Misɔ́n mí Ɓáōmɓɛ 23 - Esaa-líat ɛ́ péná

¹ Váŋ nɛ́ Póol a tīŋ ɔ́ku-vicɛ́ŋ-ví-bíkāāhɛ́nɛ́ miíh, a byɛ́ nɛ́: «Á ɛ́lōgɛ́tāŋ, m̀mím wáma á ŋgá kááhɛ ɓé ma jam tɔ já likɔlɓan la nsɔ́n á Ɔlolómɛ̄ ma sál nɛ́-tɛ́ɛla nyí lɛn.»

² Váŋ nɛ́ ŋ̀kanʼyɛ ǹcɛ́ŋ a ɓatíi-nsúlé Ananías a tí ɓot ɓɛ́ɛ́ kundɛ nɛ́ bí lɔ́g nyɛ́ á ányu.

³ La Póol ɔ lága nɛ: «Wa yé epúpúɛ édidiya ɛ́ kɔ́tá, wa nɛ́ Ɔlolómɛ̄ a ŋga kɛ́ li lɔ́g! Ɔ tɔ́ɔ̄ váŋ á li kááhɛ lí ma li oŋle la Mbéndá nyí ɔ ŋgɔ sáá, jɔ́ nɛ́ wa tí kundɛ nɛ bí lɔ́g ma!»

⁴ Ɓot ɓá bí ɓɛ́ɛ́ Póol ɓɛɓɛ bú yíhɛ́ nyɛ nɛ́: «Ɔg óŋo Ǹtíi-nsúlé Ǹcɛ́ŋ nyɔ́ a Ɔlolómɛ̄!»

⁵ Póol ɔ pélē ɓɔ nɛ́: «Á ɛ́lōgɛ́tāŋ, māh yí ɓé ma nɛ́ Ǹtíi-nsúlé Ǹcɛ́ŋ nyɔ̄ŋ. Ákaa ɛ́sɛ, yá ciiɓɛ́ nɛ: ‹Ɔ ŋgɔ́ kɛ́ ɓé lí óŋo lí ŋ̀kanʼyɛ a lilóm jɔ́ɔ›.»

⁶ Kasig nyɛ́ Póol a ŋgí yí nɛ́ jogo lí ɓot li yéŋ eti lí ɓɛ́ɛ́ Élōg-Sadúkái la Elōg-Falísái, ɔ tɛ́ɛ́ nlón á m̀mím á ɔ́ku-vicɛ́ŋ-ví-bíkāāhɛ́nɛ́ a byɛ́ nɛ́: «Á élōgétāŋ, mi lɛ mɔɔ́n Élōg-Falísái, m̀byál ma ɔ ɓɛ́ mɔɔ́n Élōg-Falísái. Mi tɛ́ɛ́ á míkāl ányúū lipitá jáhá bi byɛ́ɛ̄ la lipahye lí ɓá ɓá wū.»

⁷ Póol a ɓɛ́ɛ́ ŋgí lí manɛ lí mpɔ́t, jómo lú ɓóo á póla Sadúkái la Falísái, la eti yú káaɓan.

⁸ Ákaa ɛ́sɛ, Elōg-Sadúkái bíg laga nɛ́ lipahye lí ɓá ɓá wū lí sē ɓé, áŋgɛl tɔ m̀búl ki bí sē ɓé. Ndí Elōg-Falísái bíg páha bíŋ bísɛ.

⁹ Eduŋgú yú ɓɔ̄ŋɓɛ́ ŋgandag. Jogo lí ɓáyī-mbéndá á élɔŋ yé Élōg-Falísái, bú níŋgí á jómo, bú pɔ́t la elóh nɛ: «Ɓāh kɔt ɓé ɓɛ́hɛ nyɔ́ mut njɔm tɔ ya. Yéé ɛ́ ŋga yíhɛ ɓɛ́hɛ kí nɛ́ m̀búl tɔ nɛ́ áŋgɛl ɓé nɛ ya pɔ́tɛ nyɛ é?»

¹⁰ Kasig jómo lí ŋgí ɓét bí lí ɓét, ŋ̀kanʼyɛ ǹcɛ́ŋ a ɔkóó ví sónja ɔ kɔ̄n woŋ nɛ́ bíg saŋ Póol bitun bitun, ɔ kānʼyɛ́ nɛ bí ɓógtɛ́ nyɛ́ á m̀mím wáɓá, bí tímān la nyɛ́ á yáli-sónja.

¹¹ Díɓe lí ŋgí oŋ váŋ, Nyɔ́ŋ-Ɛsáŋɛ́ ɔ pámlé Póol, aá la nyɛ nɛ: «Letɛ́ nyuú! Wa sɔ́lé lí tíi lí mbóŋ yáma á Yélūsalɛm, ɛ́ somlɛ ki nɛ́ ɔ tí nlemlem á mbóŋ á Lóma.»

Elōg-Yúda ɛ́g tɔɓene Póol á dimb

¹² Ɛnɛ́ kítí ya yɛ́, apuh á ɓɔ́ɔ̄n bí Élōg-Yúda wú vúl dimb la li kan lí sɔŋ nɛ́ bí ŋgá dí ɓé tɔ li nyú, ɓɔ́ ŋgí lí ól lí Póol.

¹³ Ɓakan-sɔŋ múŋ á jéŋ dimb bí ŋgí loo muúmínáa mí ɓot.

¹⁴ Váŋ nɛ́ ɓá kɛ lí ɛ́n lí ɓákanʼyɛ ɓacɛ́ŋ bí ɓátíi-nsúlé la ɓacɛ́ŋ bí lílōmɛ, bú lága ɓɔ nɛ́: «Ɓaá kan-sɔŋ á ntélélé nɛ́ bi ŋgá dí ɓé tɔ li nyú, ɓɛ́hɛ ŋgi lí ól lí Póol.

¹⁵ Nyí vɔ́ŋɔ́ɔ hɔ́ á ɛ́yānā épah, la kundɛ nyí ɔku-vicɛ́ŋ-ví-bíkāāhɛ́nɛ́, sɔ́hyán hɔ́ ŋ̀kanʼyɛ ǹcɛ́ŋ a ɔkóó ví sónja nɛ́ a sɔ́la ɓɛ́nɛ nyɛ́, á m̀ɓaŋhanɛ́ nɛ́ miníg légɓe ŋkwɛl wɛ́ɛ́ nyaa m̀ɓɛɛŋ, ndí ɓɛ́hɛ, ɓaá ɓoŋhán nɛ biíg ól nyɛ́ sɔ́kágánɛ́ ag pám vá.»

¹⁶ Ndí, ɛnɛ́ mɔɔ́n mɔɔ́nyāŋ a mindígá a Póol a ámblé bíg ɓoŋhan víŋ ɔám, ɔ kɛ́ á yáli-sónja, ɔ níŋgí á lí yíhɛ lí Póol náŋ.

¹⁷ Váŋ nɛ́ Póol a yáŋá ŋ̀kanʼyɛ wa a nlɔŋ a eɓógo ɛ́ sónja, aá la nyɛ́ nɛ́: «Kɛɛ́n la ví ɔwándá á mbóg ŋ̀kanʼyɛ ǹcɛ́ŋ a ɔkóó ví sónja, a byɛ́ɛ́ jam a ŋga yíhɛ nyɛ́.»

¹⁸ Ŋ̀kanʼyɛ nlɔŋ á eɓógo ɛ́ sónja ɔ nyɔ̄ŋ víŋ ɔwándá, ɔ kɛ́la vɔ́ á mbóg ŋ̀kanʼyɛ wɛɛ́, aá la nyɛ́ nɛ́: «Póol, mut a miɓog a yáŋá ma, ɔ lága ma nɛ́ mi sɔ́la ví ɔwándá á yóg yɔ́ɔ, ví byɛ́ɛ́ jam á lí yíhɛ lí wa.»

¹⁹ Váŋ nɛ́ ŋ̀kanʼyɛ ǹcɛ́ŋ a ɔkóó ví sónja a byée víŋ ɔwándá á wɔ, ɔ ɓáāgɓán la vɔ́, ɔ ɓāt vɔ nɛ́: «Yéé ɔ ŋgɔ sómo ma lí yíhɛ é?»

²⁰ Ɔwándá vú pélē nyɛ nɛ́: «Elōg-Yúda yá súgɛ nɛ bíg sɔ́ wa lí ɛ́n, nɛ́ likɛ́ɛ́ ɔ sɔ́la Póol á ɔ́sū ví ɔ́ku-vicɛ́ŋ-ví-bíkāāhɛ́nɛ́, á m̀ɓaŋhanɛ́ nɛ́ bíg légɓe ŋkwɛl wɛ́ɛ́ m̀ɓɛɛŋ.

²¹ Ndí, ɔh kuág ɓé á ɔ́ām váɓá. Bíg ɓɛ́ lí loo lí muúmínáa mí ɓot má ám nyɛ á nzen. Ɓáŋ ɓot ɓá kān-sɔŋ nɛ́ bí ŋgá dí ɓé, tɔ li nyú ɓɔ́ ŋgí lí ól lí Póol. Ɓá ɓoŋhán mam mísɛ, kundɛ yɔɔ nɛ́ bí ŋgí laaŋkégé.»

²² Ámbúh náŋ, nyɔ́ŋ ŋ̀kanʼyɛ ǹcɛ́ŋ a ɔkóó ví sónja ɔ soɛ́ víŋ ɔwándá, aá la vɔ́ nɛ́: «Ɔh máŋlɛ́gɛ́ ɓé tɔ mut nɛ́ wa yɛ́ɛ́léné ma jéŋ dimb.»

Bíg kɛla Póol á Sezaléa

²³ Ŋ̀kanʼyɛ ǹcɛ́ŋ a ɔkóó ví sónja ɔ yáŋá ɓákanʼyɛ ɓɛ́ɛ́ bíɓáa bí milɔŋ mí eɓógo ɛ́ sónja, aá la ɓɔ́ nɛ́: «Miní ɓōŋhán nɛ́, á ŋgɛ́ŋ ɛ́buu yí ŋgōgó, miníg kɛ á Sezaléa la biɓógo bí sónja bíɓáa, muúnzambúwá mí ɓáɓēt-á-vɔ́si, la biɓógo bíɓáa bí ɓádu-wélan.

²⁴ Miní ɓōŋhán ki vɔ́si ɛ́ ŋga ɓɛ́gɛ Póol á lí kɛ á mbóg gɔ́mna licɛ́ŋ Félis nɛ́ a pám wóŋ m̀ɓɛɛŋ ŋgíla ɔɓag.»

²⁵ Ɔ cíi káati nyí ŋga pɔ́t nɛ́:

²⁶ «Nyɔ́ a adit Gɔ́mna licɛ́ŋ Félis, mā Kolódius Lísias, mag tama wa!

²⁷ Elōg-Yúda yá byeé nyɔ́ mut mi ŋga óm wa, bí ŋga somo nyɛ́ lí ól, váŋ nɛ́ ma la ɓot ɓáma, ɓaá sɔ́, bu nyɔ́ŋlé ɓɔ nyɛ́. Ma ámblé nɛ a lɛ́ mɔɔ́n Lóma.

²⁸ Kasig ma sómo lí yí lí njɔm yɛ́ɛ̄ sɔ́mɔn, jɔ́ nɛ́ ma kɛ́la nyɛ́ ɔ́sū ví ɔ́ku-vicɛ́ŋ-ví-bíkāāhɛ́nɛ́ váɓá.

²⁹ Ma sɔ̄m nɛ bíg sɔ́mánɛ nyɛ́ li oŋle la mbéndá yaɓá, ndí māh ɛ́n ɓé ma njɔm tɔ ya nyí ɛ ŋga óm nyɛ́ á nyɛmb tɔ á míɓog.

³⁰ Kasig ɓá yíhɛ́ ma nɛ́ ɓá ám nyɛ á nzen, jɔ́ nɛ́ mi ŋga óm wa nyɛ́ la li laga lí ɓásɔ̄mánɛ nyɛ́ nɛ́ bí sɔ́la sɔ́mɔn yaɓá ɔsú vɔ́ɔ.»

³¹ Li oŋle la bitɛ́ɛ́yɛ́nɛ́ bí ŋ̀kanʼyɛ ǹcɛ́ŋ a ɔkóó ví sónja, sónja yú kɛ́la Póol díɓe la díɓe á tísɔn Antipátilis.

³² Ɛnɛ́ kítí ya yɛ́, sónja yú tímān á yáli-sónja, yú yíg Póol á mɔ mí ɓáɓēt-á-vɔ́si nɛ́ ɓɔ́ bí kɛnɛ́g la nyɛ́.

³³ Ɛnɛ́ ɓá pám á Sezaléa, sónja yú tí Gɔ́mna licɛ́ŋ kálati, yú byéehɛ́ ki nyɛ́ Póol.

³⁴ Gɔ́mna licɛ́ŋ ɔ sɔ́ŋgɔ́ kálati, la nyɛ́ ɔ ɓāt á yɔɔ́yɔ́ɔ epah ékombo Póol a byááyéne. Bú yíhɛ́ nyɛ nɛ́ a lɛ mɔɔ́n Silísia.

³⁵ Gɔ́mna licɛ́ŋ aá la Póol nɛ́: «Mag kɛ wa li ámble eceg ɓasɔ́mánɛ wa ɓɔ́g bí ŋga ɓɛ́ váŋ.» Ɔ tí kundɛ nɛ́ bí tɔ́ɔyɛ́ Póol la li tát lí nyɛ á ndáá nyí likanʼyɛ Elóde.