓatíi-nsúlé nɛ́ Ananías ɔ súh élɔŋ la ɓacɛ́ŋ bí lilómɛ la ŋ̀kále-ɓot wa nɛ́ Teltúlus. Bú sɔ́mánɛ́ Póol á yóg Gɔ́mna licɛ́ŋ.

² Váŋ nɛ́ ɓá yáŋá Póol á ndáá-mikál, la Teltúlus ɔ ɓōtlé sɔ́mɔn la bí biɓaŋgá nɛ: «Nyɔ́ á adit Félis, la wa nɛ́ bi byɛ́ɛ̄ nyí taŋ nsaŋ, ányúū liyí jɔ́ɔ lí lí wɛɛla lí ɓot nɛ́ bi byɛ́ɛ̄ nyɔ́ mveŋghanɛ́ á mam ányúū nsɛ́ŋ á ékombo.

³ Nyɔ́ a adit Félis, la ŋgandag mítamlan nɛ́ bi ŋga lɛ́gle bíŋ bilɔ́ŋgɔ bí mam eceg sig la á ɓávoóm bísɛ.

⁴ Ndí, mí ŋgá lōɛ́ ɓé ma wa eceg, á lí sɛ́m lí pɛ́m, kaa bi ŋga yí nɛ́ ɔg ɓáág ɔg nyɔŋ eceg m̀ɓɛɛŋ á lí ámble, biíg sɔ́hye wa nɛ́ ɔ ámblé ɓɛ́hɛ.

⁵ Ɓaá sɔ̄m nɛ nyɔ́ mut a lɛ mut m̀ɓé taŋ taŋ, átɔm nɛ́ ag sɔ́la mpuŋgú a póla ɓɔɔ́n bí Élōg-Yúda bí ŋkɔŋ-á-sí ásɛ la ki nɛ́ a lɛ ŋ̀kanʼyɛ nlɔŋ a ɓot bí Názalɛt.

⁶ A cegé lí yɔ́l lí ndáá-ēcɛ́ŋ-Ɔlolómɛ̄, la ɓɛ́hɛ bú byée nyɛ. [

⁷ ]

⁸ Wā-mɛ̄n, eceg ɔ ŋgɔ bíhī nyɛ́, ɔ lɛ́ nɛ ɔ ɛ́n nɛ sɔ́mɔn ɛ́sɛ ɓaá tíi ányúū yɛ́ɛ̄ ɛ́ lɛ́ mbálɛ.»

⁹ Elōg-Yúda yú víhyɛ́ nyíŋ sɔ́mɔn, la li laga nɛ́ náŋ á lɛ mbálɛ.

Póol ag suŋ m̀mú wɛ́ɛ́

¹⁰ Gɔ́mna licɛ́ŋ Félis ɔ tí Póol mpɔ́t, la Póol ɔ lága nɛ: «Mag yí nɛ́ wa nɛ́ ɔ lɛ ŋ̀kááhɛ á ékombo yáhá, náŋ a lɛ ŋgandag mímbú lɛn. Jɔ́ nɛ́, la akwáá nɛ mi ŋga sūŋ m̀mú wáma ɔsú vɔ́ɔ.

¹¹ Wā-mɛ̄n ɔ lɛ́ nɛ ɔ sómo lí yí, náŋ a ŋgá loo ɓé jóom lí alɔ́ la áɓáa nɛ́ ma ɓét á Yélūsalɛm á lí ɓégɛ lí Ɔlolómɛ̄.

¹² Ɛ́ ɓɛ́ á ndáá-ēcɛ́ŋ-Ɔlolómɛ̄, ɛ́ ɓɛ́ á ndáá-míɓomán, ɛ́ ɓɛ́ á tísɔn, mut tɔ wa āh kɔ́p ɓé ma mag káláa la mut ntám tɔ li tug lí límut.

¹³ Nyí vɔ́ŋɔ́ɔ, ɓá ɓot bí sē ɓé hɔ́ nɛ ɓá étɛ́ njɔm sɔ́mɔn bí byɛ́ɛ̄ la ma.

¹⁴ Ndí, yé mi ŋga yí ɛ́ lɛ́ nɛ́, mi lɛ á nsɔ́n á Ɔ́lolómɛ̄, Lōó lí ɓatāa, á nzen péná ɓɔ́ bí ŋga yó nɛ́ ɛh tɛ́ɛ́ ɓé. Mag yéɓe yé ɛ́sɛ yá cíiɓɛ́ á kálati Mbéndá la á kálati yí ɓapɔ́tle-bí-Ɔ́lolómɛ̄.

¹⁵ Mi byɛ́ɛ́ jé lipitá la Ɔlolómɛ̄ nlemlem kaa ɓɔ́ nɛ́, lipahye lí ɓot bí tɛ́ɛ́ sim la ɓá bíh tɛ́ɛ́ ɓé sim líg kɛ li ɓɛ́.

¹⁶ Jɔ́ nɛ́, mág mi ŋga cége la ŋguu nɛ́ m̀mím wáma áh kááhɛ́gɛ́ ɓé ma á jam tɔ já ɔsú ví Ɔlolómɛ̄ la ɔsú ví ɓot-bí-bínam.

¹⁷ Ámbúh ŋgandag mímbú, mu tímān á Yélūsalɛm, mu sɔ́la lilóm jáma mióŋgánɛ, mu sɔ́la ki Ɔlolómɛ̄ míkaale.

¹⁸ Váŋ hɔ́ nɛ ɓá sɔm ma á ndáá-ēcɛ́ŋ-Ɔlolómɛ̄ kí mu mánɛ̄ ésala-miɓé. Ŋkɔtanɛ́ tɔ wa ah ɓɛ́ɛ́ ɓé, tɔ mpuŋgú ki áh ɓɔ́ŋɓɛ́ɛ ɓé.

¹⁹ Ndí jogo lí ɓot bí Élōg-Yúda bí épah-ékombo yé Ásia… Ɓɔ́ nɛ́ bí ŋgí nyɛɛ li tɛ́lɛ ɔsú vɔ́ɔ á lí sɔ́mánɛ lí ma, ki ɓɔŋ nɛ́ bí ɓɛ́la njɔm bí ŋga úm ma!

²⁰ Tɔ nɛ́, ɓá ɓot bí lɛ́ vá, bí lagá wa vɔɔ́vɔ́ɔ ɔnɛ́g ɓá sɔ̄m ma eceg ma kál ɔsú ví ɔ́ku-vicɛ́ŋ-ví-bíkāāhɛ́nɛ́.

²¹ Tɔ nɛ́, yé eɓaŋgá ma pɔ́t eceg ma lón kí mi tɛ́ɛ́ á m̀mím á eti yáɓá nɛ: ‹Ányúū lipahye lí ɓá ɓá wū nɛ mi ŋga tɛ́lɛ lɛn á míkāl ɔsú váná!›»

²² Kasig Gɔ́mna licɛ́ŋ Félis a ámbléé mam likɔlɓan la nzen nyí Nyɔ́ŋ-Ɛsáŋɛ́ Yésus, ɔ tímānɛ̄ ŋkál la mbúh aá la ɓasɔ́mánɛ Póol nɛ́: «Mag kɛ ɓɛ́nɛ li kááhɛ eceg Lísias ŋ̀kanʼyɛ ǹcɛ́ŋ a ɔkóó ví sónja a ŋga kɛ́ li suh vá.»

²³ Ámbúh náŋ, ɔ kānʼyɛ́ ŋ̀kanʼyɛ nlɔŋ á éɓōgo ɛ́ sónja nɛ́ a tímānɛ Póol á ndáá-m̀ɓog, a ɓɛ́la eɓɔmblɛ-nyuú, ɛ́h ɓɛ́ ɓé lí céŋɛ lí mut wɛɛ́ tɔ wa nɛ́ a óŋgánɛ nyɛ́.

Póol á ndáá-m̀ɓog

²⁴ Ámbúh puh alɔ́, gɔ́mna licɛ́ŋ Félis, kaa a ɓɛ́ɛ́ élɔŋ la ŋ̀gáá wɛ́ɛ̄ Dulusíla, ŋgɔn Elōg-Yúda, ɔ óm lí yáŋa lí Póol nɛ́ a pɔ́t likɔlɓan la ŋyéɓé la Yésus Kilístus.

²⁵ Ndí, kaa ŋkwɛl wáɓá a ŋgí kɛ ja á épah yé etɛ́l-sim, a lí yí lí lí ɔn lí nyúū la bikááhɛ́nɛ́ bí ŋga kɛ́ li sɔ́, náŋ ɔ téeŋgɛ́ gɔ́mna licɛ́ŋ Félis, la nyɛ́ ɔ lága Póol nɛ́: «Á nyí vɔ́ŋɔ́ɔ, tímān a ndáá-m̀ɓog, mag timan wa li yáŋa ǹdiyo ntám.»

²⁶ Gɔ́mna licɛ́ŋ Félis a ŋgí ɔ́ŋɔ nɛ́ Póol ag kɛ nyɛ́ lí tɛg, jɔ́ nɛ́ a ŋgí yɔg nyɛ́ lí yáŋa á ŋkwɛl.

²⁷ Á lísūg lí mímbú míɓáa, gɔ́mna licɛ́ŋ Pɔ́lsius Féstus ɔ yīhānɛ́ Félis. Kasig nyɛ́ Pɔ́lsius Féstus a ŋgí somo li nyɛɛle lí Élōg-Yúda, ɔ mwahɛ́ Póol á míɓog.