Misɔ́n mí Ɓáōmɓɛ 19 - Esaa-líat ɛ́ péná

Miníŋgi mí Póol á tísɔn Eféso

¹ Á éceg Apólos a ɓɛ́ɛ́ á tísɔn Kɔlínto nɛ́ Póol a sɔ́ɔ́ á Éféso, a looléé á ákolá ácɛ̄ŋ á ŋgokólá nyí yéŋ épah-ékombo. Ɛnɛ́ a sɔ́ɔ́, ɔ kɔ́p puh ɓáyēge,

² ɔ bíhī ɓɔ nɛ́: «Eceg maná yaán ɓáyēɓe, ɓaá, M̀búl Mpúán a sūhlé ɓɛ́nɛ é?» Bú pélē nyɛ nɛ́: «Bi ɓáág tɔ ŋgi lí ámble bíg pɔ́t likɔlɓan la M̀búl Mpúán!»

³ Póol ɔ ɓāt nɛ: «Yɔɔ́yɔ́ɔ nzoɓan hɔ́ maná kuh é?» Bú pélē nyɛ nɛ́: «Nzoɓan nyí Yohánɛs.»

⁴ Póol ɔ tímānɛ̄ ɓɔ nɛ́: «Yohánɛs a ŋgí tíi nzoɓan nyí li veŋe lí bílɛ̄m la li laga lí ɓot nɛ́, bí yéɓé la nyɔ́ a ŋga sɔ́ ámbúh yɛ́ɛ̄, nyɔ́ŋ nɛ́ a lɛ Yésus.»

⁵ Ɓot bú ámblé bíŋ biɓaŋgá bí Póol la ɓɔ́ bú kūh nzoɓan á joó lí Nyɔ́ŋ-Ɛsáŋɛ́ Yésus.

⁶ Póol ɔ káhyɛ́ ɓɔ mɔ, la M̀búl Mpúán ɔ sūhlé ɓɔ. Bú ɓōtlé lí pɔ́t lí ɓácɛn bí mípɔ̄t ɓá ɓot bí ŋgí yí ɓé la li lɛgɛ lí mam á joó lí Ɔlolómɛ̄.

⁷ Ɓáŋ ɓot bísɛ bí ɓɛ́ɛ́ jam-kaa jóom la bíɓáa.

Póol ag tɛ́ɛ́ likálo lí éɓaŋgá Ɔlolómɛ̄ á tísɔn Eféso

⁸ Póol a ŋgí yɛ́ŋgan á ndáá-miɓomán, náŋ sóŋ ɛ́ŋháa, a ŋgí lɛgɛ Likanʼyɛ lí Ɔ́lolómɛ̄ la akwáá ásɛ, ag cege la ŋguu nɛ́ ɓa-ámble nyɛ́ bí yéɓé la jam a ŋga lága ɓɔ́.

⁹ Ndí, kasig jogo lí ŋgí somo ɓé lí ámble lí tɔ jam, la li ɓen lí lí yéɓe la náŋ, bú ɓōtlé lí ɔl lí yé a ŋga yéglɛ ɓɔ́ ɔ́sū ví éti. Póol ɔ tímān ɓɔ li yíg, ɔ kɛ́la ɓayége ɓɛ́ɛ́, a ŋgí laga ɓɔ́ mam ɔlɔ́ sig, á ésukúlu yé mut wa bí ŋga yáŋa nɛ́ Tilános.

¹⁰ A ɓɔŋɔ́ɔ́ tɛɛla mimbú míɓáa, nyaa nyí lɛ nɛ́, ɓɔɔ́n bí Élōg-Yúda la ɓɔɔ́n bí Gelékia bísɛ ɓá bí ɓɛ́ɛ́ á épah yé Ásia bú la lí ámble lí eɓaŋgá yé Nyɔ́ŋ-Ɛsáŋɛ́.

Mam mí pámléé ɓɔ́ɔ̄n bí Séva

¹¹ Li kele la Póol, Ɔlolómɛ̄ a ŋgí ɓɔŋ bínanaŋga bí mam,

¹² nyaa nyí ɛ lɛ́ nɛ́, ɓot bú ɓōtlé lí nyɔŋ lí ɓɔ́ɔ̄n bí áŋgihi tɔ nɛ́ mipɛ́h-mí-míɓato mí má siiɓán nyuú nyí Póol, á lí kahyɛ lí mɔ ɓakɔɔ́kɔ̄n. Ɓakɔɔ́kɔ̄n bí ŋgí tɔɔ mbólí, mimbúl míɓē ki mí ɓɛ́ɛ́ ɓatám á nyúū míg pám.

¹³ Jogo lí ɓɔ́ɔ̄n bí Élōg-Yúda, ɓá bí ŋgí kɛ́ ɓavoóm nyɔ́ ámbúh nyɔ́ŋɔ́, ɓɔ́g bú nyɔŋɓán mbóŋ li páha lí joó lí Nyɔ́ŋ-Ɛsáŋɛ́ Yésus á lí duhu lí mímbūl míɓē mí mí lɛ́ ɓot á nyúū. Bí ŋgí laga nɛ́: «Á joó lí nyɔ́ŋ Yésus Póol a ŋga lɛ́gɛ, pámán!»

¹⁴ Náŋ nɛ́ ɓɔ́ɔ̄n nzambúwá ɓá ɓɔŋ. Bí ɓɛ́ɛ́ ɓɔ́ɔ̄n bí ŋ̀kanʼyɛ ɓatíi-nsúlé wa bí ŋga yáŋa nɛ́ Séva, mɔɔ́n Élōg-Yúda.

¹⁵ Ndí ɔlɔ́ vá, m̀búl m̀ɓé wú tímānɛ̄ ɓɔ nɛ́: «Mag lem Yésus, mag yí ki nzáá a lɛ Póol, ndí ɓɛ́nɛ hɔ́, miní lɛ́ nzáá é?»

¹⁶ La mut a ɓɛ́ɛ́la m̀búl m̀ɓé ɔ ɓɛ́hán ɓɔ á nyúū, ɔ lōo ɓɔ́ bísɛ ŋguu, ɔ búté ɓɔ taŋ-taŋ, ɔ wáh ɓɔ mbɔ́tí, bú pám m̀bíí á ápūū nsɔ́ la mbála á nyúū.

¹⁷ Ɓot bí Éféso bísɛ, Elōg-Yúda la Gelékia, ɛnɛ́ bí ámbléé nyíŋ pɔ́l, bú kɔɔ́n woŋ ŋgandag la ɓɔ́ bú ditɛ́ joó lí Nyɔ́ŋ-Ɛsáŋɛ́ Yésus.

¹⁸ Ɔbul ví ɓot bí yaán ɓáyēɓe, bú sɔ́ lí páha lí míɓē máɓá á ntélélé.

¹⁹ Jogo licɛ́ŋ lí ɓot jé lí ŋgí ɓɔŋ mikaŋ, lú sɔ́la kálati yáɓá, lú kómánɛ̄ yɔ ǹjín la ɓɔ́ bú dígɛ́ yɔ ɔ́sū ví ɓot bísɛ. Eceg ɓá nyɔŋ nsɔŋgí á ndam ɛ́ yíŋ kálati ɛ́sɛ, wú pám muúmítáan mí ákōō mí bípah bí kápa.

²⁰ Náŋ nɛ́, la ŋguu nyí Nyɔ́ŋ-Ɛsáŋɛ́, eɓaŋgá Ɔ́lolómɛ̄ ɛ́ ŋgí caman, ɛ́g kondye ki ŋguu.

Mpuŋgú á tísɔn Eféso la mikɛ mí Póol

²¹ Ámbúh míŋ mam, Póol á até a M̀búl, ɔ nyɔŋ bísúghɛ́nɛ́ nɛ ag loole á Masedónia la á Ákāyi li kɛ á Yélūsalɛm. A ŋgí laga nɛ́: «Kí má pám wóŋ, ɛ́g kɛ ki li somlɛ nɛ́ mi kɛ́ á Lóma.»

²² Ɔ óm ɓaóŋgánɛ ɓɛ́ɛ́ bíɓáa Timotéo la Elástɛ, á Masedónia ndí nyɛ́-mɛ̄n ɔ kondyé lí tɔɔ á Ásia.

²³ Yéŋ eceg nɛ́ mpóghānɛ́ ǹcɛ́ŋ a loolóó á Éféso likɔlɓan la nzen nyí Nyɔ́ŋ-Ɛsáŋɛ́ bí ŋgí yéglɛ.

²⁴ Mut-a-ɔvúl wa bí ŋga yáŋa nɛ́ Demetílius, a ŋgí vúl ɓɔ́ɔ̄n bí ndáá bí ŋga púnan la ndáá-loó loó lí míndīgá nɛ Altémis, a ŋgí ɓaŋ yɔ́ la sílba, nyɛ́ nɛ́ a ŋgí kuhʼanɛ ɓot bí líŋgan ŋkuh ŋgandag.

²⁵ Ɔ kɔ̄tánɛ́ ɓáŋ ɓot bí líŋgan, la ɓot bísɛ bí ŋga sál mísɔ̄n mí ŋga púnan la nyúŋ, ɔ lága ɓɔ nɛ́: «Á míwāndá máma, ɓɛ́nɛ-mɛ̄n miníg yí nɛ́, li kele la nyú nsɔ́n nɛ bi tɔɔ́ m̀ɓɛɛŋ.

²⁶ Ndí miníg ɛ́n, tɔ nɛ́ miníg ámble ɓot bíg laga nɛ́, Póol a pógɛ́ límut, ah á Éféso yɔ́-ntámɛ́ ɓé, ndí pɛ́m nɛ á Ásia ɛsɛ̄. Ag yígle ɓɔ́ lí yéɓe nɛ́, miloó bi ŋga vēg la mɔ máhá mí sē ɓé míloó.

²⁷ La náŋ, ah nsɔ́n wáhá wɔ́-ntámɛ́ ɓé nɛ ɓot bí ɓɛ́ bíg yaŋa, ndí la ndáá-loó loó lícɛ̄ŋ lí míndīgá nɛ́ Altémis ki, nyíŋ ndáá-loó yɔg ɛg jáŋɛ eɓɛ́lé yɛ́ɛ́. La náŋ hɔ́, jéŋ lóō lí míndīgá lí ŋgá ɓɛ́la ɓé pɛ adit, nyɛ́, nyɔ́ ɓot bí ŋga ɓégɛ voóm asɛ̄ á Ásia la á ŋkɔŋ-á-sí ásɛ.»

²⁸ Ɛnɛ́ ɓot ɓá ámblé náŋ, liɓal lú ɓét ɓɔ, la ɓɔ́ bú ɓōtlé lí lón nɛ́: «Altémis nyɔ́ a Eféso nɛ́ a lɛ lóō lícɛ̄ŋ!»

²⁹ Mpóghānɛ́ ɔ cáman á tísɔn ɛsɛ̄. Ɓot bú kɛ lívuŋ, bú yálán á ndáá-micaa nyí ékombo. Eceg bí ŋgí loo, bú dúutɛ́ Gáyus la Alistálke, mbyááhɛ yí Masedónia yí ɛ́ ɓɛ́ɛ́ á élɔŋ ɛ́ dúwɛ yé Póol.

³⁰ Póol ɔ súgɛ́ nɛ ag kɛ á nyɔ́ŋ ŋkɔtanɛ́, ndí elōgésāŋ yé Éɓasɛ yú súŋɛ̄ nyɛ.

³¹ Jogo jɛ́ɛ́ já lí míwāndá mí mí ɓɛ́ɛ́ mígɔ́mna micɛ́ŋ á Ásia, ɓɔ́g bú óm nyɛ nlemlem á njɛn nɛ́ ah kɛnɛ́g ɓé á ndáá-micaa nyí ékombo.

³² Mpuŋgú wú níŋgí á éti nyaa nyí ya lōo ɔ́vega, yú yaán nɛ, á nlemlem á éceg, ɓá bíg laga jé jam, ɓáŋá bíg lón jéŋé, jogo lí ɓot licɛ́ŋ lí ŋgí yí ɓé tɔ yéé yá kɔtánɛ́ ɓɔ.

³³ Bú yíhɛ́ mut wa bí ŋga yáŋa nɛ́ Alegsándēle mam mísɛ mí ŋgi lōo múŋ á yéŋ eti. Nyɛ́ nɛ́ Élōg-Yúda ɛ́ tɛ́ɛ́yɛ́ɛ́ ɔ́sū kaa m̀pɔ́tle waɓá. Alegsándēle ɔ tɛ́ɛ́ wɔ á lí yíhɛ nɛ́ ag somo li máŋlɛ lí éti.

³⁴ Ndí, ɛnɛ́ ɓot ɓá sɔ́ŋtánɛ́ nɛ a lɛ mɔɔ́n Élōg-Yúda, ɓɔ́ bísɛ bú ɓōtlé lí lón lí élɔŋ, náŋ jam-kaa ŋgɛ́ŋ ɛ́ɓáa nɛ́: «Altémis nyɔ́ a Eféso nɛ́ a lɛ lóō lícɛ̄ŋ!»

³⁵ Ǹciile á tísɔn ɔ tímān lí la lí lí mɔ́mɛ lí límut, ɔ lága nɛ: «Á ɓot bí Éféso, ɓaá mut wa a lɛ vá, nyɔ́ a ŋgá yí ɓé nɛ tísɔn Eféso nɛ́ ɛ byɛ́ɛ̄ mbóŋ li tát lí ndáá-loó loó lí míndīgá nɛ́ Altémis la esát yɛ́ɛ́ yé yá sɔ́léné á lóō é?

³⁶ Kasig pendan tɔ ya ɛ sē ɓé átē, ɓɛ́hɛ bísɛ biíg yí náŋ, mut sig a cégé nɛ́ a mɔ́mɛ́ nyɛ́-mɛ̄n, á lí somo nɛ́ ah ɓɔŋɔ́g ɓé jam líh tɛ́ɛ́ ɓé.

³⁷ Ákaa ɛ́sɛ, maná sɔ́la ɓot vá, ndí ɓáh ɓɔŋ ɓé étenā-jam tɔ yá á ndáá-loó tɔ li vɔ́ɔ́le lí lóō jáhá lí míndīgá.

³⁸ Kíyáɓɛ́nɛ Demetílius la elɔŋ yɛ́ɛ́ ɓot bí líŋgan nɛ́ bí byɛ́ɛ́ mipɔ́t la mut, alɔ́ á míkāl á lɛ, ɓakááhɛ ki bí lɛ. Wóŋ nɛ́ ɓá nyɛɛ́ lí kɛ!

³⁹ Kíyáɓɛ́nɛ miní ŋgí byɛ́ɛ́ ki mam mitám miní ŋgí somlág, eti ecɛ́ŋ ɛ́ mbéndá ɛ́g kɛ mɔ́ lí súgɛ.

⁴⁰ Jɔ́ nɛ́, bí lɛ́ nɛ ɓá sɔ́mánɛ́ ɓɛ́hɛ nyí lɛn nɛ́ bi lɛ lí ɓɔŋ lí mpuŋgú, átɔm nɛ́, bi ŋgá la ɓé ɓɛ́hɛ lí étɛ nɛ́ nyɔ́ ŋkɔtanɛ́ a sē ɓé nyɔ́ a mpuŋgú.» Ɛnɛ́ ǹciile a tísɔn a manɛ́ lí pɔ́t náŋ, ɔ soɛ́ ɓot bísɛ.