Misɔ́n mí Ɓáōmɓɛ 12 - Esaa-líat ɛ́ péná

Bíg ól Yákop, bí vá Pétlos á m̀ɓog

¹ Múŋ á yéŋ eceg nɛ́ Káísa Elóde a nyɔŋɔ́ɔ́ mbóŋ li teeŋgɛ lí jogo lí ɓot bí Eɓasɛ.

² Nyɛ́ nɛ́ a ólháánɛ Yákop mɔɔ́nyāŋ á Yohánɛs la mboná.

³ Ɛnɛ́ a ɛ́nɛ́ɛ́ nɛ náŋ a nyɛ́ɛlé ɓɔ́ɔ̄n bí Élōg-Yúda, ɔ byēlhánɛ́ ki Pétlos. Náŋ a ɓɔ̄ŋɓɛ́ɛ á eceg yé ŋgand bikɔgá bí ŋgíla esaŋɛ.

⁴ Ɛnɛ́ a byēlhánɛ́ nyɛ́, ɔ vá nyɛ á ndáá-m̀ɓog, á sí bitátlé bí bílɔŋ bínáa bí byɛ́ɛ̄ sónja ɛ́náa elɔŋ sig, la miɔ́ŋɔ nɛ́ ag kááhɛ nyɛ́ á ɔsú ví lílōm lísɛ ámbúh ŋgand Páska nyí Elōg-Yúda.

⁵ Pétlos a ɓɛ́ɛ́ á ndáá-m̀ɓog, ndí ɓot bí Eɓasɛ bí ŋgí kánɛ Ɔlolómɛ̄ ányúū yɛ́ɛ̄ eceg ɛ́sɛ ɛ́h ɓɛ́ ɓé lí tɔmb.

⁶ Ɔlɔ́ Elóde a ŋgí nyɛɛ li kááhɛ lí Pétlos, múŋ á jéŋ díɓe Pétlos a ŋgí lál á póla sónja ɛ́ɓáa, ŋkágag la misáŋ mí bícɛɛ míɓáa, sónja etám ki ɛ́ ɓɛ́ɛ́ á ɔ́sū ví líkooká.

⁷ Á ékūyá-kúyá, áŋgɛl nyí Nyɔ́ŋ-Ɛsáŋɛ́ yu nyɛ́g, la mipúú mú páa á étun ɛ́ ndáá-m̀ɓog ápah a ɓɛ́ɛ́. Áŋgɛl yu kwāt Pétlos á mbaa á lí vɛɛɓɛ lí nyɛ, yu yó nyɛ nɛ́: «Vóɛ li tɛ́lɛ!» Váŋ nɛ̄ misáŋ mí bícɛɛ má kúhlán Pétlos á mɔ.

⁸ La áŋgɛl yu kōndyé sīg-pɛ nɛ́: «Tīŋ ŋgóli, ɔ jál bitámbí!» La nyɛ́ ɔ ɓɔ̄ŋ nāŋ. Áŋgɛl yu lága sīg-pɛ nɛ́: «Jál ébuɓá yɔ́ɔ, ɔ óŋ ma!»

⁹ Pétlos ɔ ōŋ áŋgɛl, a ɓɛ́ɛ́ ŋgí lí sɔ́ŋtánɛ nɛ́ míŋ mam mísɛ áŋgɛl ɛ ŋgí ɓɔŋ mí lɛ́ mbálɛ. A ŋgí ɔ́ŋɔ nɛ́ ŋ̀ɛ́nānɛ́ nyɔ́ŋ.

¹⁰ Bú lóō voóm ɔsú ápah sónja ɛ́ ɓɛ́ɛ́ ɛ́ tɛ́ɛ, la voóm a yáhɛ́ bíɓáa, bú pám ɔ́sū ví likooká lí bícɛɛ lí ŋga légɓe tísɔn, jéŋ likooká lú leglán jɔ́-ntámɛ́ ɔ́sū váɓá. Ɛnɛ́ ɓá pám á ápūū, bú wɛɛ li pám á lísūg lí nzen, váŋ nɛ̄ áŋgɛl ya nyɔ́ŋ.

¹¹ Ɛnɛ́ Pétlos a tímān la nyɛ́-mɛ̄n, ɔ lāgá nɛ: «Nyí vɔ́ŋɔ́ɔ ma sɔ́ŋtánɛ̄ nɛ, la mbálɛ Nyɔ́ŋ-Ɛsáŋɛ́ a óm áŋgɛl yɛ́ɛ̄ nɛ́ ɛ ɓógtɛ́ ma á mɔ mí Élóde, la á áɓē ásɛ ɓɔɔ́n bí Élōg-Yúda bí ŋga sóomlene ma.»

¹² Ɛnɛ́ Pétlos a yí véé a tɛ́ɛ́, ɔ kɛ á ndáá Malía, nyaŋɛ́ a Yohánɛs nyɔ́ ɓá tí ŋgól nɛ́ Málkus. Eti ecɛ́ŋ ɛ́ ɓɛ́ɛ́ váŋ á míkánɛ.

¹³ Ɛnɛ́ Pétlos a kɔ̄tyé á likooká lícɛ̄ŋ, mɔɔ́n-á-ŋgɔn a ɓɛ́ɛ́ m̀ɓɔŋle bí ŋga yáŋa nɛ́ Lódɛs ɔ sɔ́ lí lege.

¹⁴ Ɛnɛ́ a lēm cíŋ Pétlos, átē á mivag, āh lege ɓé líkooká ndí, ɔ tímān m̀bíí li lɛgɛ nɛ́ Pétlos nɛ́ a tɛ́ɛ́ váŋ ɔ́sū ví líkooká.

¹⁵ Ɓáŋá bú lāgá nyɛ nɛ́: «Ɔg kɔn nzeg!» Ndí nyɛ́ ɔ yíigyɛ́ nɛ yé a lɛ́gɛ ɛ́ lɛ́ mbálɛ. La ɓɔ́ bú lága nyɛ nɛ́: «Mbunán yɛ́ɛ̄ nyíŋ!»

¹⁶ Ndí Pétlos a ŋgí kɔtye bí lí kɔtye, bú súglé li lege lí líkooká, la ɓɔ́ bú nyág nyɛ li ɛ́n.

¹⁷ Ɔ ée ɓɔ la wɔ nɛ́ bí tɔ́ɔ̄ pií, ɔ lāglé ɓɔ kaa Nyɔ́ŋ-Ɛsáŋɛ́ a pámɛ́ nyɛ á m̀ɓog, la nyɛ́ ɔ súglé ɓɔ li laga nɛ́: «Kɛnán miní lagá Yákop la elōgétāŋ ɛ́ ŋyéɓé náŋ.» Ámbúh náŋ, ɔ nyɔ̄ŋ nzen li kɛ lí épah etám.

¹⁸ La miyɛ́ mí kítí mpóghānɛ́ a ɓɛ́ɛ́ ŋgandag á ndog sónja. Bí ŋgí ɓatɓan yé yá loolé Pétlos.

¹⁹ Elóde ɔ ɓāt nɛ bí sōmó Pétlos, ndí bíh ɛ́nɛ́ɛ́ ɓé nyɛ. Váŋ nɛ̄ a óm yíŋ sónja á bíkāāhɛ́nɛ́, ámbúh náŋ ɔ kānʼyɛ́ nɛ bí ól yɔ́. Ámbúh eceg, nyɛ́ Elóde ɔ ɓógó á Yúdēa li suh á Sezaléa ápah a loohɛ́ɛ puh eceg.

Nyɛmb nyí káísa Elóde

²⁰ Kasig Elóde a ŋgí álye ɓot bí míkɔŋ mí Tíil la Sídon, ɓáŋ bú ámblán nɛ bíg kɛ nyɛ́ lí ɛ́n. Bú ɛ́n Balástus nyɔ́ a ŋgí sál á tuúm nyí káísa nɛ́ a óŋgánɛ ɓɔ́ nɛ́ bí kóm nsaŋ la Elóde, átɔm nɛ́ lidí lí míkɔŋ mí Tíil la Sídon lí ŋgí sɔ́léne á ékombo yé Elóde.

²¹ Ɛnɛ́ víŋ ɔlɔ́ vá kɔlan, Elóde ɔ jál mbɔ́tí yɛ́ɛ́ líkanʼyɛ, ɔ tɔ́ɔ̄ á étɔɓé yɛ́ɛ́ líkanʼyɛ, ɔ ɓōtlé ɓɔ lí kwɛlɛ á ntélélé.

²² Váŋ nɛ̄, ɓot bí ɓɛ́ɛ́ váŋ ɓá ɓōtlé nyɛ li ɓámble lí mɔ la li lón nɛ́: «Loó já jéŋ lí ŋga pɔ́t, ndí ah mut-a-binam ɓé!»

²³ Ndí á ékūyá-kúyá, áŋgɛl nyí Nyɔ́ŋ-Ɛsáŋɛ́ yú kɔ́ghɛ́ Elóde ányúū nɛ a nyɔŋɓán lipém jé li kɔɔ́ la Ɔlolómɛ̄. Ányúū náŋ, misɔ́ŋ mí líbum mú kogó nyɛ nɛ́-tɛ́ɛ ɔ wú.

²⁴ Ndí, eɓaŋgá Ɔ́lolómɛ̄ yɔ́ ɛ́ ŋgí kondye ja lí caman lí pɛ́ɛ́ ɛsɛ̄.

²⁵ Ɛnɛ́ Balnábas la Sául ɓá manɛ́ nsɔ́n wáɓá á Yélūsalɛm, bú tímān á Antiókia elɔŋ la Yohánɛs nyɔ́ a byɛ́ɛ̄ ŋgól nɛ Málkus.